أَكرَمَكِ اللّٰه فلا تَتذلَلي🍒:
"قيام الليل"
بسم الله الرحمن الرحيم ، والحمد لله رب العالمين ، والصلاة والسلام على أشرف المُرسلين سيد الخلق سيدنا مُحمد صلىٰ الله عليه وسلم.
"كل المعلومات من علماء القرآن والسُنة ومن موقع الإسلام سؤال وجواب"
احنا كلنا حافظين ان ربنا سبحانه وتعالى بينزل لنا كل يوم فى الثلث الأخير من الليل ، صح؟
طب استوعبي معايا كدة..
عارفة يعني ايه ربنا عز وچل بينزل لنا فى الدنيا ويسألنا هل من مستغفر فيغفر له كل ذنوبه ، وهل من داعي فيستجيب لكل أدعيته ، وهل من سائل فيقضي له حاجته !
دا احنا لو عرفنا ان في حد بيوزع هدايا وجوايز مجانا كدة فى منطقتنا بنبقى عايزين نجري عليه !
ما بالكم ربنا ولله المثل الأعلى والأعظم والأجمل والأرحم
ربنا فعلا بينزل لنا بس هو وحده سبحانه وتعالي اللي عالم كيفية النزول..مفيش مخلوق يعرف هو بينزل إلى سماء الدنيا ازاي؟
بس الأكيد والجميل جدا انه فعلا بينزل لنا وبيستجيب لكل دعواتنا فى الثلث الأخير من الليل
تخيلي كدة تبقى الناس كلها نايمة والجو هادي خالص وانتِ بتعبدي ربنا وعمالة تفضفضيله على اللي فى قلبك وتتكلمي معاه ، ياااه بجد مجرد التخيل بيريح القلب ، وازاي القلب مش هيرتاح وهو بيحب الجميل الرحيم بعباده
تعرفي ان انتِ لو واظبتي على القيام نور الإيمان هيملى قلبك و وشك كمان ، وأبواب المعصية هتتقفل فى وشك ، وأبواب الطاعات هتتفتحلك ، وكمان مفيش مرض هيمس جسمك وهتحسي بالبركة فى فلوسك ورزقك وأولادك ودراستك وحياتك كلها !
وبجد والله ومش ببالغ جربي بنفسك وانتِ هتعرفي
ربنا مفيش أجمل وأرحم منه يا بنات ، بيرزقنا كتير جدا وبيبارك لنا فى كل حاجة بس لو لجأنا له ، فحاولي تصلي حتى لو ركعتين بس كل يوم لحد ما يبقى القيام دا زيه زي الفروض الخمسة بالنسبة لك ، متقدريش تستغني عنه أبدا وابقي زودي فى الركعات بعد كدا براحتك
_طب بنصليه ازاي بقى؟!
صلي على الحبيب ، بصي يا غالية قيام الليل بيبدأ من بعد صلاة العشاء لحد قبل الفجر ، وبنصليه مثنى مثنى "يعني هتصلي ركعتين وتسلمي وبعدين ركعتين وتسلمي وهكذا" ، وبتقرأي فيه أي سور براحتك وبعد كدة بتختميه بركعة وِتر
سُنة عن الرسول صلى الله عليه وسلم انه كان بيصلي 11 ركعة "يعني 8 ركعات قيام وبعد كدا يوتر ب3 ركعات مع بعض بدون تشهد فى الركعة التانية "
بس لو مش هتقدري على العدد دا فصلي زي مانتِ عايزة "يعني ممكن تصلي ركعتين أو اربعة..فاللي تقدري عليه صليه بس المهم مثنى مثنى واختمي فى الاخر بركعة وِتر"
أنت تقرأ
هنصعد سلم الالتزام معا🥺💜🌸
Spiritualبصوا عاوزين نلتزم بقي؟ اصل الحياة مش لهو ولعب بس عاوزين نعمل صح بقي♥ ولَن يُخيب اﷲ صِدق إلحاحَك ما دُمت مُتيقناً :")) وكمان الجنه جميله اوي مش يلا بقي نفوق ونقرب من الله
