....مُقتطفات….
أيلين : هاا يـبن عمي ياهو حصتكم اليوم ؟.
فلاح : هههه ، ليش انه خليت واحد ؟
أيلين : حقك چاا غير موش گدها تسوي هيج و هُمه موجودين .
اتقرب فلاح لأيلين اكثر و جان يباوعلها بنظرات مُستفزه و گال ..
فلاح : گدها موش گدها المُهم سويتها ، و اليوم يومي و شوفي شسوي .. من طردتي عباس و انه حاطج ابالي و گطعت وعد وي روحي خشمج هذا الرافعته بجال اخوج الا اكسره و انزله الج .
أيلين : هههههه ليش عبالك مثل هاي النسوان انه ؟! .. اعلى ما بخيلك اركبه .
فلاح : اعرفنج گويه و هذا اليعجبني بيج .
أيلين : شعبالك اخاف منك ؟
فلاح : بعدج بعدج ما شايفتني عدل .
أيلين : هههههههههه ، انه تريدني اخاف من واحد انهان گدام عمامه و ولد عمه و مرته و ظل ساكت ؟
فلاح : ما سكتت و جاي اوخر العقبات وحده وحده ، و اولهم اخوج الجاني تالي وكت و يريد ياخذ مچاني ، الصار هسه جنازه متانيه يدفنونها !
ام أيَهم : يُمهه وليددييي .
هبه : أيَهم !
أيلين : وحگ الخلگني ما اخاف منك و لٱ تهز شعره مني لو جايب وياك جنازة اخوي أيَهم ، انه ذيبه و ما اهاب بس الذياب موش البعاير !
و حجاية أيلين جانت اهانة چبيره و ڪُلش واضحه ، و فلاح ما سكت و رفع ايده يريد يضربها بس اجته طلقه بأيده نحثرت دمه بالگاع !
و هاي الطلقه طلعت من سلاح چسَر الـزلمه لزموا عباس و طلعوه شمروه بالسياره و رجعواا محاوطين فلاح الـجان يون من الوجع و يباوع لـچسَر بغضب عارم !
چسَر : انتهى وكتك قبل لٱ يبدي يـالشيخ !
______________
أيلين : چتاالل عميي .
چسَر : شبي چتال عمج احجي ؟
أيلين : چچ چتاللل ع عميي هناا بالمستشفى ويانه ..
چسَر : شنووو !!، احجيي وينن بياا غرفه بسااععع گولييي .
أيلين : هذا هنااا ..
مشيت و مشه هو ورايه بسرعه ، وصلنه الغرفه و الحمـد اللـهَ بعدهم بيها ، دخلل چسَر بهدوء و من شافه گاصد رجف و گال ..
گاصد بصوت مهزوز : ش…شيخ چسَررر !.
چسَر : عشر دقايق ، اطيني بس عشر دقايق و تشوف ال قحطان كلهم گبالك .
_______________
و وصلتني رجليه لچرف الشط و اخذت نفس بقوه اريد اطفي نار گلبي و جان الهوى حيل عالي ، باوعت للشط جان چبير و ناگص و شباج السماجه موجوده ، ظليت واگفه ربع سَاعـه صافنه عليه و افكر اسويها لو لٱ ؟، و بدون ما احس وزني الشيطان و گلت خل اخلص !..
تگربت رجليه للچرف حيل و بـهبَـة ريَح اطيحن ، مديت اديه و طارت العبايه من الهوى العالي وگعت بالگاع و حسيت اختل توازني و وگعت !
غرگت و لگيت روحي اصارع و ارافس و اصيح حتى اعيش ، حاولت و رافست و ظليت ارتفع و اغرگ لمن حسيت الماي دخل ريتي و ما گدرت اتنفس ، و مر ذاكه شريط حياتي گدامي بـجزء من الثانيه !
اول خطواتي بـديوان جدي ، من نولدت هبه و جنت گاعده بحضن جدي غيرانه من هبه البعدها بالگماط !، و جدي من لاعبني على سيارته و عافني و راح و ظليت اصيح و محد يسمعني ، ابوي من جابلي اللعابه الجانت رايدتها و رحتله اركض ابوس بي ..
و من جنت واگفه بالباب مختله نص جسمي و ابجي من اشوف جدي و ابوي و عمامي يتعاركون و واحد واگع بالگاع ، و شردتنه بنص الليل و شلون ابوي جان خايف علينه ، جيرانه و لقائي بـجوليا و اول يوم اداوم بي ، و ذكرياتي بالمدرسه كلها ، و من رجعت بذاك اليوم الاگشر و شفت سيارات عمامي ساده الشارع و من دخل ابوي و گال لازم نرجع ..
من ودعت جوليا و عمتي بدموع و جنت ما رايده هاي الرجعه كلها ، من فتحت عيوني و شفت عمامي و استقبالهم النه ، عماتي و نسوان عمي و هبه و شلون ملگانه صار ، من گمت اخذت ماعوني و گعدت يم هبه ،
من اجه أيَهم و تحرش بيه عباس و طردوه ، و چتال عمي النقذته بأيدي من الموت .. و چسَر !
چسَر و هيبته و شخصيته الخلتني انعجب بي من سحلني و حماني وره ظهره ، من وگعت بحضنه و رجعني لهلي ، و اخر شي تذكرته قبل لٱ اموت هو أيَهم و موته و ابتسم و گلت بلكت نتلاگه يم ربنه ، و انتهى ڪُلشي حسيت روحي غرگت و وصلت للگاع و ما اگدر اسوي ڪُلشي ، استسلمت و غمضت عيوني و نگطع نفسي گد الماي الترس ريتي !
____________
ْ
ابدءُ روايتي بـأسم خالق الكون و كُل انشً به ، بسم اللّٰـهِ الرحمن الرحيم .
انتظروني فـي روايتي ..
لاڤـندر ..
لزهـراء أل عـلي .
ْ
يتبـع ...
أنت تقرأ
لاڤندر .
ChickLitرأت زهرة لاڤندر عند جيران عمامها فـغيرت لـها هذه الزهرة مجرى حياتها !.. رواية حقيقه حدثت في العـراق في شتاء ٢٠١٤ ، فـتاة مـن شمال الـعراق تجد نصيبها فـي جنوبـهُ . - بـقلمي أنا .. زهراء أل علي . - باللهجة العراقية . - روايه تحوي بين كلمات سطورها العُ...
