" *اكتب رسالة لنفسك عن أيامك الجميلة،لحظاتك الأكثر عمقًا في قلبك ،اللحظات التي أصبحت فيها فخور جدًا وسعيدًا،لشيء فعلته يومًا وجعلك تشعر انك على نحوٍ أفضل ،اكتبها لأجل أيام قد تكون فيها بأسوأ لحظاتك ،لا تربيتة أفضل من تربيتة من نفسك لك* "
🌸 *بعد شهر* 🌸
خلصت إمتحانات وسلمتَ البحث بتاع التخرُج ،كنت مبسوطة شديد وما في بالي حاجة غير أجري على البيت وأنوووووم أصحى بكرة، عشان أعوض تعب الأيام الماضية،السهر والقراية و المعاناة العانيتها عشان أخلص البحث، شلت شنطتي وقعدت في أقرب درجة سلم جنب المكتب وبقيت أتأمل في الجامعة زاوية زاوية ،اتذكرت من أول يوم جيت مع مؤيد عشان التسجيل ،كنت برجف وخايفة من المجتمع الجديد اللي ح أواجهه براي! كنت شايفة الخمس سنوات دي بعيدة شديد شديد وصعبة ،هي فعلاً كانت صعبة بس راحت، اتذكرت أيام كنت برلومة وحُسام كان يوصلني كل يوم، وأيام بيزورني في الجامعة ومعاهو عادل وكنت بفرح شديد!
اتذكرت كل المواقف اللي واجهتني وكانت بتستنزف طاقتي وبتحول دون وصولي للنقطة دي تحديداً ،عاينت لشجرة رزان وعلاء الدين ،ومجمع القاعات، وكافتيريا سيف وناس دفعتي اللي واقفين يتصورو مع بعض، مشاعري كانت ملخبطة بين عايزة أضحك وعايزة أبكي،اخدت نفس طويل ابتسمت ووقفت ،وأنا طالعة على البوابة لاقوني خالد ونور ،سلمت عليهم
نور : جيتي في وقتك، كنا بنفتش عليك
ميسون : بالجد ،اهاا
نور: طالعين مشوار وإياك تقولي لأ
ميسون:"عاينت ليهم" ههه عصرتو علّي ،عندي مشوار مهم حالياً وما بيتأجل
خالد :"وقف قدامها وكان بعاين ليها في عيونها" نحنا دايماً حنفضل نحنس حضرتك عشان تطلعي معانا؟وإحتمال تكون دي آخر طلعة لينا مع بعض
ميسون : مقدرة اهتمامكم بي ،بس والله الموضوع مهم
خالد : طيب ما ينفع تجي معانا وبعدها أوصلك حتة الموضوع؟
ميسون: اممم للأسف ما ينفع! الوقت حيتأخر قريب للمغرب ما بقدر أمش هناك أفهموني
نور: يعني ما ممكن تمشي يوم تاني
ميسون:" دموعها نزلت، مسحتها سريع عشان ما ينتبهوا " والله ممكن بس أنا محتاجة أمشي الليلة وحالاً ، "مسكت يد نور وهي بتعاين لخالد" حاولو تتفهمو واستمتعو بالطلعة يا خريجين
خالد من الزعل ما قال شي تاني ،اكتفى بإنه يمش من جنبهم، ميسون ودعت نور وطلعت من الجامعة...
اتصل عليها رقم غريب ردت:-
_ الو
_ ميسون إزييك
_ بخير
_ الحمدلله ، أنا عثمان
_ اهااا عثمان صلاح ،كيفك
