Ray ဧည့်သည်ခန်းတွင် ခဏနားပြီး ရေချိုးလိုက်သည်။Yan ကတော့ ခရီးပန်းလို့ အိပ်နေသလား မသိ။ဖွားဖွားက ခြံထဲတွင် လမ်းလျှောက်နေသည်။အန်တီတို့က Kitchen ထဲတွင် ချက်ပြုတ်နေကြ၏။
မြန်မာစံတော်ချိန်အားဖြင့် မွန်းလွှဲ သုံးနာရီ။Ray အိမ်ပြင်ထွက်လိုက်တော့ တစ်ဖက်ခြံကနေ Yan ရဲ့ တူမလေး ဒီဖက်ခြံထဲသို့ ကူးလာသည်။
"Hi"
Ray ကို မြင်တာနဲ့ နှုတ်ဆက်တဲ့ ကလေးလေးက သနပ်ခါး အဖွေးသား။မျက်နှာမှာရော လက်တွေမှာပါ ညီညီညာညာ လိမ်းထားသည်။သူရှိရာ လျှောက်လာပုံမှာ ဖြူဖြူ လုံးလုံးလေးမို့ ချစ်စရာ ကောင်းနေ၏။
"မီးမီး နာမည်က ဂူဂူး"
ကလေးလေးရဲ့ရှေ့တွင် Ray ဒူးတစ်ဖက်ထောက် ထိုင်ချလိုက်သည်။သနပ်ခါးနံ့သင်းနေသော ပါးဖောင်းဖောင်းကို အသည်းတယား ဆွဲဖျစ်ချင်ပေမဲ့ သနပ်ခါးပျက်မှာ စိုးတာကြောင့် လက်ညိုးဖျားလေးနဲ့ပဲ ထိလိုက်သည်။
"လှ တယ်"
သူပြောတော့ ပါးချိုင့်တွေ ခွက်နေအောင် ပြုံးရယ်သည်။
"ကိုကိုရော သနပ်ခါး လိမ်းမလား"
"ဟင်"
"ဂူဂူး လိမ်းပေးမယ်"
ဂူဂူး က သူ့အား လက်သေးသေးလေးတွေဖြင့် ဆွဲခေါ်သည်။အပေါ်ထပ် ဧည့်ခန်းထဲရောက်တော့ သူ့လက်ကို ဖြုတ်ပြီး အခန်းတစ်ခုထဲ ပြေးဝင်သွား၏။ထို့နောက် လက်ထဲတွင် ဗူးတစ်ဗူး ကိုင်လျက် လုံးလုံး လုံးလုံးနဲ့ ထွက်လာသည်။
"ဒီမှာ ထိုင်"
သူ့ကို Sofa ပေါ် ထိုင်ခိုင်းပြီး အစိမ်းရောင် ဗူးဖုံးကို ဖွင့်ပေမဲ့ ကလေးအားနဲ့မို့ မပွင့်။ လက်ချော်နေတာမို့ သူယူပြီး ဖွင့်ပေးလိုက်၏။
ဗူးထဲက အဝါရောင်ဖျော့ဖျော့ အနှစ်တွေကို လက်ညိုးလေးနှင့် အသာကော်ယူကာ သူ့ပါးပေါ် တို့လာသဖြင့် မျက်နှာကို ငိုက်ပေးမိသည်။
သနပ်ခါးလိမ်းခံလိုက်ရသည့် သူ့ပါးနှစ်ဖက်လုံး အေးမြမြ။
"လှသွားပြီ"
လက်ချောင်းတွေမှာ သနပ်ခါး အလူးလူးနဲ့
ဂူဂူးက သူ့မျက်နှာကို ကြည့်ကာ လက်ခုပ်တီးသည်။
