I married my sister's husband{Completed}

Part-18(Uni and Zawgyi)

Scroll down for Zawgyi❤

ပြတင်းတံခါးဆီမှဖြာကျလာသော လရောင်သည်ခပ်မှိန်မှိန်အခန်းအတွင်း ဖြန်ကျက်ထား၏။တိတ်ဆိတ်နေသော်ငြား တစ်ချက်တစ်ချက် ပုရစ်အော်သံတစီစီနှင့်ပိုးကောင်များအော်သံသည် နယ်မြို့လေး၏ညခင်းပြယုဂ်တစ်ခုဖြစ်ခဲ့သည်။လရောင်ဖြာကျနေသော ကြမ်းပြင်ဘေးရှိ သစ်သားကုတင်ပေါ်တွင် လင်းထင်ကျော်ဇောနှင့်တန်ခူးရိပ်မှာပူးကပ်နေကြရ၏။တစ်ယောက်အိပ်ကုတင်လေးဖြစ်တာကြောင့် လင်းထင်ကျော်ဇော၏အိမ်ရှိKing sizeမွေ့ယာထက်တော့ အဆပေါင်းများစွာသေးသည်။

"ဘာလို့ မမကြီးရဲ့ခဲအိုလို့ပြောလိုက်တာလဲ"

ညနေက မေမေ့မေးခွန်းတွင် လင်းထင်ကျော်ဇောသည်ဝါဆိုမေ၏ ခဲအိုပါဟူသည့် အဖြေကိုအလိုမကျ၊သိလိုစိတ်ပြင်းစွာ တန်ခူးရိပ်မေးလိုက်သည်။တန်ခူးရိပ်သည် ပက်လက်အနေအထားဖြင့် မျက်နှာကျက်အားစိုက်ကြည့်နေပြီး လင်းထင်ကျော်ဇောကတော့ လက်တစ်ဖက်ကိုနားထင်တွင် ထောက်လျက်ဘေးတစောင်းအနေအထားဖြင့် တန်ခူးရိပ်၏မျက်နှာသေးသေးလေးအား ကြည့်နေ၏။

"မြတ်ထင်ရဲ့အမျိုးသမီးက ကိုယ့်ခယ်မပေါ့ ကူးငယ်ရဲ့"

လင်းထင်ကျော်ဇောစကားကိုကြားတော့ တန်ခူးရိပ်ကမျက်ခုံးတွေတွန့်ချိုးလိုက်ပြီး ခေါင်းကိုဆတ်ခနဲ လင်းထင်ကျော်ဇောဘက်လှည့်ပစ်လိုက်ကာ...

"အမ်! ဦးနဲ့မမကယူထားတာမဟုတ်ဘူးလား"

"ကိုယ့်နှုတ်ကနေ ကိုယ်ကတော့ဖြင့်ဝါဆိုမေ့ခင်ပွန်းပါလို့ ကူးငယ်ကိုပြောဖူးလို့လား"

တန်ခူးရိပ်ပြန်စဉ်းစားကြည့်မိသည်။လင်းထင်ကျော်ဇောနှုတ်မှ တစ်ခါမှမမကြီးနှင့်သူ၏ဆက်ဆံရေးကိုထုတ်ဖော်မပြောခဲ့။အဲ့ဒီ့အပြင် တစ်အိမ်လုံးမူးနောက်နေအောင် ပတ်ရှာတာတောင် မင်္ဂလာဓာတ်ပုံတစ်ပုံပင်မတွေ့ရ။ပို၍ထူးဆန်းသည်က မမကြီးနှင့်လင်းထင်ကျော်ဇောသည် အခန်းတစ်ခုတည်းပင်မသုံးကြချေ။ဆက်စပ်၍တွေးရင်း၊တွေးရင်းမှ တန်ခူးရိပ်သည် အားလုံးကိုအချိတ်အဆက်မိမိတွေးမိတော့သည်။
ခေါင်းကို ခပ်လှုပ်လှုပ်ခါယမ်းလိုက်ကာ...