I married my sister's husband{Completed}

Part-10(Uni and Zawgyi)

Scroll down for Zawgyi❤

စာမေးပွဲပြီးသွားသည့်တန်ခူးရိပ်အဖို့ စိတ်အစဉ်ဟာ လှောင်အိမ်ထဲမှပျံသန်းခါစ ငှက်ငယ်တစ်ကောင်နှယ် လွတ်လပ်ပေါ့ပါးနေခဲ့သည်။ကားကို ကျောမှီလျက်လက်ပိုက်ကာစောင့်နေသည့် လင်းထင်ကျော်ဇောကိုတွေ့လိုက်ရတော့ မထိန်းနိုင်စွာ ပြေးသွားလိုက်မိသည်။ထိုကဲ့သို့အပြုအမူတွေကလည်း သူ့အတွက်တော့အသားကျနေခဲ့ပြီဖြစ်သည့်အလျောက် စိတ်ထဲတွင်ခပ်စိမ်းစိမ်းမခံစားရတော့။သူတို့နှစ်ယောက်၏ဆက်ဆံရေးမှာ အများကြီးတိုးတက်လာခဲ့ပြီလေ။

"ဖြေနိုင်တယ်မလား ကိုယ့်ချာတိတ်က တော်ပြီးသားပါ"

ခေါင်းကိုခပ်ဖွဖွပုတ်လာသည့် လက်ဖဝါးနွေးနွေးတွေကို ကြောင်လေးတစ်ကောင်ကဲ့သို့ ခံယူလိုက်ကာ ခပ်ပြုံးပြုံးဖြင့် ခေါင်းညိတ်ပြလိုက်သည်။

"စာမေးပွဲလဲပြီးပြီဆိုတော့ အခုဘယ်သွားချင်လဲ"

တန်ခူးရိပ်ကားခါးပတ်ပတ်နေရင်း မျက်လုံးဝိုင်းလေးများဖြင့် လင်းထင်ကျော်ဇောအား ပြူးကြည့်နေလိုက်သည်။တန်ခူးရိပ်တွင်အဖြေမရှိသည့်အခါမျိုးတွင် လုပ်တတ်သော အမူအကျင့်လေးတစ်ခုပင်။လင်းထင်ကျော်ဇောက တန်ခူးရိပ်နှာခေါင်းလေးအာ ဆွဲဖျစ်လိုက်ကာ....

"သားကိုထားခဲ့ပြီး ကိုယ်တို့နှစ်ယောက်တည်းဒိတ်ကြတာပေါ့"

ထင်ထင်လေးကတကယ့်ကို အလည်လေးပင်။တန်ခူးရိပ်မအားသည်ကို သိတာကြောင့်ဆရာမနှင့်သာအနေများပြီး တစ်ခါတစ်ရံတွင်တော့ 'တီချယ်ကလေ..' ဟုအစချီကာ တန်ခူးရိပ်အားဆရာမအကြောင်း လာလာတိုင်ကြားတတ်သည်။များသောအားဖြင့်အကြောင်းအရာများမှာ တန်ခူးရိပ်နှင့်ထင်ထင်အကြား သွေးခွဲစကားများပင်။သို့သော်သူမ အမြှုပ်ထွက်အောင်ပြောလည်း ထင်ထင်လေးကတော့ နားမယောင်သည့်အပြင် စ လယ် ဆုံး တန်ခူးရိပ်ကိုသာလာလာတိုင်တတ်သည်။

လင်းထင်ကျော်ဇောစကားကို တန်ခူးရိပ်ခေါင်းညိတ်ပြလိုက်သည်။သူလည်းစာမေးပွဲပြီးပြီဖြစ်၍ ဆရာမကိစ္စကိုဖြေးဖြေးချင်း ကိုင်တွယ်ရမည်သာ။ယခုလို လင်းထင်ကျော်ဇော၏ စိတ်ကြည်သာနေသည့်အချိန်ကို မဖျက်ဆီးချင်သလို သူကိုယ်တိုင်ကလည်း ထိုအချိန်လေးကို သဘောကျနေသောကြောင့်ပင်။ယုန်ဖြူလေးက ကြောက်တတ်သော်ငြား နုံတော့မနုံပါ။ထိုကြောက်တတ်သည့်စိတ်မှာလည်း လင်းထင်ကျော်ဇောကြောင့် တဖြေးဖြေးချင်း လျော့ပါးလာနေသည်။