I married my sister's husband{Completed}

Part-42(Final)(Unicode)

တန်ခူးရိပ်၏မွေးဖွားမည့်ဂျူးဒိတ်သည် တဖြည်းဖြည်းနှင့်နီးကပ်လာသလို လင်းထင်ကျော်ဇော၏စိုးရိမ်စိတ်များဟာလည်း မြင့်တက်လာလျက်ရှိသည်။ထို့ကြောင့် အချိန်တော်တော်များများတွင် လင်းထင်ကျော်ဇောအား ဘုရားခန်းတွင်တွေ့နိုင်သလို ဘုရားစာစာအုပ်ကိုင်လျက်လည်းတွေ့နိုင်သည်။

အင်္ဂုလိမာလသုတ်က သူ့အတွက်ကျက်ရအတော်ခက်နေ၏။တကယ့်တကယ် မွေးရဖွားရမည့် တန်ခူးရိပ်ကတော့ ဆေးရုံဆိုဖာပေါ်တွင်အေးရာအေးကြောင်း ထိုင်လျက်ရုပ်ရှင်ကြည့်ကောင်းဆဲပင်။နီးကပ်လာသော ဂျူးဒိတ်ကြောင့် လင်းထင်ကျော်ဇော၏သဘောအရ အိမ်တွင်မနေတော့ဘဲ ဆေးရုံတွင်ကြိုရောက်နေကြခြင်းဖြစ်သည်။ထင်ထင်က ဂုဏ်ရည်သွေးတို့နှင့်အတူသွားနေပါသည်။ဂိမ်းဆော့ဖော် ဂုဏ်ရည်သွေးအား အတော်လေးခင်တွယ်နေပုံရသည်။

သီးသန့်ခန်းဖြစ်ပြီး အော်ပရေးရှင်းခန်းနှင့် ကပ်လျက်ဖြစ်၍တော်ရုံမည်သူမျှ အမျိုးသားကိုယ်ဝန်ဆောင်မွေးဖွားမည်မှန်းသိကြမည်မဟုတ်။ဒေါက်တာမီမီကျော်ခိုင်နှင့်လင်းထင်ကျော်ဇောသည်အရာအားလုံးကို ထောင့်စေ့အောင်ပြင်ဆင်ထားကြပါသည်။

ယခုလည်း ဆိုဖာပေါ်တွင် ပျင်းရိပျင်းတွဲလှဲလျက် တစ်ဖက်တွင်ထိုင်နေသော လင်းထင်ကျော်ဇော၏ပေါင်ပေါ်သို့ခြေထောက်တွေပစ်တင်ထားသည်။တီဗွီတွင်ဖွင့်ထားသည်က ရုပ်ရှင်ကားမဟုတ်။ဒေါက်တာမီမီကျော်ခိုင်ပေးလိုက်သည့်
အဖြူအမည်းသာပေါ်သည့် သန္ဓေသားဗီဒီယိုဖြစ်သည်။

"ကလေးတွေနာမည်စဉ်းစားကြရအောင် ဦး"

အရင်ကထက်ပို၍စည်ကားလာမည့်မိသားစုကြီးအတွက် တန်ခူးရိပ်ရောလင်းထင်ကျော်ဇောပါရင်ခုန်စောင့်စားနေကြရပြီ။

"ကူကူးငယ်ကဘယ်လိုစဉ်းစားထားလို့လဲ"

တန်ခူးရိပ်သည် သူ့ခြေထောက်တွေကိုဆုပ်ကိုင်ထား၍ မေးလာသည့်လင်းထင်ကျော်ဇော၏လက်ဖဝါးတွေထဲမှ ခြေထောက်အားရုန်းလိုက်ပြီး ခပ်အေးအေးခြေထောက်တွေကို လင်းထင်ကျော်ဇောရဲ့အကျၤီအောက်ထဲသို့လျှိုသွင်းလိုက်ကာ အဖုအထစ်တွေနှင့်ဗိုက်သားပေါ်ကပ်ထားလိုက်တော့၏။ကိုယ်ဝန်ရှိလာချိန်မှစ၍ ခြေထောက်တွေအေးလာသည်ဟုခံစားရတိုင်း တန်ခူးရိပ်အမြဲလုပ်တတ်သော နည်းလမ်းတစ်ခုပင်။