لو قلت لقلبي توب عيني تكذبني

الجزء الخامس عشر

جلس جمبها بهدوء وهو يسمع تبريكات الكل اللي يهنّيْهُم واللي يبارك لهم وجابو لهم الدفتر و وقعو وزغرطو الحريم
قامت ليان وهي تشغّل اغنية هادئة ورومنسية وقف الليث وهو يمسك يدها و وقفت معه
حاوطها من خصرها وهي حاوطته من رقبته ودفن وجهه برقبتها ويرقصون والبنات خاقين مرا على منظرهم
الليث : توجعين قلبي تدرين ولا لا ؟
سكتت مناهل وحست بقشعريرة من باس نحرها و وقف رقص وضمها لصدره بقوة وقال : ابي ادخلتس بضلوعي محد يشوفتس غيري
مناهل : كسرتني الله يسلمك
ضحك وهو يبعد عنها وقالت ام فهد : تقدرون تدخلون غرفة لحالكم
ابتسم الليث وقال : وقته يا خالة الله يحفظتس مشكورة
مسك يدها وهم يدخلون لمجلس الحريم الفاضي
جلس وهي جالسه على فخذه ويدها محاوطة خصرها ويده الثانية ماسكة يدها
كان للحين يطالع فيها مايبي يرمش رمشة وحدة
الليث : وش مضيق خلقتس ؟
مناهل : وش مضيق خلقي ؟
الليث : انتي
مناهل : وش فيني انا ؟
الليث : متضايقة لتس فترة
مناهل : انا متضايقة ؟
الليث : لا انا
مناهل باستغباء : ما لاحظت عليك انك متضايق
مسك فكها وهو يلفها له وقال : لاتستهبلين
مناهل : ليه انا استهبل ؟
طالع فيها بحدة وقال : الفترة ذي صايرة ترفعين ضغطي حيل
وقفت مناهل وهي ترتّب فستانها وشعرها وعيونه عليها
ومشت متوجهة للباب
الليث : وين ؟
مناهل : خلاص بروح للبنات
الليث : تو ماكملنا 10 دقايق
مناهل ببرودة : مايهم
وقف وهو يسحبها وحاصرها بالجدار وقال بحدة : وش فيتس ؟
مناهل : ابعد عني خلني ادخل داخل مابي شوفك ابد
ابتسم الليث وقال : بتشوفيني مرتين بالاسبوع تدرين ولا لا ؟
عقدت حواجبها باستغراب وقال : متفقين انا وابوتس اني اشوفتس الاثنين والخميس الاثنين نطلع بالسيارة والخميس اجي عندتس للبيت
مناهل : يصير خير
الليث : بكرا خميس
مناهل : يصير خير
الليث : مابتقولين يعني وش بلاتس ؟
مناهل : ابي اطلع
حطت كفوف يدينها على صدره وهي تصد عنه وتبعده عنه بشويش وطلعت وهو منقهر
الليث : نشوف وش نهايتها يا مناهل
طلع الليث وهو يدخل للرجال
ماجد : مبروك يا ابو زايد
الليث : الله يبارك فيك
احمد : منك المال ومنها العيال
الليث : امين وعقبالكم جميع
قالو العيال بصوت واحد : اميين
عمار : ياسر وقصي بعلم عليكم حريمكم
ياسر : بصفقك هاه
عمار : ششش
شغلو العيال سامري وقامو يرقصون وحتى الرجال قامو يرقصون معهم
●
●
●
عند البنات كانو مشغلين اغاني و دخلو الكتاب لمرام و وقعت يعني كانت ملكتين ملكة مرام ومناهل
مرام : تزوجت يا بناات
دخلت ريوف وهي تقول : نايف ينتظرك بالمجلس
قامت مرام بدلع وهي تستهبل والبنات يطالعونها بطرف عين ودخلت عند نايف
طالعها نايف وهو يبتسم وقال : حي الله بحبيبة قلبي
ضحكت وهي تشوفه فاتح يدينه ومن قربت منه حضنها وهو يبوس رأسها وقال : مبروك عليك انا
مرام : الله يبارك فيك وانت بعد مبروك عليك انا لاتموت على نفسك حيل
ضحك نايف وهي يجلس ويجلسها بفخذه
نايف : ايوه شلونتس
مرام : مأثرين بلهجتك اهل ليث
نايف : الظاهر ، اسمعيني الحين
مرام : كلي اذن صاغية
نايف : ابي زواجنا بأقرب وقت
مرام : وتجهيزاتي ؟
نايف : شهر تجهزين نفسك وشهر الزواج يعني بعد شهرين نتزوج
مرام : قريبة مرا شف مناهل وليث بيتزوجون بعد 5 شهور
نايف : حنا مناهل وليث ؟
مرام : لا
نايف : اجل ماعلينا فيهم انا ابيك اليوم قبل بكرا وزين اني ماسويت زي اهل الديرة وقلت بعد اسبوعين
ضحكت وهي تحط كفوف يدينها بوجهه وقالت : اللي تبيه تبشر به كلامك مابعده كلام
ابتسم وهو يبوس باطن كفها وقال : ياجعلني فدا ذا الضحكة يارب
مرام : شدعوه بس الضحكة روح فدا لي كلي
نايف : لا ياحبيبي ابيني
