هو مش ربنا قبل ما يخلقنا كاتب أقدارنا كلها؟!
طب ليه أنا اتعب نفسى ما دام كده كده هيحصلى اللى مكتوب......؟!
ليه أذاكر ما دام نتيجتى مكتوبه؟! ،
ليه اعبد ربنا ما دام كده كده مكتوبلى أدخل الجنه أو النار .......؟!
وليه ربنا أصلا اختار ناس وكتب عليهم النار وناس تانيه اختار لهم الجنة💔
وليه ناس تعبانه فى حياتها ومتبهدله وناس تانيه مرتاحه وسعيده......؟!
وليه نتحاسب يوم القيامه على أعمالنا مع إن هو اللى كتبلنا ده......؟!
طب صلوا على النبى الاول وتعالوا نفهم بالراحة
بصى يا ستي في جمله جميله أوى بتقول "الإنسان مُسير فيما ليس فيه ثواب ولا عقاب ، ومُخير فيما فيه ثواب وعقاب "
يعنى في حاجات ربنا كتبها علينا ومُجبرين عليها ، والحاجات دي مفيهاش ثواب وعقاب والحمد لله إن ربنا اللي نظمها لنا
زى ايه.....؟!
زى أعضائك اللى فى جسمك ، القلب مثلا تعرفى تشغليه لوحدك وتوقفيه لوحدك؟!
والمعدة تعرفى تقوليلها تهضم امتى وامتى تقف؟!
من نِعَم ربنا إن هو اللى بيعمل كده ، وزي بردو شكلك وأهلك وهكذا
أما الحاجات اللى فيها حسنات وسيئات وهنتحاسب عليها فدي ربنا جعل الإنسان مُخير فيها
ربنا بيخيرك والدليل قوله تعالى
" أَفَأَنتَ تُكْرِهُ النَّاسَ حَتَّىٰ يَكُونُوا مُؤْمِنِينَ "
" وَقُلِ الْحَقُّ مِن رَّبِّكُمْ ۖ فَمَن شَاءَ فَلْيُؤْمِن وَمَن شَاءَ فَلْيَكْفُرْ ۚ "
" وما عليك إلاّ البلاغُ المُبين "
طب ما دام احنا مُخيرين فى الطاعة ليه كتب على ناس الجنة وعلى ناس النار من قبل ما يخلقنا؟!
بصى انتِ لو أختك مثلا ولا جارتك مبتذاكرش ولا بتفتح كتاب طول السنة مع إن الكتب معاها وبتروح المدرسه وبيتشرحلها الدروس
مش هتقولي انها هتسقط مع إن كل حاجه متوفرة لها؟!
ولله المثل الأعلى
ربنا بيعمل كدا معانا
هل انتِ علمك سبق علم ربنا......؟!
فهل انتِ تعرفى دلوقتى انتِ من أهل الجنه ولا من أهل النار.....؟!
وهل انتِ عارفه ربنا كاتب عليكى المعصيه ولا الطاعه.....؟!
ولو اخترتى حاجه فيهم حد منعك؟!
يعنى هى لو ذاكرت كان حد هيمنعها!!
ربنا عالم إن فلان هيختار الطريق ده فكتب عليه الجنه ، وفلان هيختار الطريق التانى فكتب عليه النار
ربنا هو اللى خلقك وعالم انتِ هتفكرى ازاى وبعد ما تفكرى هتختارى إيه؟
يعنى مثلا ايه اللى خلاكى تقرأى البوست؟!
لما تفكرى هتلاقيكى اخترتى تقرأيه بإرادتك ، محدش جبرك!!
فربنا كاتب إنك هتقرأيه لانه أعلم بيكى من نفسك
طب انتم مش بتقولوا إن التوفيق من عند ربنا ، ما هو ربنا موفقنيش لطريق الطاعة ، ذنبى ايه أنا بقى😔💔
هقولك مفهومك غلط لان احنا اللى علينا الخطوه الاولى نبدأ وبعدين نستعين بربنا ، وربنا ذكرلنا ده فى القرآن فى قصة أهل الكهف
قال تعالى : " إِذْ أَوَى الْفِتْيَةُ إِلَى الْكَهْفِ فَقَالُوا رَبَّنَا آتِنَا مِن لَّدُنكَ رَحْمَةً وَهَيِّئْ لَنَا مِنْ أَمْرِنَا رَشَدًا "
هم هربوا بدينهم الاول وبعدين استعانوا بربهم
وعن أنس عن النبي ﷺ فيما يرويه عن ربه قال: إذا تقرب العبد إلي شبرا تقربت إليه ذراعا، وإذا تقرب إلي ذراعا تقربت منه باعا، وإذا أتاني يمشي أتيته هرولة"
بردو الخطوة الاولى عليكى ، وربنا لو لقى قلبك معلق به هيوفقك وهيعينك
فهمتي كده✨
يلا بقى خدي الخطوة الاولى والتوفيق من الله ، ادعيه على طول واستعينى به ومتفضليش واقفة مكانك
وفقنا الله وإياكم يارب ورزقنا الفردوس الأعلى✨
#مين_الي_قال_احنا_مانقدر 💪🦋
أنت تقرأ
هنصعد سلم الالتزام معا🥺💜🌸
Espiritualبصوا عاوزين نلتزم بقي؟ اصل الحياة مش لهو ولعب بس عاوزين نعمل صح بقي♥ ولَن يُخيب اﷲ صِدق إلحاحَك ما دُمت مُتيقناً :")) وكمان الجنه جميله اوي مش يلا بقي نفوق ونقرب من الله
