*يصبح الإنسان ناضجًا حينما يدرك أنه من الممكن أن يحب الأشخاص أو الأشياء في هذا العالم دون أن يمتلكها*
#لقائله
عند ناس ملاذ::
-ياااخ المشكلة ما بتسمع الكلام أنا حذرتها يا أمي
-لأ يا مؤيد ما تضربها كلو بيتحلى بالتفاهم أهدا
-ما بهدا يا أمي ماااا بهدا
"مشى ناحية غرفة ملاذ وهو شايل الحزام وبكورك: ملاااذ يا ملاذ "
ملاذ طلعت من الغرفة وهي بترجف من الخوف، شكلها عارفة المصيبة العملتها ..
-ففف في شنوو
- جيبي التلفون وادخلي غرفتك انتظريني
- ت تتا تلفون؟
- ااي جاتني رسالة إنك فتحتيه
-ما فتحته تلفون شنو
-"قال ليها بنهرة وهو بلف يدها" إياك تكذبي علي إياااك
(أمهم جات فكتهم من بعض، ملاذ بقت تبكي وما قادرة تبرر، رغم إنو ملاذ عندها شخصية قوية وبتقدر تفرض رايها على ااي زول بس في شخصين بتكون ضعيفة جداا قدامهم !
مؤيد أخوها البتخاف منو موووت وحذيفة البتحبو موت برضو😂......)
ملاذ::
المهم أمي أقنعت مؤيد يخليني، كلمتو إنو هي أدتني التلفون عشان أطلع من جو القراية شوية،اقتنع بكلامها و شال التلفون قفلو ورجعو الدولاب بس ما اتكلم معاي نهاائي،مشى صلى العشا وقفل باب الغرفة شديد، قعدنا أنا وأمي في الحوش وبقيت اهبش في ايدي وجعتني شديد من حركة مؤيد القبيل، أمي جابت تلج وقعدت تدلكها لي وهي بتتكلم بنفرزة : غايتو مصايب مصااايب الله يهديكم بس، مؤيد عصبي وانتي عنيدة انا حذرتك قلته ليك أخير تتصلي بتلفوني حتى لو ما لميسون يعني "قالت كدة وهي بتحمر لي، وواصلت" نحنا ما ناقصين مشاكل والله، كررعلي ميسون ما رجعت ليها أشوف بقت كيف زاتي وهسي الوقت اتأخر، المهم يا لوزة أخوك زعلاااان منك إنتي إعتذري منو وكان ما سامحك على كيفو المهم إنتي تسوي العليك، بعدين خليك عارفة كويس تصرفات مؤيد دي كلها عبارة عن خووف عليك يا بتي أخوك بحسب حسابات بعيدة، بخاف عليك وبهمه مستقبلك عايزك تركزي في قرايتك بس"ما كنت حابة اتناقش مع أمي وأكتر كلام ف إكتفيت بإنو شلته نفس وقلت ليها":حااضر ومشيت على غرفتي .....
-:صباح اليوم التاني:-
أمي صحتني بدري صليت الصبح وجهزت طلعت سريع لقيت مؤيد قاعد في الكرسي ويشرب في الشاي بإستكانة وهو بعاين في التلفون كان متشيك شكلو طالع الشغل، اتذكرت كلام أمي فكرت أعتذر منو بس والله كبريائي ما سمح لي خالص لما قلت ليهو: صباح الخير وسفهني عاين لي باستخفاف وواصل يشرب في الشاي ،طبعا دمي فار من حركته دي اتأففت وعاتبت روحي عشان اتكلمت معاهو كبيت الشاي وختيت رجل على رجل وأنا بعاين ليهو بغضب، جاتو مكالمة طوالي نادى على أمي قال ليها ماشي باس راسها وهي دعت ليهو،
