هنصعد سلم الالتزام معا🥺💜🌸

اهم ايام حياتك

اللي ضيع ال3 أيام اللي فاتوا من ذي الحجة قوموا وتوبوا إلى الله ويقينا هيقبلكم لو صادقين، بلاش نفضل خسرانين طول عمرنا، والله مافي أي حاجة هتنفعنا نهائي غير صلاتنا اللي ترضي الله وصيامنا وأذكارنا واتباعنا لرسول الله ﷺ

الناس اللي بتستغل الأيام دي معندهاش معجزات زيادة عنكم، هم كل الحكاية إنهم فعلا عارفين هم جايين الدنيا ليه، عارفين مين رب العالمين اللي مهما نعبده فوالله ما هنقدَّره حق قدره

ربنا اللي لولاه مكناش هنبقى موجودين أصلا

شوفي نفسك كدا عندك كم سنة ولنفترض 20 سنة وافضلي فكري وقولي انا فعلا يارب من 22 سنة مكنتش موجودة في الدنيا دي، الحمد لله إنك خلقتني ورزقتني بكل النعم دي وكمان لو عملت أعمال معينة هتجعلني خالدة في الجنة

مستوعبة يعني ايه تبقي عايشة دايما في نعيم والأفضل من النعيم هو رؤية ربك اللي خلقك سبحانه وتعالى

هتشوفيه دايما على عكس الدنيا دي مش عارفين نشوفه أبدا لكن سبحان الله عندنا يقين إنه معانا وسامعنا وبيحفظنا وبيرزقنا من حيث لا نحتسب، والله بيرزقنا فعلا من حيث لا نحتسب لانه الكريم الرحيم الودود الغفور الچميل العظيم السميع البصير المؤمن البر اللي كل أسمائه وصفاته وأفعاله جميلة، والله جمييييلة وأي سوء ظن بيجيلنا أو أي وساوس بتجيلنا فالله عز وچل بريء منه لأنه كامل سبحانه وتعالى

قوموا وجاهدوا وعافروا وتيقنوا إن ربنا معاكم وإنه بيقبل توبة عباده، متتركوش نفسكم للشيطان لأنكم لو تركتوا نفسكم له يقينا هتكونوا من أهل النار ومحدش فينا هيكون مرتاح أبدا في النار

واعرفوا إن أحب الأعمال إلى الله أدومها وإن قل، أهم حاجة بس حافظوا على الفروض في وقتها واللي عليها صيام من رمضان تصوم في الأيام الجميلة دي لان صيام الفرض أجره أعلى من صيام السُنة، والقرآن القرآن القرآن، تدبر القرآن من أعظم الأعمال اللي فعلا بفضل الله بتصرف عنك وساوس الشيطان وبتزود اليقين جواك وبتجعلك تشتاقي أكتر لرؤية ربك ورؤية رسوله ﷺ

وحاولوا على قد ما تقدروا تذكروا الله كتير في الأيام دي علشان بإذن الله ربنا ينعم عليكم وتكونوا دايما من الذاكرين الله كثيرًا والذاكرات اللي ربنا هيرزقهم بالمغفرة والأجر العظيم

يعني طول ما انتم قاعدين مثلا أو بتعملوا حاجة استشعروا عظمة إن لسانكم بيذكر الله، سبحان الله وبحمده سبحان الله العظيم، سبحان الله والحمد لله ولا إله إلا الله والله أكبر ولا حول ولا قوة إلا بالله

الله أكبر كبيرا والحمد لله كثيرا وسبحان الله بكرة وأصيلا

الله أكبر الله أكبر الله أكبر لا إله إلا الله الله أكبر الله أكبر ولله الحمد

والله سهلة ومن رحمة ربنا إنه جعلنا نكسب مليارات من الحسنات واحنا ممكن نكون قاعدين على السراير لكن الأجر بناخده بتحريك اللسان بس !

يلا استعدوا واستغفروا والجأوا للي أرحم عليكم من نفسكم اللي بتهلككم واللي لو مشيتوا وراها خلاص هتضيعوا

قال تعالى : {إِنَّ الَّذينَ آمَنوا وَعَمِلُوا الصّالِحاتِ كانَت لَهُم جَنّاتُ الفِردَوسِ نُزُلًا﴾   [الكهف: ١٠٧]

اسعوا علشان الفردوس الأعلى 🌱🌴☘️

#كلموا_الناس_عن_ربنا
#صلوا_على_الحبيب