السلام عليكم ورحمة الله وبركاته، لعل الكلام دا يكون رحمة لينا من ربنا
الفتن والمصائب بقت بتزيد جدا في الدنيا زي الانتحار والإلحاد وغيرهم، بس اللي بجد بفضل الله عايزة أقوله إن اللي متعلق فعلا بالله وبيلجأ له وبيكتفي بالعلم عنه فوالله مهما يتعرض هو ذات نفسه لابتلاءات زي موت حد عزيز عليه أو فقر أو غيرهم بيكون بفضل الله زي الجبل الثابت اللي فعلا مهما يشوف فهو عايش ب"كلا إنَّ معيَ ربي سَيَهدِين" و "إنَّ ربِّي لَطيفٌ لِما يَشاء" و "أنْتَ وَليِّ في الدنيا والآخرةِ تَوفَّني مُسلما وألحِقْني بالصالحين" وآيات تانية كتير بتأكدله في كل ثانية إن ربنا أرحم عليه من أي حد
العارف بالله والمتعلق به سبحانه وتعالى بيكون فعلا عايش في جنة الدنيا وبيحس بنعيم الجنة في قلبه زي ما الشيخ بن تيمية كان عايش كدا في السجن وسبحان الرزاق اللي من عليه بانشراح الصدر والعيش مع القرآن لدرجة إن الناس كانوا بيزوروه علشان يتعلموا منه الصبر وهو مسجون !
العارف بالله مش بيهتم أبدا إنه يفضل قاعد بالساعات على الفيس علشان يعرف مين قتل مين ومين تزوج مين، العارف بالله واحد فعلا كل همه ربه سبحانه وتعالى، ربه فقط
فبجد تعالوا نلجأ لله إنه يحفظنا من شرور أنفسنا ومن سيئات أعمالنا ومن شر شياطين الجن والإنس وندعي إنه يرحمنا برحمته ويرزقنا العلم عنه والاستغناء به سبحانه وتعالى
طب أتعلم عن ربنا ازاي؟!
اعملي بوصية رسول الله ﷺ وافضلي مصاحبة القرآن والسُنة علشان دول اللي بتوفيق الله فيهم النجاة، القرآن صاحبيه بالتدبر والحفظ والعمل واستخراج أسماء الله الحسنى وصفاته وأفعاله مع المؤمنين ومع الكفار وايه هي صفات المؤمنين في الآية دي علشان أستعين بالله واعمل بيها وايه هي صفات الكفار علشان ألجأ لربنا إنه يبعدني عنها، التعامل مع القرآن بالنظام دا أقسم بربي جنة الدنيا، ويا سلام لو تسمعي أسماء الله الحسنى للمعلمة أمنية اللي أصلا الله يجازيها خير ربنا سخرها لينا علشان هي اللي تعلمنا الكلام اللي بتوفيق الله كتبته فوق دا، والسُنة إنك تتعلمي أخلاق رسول الله ﷺ وفي كتاب جميل جدا اسمه كيف عاملهم للشيخ محمد صالح المنجد رائع جدا اللهم بارك، وطبعا علشان الفتاوي اللي بدون أي أدلة كترت جدا فانت محتاجة تتعلمي فقه وعقيدة وحديث ودا اللهم بارك مع المعلمة أم تميم
اللي في الآخر عايزة بعون الله أقوله إن كلها فترة وهنمشي من الدنيا الفانية دي وربنا أرحم الراحمين يسر لنا كل حاجة الحمد لله فاستعينوا بالله ومتفكروش كتير وتوكلوا عليه وجاهدوا وهو بفضله وبكرمه وبرحمته هيعينكم🍁
لا حول ولا قوة إلا بالله العلي العظيم
#كلموا_الناس_عن_ربنا
#صلوا_على_الحبيب
#عائلة_المتفائلات_بالفردوس
أنت تقرأ
هنصعد سلم الالتزام معا🥺💜🌸
Espiritualبصوا عاوزين نلتزم بقي؟ اصل الحياة مش لهو ولعب بس عاوزين نعمل صح بقي♥ ولَن يُخيب اﷲ صِدق إلحاحَك ما دُمت مُتيقناً :")) وكمان الجنه جميله اوي مش يلا بقي نفوق ونقرب من الله
