يتيمة المشاعر

البارت السادس والثلاثين

السلام عليكم
يتيمة المشاعر
نور ال زياده

رافي
____

عرفت عن نفسي سابقا وكانت المره الوحيده اللي
تكلمت فيها،،،

بطبعي انسان كتوم ومااحب التحدث عن نفسي، بس اللي عشته بهل اليوم خلاني، ماانسى طول عمري،

ولهذا ولاول مره راح اتكلم عن اللي مريت بي

واللي ماابالغ من اكول اصعب يوم بحياتي كلها

من تزوجت نورزان كان يوم جدا صعب حسيت
روحي تريد تطلع وكلبي يريد ينفجر من حسرتي
وقهري والمي

بس اليوم ميتقارن بهذاك اليوم ...

لان ماكو شعور ولاوصف بالحياة اكدر اوصفه
او اعبر عن شعوري والمي واني شفتها بهل الحال
وهي تنازع الموت وحالها يرثى له

بس من فتحت عيونها وتكلمت وعبرت عن خوفها
من كالت احس الموت يفتر على راسي

كانت هل الكلمه سبب حتى احس بالرعب
والخوف

متحملت كلامها كان مؤلم الى درجه
ماكو احد يتحمل هل شي

كلشي بالحياة ممكن اتحمله بس واني اشوفها
بهل حال كان بالنسبه الي الموت بعينه

دعيت بداخلي انو ميصير بيها شي واذا الله اخذ امانته دعيت ياخذني وميخليني ولاثانيه بعدها
لان ماراح اكدر اتحمل هل شي

طول عمري افهم الناس انو اني مااؤمن بالحب
بس بالحقيقه اني اخاف من الحب

لان اني انسان احب ابقى قوي وماكو اي مشاعر تتحكم بيه

لهذا حتى مشاعري بارده ويا الجميع

واي بنيه اعرفها مااحاول اتعلق بيها واي تصرف
منها ميعجبني اطلعها من حياتي

بس نورزان من هي وطفله خلتني اتعلق بيها من غير مااحس

حسيتها بنتي قطعه مني من غير مااحس تعلقت بيها وصارت شي مهم بحياتي

بس من كبرت تغيرت مشاعري وصارت حلم بالنسبه الي، حاولت امنع نفسي عنها واطبق اللي اسوي ويا الكل

بس ماكدرت، مشاعري اتجاها عبرت مراحل الحب
من وقت طويل

الحب مصدر قوه ومصدر ضعف بنفس الوقت
صار اللي خفت منه ونورزان صارت ضعفي

احس صرت انسان ضعيف واتاثر بكلشي يخصها

شكد احاول ارجع رافي السابق اللي ميهتم
وميهزه شي

ترجع وتهزني من جديد وتخرب كل محاولاتي
وكان هلشي يضوجني

بس بهل يوم عرفت كل الاشياء اللي عشتها بحبها
لاشيء

كدام تضحيتها وهي تحاول حمايتي وخوفها عليه

ضحت بنفسها وتزوجت شخص متحبه علمودي