" *الفاصل بيننا خندقٌ عمقه كروحي تماماً، عرضهُ ما بيننا من أحلام ، أما طوله فيبتلعُ ما أتمنى في كل مرة* "...
#رينوش_محمد
نومت باسِل ،كنت بعاين لملامحه وببتسم، غطيته وطلعت برا لقت مؤيد بيعبي صحن الكلب أكل..
_ ممم مؤيد" نادته وهي بتشبك يديها مع بعض "
_ سامعاك يا ميسون
_ ااا عايزة أتكلم معاك في موضوع
_ ااهاا " قام مشى على الماسورة غسل يديه والتفت عليها "
_ اممم عايزة أرجع الجامعة أكمل قرايتي كفاية غبت شهرين لأني كنت مخنوقة وفكرت أبطل أقرا في لحظة ضعف بس
_ حلو جداً ،أصلاً كنت عايزك تعملي كدة بسس ااا حبيت يكون بطلبك إنتي ورغبتك إنتي ،نمش بكرة
_ تمام"كانت حتمشي بس جرا يدها"
_ حاسبت نفسي وقررت من هنا لقدام أعاملِك إنتي وملاذ كأب ما أخ ، لأن الأب ما بيظلم أولاده وبيحب يوفر ليهم كل السبل البتسعدهم ، واثق إنو أبوي لو كان عايش كان حيدلعكم شديد شديد، أصلاً البت حبيبة أبوها
_ ماف زول بقدر يشيل مكان أبوي، بس إنت ما تبطل تحاول لأني مكسورة منك يا مؤيد وفي نفس الوقت ماف زول بقدر يصلح كسرتي غيرك
"إبتسم فكا يدها ،هي مشت ناحية غرفتها وهو رجع يلمس شعر الكلب"...
عند عادل::
غياب ميسون كان درس عظيم وقاسي جداً في حياتي، إكتشفت إني أنا البحبها طول الوقت وأكتر من ما هي بتحبني والله،بس كنت بخبي الحاجة دي ورا حكاية إنها وصية صحبي الأخيرة،وبحاول أقنع روحي بإني ما عندي ليها حاجة،بسس كنت خايف من اليوم البتعرف فيه الحقيقة وتتخلى عني للأبد وللأسف جا اليوم دا وجات بعده أيام كتيرة كانت بمثابة عِقاب لي...💔
أنا واثق إن ميسون بتحبني برضو والقلب البحب ما بقدر يكرَه،إحنا ما اتطلقنا، أنا لسة عندي أمل إنها ترجع لي ،أنا اتعمدت ما أودي ليها أوراق الطلاق عشان تجي تواجهني، محتاج أشوفها مشتاق لكواريكها البتملى علينا البيت، بس هي عنيدة أكتر مني ما اتكلمت معاي في الموضوع وأصلاً ما قاعد ألاقيها، أحياناً بوصل علاء الدين الجامعة على أمل ألاقيها بس من غير فايدة، لما سألت صحباتها ،اكتشفت إنها ما مداومة من شهرين..!
حتى بمشي المكتب وطول فترة الدوام بقضيها تفكير ،ما بكون فاهم شي ،بديت أفكر في طريقة أشوف بيها ميسون ونتفاهم خطرت على بالي فِكرة إبتسمتَ بنَصر ، "زول فتح باب المكتب بقوة خلتني اتخلع والتفت سريع" كانت وعد ...
_ عادل نحنا ممكن نتكلم
_ أطلعي برا
_ ما من حقي أتكلم معاك
