စိတ်ရဲ့ အလှည့် | မြန်မာပြန် |

အပိုင်း ၁၊ အိမ်သို့ တစ်ခါ

Unicode

"ဒရေကို၊ကလေး၊အမေတို့မိသားစုက အခု ဘယ်အနေအထားမှာလဲဆိုတာ သား နားလည်မှဖြစ်မယ်နော်"

သူ အမက်မောရဆုံးသော လိုအင်များက အပြင်ဘက်မှာ တည်ရှိနေသည့်အလား ပြတင်းပေါက်ခုံပေါ်ထိုင်၍ ပြတင်းပေါက်အပြင်သို့ ငေးကြည့်နေသော ဒရေကို့ကို ရတက်မအေး ဖြစ်နေသည့် နာစစ်စာက အသနားခံသည်။စစ်စစ်ပေါက်ပေါက်ပြောရလျှင်တော့ ဟယ်ရီက အဲသည်အပြင်ဘက် တစ်နေရာရာမှာ ရှိနေနိုင်သည်ဖြစ်၍ ထိုခိုင်းနှိုင်းတင်စားမှုက မှန်ကန်ပါသည်။

ရက်စ်လေဆီမှာ ဒရေကို အဖမ်းခံရပြီး မာလ်ဖွိုင်းစံအိမ်သို့ ပြန်ခေါ်လာခံရတာ သုံးပတ်နီးပါးရှိပြီ။အစပိုင်းမှာ သူ ဆန့်ကျင်ခဲ့၏။လွတ်မြောက်ဖို့ပင် လျှို့ဝှက်ကြံစည်ခဲ့သည်။ကံမကောင်းဘဲ သူ့အမေ သူ့ကို တွေ့သွားကာ အခု သူတို့ သည်နေရာမှာ သူ့အဖေနှင့် သူတို့မိသားစုအတွက် ပူးပေါင်းပေးဖို့ သူ့အမေက တောင်းပန်နေပြီး ဒရေကိုက အဖြေပေးဖို့ ငြင်းဆန်နေခြင်းဖြစ်၏။သူ့ကို အမှန်တကယ် ချစ်သော လူတွေထဲမှာမှ တစ်ယောက်ဖြစ်သည့် သူ့အမေကို လျစ်လျှူရှုနေခြင်းအတွက် အပြစ်ရှိသလို ခံစားရသည်။ဒါပေမဲ့ သူ ဟယ်ရီ့ကို ပိုချစ်သည်။ဒရေကို့အတွက် သူ့အသက်ကို စွန့်လွှတ်မည့် ဟယ်ရီ၊သူ့အတွက် ဘာမဆို လုပ်ပေးမည့် ဟယ်ရီ။

သူ ဟယ်ရီ့ကို လွမ်းသည်။အပြုံးနွေးနွေးတွေ၊ရင်ဖိုရသည့် အထိအတွေ့၊ဇိမ်ကျသော အပွေ့အဖက်ကို လွမ်းသည်။ဒရေကို ဟယ်ရီ့ကို သည်နေရာမှာ သည်အခု ရှိနေစေချင်သည်။သို့ပေမဲ့ ဟယ်ရီ့ကို ပြန်လိုချင်လျှင် တိုက်ခိုက်ရမည်မှန်း သူသိသည်။ဟယ်ရီ နှင့် ဖူးပွင့်စ သူတို့အချစ်အတွက် တိုက်ခိုက်ရမည်။ယခုတော့ သူလုပ်နိုင်သမျှ အရာအားလုံးဟူ၍ အမှောင်သခင် ကမ်းလှမ်းသည့် ယာယီစစ်ဆိုင်းခြင်းကို လက်သင့်ခံပြီး ဇာမဏီငှက်ပြန်တမ်းအဖွဲ့အတွက် သတင်းအချက်အလက်တွေ ရနိုင်သမျှ စုဆောင်းထားဖို့သာ ရှိသည်။

ဒရေကို ပြန်ရောက်နေပြီဖြစ်ကြောင်း အမှောင်သခင်မသိသေးပါ။အမှောင်သခင် ပြန်လာတော့မည်ဟု ယူဆရလျှင်ရချင်း တစ်နေရာရာမှာ သူ ပြန်သွားပုန်းရှောင်နေဖို့ ဆဗရပ်စ်က ဒရေကို့ကို ပြောပြီးဖြစ်၏။သိရသလောက် ဆဗရပ်စ်သည် ဒမ်ဘယ်ဒေါအတွက် အလုပ်လုပ်ပေးနေသော နှစ်ဖက်ချွန် သူလျှိုဖြစ်သည်။ထိုအချက်ကို ဒရေကို့ မိဘများပင်မသိ၊သို့ပေမဲ့ ၎င်းအား လျှို့ဝှက်ချက်အဖြစ် ဒရေကို ထိန်းသိမ်းမည်ဟု ယုံကြည်ခံထားရပြီး ဖြစ်၏။ဆဗရပ်စ်က ဒရေကို့ မှတ်ဉာဏ်တွေကို တစ်ချက်စစ်ဆေးကြည့်ပြီး သူ့ကို စိတ်ချ၍ရသည်ဟု မှတ်ယူခဲ့သည်။