Kiss me,Baby (Completed)

~2~

"ဒီအခန်းကိုသေချာပြင်ပေးထားပါ ​ကြီးမေ ကျွန်တော် ကြီးမေကိုအပ်ထားလိုက်မယ်နော်"

"သားဂုဏ်ရည် အဲ့လောက်စိတ်ပူမနေပါနဲ့ကွယ် ကြီးမေ သေချာပြင်ဆင်လိုက်ပါ့မယ်"

အသက်ကြီးကြီး အမျိုးသမီးကြီးမှာ ဂုဏ်ရည်ထွဋ်ခေါင် ဖြစ်စေချင်သည်ကို ဖြစ်အောင်လုပ်ပေးမည်ဟု တတွတ်တွတ်အာမခံနေသော်လည်း ဂုဏ်ရည်တစ်ယောက်ကတော့ ခုထက်ထိ စိတ်မအေးနိုင်သေး။

" ဒါပေမယ့် ကျွန်တော် အေးမိတို့ကိုစိတ်မချဘူး ကြီးမေလည်းသူတို့အကြောင်းသိတယ်မလား ဒီတိုင်း လွှတ်မထားနဲ့ဦး"

ဂုဏ်ရည့်စကားကြောင့် ဘေးမှာရပ်နေသည့်ကောင်မလေးနှစ်ယောက်မှာဇက်လေးပုသွားကြ၏။ ကြီးမေဆိုသည့် အမျိုးသမီးကြီးမှာတော့ရယ်ရင်းပြောလာပါသည်။

"သားရယ် ကြီးမေကိုယ်တိုင်စီစဥ်လိုက်ပါ့မယ်စိတ်ပူမနေပါနဲ့ အခုအလုပ်အရေးကြီးလို့ဆို သွားတော့လေ"

ထိုအခါမှ ဂုဏ်ရည်မှာ စိတ်လျှော့ရသည်။ မဟုတ်ရင် ထပ်ပြီးထိုကိစ္စလေးနဲ့စိတ်ပူမိနေဦးမည်။ စိတ်မချသည့်ပုံစံနဲ့ပင်ထွက်သွားသော ဂုဏ်ရည်ကိုကြည့်ပြီး ကြီးမေဖြစ်တဲ့ဒေါ်မြမေမှာ ပြုံးတောင်ပြုံးနေမိသည်။ မိမိတို့အိမ်ကြီးသခင်ဖြစ်တဲ့ ဂုဏ်ရည်ထွဋ်ခေါင်၏ထိုသို့ပုံစံကိုသူတို့မမြင်ဖူးသေးသည်လေ။

"သခင်လေး အခုလို ပုံစံမျိုးတခါမှမ​မြင်ဖူးဘူးနော် ကြီးမေ အခုလာမယ့်တစ်ယောက်ကဘယ်သူမို့လို့လဲ"

​ဒေါ်မြမေဘေးမှာရပ်နေသည့် အေးမိဆိုသူက စကားစလာတော့ ဘေးကနောက်ထပ်ကောင်မလေးတစ်ဦးမှုလည်းတခစ်ခစ်ရယ်ရင်း ထောက်ခံနေ၏။

"ကဲ ဒီကောင်မလေးတွေ စကားတွေရှည်မနေကြနဲ့ နင်တို့သခင်လေး ဘာပြောသွားလဲ ကြားတယ်မလား ညနေဧည့်သည်မလာခင်နင်တို့ပြင်ဆင်ထားကြ..... အေးမိ ညည်းကမီးဖိုချောင်မှာ ညစာပြင်ထားတော့ ပိုးဥ ညည်းကတော့ အခန်းကို ငါနဲ့လိုက်ရှင်းမယ် လာ"

ဒေါ်မြမေက ပြောလည်းပြော အပေါ်ထပ်သို့တက်သွားလေသည်။ ပိုးဥဆိုသည့်ကောင်မလေးလည်းလိုက်သွားပါသည်။ အေးမိကတော့မီးဖိုခန်းထဲခပ်သွက်သွက်ဝင်သွားလိုက်၏။ ဤသို့ဖြင့် ဂုဏ်ရည်စံအိမ်တွင် အလုပ်သမများ အလုပ်ရှုပ်ကုန်ကြလေပြီ။