هنصعد سلم الالتزام معا🥺💜🌸

العيال_والقرآن

#العيال_وسنينهم
#العيال_والقرآن 5
طرق وبرامج لتيسير حفظ وفهم القرآن..

📚📚أولا: خطط الحفظ📚📚
🚦المصحف 600 صفحة تقريبا.. كل صفحة 15 سطر تقريبا، يعني إن شاء الله:
لو ابنك هيحفظ سطر في اليوم=هيختم في 25 سنة 😁
لو هيحفظ سطرين ف اليوم=هيختم ف 12ونص-13 سنة
لو هيحفظ ربع صفحة ف اليوم=3أسطر ونص=هيختم في مدة من 7-8سنين
لو هيحفظ تلت صفحة ف اليوم=5أسطر=هيختم في مدة من 5-6 سنين
لو هيحفظ نص صفحة في اليوم=هيختم في مدة من3ونص-4 سنين
لو ابنك هيحفظ تلتين صفحة ف اليوم=10 أسطر=هيختم ف مدة من 2ونص-3سنين
لو هيحفظ صفحة في اليوم=هيختم في 20 شهر=تقريبا سنتين

🚦#عايزة_أقول_إيه👀؟
عايزة أقول إن  حتى لو طول عمره بطيء جدا ف الحفظ=فمالكيش عذر في عدم تحفيظه، لإنه لو هيفضل طول عمره بيحفظ في اليوم سطرين فقط يبقى خير جدا برضو إنه يخلص بعد 13 سنة، وإيه يعني!.. مش أحسن من انه ما يحفظش؟ ❤️ مابالك بقى إنه أكيد مش هيفضل طول عمره بيحفظ بنفس المقدار. أكيد كل مرحلة عمرية وليها قفزة معينة حسب قدرته.

⭐️#نصيحتي⭐️
➖غالبا كلنا بنتنقل في المراحل دي حسب كل مرحلة عمرية لولادنا ومش بنفضل ثابتين عند مقدار ثابت للحفظ.
➖وغالبا بنبدأ بأقل كمية مقبولة=3أسطر في اليوم، لو بدأوا حفظ من سن 5 سنين في المتوسط.
➖لو نفَسك طويل وهمتك عالية=ابدئي تحفيظ لابنك من قبل 5 سنوات لو عاوزة، من أول ما ينطق يعني، ولو حتى يحفظ سطر ف  اليوم.. وحبة حبة يكبر ونزود المقدار تدريجي. وكل ما بتلقنيه بصوتك آية ويقولها وراكي كل ما دة بيصب مباشرة في صحيفتك.
➖لكن لو نفسك قصير ومالكيش حيل على التلقين الشفوي المكرر لابنك=اكتفي بإنك تشغليله القرآن يوميا في البيت –جزء عم كبداية- بحيث يتعود عليه كفترة تمهيدية للحفظ، ثم ابدئي تحفيظه رسميا من سن 5 سنوات مثلا لما يكون خلاص بدأ يعرف يقرأ لغة عربية.
➖طول ما ابنك أقل من 7 سنين خلي كمية الحفظ بسيطة لا تتجاوز النص صفحة=سبع سطور ونص... ولو عنده صعوبة يبقى خلي الحفظ لا يتجاوز التلت صفحة=5أسطر.
➖لما ابنك يكبر عن 7 سنين وإمكاناته الذهنية تكبر، زودي الكميات لنص أو تلتين صفحة ف اليوم باتفاق ودّي معاه وتشجيع ، مش بالغصب.
➖غالبا قبل سن 7سنوات ابنك هيتقبل تكرار الآيات فهيبقى متقبل برامج القرآن دي اللي فيها التكرار دة بسهولة.. بعد كدة هيبقى عاوز ينجز فهيبقى بيفضل المصحف الملعم عنهم عشان التكرار فيه مرتين فقط.. بعد كدة خالص بقا هيبقى عاوز قرآن عادي خالص بدون تكرار مطلقا، يبقى بيراجع معاه فقط مش بيحفظ.
➖أهم حاجة بشكل عام: بلاش تخلي الحفظ صفحة في اليوم أبدا، إلا لو ابنك كبر خلاص وبقا بعد سن العاشرة مثلا وهو بنفسه إللي اختار دة عشان يختم أسرع ويفرح، وف نفس الوقت مش مقصر في المراجعة=يبقى اسمحيله طبعا و خليكي معاه للنهاية.

📚📚ثانيا: طريقة الحفظ بقا📚📚
🚦لو ابنك أقل من 5 سنين ولسة مش بيعرف يقرأ--- هتبدأوا حفظ من آخر المصحف عشان الآيات قصيرة مناسبة لنفسه القصير... هتقري الآية بصوت عالي ويقولها وراكي.. ثم تقولي تاني ويقولها وراكي ثم تالت ويقولها وراكي.. ثم  تطلبي منه يقولها لوحده.. ثم تخشوا عالآية اللي بعدها بنفس الطريقة.. ثم تطلبي منه يقول الآية الأولى ويلضم فيها التانية: لوحده.. ثم تبدأوا بنفس الطريقة مع الآية التالتة وتكرروا نفس الطريقة... خلصتوا 3 آيات؟ سيبوهم على جنب وابدأوا 3 آيات جداد بنفس الطريقة.. خلصتوهم دول كمان وبقا معاكم 6 آيات؟ قوليهمله على بعض مرة بنفسك وخليه يقولهم لوحده مرة بعديكي. لقيتيه بيقولهم بصعوبة؟ كرري العملية اللي فاتت بس بدل 3 مرات خليها 5 مرات.. طب بيزهق ويتعب؟ قللي كمية الحفظ #أو ارجعي لمقال شقلباظات العيال -فووووق👆🏻-هتلاقي فيه الحل إن شاء الله // ومهم جدا الجزء اللي بيحفظه يفضل شغال في الكاسيت ليل نهار.

