هنصعد سلم الالتزام معا🥺💜🌸

لقطه تربويه

#لقطة 1
((وإنت من أهل الله))

لما ابنك يدخل عشان ينام،
و يقول لك "تصبحي على خير يا ماما"،
حلو إنك تقوليله "و انت من أهل الخير" طبعا..
و أحلى وأقيَم لقلبه روحيًا وإيمانيًا، إنك تقوليله:
"و انت من أهل القرآن" ❤️
أو "و انت من أهل الطاعة" 🍃
أو "و انت من أهل الله"...💚

🌿نوّعوا من الكلام الطيب لولادكم، ما يبقاش قوالب ثابتة بتتقال لحد ما تفقد معانيها وتتبادل بفتور..

🌿و دايما قبل النوم ركزوا على كلمة فيها معنى و قيمة مهمة، تبقى آخر رسالة تربوية ودُودة وخفيفة غير مباشرة، منكم ليهم في نهاية اليوم.

#لقطة 2

لما ابنك يشتم أو يقول كلام بذيء قوليله:
اللسان اللي يجري عليه القرآن يا حبيبي ما يجريش عليه إلا كل لفظ كريم.. ☝️
عارف النبي حبيبك ﷺ قال إيه؟ قال: "لا ينبغي لصاحبِ القرآنِ أن يجِدَ مع من وجَد ولا يجهلَ مع من جهِل وفي جوفهِ كلامُ اللهِ"..✋
وقال كمان: "ليس المؤمن بالطعان ولا باللعان ولا الفاحش ولا البذيء".. ☝️
و احنا بنتوضى بقى نتمضمض كويس عشان نغسل لساننا، ويقع الكلام الوحش دة مع ماء الوضوء في الحوض، ونخرج من الوضوء بلسان طيب متطهر من غلطاته"..

#لقطة 3

ما تقوليش لابنك "إنت مقصر في حق القرآن"..
قوليله "إنت مقصر في حق نفسك" ببُعدك عن القرآن.. 🍃
"وإنه لكتاب عزيز"...☝️

#لقطة 4

لما ابنك يعمل قُرعَة -اقتراع يعني- بينه و بين أخوه أو صاحبه، و قبل القُرعَة يقول بغيظ و غلّ "أنا عارف إن نتيجة القُرعَة هتطلع مش ليا كالعادة ودايما بخسر فيها😣!"

قوليله:
-يا حبيبي إنت مستوعب إن إنت كدة بتعترض على اختيار الله ليك مش حاجة تانية؟ إنت عارف إنك كدة بتبوظ في قلبك الركن السادس من أركان الايمان "الإيمان بالقدر خيره و شره" ؟ ..
المؤمن كامل الإيمان يؤمن إن اختيار ربنا له دايما هو الأصلح له..

-ثم إن سوء ظنك بالله هو إللي غالبا بيخليك تخسر لإن الله عند ظن العبد به.. فأحسن الظن👌..

-ثم أنا شفت بعيني أكتر من مرة القُرعَة قبل كدة كانت بتبقى لصالحك، بس انت اللي ناسي😈.. وبتنسى ساعتها كمان تحمد ربنا انك كسبت😑..
الشيطان إللي بينسّيك النعمة وشُكرها وبيفكرك فقط بالسُّخط على ما لا يرضيك.. فاستعذ بالله..

#لقطة 5

🌿 قاعدة عامة ولها استثناء طبعا في أقدار الله:
((على قدر برِّك بمامتك وباباكي=على قدر برّ ابنك بيكي))☝️
((بِرُّوا آباءَكم تبرَّكم أبناؤُكم))*صححه السيوطي/الجامع الصغير..

✋لو والديكي الكرام -أو واحد منهم- لسة عايشين ➖ توبي عن تقصيرك و جفائك وعقوقك ليهم لو فيه عقوق، واجتهدي واإلحقي إللي فاتك ❤️ ..
*حديث نبوي تاني---"رغِم أنفه، ثم رغِم أنفُه، ثم رغِم أنفُه... قيل: مَن يا رسولَ اللهِ؟! قال: من أدرك والديه عند الكبرِ، أحدَهما أو كليهما، ثم لم يدخلِ الجنةَ"
..
✋ولو ماتوا خلاص الله يرحمهم؟ ➖ برُّهم ما انقطعش لسة برضو..
🔹حديث نبوي تالت---"يا رسولَ اللهِ إنَّ أبويَّ قد هلَكا فهل بقي لي بعدَ موتِهما مِن بِرِّهما شيءٌ؟.. قال رسولُ اللهِ صلَّى اللهُ عليه وسلَّم: نَعم، الصَّلاةُ عليهما، والاستغفارُ لهما، وإنفاذُ عهودِهما مِن بعدِهما، وإكرامُ صديقِهما وصِلةُ رحمِهما الَّتي لا رحِمَ لك إلَّا مِن قِبَلِهما".