I married my sister's husband{Completed}

Part-11(Uni and Zawgyi)

Scroll down for Zawgyi❤

တန်ခူးရိပ်စိတ်အတော်လေး ကြည်သာနေခဲ့သည်။အထုပ်တွေအပိုးတွေဖြင့် အိမ်ကြီးကိုလှည့်ကြည့် လှည့်ကြည့်လုပ်ကာ Taxiပေါ်တက်သွားသည့် ခင်ဝင့်လွှာ၏ပုံရိပ်ကို ကျေနပ်ကာ နှုတ်ခမ်းတစ်ချက်တွန့်ရုံမျှ ပြုံးလျက် လက်ကိုအသာ ခါယမ်းလျက် လက်ပြနှုတ်ဆက်လိုက်သည်။ကဲ....သွားပေဦးတော့ အစ်မကြီးခင်ဗျ။ခင်ဝင့်လွှာကတော့ တန်ခူးရိပ်၏ ထိုပုံစံကိုကျိန်းသေပေါက် တွေ့လိုက်မည်မဟုတ်။အကြောင်းမှာတန်ခူးရိပ်သည် သုံးထပ်တိုက်ကြီး၏ ဒုတိယအထပ် အိပ်ခန်းဝရံတာတွင် ရပ်၍ အပေါ်စီးမှကြည့်နေခြင်းကြောင့်ပင်။

တစ်ဆက်တည်း ဘေးခြံရှိဆူဆူညံညံအသံတွေကြောင့် ခေါင်းလှည့်ကြည့်လိုက်သည်။လူသစ်တွေပြောင်းလာပြီ ထင်ပါရဲ့။ခမ်းနားသော်လည်း အိုဟောင်းနေသည့်တိုက်အိုကြီးကို အစွမ်းကုန်မွမ်းမံနေသည့်အသံတွေ။မြက်ရိတ်သံ၊အလုပ်သမားများ၏ စကားပြောဆိုသံများနှင့် တိတ်ဆိတ်နေသည့်ဘေးခြံကြီးမှာ ဆူညံအသက်ဝင်လျက်ရှိသည်။

"ရက်ပိုင်းလောက်အထိ ဆူညံဦးမယ်ထင်တယ်"

တစ်ကိုယ်တည်း တီးတိုးပြောလျက် ဝရံတာတံခါးကိုဆွဲပိတ်လိုက်ကာ အခန်းထဲသို့ပြန်ဝင်လာလိုက်သည်။နေ့လည်နေ့ခင်းအိပ်နေကျ ထင်ထင်လေးကတော့ ကုတင်ပေါ်တွင် ခြေပစ်လက်ပစ်ကို အိပ်မောကျနေလေသည်။

လင်းထင်ကျော်ဇောလည်းမရှိတာကြောင့် သူ့အားဘေးနားတွင်တစ်ချိန်လုံးကပ်လျက် ကလူ၏သို့မြှူ၏သို့ စကားများပြောမည့်လူလည်းမရှိ။တစ်စုံတစ်ယောက်အကြောင်းတွေးမိတော့ နှုတ်ခမ်းတို့ကအလိုလိုတွန့်ချိုးလာခဲ့သည်။စာအုပ်စင်ပေါ်က ဆရာကြီးမြသန်းတင့်ရဲ့ ချစ်သောယွန်းခင်ခင်စာအုပ်ကို ဆွဲထုတ်လိုက်ပြီး ကုတင်ဘေးရှိ ဆိုဖာဆက်တီပေါ်တွင် ထိုင်ကာ စာကိုအာရုံစိုက်ဖတ်ပေမယ့်လည်း စိတ်ထဲမရောက်။

တန်ခူးရိပ်မှတ်မိပါသေးသည်။လင်းထင်ကျော်ဇော၏ကုမ္ပဏီကအပြန် ဘာဝယ်ခဲ့ရမလဲဆို၍ ဆရာမခင်ခင်ထူး၏ပန်းကြာဝတ်မှုန်စာအုပ်အား မှာလိုက်မိပါသည်။စာအုပ်ဆိုင်တွင်ရှိသမျှ ဆရာမခင်ခင်ထူး၏စာအုပ်တွေ အကုန်ဝယ်ချလာခဲ့တာကို။အဲ့ဒီ့နောက် ရံဖန်ရံခါ သူကြိုက်တတ်သည့်စာရေးဆရာများ၏နာမည်ကိုမေးကာ စာအုပ်တွေတပွေ့တပိုက်ဖြင့် အိမ်ပြန်လာတတ်သည်။ချာတိတ်ဖို့ဆိုသည့် စာအုပ်စင်များဟာလည်း အိပ်ခန်းအတွင်း နေရာအတော်များများယူခဲ့ပြီးပြီ။