هنصعد سلم الالتزام معا🥺💜🌸

العيال_والقرآن

#العيال_وسنينهم
#العيال_والقرآن 4: ((الوِرد والجداول والنوتة ))==
#الوِِرد  #وكميته  #والنوتة  #والجداول..

🚦المنشور دة مناسب للسن من أول #أولى_ابتدائي/ وطفل حافظ جزء عمّ على الأقل خلاص وبدأ في تبارك.. / ولحد سن10-12 سنة مثلا.. بعد السن دة، تلقائيا  الولاد بيقى الورد بتاعهم في مخهم ومش بيحتاجوا نوتة غالبا.. حسب ظروفكم طبعا..

🍄أول حاجة: شكل النوتة🍄
🔹هاتي لابنك نوتة حلوة كدة بقلم لطيف، وسموها نوتة الوِرد القرآني..
🔹بعد المنشور هتلاقوا الصور.. #أول_صورتين = يوم من النوتة بتاعة حمزة لما كان 11سنة- والنوتة بتاعة سلمان لما كان 8سنين..-----هي دي نوتة الوِرد بتاعهم...
🔹هتلاقي فيها نموذج لصفحة الورد اليومي: اليوم ميلادي وهجري/الحفظ/ الجديد/ الماضي/ السماع/ التفسير/ إمضاء حامل القرآن/ إمضاء المشرف.
🔹دي ف حالة إنك معودة ولادك إنهم بيحفظوا و يسمّعوا لبعض، لكن في  حالة إنك إنتي إللي بتسمّعي لابنك، فياريت تبقى ليكي نوتة برضو عشان يحس بالقدوة والمشاركة. لو صعب عليكي، خلاص صمميله إنتي نوتة بجداول وكل أسبوع تقريبا تعملي الجدول الجديد، وهو يمشي عليها. وفهميه إزاي بتقسمي الورد، بحيث يتمرن على التخطيط، وبعد كدة يعمل الجدول هو بنفسه-بتعلميه يخطط ويظبط وبتعلميه الأمانة والدقة كمان- وطبعا هتبصي على النوتة كل يوم في الأول لحد ما يحس بالحزم، ثم هتبصي على فترات عشوائية، ولما تلاقيه ماشي على النوتة 80% شجعيه طبعا والفتي نظره إن فيه 20% واقعين بس هنفوتهم عشان إنت لسة بتتمرن يا حبيبي وعشان إنت ولد مجتهد.. حتى لو النسبة 50% برضو شجعيه لو هو طفل ملول وبيجيله إحباط بسرعة، وخليكي ف ضهره.

🍄تاني حاجة: إزاي أصلا بتعملي جدول لولادك؟🍄

♻️♻️نبدأ بالأمهات إللي ولادها ف أزهر زي حالتي
▪️معروف إن المدرسة حتى لو أزهر مش بتحفظ الأطفال القرآن إلا نص جزء عمّ مثلا في الحضانة، ودمتم.ومعروف إن أزهر ليهم منهج قرآن يتختم على إعداداية.
▪️هدفك القريب=إن ابنك يحفظ المنهج قبل الدراسة، بحيث في الدراسة يبقى بيراجع فقط مع الفصل كتثبيت حفظ وبالتالي يبقى متفوق دايما في حصة القرآن إن شاء الله ويجيب مركز آخر السنة فيه..
▪️هدفك البعيد=إن ابنك يحفظ زيادة عن المنهج بجزء مثلا لو ماشاء الله ربنا بارك في الوقت والنشاط.
▪️طب إزاي اشتغل على الهدف دة؟ = هتحددي الكمية بتاعة كل خانة حسب اتفاقك مع ابنك والخطة، وتتابعيها يوميا.
▪️الخانات بتاعة النوتة عبارة عن الخانات إللي شرحناها في منشور "ألكتاتيب" للكبار، وهزود عليهم خانات من عندي: تفسير وسماع.. كدة مجموع الخانات 5..
والشرح التفصيلي كالتالي:

⭐️أولا: خانة الحفظ⭐️
➖كل سنة في أول الأجازة الكبيرة–بالكتير بعد مرور شهر من بدء الأجازة- ابدئي احصري عدد الأجزاء اللي على ابنك يحفظها في المنهج للسنة الجاية.. وليكن مثلا  هو رايح تالتة ابتدائي =يبقى عليه 3 أجزاء، يعني 3أجزاء*20صفحة=60 صفحة.
➖شوفي الأجازة كام شهر لحد الدراسة.. وليكن مثلا من شهر 5لشهر9 تقريبا: حوالي 5شهور.. هتقسمي عدد الصفحات دي -60 صفحة-على 4 شهور فقط –إللي هما بالأيام =4شهور*30يوم يعني 120 يوم- مش هنقسم على 5شهور عشان تعملي حساب إن فيه أيام فيها ظروف بتوقف الحفظ وليكن شهر هيقع منكم، خلي جدولك مرتاح عشان تقللي التوتر- المهم هنقسم 60 صفحة على 120 يوم، الناتج=نص صفحة في اليوم.
➖والله ابنك قادر يحفظ نص صفحة في اليوم=خير وبركة هتخلصي إن شاء الله قبل الدراسة ويمكن قبلها بشهر كمان لو ما وقعتوش الشهر الاحتياطي..
➖طب مش قادر وبيزمزأ بعد ما جربتي كل الشقلباظات إللي في المقالات إللي فاتت؟ =هتخليها تلت صفحة مش نص صفحة –يعني 5سطور لإن الصفحة 15 سطر..
➖طب ابنك منهجه أكبر من كدة؟=هتبدئي من أول الأجازة مش بعد شهر، وهتقللي فرص الوقت المهدر قدر الإمكان، أو هتدخلي الدراسة بنسبة بسيطة فقط من المنهج لسة ما اتحفظتس-أمرها سهل جدا بقا ومعاكي وقتك طول الدراسة.
➖طب أقنعه إزاي؟— اقري المنشور1و2و3. واستعن بالله ولا تعجز ❤️ ..
➖طب تسميع الحفظ كان نص نص؟---فوتي لإنه كدة كدة هيسمعّها تاني بكرة وطول الأسبوع في المراجعة. ==طب كان وحش جدا؟--لأ يسمّعها تاني وسايسيه بإللي قلناه في مقال3 بتاع شقلباظات العيال.