I married my sister's husband{Completed}

Part-12(Uni and Zawgyi)

Scroll down for Zawgyi❤

မဲမှောင်နေသည့် အခန်းထဲတွင် ဆေးလိပ်မီးနီနီရဲရဲနှင့် ဆေးလိပ်အငွေ့တစ်ချို့ကမြူတွေဆိုင်းနေသည့်အလား ပျံ့လွင့်နေသည်။အနက်ရောင် ဆိုဖာပေါ်တွင် ခပ်လျော့လျော့ထိုင်နေသည့်လူမှာ မျက်လုံးများမှေးစင်းလျက် မျက်စိရှေ့ projectorပေါ်က ကောင်ငယ်လေးကို တစိုက်မတ်မတ်ကြည့်နေ၏။ထိုလူ၏ မျက်ဝန်းများမှာ ခန့်မှန်းရခက်ပြီး ရက်စက်ကြမ်းကြုတ်သည့် အရှိန်အဝါအပြည့်ဖြင့် ကျောချမ်းစရာကောင်းလှသည်။

အလင်းရောင်ဟူ၍ projectorထဲမှ အလင်းစတစ်ချို့သာပျံ့လွင့်နေသော အခန်းထဲ၌ ထိုလူ၏အပြုံးမှာလည်း သိပ်မသဲကွဲ။

"လင်းထင်ကျော်ဇောရဲ့ အသည်းအသက်လေး ပေါ်ထွက်လာပြီပေါ့ အဟက် နှလုံးသားမရှိတဲ့လူက ချစ်တတ်သေးတာပဲ"

ထိုလူက ဆေးလိပ်ပြာတွေကို လက်နဲ့တစ်ချက်တောက်လိုက်ကာ ဘေးတွင့်အသင့်ရပ်စောင့်နေသည့် သူ့လူတစ်ယောက်အား အနားသို့တိုးလာခဲ့ရန် အချက်ပြလိုက်သည်။ထို့နောက် စားပွဲပေါ်မှ စက္ကူစာအိတ်ခပ်ကြမ်းကြမ်းအညိုရောင်အား မေးငေါ့ပြလိုက်ကာ...

"လင်းထင်ကျော်ဇောဆီ အရောက်ပို့ပေးလိုက် အာ...မဟုတ်သေးဘူး ငါ့မိတ်ဆွေဟောင်းကြီး Lucianဆီပို့ပေးလိုက် အဟင်းဟင်း"

ကြက်သီးထစရာကောင်းသည့် လှောင်ရယ်သံတိုးညှင်းညှင်းက အခန်းတွင်း ကျက်သရေမဲ့စွာ ပဲ့တင်ထပ်သွားတော့သည်။
.
.
.
.
တောက်ခတ်သံကျယ်လောင်စွာ ထွက်ပေါ်လာတာကြောင့် မြတ်သူ၏ခန္ဓာကိုယ်သည်ပင် ကျုံ့သွားရသည်။ဥက္ကဋ္ဌထိုမျှလောက် ဒေါသတကြီးဖြစ်သွားသည်မှာ ရှားလှသည်။ပညာရှိအမျက် အပြင်မထွက်စေနဲ့ဟူသည့် ဆောင်ပုဒ်ကိုလက်ကိုင်ထားသည့် လင်းထင်ကျော်ဇောလိုလူအား စာအိတ်အညိုရောင်လေး တစ်စောင်က အကြီးအကျယ် ယမ်းပုံမီးကျစေ၏၊

"ဒီနေ့ရှိသမျှ appointment အားလုံးကိုဖျက်လိုက်တော့"

ချက်ချင်းထရပ်ကာ ကားသော့ဆွဲကိုင်လိုက်သည့် ဥက္ကဋ္ဌ၏မျက်နှာထားကြောင့် မြတ်သူသည်လည်း အယောင်ယောင်အနနဖြင့် ခေါင်းညိတ်ပြလိုက်သည်။သူတားရန်လည်း မစွမ်းသာခဲ့။