"*إنني وبعد الآن لا أجد شيئًا يُخلصني من الصمت،
ثمة شيء مكوّم هنا،لربما قلب يحترق* "
بعد أيام: -
جيت من الجامعة مرهقة شديد، وما قادرة أقيف على حيلي، أصلا البلد دي تعبانة واحتمالات الراحة فيها شبه منعدمة،يعني وضعك لو ما باسطة تتبلى لمن ماف طريقة مواصلات وضربة شمس وقرف...
اتسطحت على السرير وجزمتي ما قادرة اقلعها بعاين في السقف البيت كان هادئ، امي ما في المطبخ، ابوي ما في الصالون ولا غرفته ولا في الشارع،مشو وين ديل؟! علاء خليته في الجامعة محاضراته ما خلصت،عادل تلفونه مقفول كالعادة وأنا دوامي خلص بدري ما قدرت انتظرو، ف ما كان عندي مفر من المواصلات ..شلت نفس وبديت افكر بس المرة دي تفكير بعييد ما عندو علاقة بالحاضر،المرة دي خطر على بالي أبوي (محمد خير) ابتسمت....
*يلا يا حلوين تعالو نسافر في ذاكرة ميسون شوية عشان تتعرفو عليها أكتر، هي منو وعاشت كيف أربطو أحزمة التخيل*
-أبوي عايزة 5الف
-وانا برضو يا ابوي قالو لي اجيب قروش الامتحانات
-يااخ بنات غياظات، خلو الحاج دا يرتاح متين جا ابوي دا؟!
اسمعني يا ابوي انا والشباب عاملين رحلة سياحية الشير 30الف
(ابوي عاين لينا مسافة وشال الحزام كلنا قمنا جاريين من جنبو)"حركاتو البيعملا لما نطلب منه قروش"
-والله يا حاج انت مكنننة عديل وصلت مستوى بعيد في اللعبة دي
-ابوك معلم من زمان يا مؤيد
*هوامش من ذكرياته قبل الرحيل*
-يا أمي عايزة قروش ضروووري
-أمشي لأبوك
-أمي أنا زهجانة
-مش متعودة تتونسي مع أبوك ما تزعجيني
-أمي يا أمي أبوي مشى وين؟
-يااخ تقول اول مرة يتأخر ابوكم دا حيجي..
*قبل كل شيئ كان أبي صديق لنا،كان بوتقة أمآن*
"في يوم ما متوقع"
جيت من المدرسة مبسوطة بضحك برااي بعد ودعت صحباتي الما بحبهم بدموع الوداع الكاذبة 😅الليلة آخر امتحان للشهادة السودانية، كان انجليزي والاسئلة جات حنينة شديد، سعادتي كانت ما بتتوصف خلاص خلصت تالت يا ناس وحأخش الجاامعة يا صيدلة جاك زول "رغبتي💙" لقيت ابوي جنب الباب لابس جلابية وشكله كان طالع، اول ما شافني ابتسم ابتسامة عريضة جراني من اضاني قال لي: الدكتورة..أهاا آخر امتحان كان كيف؟
ميسون: حلووو حلو شديد يا ابوي
-اصلا واضح من ضحكتك
- "زدت الضحكة مسكت شنطتي وبقيت ادور حول نفسي " ابوي إنت حتقدم لي صيدلة صااح؟
