أنا مش طول الشهر بصلي الصلاة في ميعادها ساعات بتتأخر ومش كل يوم بعرف اقرأ ورد القرآن، ومش كل يوم بقول الأذكار ومش كل يوم بيبقى عندي القابلية إني لما اسمع الآذان أقوم اتوضأ وأصلي في لحظتها، الصلاة ساعات بتبقى تقيلة على قلبي ونفسي الآمارة بالسوء ساعات بتشغلني عن الصلاة والعبادة""
..
هتلاقي نفسك بيحصل معاك كده أحيانًا، كل ده يدخل تحت بند فتور العبادة، علاقتك تكون فاترة بربنا والهمة في الأرض وبتجر نفسك بالعافية وتجبرها على صلاة الفرض والطاعات، على عكس أيام تانية الهمة بتبقى عالية ومش ملاحقين ما شاء اللّٰه صلاة الفرض والنوافل والأذكار وقراءة القرآن عشر صفحات في اليوم مثلًا وساعات أكتر وصيام نافلة!
هو في ايه؟ ليه مش بنثبت على الطاعات طول الشهر؟ طب ليه الهمة مش بتفضل عالية؟ وليه الصلاة ساعات تبقى خفيفة على قلبي وساعات ببقى مش قادر أصلي أصلًا؟!
طب هو ربنا عز وجل لم يكن يعلم إننا هنبقى كده وهيبقى فيه فتور في العبادة؟!
لا هو يعلم سبحانه وتعالى تمام العلم إننا بنتقلب في الأحوال كده، هو أصلًا سبحانه مُقلب القلوب، ساعة القلب لاهي وغافل وساعة القلب عابد وذاكر، الفكرة كلها تكمن في جهاد النفس وإننا نكون مُدركين إن فيه شيطان قاعد لنا ليل نهار بيحارب فينا وفيه نفسنا الآمارة بالسوء طول الوقت نازلة وسوسة عشان تبعدنا عن الطريق ونُعرض عن الطاعات معلش يعني هي الجنة ببلاش؟!
قَالَ رَسُولُ اللّٰه -صلى اللّٰه عليه وسلم: "مَنْ خَافَ أَدْلَجَ وَمَنْ أَدْلَجَ بَلَغَ الْمَنْزِلَ أَلاَ إِنَّ سِلْعَةَ اللّٰهِ غَالِيَةٌ أَلاَ إِنَّ سِلْعَةَ اللّٰهِ الْجَنَّةُ" سنن الترمذي، حديث صحيح.
متخليش حد يقنعك إنه طول الشهر بيكون Top في العبادات وطول الوقت همته عالية، دا يبقى كذاب! ولو أنا صدقت إن فيه حد كده طبيعي هيجيلي إحباط وهقول لنفسي إني إنسان سيئ ومش عارف أكون زي فلانة أو فلان وممكن لا قدر اللّٰه أبطل صلاة اصلًا! يا رب سلم، لازم أنا كَـ بشر اقتنع إن مش مطلوب مني أكون آلة، لأن ربنا عز وجل يعلم ضعفنا وتقصيرنا، يعلمه تمام العلم، بس لازم لما ألاقي نفسي دخلت في فترة الفتور دي ألحق نفسي وأقوّمها وأقاومها ولو تطلب الأمر احاربها عشان متنتصرش عليَّ وتغلبني وتميل بيَّ على هواها، أبقى معاها في جهاد طول الوقت أجبرها على العبادة زي ما بجبر الطفل الصغير على شرب الدواء، ربنا عز وجل يقول: "وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا ۚ وَإِنَّ اللَّهَ لَمَعَ الْمُحْسِنِينَ" في سورة العنكبوت، ويقول عز وجل: "وَالَّذِينَ اهْتَدَوْا زَادَهُمْ هُدًى وَآتَاهُمْ تَقْوَاهُمْ" في سورة محمد.
فَـ الإنسان اللي بيجاهد نفسه بيُثاب مرتين، مرة بياخد الثواب على فعل الطاعة ومرة ثواب تاني على صبره على الطاعة، فَـ نغتنم الأوقات اللي بتكون فيها الهمة عالية بفعل أكبر عدد من النوافل والطاعات عشان لما نقع نلاقي في رصيد يحفزنا عشان نعرف نقف تاني.
أنت تقرأ
هنصعد سلم الالتزام معا🥺💜🌸
Spiritualبصوا عاوزين نلتزم بقي؟ اصل الحياة مش لهو ولعب بس عاوزين نعمل صح بقي♥ ولَن يُخيب اﷲ صِدق إلحاحَك ما دُمت مُتيقناً :")) وكمان الجنه جميله اوي مش يلا بقي نفوق ونقرب من الله
