هنصعد سلم الالتزام معا🥺💜🌸

العيال والقرآن

#العيال_وسنينهم
#العيال_والقرآن 2 :  ((حلق في ودنك قبل ما نبدأ ))

🔦قبل أي حاجة جديدة نتفق سوا على شوية حقائق 🤓
✋🏻لو إنتي متخيلة إن ابنك هيحفظ القرآن لوحده وإنتي على مستواكي الشخصي مش بتحاولي تحفظي القرآن زيه–ولو مجرد محاولة- أو هاجرة لمصحفك وما بيشوفكيش ولو حتى ماسكاه بتقري منه إلا ف رمضان أو كل شهر مرة= يبقى بتحلمي 😬

✋🏻لو إنتي متخيلة إن ولادك هيسعوا بنفسهم  و"كامل" إرادتهم الحرة لحفظ القرآن وهما لسة أطفال، أوهيحفظوه من غير ما تسايسي وتحايلي كمان وتقدمي قدوة ليهم، ومن غير مكافآت واتفاقات ومفاوضات=تبقي لسة في نفس الحلم. 😑😬

✋🏻لو إنتي متخيلة إن مسيرة الحفظ هتبقى كلها لطيفة ومفيهاش شد وجذب ومفيهاش إلا الطبطبة والمحايلة ومفيهاش مجاهدة منكم إنتوا الاتنين -مش منهم هما فقط=يبقي لسة الحلم ما خلصش ويارب حد معدي جنبك يكسب فينا ثواب ويصحيكي 👊🏻😂

حبيبتي ❤️
🙄أجواء تحفيظ ولادك مش هتبقى كلها هدوء وسلام و أحضان ونسائم ملائكية.. لأ حبيبتي دول لسة بيتعلموا يعني إيه مجاهدة ودين واحتساب.. بكرة ولادنا يكبروا ويرشدوا و يستوعبوا قيمة و قدر القرآن أكتر و يبقوا هما اللي بيسعوله بأرواحهم طوعا كل ما يعرفوا ربنا أكتر –زينا دلوقتي... #فاستهدي_بالله_كدة_عز_وجل ❤️

🙄طبيعي إن الطفل يفضَّل اللعب على أي شيئ فيه جدية والتزام.. هو طبيعته اللهو واللعب والتحرر من أي التزام وأي تكليف وأي أمر مش ملفت لمزاجه، بيسمع كلام شهواته فقط.. إحنا بقا بالحوار والمصاحبة والترغيب والتشويق والمكافآت والأنشطة المرتبطة =بنحاول نرغبه ونحببه في جسلة القرآن ونزرع جواه عقيدة القرآن وأخلاق القرآن نقطة نقطة ❤️ .. فإوعي تيأسي.. دي صحيفتك انتي اللي بتقاتلي عشانها.. لما انتي تيأسي بسرعة رغم معرفتك لقدر القرآن و حماسك، ما بالك هما بقا اللي لسة اطفال و كل مخهم في اللعب و ماعندهمش حافز قوي لتقليل مساحة اللعب عشان خاطر الحفظ، وشايفينك يئستي؟ اكيد ما هيصدقوا :/
وحفظ وتحفيظ القرآن أعظم غاية ووسيلة نشغل بيها طاقات وأذهان وقلوب وأعمارنا إحنا و أولادنا.. والحفظ في الصغر أسهل من الكبر وأبعد عن النسيان..
❤️ فاستعيني بالله وشجعيهم قدر طاقتك دة مشروع العمر حبيبتي و أحسن استثمار.. مسيرك تحققي هدفك بإذن الله.. ولو بعد حين.. كله بأوانه عز وجل ❤️ ..

👈🏻⭐️وتعالي نشوف نبدأ إزاي ومنين مع السن الأكبر النهاردة:
🔦لو ولادك كبار –ابتدائي- ولسة ما بدأوش حفظ رغم قدرتهم على نطق الحروف العربية، وكل يومهم غرقانين في التابلت واللعب والكرتونات فقط=يبقى أنصحك نصيحة: صفَّري العدّادت وابدئي حطي قوانين على حسب أكتر حاجة هما بيحبوها وبيضيعوا فيها وقتهم باستمتاع ..