🚦لو ابنك أكبر من 5 سنوات وبيعرف يقرا نوعا ما خلاص-----هتقروا السطور اللي هيحفظها سوا حوالي 3 مرات.. هتمشي معاه بإيدك على حروف السورة وتخليه هو إللي يقرأ قبل منك خرف حرف بحركات التشكيل.. أول مرة أكيد هيغلط كتير ويبقى بطيء لإن حروف الرسم العثماني مختلفة شوية شكلا عن الحروف إللي بياخدها في المدرسة---اصبري لإن كدة بتعلمي عينه تتعود على رسم المصحف عشان يعرف يحفظ لوحده بعد كدة بدون اعتماد على حد... خلصتوا قراية وبقى بيقراها مية مية نوعا ما؟ عندك هنا بقا حل من اتنين:
1*يا إما تخليه يقعد على جنب يحفظهم لوحده تماما ونجرب ونشوف ونحايل ونشجع.
2*يا إما تخليه يحفظ عن طريق برنامج تحفيظ.. دة برنامج بيبقى فيه خاصية تكرار الآيات لحد عشرات المرات..

⭐️⭐️وآدي روابط وأسامي #برامج_لتيسير_الحفظ⭐️⭐️

= الجزءالثاني/الأخير، ⭐️⭐️وآدي روابط وأسامي #برامج_لتيسير_الحفظ⭐️⭐️

✔️✔️1️⃣برامج للابتوب1️⃣✔️✔️
🔺برنامج آيات: أشهر بنامج، وفيه خواص كتير جدا من ضمنها وجود صورة لصفحات المصحف زي الحقيقي –بحيث الطفل يثبت عنده الحفظ بشكل وموضع الآية الثابت- كمان فيه خاصية تكرار فقرة آيات على بعضها عدد معين أو آية آية عدد معين ، و فيه قراء كتير وتفسير.. دة رابط تحميله، وهتلاقي هنا رابط لتجربة البرنامج قبل تحميله
http://quran.ksu.edu.sa/ayat/

🔺برنامج اسمه "تحفيظ القرآن" نفس خواص التكررا اللي فاتت.. كمان نفس الموقع دة فيه برنامج تعليم التلاوة وفيه خاصية التكرار برضو: أنا جربته زمان مع ولادي زمان قبل ما يبقى عندنا تابلت وموبايل حديث، وكان ظريف زي برنامج آيات كدة.
http://www.houseofquran.com/arabic.html

🔺برنامج من ترشيح أخت في التعليقات: للاطفال وللكبار و فهي كل أنواع القراءات وكل مايخطر على بالك من شيوخ -مرتل ومجود -وممكن لحفظ السور الكبيرة لإن انتي اللي بتتحكمي حتى لو بتكرري سورة كبيره ربع ربع او صفحه صفحه او آيه آيه وكل مقطع او مجموعه آيات تعمليلها تكرار تاني يعني جواه تكرار المقاطع في تكرار للايات لحد 10 مرات..
http://www.quran4u.net/Quran4u_Mohaffez_Animated_Ayah.html

✔️✔️2️⃣برامج للموبايل والتابلت من جوجل بلاي2️⃣✔️✔️
🔺برنامج عدنان معلم القرآن---جزء عم فقط
https://play.google.com/store/apps/details?id=com.tagmedia.adnan&hl=ar

🔺برنامج آيات برضو---هو نفس اللي فوق بس دي نسخة الموبايل
https://play.google.com/store/apps/details?id=sa.edu.ksu.Ayat&hl=ar

🔺برنامج المصحف المعلم للقرآن كاملا---بيكرر الآية مرتين فقط مرو بصوت الشيخ ومرة بصوت أطفال، مفيهوش مشايخ كتير، هو المنشاوي والعزازي فقط. بس كان حلو أوي لمرحلة ما بعد سن 7 سنوات بعد ما يكون الولاد بيحفظوا لوحدهم خلاص ومجرد بيراجعوا بالسماع. والولاد بيعرفوا يتعاملوا معاه بسهولة.
https://play.google.com/store/apps/details?id=com.oubaida.almoshaf_mo3lem_full

🔺برنامج المصحف المعلم جزء عم—الشيخ العزازي فقط
https://play.google.com/store/apps/details?id=com.oubaida.almoshaf_mo3lem

🔺برنامج المصحف المعلم جزء تبارك—الشيخ العزازي فقط
https://play.google.com/store/apps/details?id=com.oubaida.almoshaf_mo3lem_2

🔺لو عاوزة مصحف معلم لأي جزء بشكل مستقل ابحثي في جوجل بلاي بكلمات البحث "مصحف معلم الجزء كذا" وتحطي رقم الجزء أو اسمه.

🔺لو ابنك بيحب شيخ معين برضو ابحثي ف جوجل بلاي على "القرآن بصوت فلان الفلاني"..

🔺غالبا البرامج كلها بتحتاجي فيها نت أول مرة فقط: بتنزلي السورة مرة واحدة من عالنت ثم بعد كدة تشتغلي بيه أوفلاين عادي.