"မင်းဘက်က လွန်တယ် ဆိုတာကို သိတယ်မဟုတ်လား Ray"
Eric အသံက မာနေသဖြင့် ကြားထဲက Noah ပါ နေရခက်လာသည်။ Eric ဟာ Ray အပေါ် ဒေါသဖြစ်ခဲလှပေမဲ့ ခုကိစ္စမှာတော့ Constellation ရဲ့ အကြီးအကဲအနေနဲ့ရော အဖေတစ်ယောက်အနေနဲ့ပါ Ray လုပ်ရပ်ကို စိ်တ်ဆိုး၏။ ကိုယ့်ပယောဂလည်း မကင်းတာကြောင့် Ray မာန်ခံရခြင်းအား Noah စိတ်မကောင်း။
"သူက ကျွန်တော့်သူငယ်ချင်းနဲ့ကျွန်တော့်အဖေရဲ့ဂုဏ်သိက္ခာကို စော်ကားနေတာလေ!"
ဒေါသအရှိန်မပြယ်သေးသော Ray အသံကလည်း နူးညံ့မနေ။ Noah စိုးရိမ်နေခဲ့သည့် ကိစ္စတွေဟာ အစပျိုးလာခဲ့ပြီ။
သူနှင့်ပါတ်သက်၍ Eric ကို စကားနှင့်ပင် Noah မထိခိုက်စေလိုပေ။
"ဂုဏ်သိက္ခာဆိုတာ စကားလုံးတွေနဲ့ တိုင်းတာရတာ မဟုတ်ဘူး Ray...မင်း အဲ့ဒီ့လို ကိုယ်ထိလက်ရောက် တုံ့ပြန်လိုက်တာကမှ မင်းကို ပျိုးထောင်ထားတဲ့ အုပ်ထိန်းသူကိုပါ ဝေဖန်စရာ ဖြစ်လာမှာ...နားလည်လား"
Ray အား ခပ်ရိုင်းရိုင်း လူငယ်လေးလို မဖြစ်စေချင်သည့် Eric ရဲ့ စေတနာကို Noah မြင်ရသည်။ ကိုယ်ချစ်ရသူတွေအတွက်ဆိုလျှင် ဘာကိုမှ ဂရုစိုက်မည်မဟုတ်သော Ray ဘက်က ခံစားချက်တွေကိုလည်း Noah နားလည်ပါ၏။ ဒါပေမဲ့ သားအဖနှစ်ယောက်ကြားမှာ တစ်ခွန်းတစ်ပါဒမျှ ဝင်မပြောနိုင်ဘဲ ဒီအတိုင်း ထိုင်ကြည့်နေရသည်။
"တချို့လူတွေက အဲ့ဒီ့လို တုံ့ပြန်မှုမျိုးနဲ့ပဲ ထိုက်တန်တယ်လို့ ကျွန်တော်က ယူဆတယ်...နောက်ထပ် နားမခံနိုင်အောင် ပြောလာတဲ့ စကားတွေကိုလည်း ကျွန်တော် သည်းခံနေမှာ မဟုတ်..."
"Ray Anderson!"
ရုံးခန်းထဲတွင် ဟိန်းသွားသော အသံကြောင့် Noah ပင် တုန်တက်သွားရသည်။
"ငါ့သား အနေနဲ့ မင်းမှာ သည်းခံ ခွင့်လွှတ်စိတ် သူများထက် ပိုပြီး မွေးမြူရလိမ့်မယ်လို့ ငါသင်ထားတာတွေ မေ့ကုန်ပြီလား!"
Ray ကတော့ မတုန်လှုပ်ပေမဲ့ မျက်နှာ မှိုင်းသွားတာ သိသိသာသာ။
"ကျွန်တော် မမေ့ပါဘူး...ပြီးတော့ ကိုယ်ချစ်ရတဲ့သူတွေကို ကာကွယ်ရမယ်လို့ Eric သင်ထားတာကိုလည်း မမေ့ဘူး"
