စိတ်ရဲ့ အလှည့် | မြန်မာပြန် |

အပိုင်း ၁၊ အသစ်တစ်ဖန်

Unicode

(T/N-သည် novelလေးက ကျွန်တော် ခြုံဖတ်ကြည့်ထားသလောက် မူရင်းဇာတ်ကြောင်းနဲ့ အများကြီး မကွဲထွက်ပါဘူး။ဟယ်ရီတို့ သုံးယောက် horcrux အရှာထွက်တဲ့ ခရီးမှာ ဒရေကို့ကို ထည့်လိုက်တာပါပဲ။ပြီးတော့ mature content မပါပါဘူး။ဒါပေမဲ့ သူ့နည်းသူ့ဟန်နဲ့ ရိုပါတယ်။ကျွန်​တော် ဘာသာပြန်ဖြစ်တာက ဟယ်ရီက သူ့ရဲ့ ရန်သူ​တော်နဲ့ သူငယ်ချင်းလုပ်ချင်လာတဲ့ ခံစားချက်က​လေးကို ​ရေးထားတာနဲ့ ပတ်သက်ပြီး သ​ဘောကျလို့ပါ။ဖတ်လို့ကောင်းအောင် အတတ်နိုင်ဆုံး transထားပါတယ်။ဖတ်ရ အဆင်မ​ပြေရင် ဝေဖန်​ထောက်ပြ​ပေးလို့ရပါတယ်။​ကျေးဇူးတင်ပါတယ်။)

အခြေအနေတွေ တည်ငြိမ်၍ သူလည်း စိတ်တည်ငြိမ်စပြုသည့်အခါ သူငယ်ချင်းတွေကို ဒမ်ဘယ်ဒေါ သေဆုံးသော ကိစ္စနှင့် မာလ်ဖွိုင်း၏ အကြံအစည် အကြောင်း ဟယ်ရီ ပြောပြခဲ့သည်။သူငယ်ချင်းအများစုက ဒေါသထွက်ခဲ့ရသည်။အထူးသဖြင့် ရွန်၊အော်ဟစ်ငိုကြွေးရင်း မာလ်ဖွိုင်းသည် အမှောင်ဂိုဏ်းသားတစ်ယောက်၊မကောင်းဆိုးဝါး သတ္တဝါလေးတစ်ကောင်ဖြစ်သည်ကို အစကတည်းက သူသိခဲ့သည်ဟု ဒေါသတကြီး ပြောဆိုနေခဲ့သည်။

ဟာမိုင်အိုနီက အပြင်ပန်းမှာ မျက်ရည်စက်လက်နှင့် သိသိသာသာ ကတုန်ကယင်ဖြစ်နေခဲ့သော်လည်း ရွန့်ထက်တော့ တည်တည်ငြိမ်ငြိမ် စဉ်းစားတွေးခေါ်နိုင်ခဲ့သည်။မာလ်ဖွိုင်းဆီက ဖြေရှင်းချက်ရဖို့ ဟက်ဂရစ်၏ တဲကို လိုက်သွားရန် ဟာမိုင်အိုနီက ဆုံးဖြတ်လိုက်သည်။

ပါမောက္ခ မက်ဂေါနဂယ် နှင့် မဒမ် ပွန်ဖရေးက ထိုကိစ္စကို သဘောတူခွင့်ပြုခဲ့သည်။သူတို့သုံးယောက် အဆင်ပြေပြေရှိနေရဲ့လား မေးမြန်းပြီးနောက် တာရှည်လျားသော ည၏ အရိပ်အောက်တွင် တည်ငြိမ်သည့်ဟန်ကို ပြန်လည်တည်​ဆောက်နိုင်ဖို့ ကြိုးစားရင်း ထွက်သွားခဲ့ကြ၏။

တဲဆီသို့ ရောက်သောအခါ ဟက်ဂရစ်က မျက်ရည်တွေနှင့် သူတို့ကို နှုတ်ဆက်သည်။အပျက်ပျက် အယွင်းယွင်း မငိုကြွေးမီ ဟက်ဂရစ်နှုတ်က ထွက်လာသည့် တစ်ခွန်းတည်းသော စကားက မာလ်ဖွိုင်း သူ့ကို ပြောပြပြီးပြီ တဲ့။ဟာမိုင်အိုနီက ဦးဆောင်၍ သူတို့သုံးယောက်သား ဟက်ဂရစ်ကို တဲအတွင်းသို့ တွဲခေါ်ပြီး ခွေးခြေထိုင်ခုံတစ်လုံးပေါ် နေရာချပေးလိုက်သည်။အခန်းတွင်းက ကြမ်းပြင်တစ်နေရာပေါ်မှာ ခွေခွေကလေး အိပ်မောကျနေသည့် မာလ်ဖွိုင်းကို မြင်လိုက်ရရသည့်အခါ သူ့ စိတ်အနှောင့်အယှက်ဖြစ်သွားခဲ့သည်။ဤ ညမျိုးမှာ သက်သောင့်သက်သာ အိပ်နေနိုင်သည်ကို မကျေနပ်ခြင်းနှင့်အတူ သူ၏ ရန်ဘက်အပေါ် သနားခြင်းကိုပါ ခံစားရသည်။