" *سُيقال عنك ما ليس فيك ،وسيقال لك ما لا تحب ،وسيقال أنك فعلت ما لم تفعل ،فخذ العفو ،وأمر بالمعروف ،وأعرض عن الجاهلين* "...💙
#الشعراوي
🌸 *في ساحة إحدى الجامعات العريقة بالخرطوم* 🌸
ملاذ ماسكة في يد لين وبتعاتب فيها عشان إتغيرت معاها.
_ لين لين لين ،أفهمي حاجة واحدة بسس ، إنتي الوحيدة اللي مهما تعملي فيني وتسفهيني ح أفضل ماسكة في يدك كدة! إنتي يا لين صحبتي الوحيدة فااهمة علّي ،ما عايزة نخسر بعض عشان حاجة تافهة، عشان غيث؟! ههه ،يا بت غيث دا هو سمح صاااح ويستحق تكرشي عليه، بس ما يستحق تخسري صحبة قمر كدة عشانه والله ف بس
_ ما عارفة بس أعترف بالجد حركاتي معاك كانت باطلة شديد والله
_ حركات الوهميين دي بطليها نحنا واحد ، وكان على غيث إنتي ما شاء الله عليك أدب وحلاوة وكلو ما تحاولي تجذبيه ، حيتقاد ليك براهو، وصراحة صراحة الحُب السمح داك يا لين ما ليهو وجود غير في الروايات والأفلام، في واقعنا ماف ،ااي إنتي ممكن تحبي إنسان وتبني أحلامِك عليه وتحسي إنه ممكن يكون ليك سند حقيقي ،وممكن يشوفِك واحد ويتمناك تكوني أُم لأولاده وخزانة أسرارُه، وهنا ممكن يجمعكم رابط حلااال، غير كدة كلو هبل صدقيني، أنا كملاذ دا رأيي كدة😂
_ طيب ممكن سؤال؟!
_ أسألي يا ستي
_ يعني إذا طرح ليك واحد قرض ومقرش وأخلاقه حلوة، ما حترتبطي بيه؟
_ لأ ،العايزني يا لين يمشي لمؤيد أخوي ،أنا وراي راجل
_ غلط ، مفروض ترتبطي بالإنسان الحتعرسيه ، عشان تتعرفو على بعض، تعرفو ااي حاجة عن بعض، عشان ما تحصل خلافات بعدين
_ يلا ما هو العايزك ووصل لأهلك عديل دا معناها دا ود الناس العايز الحلال، وسلفاً بتكوني بتعرفيه ،دا ممكن تديه فُرصة وتحبي قدر ما تقدري، حُب الدسدسة دا حق الشُفع، نحنا كبرنا وعايزين نحب ونكون مطمنين ،نحب في العلن وما نخاف من زول، ويا لين لما تعرسي واحد وتبدو تكتشفوا حاجات جديدة عن بعض بعد الزواج دي متعة والله، بيكون عندك دافع يخليكم قريبين من بعض فاهمة، يعني ما ضروري تكوني عارفة ااي حاجة بالتفصيل عنه قبل الزواج، وحالياً نحنا فكينا من السيرة دي لأننا ما قدر عرس ،خلينا نكمل قرايتنا ونتخارج من البلد دي
_ كلامك منطقي، بس عمرنا حيضيع وحنكون اتحرمنا من الشعور العند الشباب اللي في عُمرنا
_ لين، أحلامنا بتستحق نضحي عشانها ،وربنا ما بظلم زول، الحُب ملحوووق، إطمني نصيبِك من الحُب ماف زول بيشيله
_ ورح ناكل يا ماما ملاذ، لما تقومي على النصايح صعبة وما بتسكتي تاني
_ "ضحكت" شفتي كيف مكنة أنا