== مثال: عندنا في البيت إحنا حطين قانون لأهل البيت كله محدش يستعمل جهاز الكتروني قبل "إنهاء الورد القرآني"، حتى أنا، ولو حصل وقفشونا بيسألونا "إنتوا خلصتوا الورد بتاعكو!؟" لو كنا خلصناه=بنقول آه فبيسكتوا.. لو لأ=بنقول لأ وبنقفل الجهاز :/ ، عشان نبقى قدوة وعشان فعلا فرصة الواحد فينا يلتزم بورده أكتر.. —-المهم: شرط إباحة التابلت عندنا في البيت هو "الورد القرآني" استئناسًا بكلام بعض العلماء ممن أباح بعض الألعاب المعروفة بشرطهم "ألا تلهي عن واجب".. وإحنا متفقين سوا إن القرآن واجب يومي يعلو ولا يُعلَى عليه ❤️ .. وطبعا هما ساعتين فقط هما المسموح بيهم أصلا للالكترونيات زي ما اتكلما في مقال "العيال والإدمان".

#عن_تجربة: الشرط دة بيخليهم:
يصحوا من النوم على القرآن----يطلبوا مصحف وإحنا ف العربية----يعملوا الوِرد حتى لو  في زيارة عند جدتهم أو خالهم----يعملوا الورد من نفسهم ومع نفسهم بدون حجج ومماطلات..إلخ، عشان يعرفوا يلعبوا على الأجهزة ف أقرب وقت.

🙄👀هتقوليلي طب كدة مش بيتعلموا الإخلاص إطلاقا؟
هقولك سؤال منطقي طبعا وواقعي كمان وكلنا بنتعرض له ف حياتنا أصلا، وإنتي بقا لما بتشكي في دة بتعملي وقفة معاهم وتبدئي تفكريهم: "هو إحنا بنحفظ عشان ربنا وأعلى درجة في  الجنة والا عشان التابلت؟"...وبيبان الإخلاص من عدمه وبيتقوّم ببساطة.. حاليا عرفنا نوقف التابلت أسبوع آهو وعملوا الورد برضو بفضل الله عشان حذّرناهم إن دة اختبار للإخلاص ولازم ينجحوا فيه والحمد لله رغم اختفاء حافز الأجهزة نجحوا بنسبة 80% من الأسبوع :D –لإن إنتي شغالة على تربيتهم ليل نهار في الإخلاص بالتوازي.. الإنسان بفطرته مجبول على الاستجابة للإرشاد بالترغيب والترهيب مع بعض، ثم بالدين بيتم ترشيد دة وظبطه ناحية بوصلة الآخرة مش الدنيا، الأط بقا على فطرتهم لسة، فمهما عملتي كدة كدة لسة اخلاصهم مدخول وتحت التمرين.. #فما_تقلقيش #أطفال_ولسة_بيتربوا...

👈🏻يعني أهم شرط للشرط دة: تكوني مطبقة الإسلام في حياتهم كمنظومة متكاملة عشان مفيش ركن يبقى على حساب ركن👉🏻

= الجزء الثاني/الأخير=
🔦وساعات كنا بنعكس النظام: بنعتبر التابلت مكافأة ما يتسحقهاش إلا اللي خلص ورده.. ابنك هيقولك "ليه ما ألعبش يا ماما إلا لو حفظت؟" قوليله "مين قال كدة، عندك كل اللعب في الدولاب العب براحتك بأي حاجة والعب مع أخوك، لكن التابلت مكافأة فقط للي يخلص ورده"..
يعني براحتك استعملي تكنيك المكافأة بقا أو الشرط، اختاري اللي يعجبك ونوعي..

🙄✋🏻طب إيه باقي المنازعات والشقلباظات اليومية إللي واجهتها معاهم؟ وظبطناها إزاي والمسيرة استمرت بفضل الله؟
الإجابة في مقالنا بكرة إن شاء الله ف نفس المعاد يا فتياتي العزيزات،
وهيكون فيه حلول لكل الشقلباظات بعون الله يا كل أم جالها القولون العصبي😂

#أبشري_حبيبتي_واحتسبي😁
#هايروحوا_من_ربنا_فين 😂

أسماءمحمدلبيب