I married my sister's husband{Completed}

Part-40(Uni and Zawgyi)

Scroll down for Zawgyi❤

ရေချိုးခန်းထဲကနေ အိပ်ယာပေါ်ရောက်သည်အထိ လင်းထင်ကျော်ဇောက တန်ခူးရိပ်၏ဗိုက်သားချပ်ချပ်လေးအား ကိုင်ကိုင်ကြည့်၍ အူမြူးနေခဲ့သည်။နောင်တစ်ချိန်တွင် လုံးလာမည့်ဗိုက်လေး။တန်ခူးရိပ်ကတော့ သိပ်မသေချာသလို လင်းထင်ကျော်ဇောအား အရမ်းမျှော်လင့်မထားဖို့ပြောပါသည်။မျှော်လင့်ပြီးမှဖြစ်မလာလျှင် ပို၍ဝမ်းနည်းရတတ်ကြောင်းပြောသော်လည်း လင်းထင်ကျော်ဇော၏ပျော်ရွှင်မှုတွေကိုတော့ မတားနိုင်ခဲ့ပါ။ထိုညက တန်ခူးရိပ်ရောလင်းထင်ကျော်ဇောပါ ကောင်းကောင်း အိပ်မပျော်ခဲ့ကြ။မျှော်လင့်ချက်တွေတပုံတပင်နှင့် သူတို့ညဥ့်နက်ခဲ့ရသည်။

မနက်ရောက်တော့ ထင်ထင်ကဖျားနေချေပြီ။မနက်စာစားပွဲတွင် တန်ခူးရိပ်၏ပေါင်ပေါ်တွင်ထိုင်ကာ ကပ်၍အီနေခဲ့၏။

"ထင်ထင်ဒယ်ဒီ့ဆီလာ ကူကူးမနက်စာစားပါစေဦး"

လင်းထင်ကျော်ဇောကလက်ကမ်း၍ခေါ်လိုက်သော်လည်း တန်ခူးရိပ်ရင်ခွင်ထဲမှ ခွေးပေါက်လေးလိုမျက်လုံးများနှင့် ကလေးငယ်ကခေါင်းယမ်းပြသည်။ဖျားသည့်အရှိန်နှင့်မျက်ခမ်းစပ်လေးများနှင့် နှာထိပ်လေးသည်ပင် ရဲတက်နေ၏။

"ရပါတယ် နေပါစေ။ဦးလည်းစားပါဦး ကူးကိုပဲတစ်ချိန်လုံးကြည့်မနေနဲ့။ပြီးရင်တစ်ညနေလုံး ကားမောင်းရဦးမှာ"

ခရီးရောက်မဆိုက် ပြန်ကြတော့မည့် သားနှင့်မြေးကြောင့် ဒေါ်ရီရီဦးစိတ်မကောင်း။လိုက်ခဲ့ရန်တော့ ပြောပေမယ့် သူမကလဲရန်ကုန်ကိုသဘောမကျ။မြို့ကြီးပြကြီးကအသက်ရှူကျပ်စေသည်။ယဉ်ယဉ်သာရှိလျှင် အချိန်ကြာကြာနေမည့်မြေးဖြစ်သူက အခုတော့ဖျား၍ဂျစ်တိုက်ကာ ပြန်ချင်ပြီပူဆာနေပြီး သားမက်ဖြစ်သူကလည်း အားချင်းရန်ကုန်ပြန်ရန်သာလောနေ၏။ဆေးစစ်စရာရှိလို့ဟုပြောပေမယ့် ဘာဆေးစစ်မယ်မှန်းသူမလဲရေရေရာရာမသိ။မေးလည်းမမေးခဲ့ပါ။

"ယဉ်ယဥ့်ဆီလိုက်ချင်တယ်"

တန်ခူးရိပ်ရင်ခွင်ထဲမှ ထင်ထင့်အသံလေးက တိုးတိုးညှင်းညှင်း။တကယ့်ကိုတိုးတိုးညှင်းညှင်းနှင့်သနားဖို့ကောင်းလှသည်။