" *أنت لست لي ولكنّي أحبك،ما زلت أحبك،وحنيني إليك يقتلني،وكرامتي تمنعني،وكُل شيء يحول بيني وبينك* " ..🌸
-محمود درويش.
عند ملاذ::
كنت خايفة على ميسون ما قدرت أمش أخليها ، الليل كلو فِضْلَت صاحية أنا كنت شبه نايمة، كل ما أفتح عيني بلقاها صاحية وبتعاين للتلفون، نظراتها وخوفها حسيت إنها بتوحي بتعب عظيم هموم ومسؤوليات أكبر منها..
تاني يوم الصباح مؤيد رجع كان واقف جنبي سألته عن أمي وقعدنا نتكلم عن علاء، وحسيت بيه شبه يآئس من حالته ،وقفت قدام غرفة علاء وبعاين ليه من خلال الزجاج، كان فاقد للوعي تماماً ،ممدد زي الجثة المُحنطة وكمية من الأجهزة موصلة في جسمه،ملامحه إتغيرت بقت باااهتة شديد ، عاينت ليه بإنكسار وفي صوت جواي بدا يقول :علييك الله قوم يا علاء ،قوم يا صحبي والله الرقدة دي ما شبهك، قربتَ أبكي، وأمو كانت بتحوم حول الغرفة شوية وتقعد شوية، في وسط اللي أنا فيه جاني صوت حُذيفة بيسلم ،التفتت عليه وقلبي بقى يدق شديد، كان بيسلم على الموجودين ونظراته موجهة علي، وأنا مراقباهو بنظراتي لحدي جا وقف جنبي ،عاين لي وابتسم مسااافة حتى فتح خشمه وقال لي: إزيك يا ملاذ.
_كويسة
_ الحمد لله، "أخد فاصل صمت رفع راسه عاين لي وأضاف:"مشتاق ليك والله العظيم
_ "نظراتنا اتلاقت ، حسيت عيوني حتدمع وتفضحني،هو ما عارف إنو كل كلمة بتطلع منو موجهة لي بيكون ليها تأثير خاااص، هو يادوب اشتاق لي وما عارف إني قضيت ليالي كتيرة ببكي وأعاني وهو ما حاسس،ما عارف إني بفرح كيييف لما بشوفه قدامي رغم إدعائي للعكس، ما عارف إنو كان بيحرق روحي في كل مرة بشوفه واقف مع مآب،وبعاين ليها ويتغزل فيها قدامي، حاسة حذيفة عارف دا كله بس عامل نفسه أهبل، سرحت في عيونه وأنا بقول الكلام دا كله لروحي ،إنتبهت إنو نظراته إتحولت لنظرات إستغراب، إنتبهت برضو إني شردت كتير، ما عرفت أقول شنو، قلت ليه:الضربك في وشك شنو؟!
_ دي حكاية طويلة ، بتشبه حكايتي معاك
_ عمرنا ما كانت بيننا حكاية يا حُذيفة
_ "مسك يدي بقوة وقال لي بنبرة حادة بس بصوت واطي عشان الحولينا ما يسمعو" إياك تقولي كدة يا ملاذ إنتي بس ما عارفة مكانتك عندي
_ حذيفة فك يدي
فجأة مؤيد ظهر قدامنا عاين لحذيفة مسافة وعاين لي يدينا حذيفة بدورو اتخلع وفك يدي ،أنا كنت برجف من الخوف ونظرات مؤيد ما مطمنة نهائي
مؤيد: تعالي عايزِك
مشيت معاهو وخليت حذيفة واقف بيعاين لقبضة يدو ...
" *أنتَ لا تُفلح بشيئ غير إرباكي، ستقودني نوباتك المتقلبة تلك إلى الجنون* "💙
عند رزان::
