I married my sister's husband{Completed}

Part-36(Uni and Zawgyi)

Scroll down for Zawgyi❤

မစိမ်းသက်လှသည့် အိမ်ကိုသူတစ်ခေါက်ပြန်ရောက်ခဲ့ပြီ။အမေရှိသည်ဟူသည့်အသိကြောင့် အိမ်နေရာသည်မစိမ်းသက်လှသော်လည်း အိမ်တွင်းအပြင်အဆင်သည်များစွာပြောင်းလဲသွားခဲ့ပြီ။သစ်လွင်နေသည့်ပရိဘောဂတွေ၊ဆေးအသစ်သုတ်ထားသော အိမ်နံရံတွေ ပို၍ကောင်းမွန်လာသောအိမ်ပုံစံသည် လင်းထင်ကျော်ဇောပြင်ဆင်ပေးထားခြင်းသာဖြစ်သည်။ဒီလိုဆိုပြန်တော့လည်း လင်းထင်ကျော်ဇောဟာ ခင်ပွန်းကောင်းတစ်ယောက်အပြင် သမက်ကောင်းတစ်ယောက်ပါဖြစ်နေသေးသည်။

အိမ်အနောက်ဖက်မှထွက်လာသောမိခင်ဖြစ်သူအား တန်ခူးရိပ်ပြေးဖက်လိုက်သည်။တစ်ခါတစ်ရံ မိခင်၏ရင်ခွင်သည် အကောင်းဆုံးသော သောကများအေးငြိမ်းရာ နေရာတစ်ခုဖြစ်သည်။

"အိမ်ပေါ်ကဆင်းလာခဲ့တယ်ဆိုပါတော့"

မေမေကသူ့အားဖက်ထားရင်းမှ သူ့ဆံပင်လေးတွေကိုပွတ်သပ်လျက် ခပ်အေးအေးဆိုလာသည်။သူခပ်ဖြေးဖြေးချင်း ခေါင်းညိတ်ပြလိုက်ပြီး မေမေ့ရင်ခွင်ထဲမှထွက်လိုက်သည်။

"ကူး မေမေ့ဆီမှာခဏပြန်နေချင်တယ်"

မေမေက သူ့အားဘာမှမပြောပါ။ခပ်ပြုံးပြုံးသာကြည့်၍ ခေါင်းညိတ်ပြ၏။အမေတိုင်းသည် သားသမီးများအတွက်ဆို ငြင်းဆိုသည့်စကားဘယ်လိုလုပ်ထွက်ပါလိမ့်မလဲ။တန်ခူးရိပ်၏မိခင်သည် အတော်လေးရင့်ကျက်နားလည်မှုရှိသည့်အမျိုးသမီးတစ်ဦးပါ။သူမသည် တန်ခူးရိပ်အား ရောက်ရောက်ချင်းဆောက်နဲ့ထွင်း ဖြစ်စေမည့်ပြသနာအရင်းအမြစ်တို့ကိုလည်းမမေး။ဒီလိုယူမှတော့ ဒီလိုဖြစ်ပြီပေါ့ဆိုသည့် အပြစ်တင်စကားတို့ကိုလည်းမဆို။အိမ်ပြန်လာသည့် သားဖြစ်သူအားပြုံး၍သာ ဆီးကြို၏။

"သွားနားတော့ မနက်မှမေမေတို့စကားပြောကြမယ်။ပင်ပန်းလာတယ်မလား"

"အမဖြူငယ်ရော"

တွေ့နေကြ အဖော်nurseအမကြီးကို မတွေ့ရ၍ မေးလိုက်သည်။မေမေ့ကျန်းမာရေးကတော့ အတော်လေးကိုထူထူထောင်ထောင်ဖြစ်လာခဲ့ပါသည်။ဆေးကောင်းဝါးကောင်းများနှင့် အမဖြူငယ်၏ပြုစုကောင်းမှုတို့ကြောင့်ဖြစ်မည်။