စိတ်ရဲ့ အလှည့် | မြန်မာပြန် |

အပိုင်း ၁၊ အဆုံးမဲ့ ကတိ

Unicode

နောက်တစ်ပတ်အကြာမှ ထွက်ဖို့ သူတို့အစီအစဉ် ဆွဲခဲ့ကြသည်။ထွက်ခွါမည့် မနက်မှာ ဟယ်ရီက အာဟာရဖြစ်​စေသော ဝက်သားပြားကြော်နှင့် ကြက်ဥမွှေကြော်ကို မနက်စာအဖြစ် ဖူဖူလုံလုံ ပြင်ဆင်ပေးခဲ့သဖြင့် သူတို့အားလုံး တပျော်တပါး စားခဲ့ကြသည်။

သူတို့ ယူစရာ ပစ္စည်းစုံပြီလားဟု ရံဖန်ရံခါ စစ်နေသော ဟာမိုင်အိုနီက လွဲလို့ တိတ်ဆိတ်နေခဲ့သည်။ခရီးလမ်းမှာ အရေးပေါ် အသုံးချဖို့ စည်းချထားသော အိမ်မှ ကြက်ခြေနီ သေတ္တာနှင့် အိပ်ရာ အိတ်(sleeping bags )တွေကိုပါ သူတို့ ယူခဲ့ကြသည်။မင်္ဂဆောင် အောင်အောင်မြင်မြင် ပြီးသည်အထိ ထိုပစ္စည်းများအနက်မှ ဘာတစ်ခုကိုမှ အသုံးမပြုရဖို့ သူတို့ မျှော်လင့်ကြသည်။

ဒါပေမဲ့ ဟာမိုင်အိုနီကတော့ ဖြစ်ပေါ်လာနိုင်သည့် အခြေအနေအားလုံးအတွက် သူတို့ကို ထုတ်ပိုးယူဆောင်ခိုင်းခဲ့သည်သာ ဖြစ်၏။ဟာမိုင်အိုနီက ရုပ်သွင်ပြောင်းဆေးရည်ဖြင့် အခြားမှော်ဆရာမတစ်ဦးအသွင် ရုပ်ဖျက်ကာ ဒိုင်ရာဂွန် အယ်လီ၏ လက်ကျန်ဆိုင်ခန်းများသို့ သူတို့လိုအပ်လောက်မည့် မှော်ပစ္စည်းများ ဝယ်ရန်သွားခဲ့သည်။

ဟယ်ရီ က သက်လတ်ပိုင်း မက်ဂယ်အမျိုးသားတစ်ဦးအသွင် ရုပ်ပြောင်းထားခဲ့သည်။အစားအသောက်နှင့် အခြားပစ္စည်းများဝယ်ဖို့ ကုန်စုံဆိုင်သို့ တစ်ခေါက်တလေ စျေးဝယ်ထွက်ရသဖြင့် အလွန်တော့ အသုံးဝင်သည်။

အခုတော့ ဘာရိုးအသစ်ကို လာလို့ ရပြီဟု ဝီစလေ မိသားစု၏ အချက်ပေးမှုကို စောင့်ဆိုင်းရင်း ဧည့်ခန်းထဲမှာ သူတို့ ထိုင်နေခဲ့ကြ၏။ဘဲလ်ထရစ်နှင့် သူ၏ အမှောင်ဂိုဏ်းသားနောက်လိုက်တွေ မီးရှို့ဖျက်ဆီးပြီးကတည်းက ဘာရိုးကို ပြန်ဆောက်ခဲ့သည်။အိမ်အသစ်မှာလည်း အစိတ်အပိုင်းအများစုက ဘီလ်နှင့် ဖလားလ်တို့၏ မင်္ဂလာဆောင်အတွက် ယာယီမျှသာဖြစ်သည်။

ဒရေကိုနှင့် ဟယ်ရီ့အပေါ်မှာ အနေရခက်သည့် တိတ်ဆိတ်မှုတစ်ခု ကြီးစိုးနေခဲ့သည်။လွန်ခဲ့သည့်ရက်သတ္တပါတ် ညက အတော်လေး ပြက်ပြက်ထင်ထင်ရှိသည့် အိပ်မက် မက်အပြီးမှာ သူ့ခံစားချက်တွေနှင့် ပတ်သက်လို့ သူ ထပ်မတွေးတတ်တော့ပေ။ထိုခံစားချက်တွေကို အခု ဖျောက်ဖျက်ပစ်နိုင်ဖို့ပင် သံသယတွေ စွဲကပ်လာပြီ ဖြစ်သည်။