" *لقد كان البحر والسماء في آن واحد، لا أعلم كيف كنت أحلق وانا غارقة في عينيه* "..!💙
عند شهد::
صحيت من النوم متأخرة ،يمكن عشان سهرة أمس الطويلة مع ناس البيت،قعدت في السرير بديت اتثائب وانا بمد يدي، الغُرفة كانت مرتبة ابتسمت وقلت :يا رزااان
جاني صوتها من الحمام وهي بتقول : ااي أنا الرتبتها
_ بسم الله وبتتكلمي من جوا الحمام لشنو
_ نسيييت
شهد وهي بتقوم :حالة صعبة ربنا يعوض أهلك
تلفوني كان بيرن عاينت ليهو كان المتصل مؤيد ابتسمت وقلت احم احم إختبار الصوت ورديت
_ يا صباح الخيرات
_ صباح الخير؟ قولي لي بس يادوب صاحية إنتي
_ تصدق
_ لالا ما بتنفعي معاي
_ كيف
_ لقيت ليك عريس ،بسسس إنتي كسلانة ساي ح أكلمه يكسر الحنك
_ هههاي، تبقى خراب للنصيب
_ كيفِك، اهاا الليلة حتمشي تسجلي؟
_ إن شاء الله
_ ماش معاك منو؟
_ رزان
_ رزان؟
_ صحبتي
_ اهاا طيب ، أنا عندي شوية أوراق مفروض أطبعها ح أجي المكتبة اللي جنب جامعتكم قالو طباعتها نضيفة، ومنها أمر على صيدلية(...)
_ ااي دي جنبنا برضو
_ كبيرة ومشهورة الصيدلية دي وأظن الدربات حتكون متوفرة فيها ،في المنطقة دي بقت معدومة قالو
_ حلو ، بس إن شاء الله خير الدربات عايزها لمنو؟
_ وااحد قريبي وصاحبي ياااخ عندو عملية
_اهاا ربنا يعافيه
_ يا رب يا رب دعواتِك
_ إن شاء الله
_ متفائِل بيك عاملة زي مصباح علاء الدين، دعواتِك كلها بتستجاب
_ ترنيمة حظ
_ ترنيمة حظي
" *الحديثُ معكَ يُوقظ ألف خلية نائمة داخل قلبي، ويميت الكون والأصوات حولي،أسمع سوى صوتك،أرجو بقائكَ طويلاً وسواك لا يهُم* "...💙
_ تمام لبعدين
_ أوكيييي " كُنت واثقة في اللحظة دي إنه حيقول لي ؛ ونتلاقى،نفسي أشوفِك"
_ تمام قومي أجهزي عشان الوقت يا كسلانة إنتي
_ خلاص ح تذلني بيها تاني، يلا يلا
