" *الفُرصة الثانية لا تُمنح لمن بدل حُبنا وبدلنا،ولا ذاك الذي جعلنا نذرفُ الدمع بسخاء،ما رأيكَ أنت* ؟ "...
عند ميسون::
صحيت من الصباح بدري صليت،وجهزت عشان امشي الجامعة،باسِل كان نايم ،جهزت ليه علبة الأكل وحاجاته، بستُه على خده ،كلهم كانو نايمين صحيت ملاذ كانت بتتكاسل وبتفك يدها مني
_ خلييييني انوم يااخ
_ عايني عملت الشاي يلا قومي عشان تلحقي الجامعة
_ أنا محاضرتي بتبدا ١٠
_ المهم انا إتأخرت جهزي باسل وصحي مؤيد وأمي يلا باي
_ باي باي
شلت شنطتي وطلعت، في الطريق اتصل عادل كذا مكالمة بس ما رديت اتأففت،و عملت التلفون سايلنت.
وصلت الجامعة،،،،بعد دوام طويل وممل ، عاينت لجدول الإمتحانات النهائية، أخدت نفس وقلت: خلاااص يا ميسون قربتي للنهاية، أول ما تمسكي شهادتك في يدك حتنسي كل الهموم والمشاكل دي،،، وانا سرحانة جات واحدة من صحباتي قالت لي : تعالي نشرب قهوة، إنتي طبيعي منعزلة كدة؟ قربنا نخلص ونودع الجامعة الفقر دي للأبد
_ حرفياً ،أرح أصلاً الليلة مزاجي رايق 😅
قعدنا في مكان القهوة ،اتونسنا كتير ،جا خالد قرَب الكرسي بتاعه مني وقال لي بهمس: دي الليلة طلعت منك كيف؟! "ريحة السجاير كانت فايحة منه وبتخنق"
_ م فهمتك
_ قصدي ما من عاداتك يعني تقعدي مع الناس وكدة ،دايماً منعزلة
_ ما منعزلة والله أبداً ،بس طبيعي مشغولة وما بصدق أول ما الدوام يخلص بجري على البيت
_ ليه ؟ متزوجة إنتي؟😅
ما قدرت أرد، هسي أنا لا متزوجة ولا مطلقة ما عارفة زاتي أنا شنو ؟!!! اتدخلت ريم : ههه أجييي يا خالد أصلاً ميسون متزوجة من زمان كمان
خالد : ما جادة طبعاً
ريم : والله جد ،تتذكر مرة كنت بتمدح لي فيها ،قلت ليك أعمل حسابك وراها راجل
خالد : ما انا ااا إفتكرتك بتهظري "بقى يعاين لي بإستغراب" إنتي بالجد متزوجة؟ من متين؟
ميسون: اااا من السمستر الأول
خالد : اااا، هههه ما شاء الله، ربنا يخليكم لبعض
ميسون: " حسيت إني مخنوقة وما قادرة أكمِل إكتفيت بإني أبتسم وألف وشي منه ،كان لسة بيعاين لي بنفس النظرات حسيت بالزعل في ملامحه، يلا خالد دا ما عندي بيهو علاقة ،اتعرفت عليهو في نهاية سنة رابعة و السمستر الفات كان بلاقيني مع ريم بجي يسلم ويسألنا عن الإمتحان اشتغلنا كيف ويمشي،وبداية السمستر دا شال رقمي من ريم وكان بسألني ليه ما قاعدة أجي الجامعة في الشهر اللي غبته ف بس ،ما حاسة إنو بيكن لي مشاعر أو كدة اتحاشيت نظراته.حرفيا بعد فتحو معاي الموضوع بديت اتذكر عادل واتضايقت شديد القهوة ما قدرت أكملها وما قادرة أركز مع ونستهم ،شلت شنطتي استأذنت منهم ، بقو كلهم يترجوني عشان أقعد عدا خالد بس رفضت ومشيت...
