Uni
ကျွန်တော် မနက် အိပ်ရာနိုးတော့ အခန်းထဲဝင်ပြီး ရေချိုးလိုက်ပါတယ်
ရေချိုးခန်းမဝင်ခင်ကတော့ အမှတ်တမဲ့ ဖြစ်နေပေမဲ့ ပြန်ထွက်လာတော့မှ ကျွန်တော့်အခန်းနံရံတွေ ရှင်းလင်းနေတာကို သတိထားမိပါတယ်
နံရံက ဓာတ်ပုံတွေကို ဖြုတ်ပြီး အထပ်လိုက်ပုံထားတာပဲ
ကျွန်တော် အဝတ်အစားလဲနေတုန်း မီးလေး အခန်းထဲ ဝင်လာပါတယ်
"ဦး ရေချိုးပြီးပြီလား
ပြီးရင် မနက်စာ ပြင်ထားပေးတယ်"
"အင်း....လာမယ်"
"ဦးတို့ ဓာတ်ပုံတွေ မြန်မာပြည် ပြန်သယ်ဖို့ မီး ထုပ်ပိုးထားလိုက်မယ်
နေ့ခင်းကျမှ ဧည့်ခန်းက ပုံတွေ သိမ်းရမယ်"
"မြန်မာပြည် ဘာလို့ ပြန်သယ်ရမှာလဲ
သယ်တဲ့စရိတ် နည်းမှာ မဟုတ်ဘူး"
"ဦးတို့ ဒီကိုတောင် စရိတ်အကုန်ခံ သယ်လာတာပဲ မလား
ပြန်သယ်ရမှာပေါ့
မီး ပြန်ရင် တခါတည်း သယ်သွားပြီး ဦးအိမ်ပို့ပေးမယ်"
"အင်းပါ မင်း သဘောပဲ"
ရုံးချိန် နောက်ကျမှာစိုးတာကြောင့် ဆက်ပြောမနေတော့ဘဲ မြန်မြန် စကားဖြတ်လိုက်ပါတယ်
ထမင်းစားပွဲမှာ ထိုင်လိုက်တော့ ကော်ဖီတစ်ခွက်နဲ့ ချောကလက်တစ်ခု ချထားပါတယ်
"မနက်စာက ဘယ်မှာလဲ"
"အဲ့မှာ ပြင်ထားတယ်လေ"
"ချောကလက်က ဘာလုပ်ဖို့လဲ"
"ဦး စားဖို့လေ....
ဥာဏ်ကောင်းအောင်"
"ဘာ....."
"စတာပါ
အိမ်မှာ ဘာမှမရှိဘူးလေ"
"အေးပါ ကော်ဖီပဲ သောက်တော့မယ်
ရုံးနားကျမှပဲ စားတော့မယ်
နောက်ကျတော့မယ်"
ကျွန်တော် ကော်ဖီသောက်ပြီးတာနဲ့ မြန်မြန် ထွက်လာလိုက်ပါတယ်
ရုံးမရောက်ခင် အလုပ်ဖုန်းဝင်လာတာနဲ့ မနက်စာကို ဆိုင်မှာ ထိုင်စားမနေနိုင်ဘဲ ဘာဂါတစ်လုံးပဲ ဝယ်သွားလိုက်ပါတော့တယ်
"ကိုရှိန်း မနက်စာစားပြီးရင် meetingစမယ်တဲ့"
meetingခန်းထဲ မဝင်ခင် အိမ်က ဖုန်းဝင်လာပါတယ်
