I married my sister's husband{Completed}

Part-33(Uni and Zawgyi)

Scroll down for Zawgyi❤

လက်ကကြိုးတွေဟာ မည်မျှခိုင်သလဲတော့မသိပါ။သူရုန်းလေ ထိုကြိုးတွေဟာ လက်ကောက်ဝတ်နုနုတွေအား အရှိန်ပြင်းပြင်းပွတ်တိုက်လေဖြစ်တာကြောင့် သွေးစို့လာသောလက်တွေကို ခဏအနားပေးလိုက်ရပါသည်။မျက်လုံးကိုစည်းထားသည့်ကြိုးကြောင့်လည်း သတိပြန်ရလာသည့်တိုင် ဘယ်လိုနေရာကိုဘယ်သို့ဘယ်ပုံရောက်လာခဲ့မှန်းလည်း မသိရ။သေချာသည်ကတော့ မှောင်မဲစိုစွတ်နေသည့်ဂိုထောင်ပျက်လို နေရာမဟုတ်တာပင်။

မျက်လုံးစည်းဖြင့် စည်းထားခြင်းခံရသည့်တိုင် မျက်ခွံပေါ်မှတစ်ဆင့်ခံစားမိနေသော အလင်းရောင်စူးစူးနှင့် ဟိုစမ်းဒီစမ်း စမ်းမိသောနေရာ၏ကျောက်နံရံအထိအတွေ့တို့ကြောင့် ကြီးကြီးမားမားအထပ်မြင့်အဆောက်အအုံဟု တန်ခူးရိပ်ကောက်ချက်ချမိသည်။အထပ်မြင့်ဟုတွေးမိသည်ကလည်း ခန္ဓာကိုယ်ပေါ်ဖြာကျလာသည့် ခပ်နွေးနွေးနေရောင်ခြည်တချို့ကြောင့်ပင်။အဲ့ဒီ့အပြင် အတော်လေးအရှိန်ပြင်းပြင်းဝေ့ဝဲတိုက်ခတ်လာသည့် မြောက်ပြန်လေတစ်ချို့ကလည်း အထပ်မြင့်ဖြစ်သည်ဟုပို၍ ထောက်ခံနေသယောင်။

ကျောကပ်ရပ်မှလူကို ထပ်၍တွန်းလှုပ်နှိုးလိုက်သည်။မေ့ဆေးအုပ်ခံရသည်က နည်းနည်း၊ထိုရောင်စုံခေါင်းအိပ်ပျော်သွားသည်ကများများ။သူတောင် နိုးနေပြီ။ထိုရောင်စုံခေါင်းကအခုထိ ငြိမ်ချက်သားကောင်းတုန်း။တန်ခူးရိပ်ကတော့ ဂုဏ်ရည်သွေးအား လွယ်လင့်တကူရောင်စုံခေါင်းဟုသာ နာမည်ပေးထားပါသည်။

"ဟေ့....ဟေ့ ထဦး နိုးပါတော့"

ကျောချင်းကပ်ရပ်ချည်ထားတာကြောင့် တန်ခူးရိပ်သည်ကျောကုန်းအား ပို၍ပို၍ တွန့်လိမ်တွန့်လိမ်တွန်းထိုးလျက် ဂုဏ်ရည်သွေးအားနှိုးသည်။လေးငါးခါလောက် တွန်းထိုးလှုပ်နှိုးအပြီးမှာ အင်း..အဲအသံမြည်လျက် ဂုဏ်ရည်သွေးနိုးလာတော့သည်။

"အခန်းမီးတွေ တစ်ယောက်ယောက်ဖွင့်ပေးပါဦး ဒီမှာအရမ်းမှောင်တယ်"

သမ်းဝေလျက် အသံပြဲကြီးဖြင့်ထအော်သည့် ဂုဏ်ရည်သွေးကို တန်ခူးရိပ်တကယ်ကြီးထကန်ချင်မိသွားသည်။အတော်လေး ပေါ့ပေါ့တန်တန်နေတတ်သည့်လူ။Horrorရုပ်ရှင်တွေထဲကလို တစ်ခုခုုဖြစ်လျှင်ထိပ်ဆုံးကသေမည့်လူမျိုး။