مرام : ابيك انا
قرب منها وهو يطبع قبلة على نحرها وهي قالت : فك عيب
نايف : حرمي ولا انا غلطان ؟
مرام : اي بس عيب
نايف : انقلعي داخل
ضحكت وهي تبوسه من خده وطلعت وهو متخرفن مرا
نايف : يارب خلي هالشهرين يومين
ضحك على نفسه وطلع للرجال
مرام : يارب يجنن يجنن يجنن ياحظكم يا خواته فيه
نوف : هذا اللي ناقص تحسدنا فيه الحين تجينه وتلصقين ماتفكين اصبري فترة بس
ضحكت مرام وشغلو اغنية وقامت هي ومناهل يرقصون والكل يسمون عليهم
مرام : عاشت بنت هادي عاشت
ضحكت مناهل وهي تمسك يد مرام ويتمايلون بخصرهم بشكل يجنن
بدور : لا اله الا الله كل وحدة تقول الزين عندي
كيان : منجد ما شاء الله عليهم
انتهى اليوم الجميل اللي جمع مناهل والليث و نايف ومرام
●
●
●
اليوم الثاني
يوم الخميس الساعة 8 ونص العشاء كانت مناهل جالسة مع البنات والحريم يسولفون ويأخذون احوال بعض لين دق جوالها وقامت للمطبخ : هلا
الليث : هلابتس زود
مناهل : آمر ؟
الليث : انا بالملحق
مناهل بملل : تمام
طلعت مناهل للملحق من باب المطبخ ودخلت وشافته منسدح على السرير
مناهل : وش ؟
جلس وهو يضرب السرير بشويش بمعنى " اجلسي "
جلست جمبه بس كان في فراغ بسيط بينهم
الليث : ليه تبعدين ؟
مناهل : طلبت مني اجي تبي شي ؟
الليث : مناهل اسألتس ليه تبعدين ؟ معد صرتي زي ما كنتي كنتي تحبيني وتموتين فيني الحين اشوف الكره بعيونتس ليه ؟
طالعت فيه بنظرات باردة وقالت : اللي يطالع غيري انا ما اطالعه ابد
الليث : مين طالعت ؟
مناهل : مو لازم اقول لو تتعب نفسك شوي وتتذكر تعرف مين طالعت ويد مين مسكت المهم بغيت شي مابي اطول عن الحريم
الليث : مناهل يرحم لي والديتس لاتلغمين كلامتس
مناهل : لو جلست تصرّ علي اكثر كلامي بينفجر بدل مايصير ملغم
الليث : وش مضايقتس فيه انا ؟ يعني والله انا ما جاز لي الوضع خلني ازعل ! طيب اوك تبين تزعلين ازعلي بس علميني وشوله تزعلين عشان اراضيتس ولا تبين تزعلين وتخليني زي الفاهي مدري وش مسوي لا تصدين وانتي تدرين اني ابيتس
مناهل : ابي ادخل داخل
تربع وهو يمسك يدينها وحطها على جبينه وقال : تكفين قوليلي وش فيتس
بعدت يدينها عنه وقالت : تجاهل اللي فيني لأنه مافيني شي
رفع رأسه وهو يطالعها بنظرات رجاء وحست بالضعف
مناهل بقلبها : مناهل لا تضعفين صد عنك شهرين طول الوقت وهو يبعد عنك واذا جاء يجي يهاوشك ويسفل فيك يخليك العن مخلوقات الارض خليه يحس بغلطه
مناهل : انا بدخل
مشت و وقفها صوته وهو يقول : بجيتس يوم الاثنين نطلع نجهز بيتنا
شدتها كلمة " بيتنا " لكن قوّت نفسها وهي تحس انها لازم يتعاقب على الفترة اللي كان يخليها تكره نفسها بسببه
طلعت بصمت وهو قال : وش النهاية ؟ بعد 5 شهور بنصير زوج و زوجة ؟ او بينتهي طريقنا قبل لانصير نصيب بعض ؟
مسح دمعته بطرف شماغه وطلع لبيتهم
ابو صقر : مسرع رجعت ؟
الليث : ابد يبه كلمتها ورجعت
طالعو فيه كلهم و واضح الضيقة من عيونها الحمراء وعروقه البارزة
ابو صقر : تعال اجلس جمبي
الليث حس انه بيضعف قدامهم وقال : بروح انام تعبان
ابو صقر : بكلمك وبعدها رح
جلس الليث جمب ابوه وهو ينزل رأسه ويخلل اصابعه لشعره ويشد على رأسه
ابو صقر : في شي صاير بينكم ؟
الليث : لا
ابو صقر : لاتكذب
ام صقر : حتى انا شايفة فرحتها امس ما كانت زي فرحتها بيوم الخطوبة ؟
الليث : مافي شي
اريج : للمعلومية تراها شايلة بخاطرها عليك واجد ولو حركت اصبعها لاخوانها باتجاهك بيهلكونك لأن اللي مسويه انت معها مب قليل
رفع الليث وهو يطالع اريج وقال : وش تقصدين ؟
اريج : يوم جو عندنا الصبح سمعت اختها وقريباتها يتكلمون ويوم رحنا عندهم يوم قامت تبكي ولحقتها اختها سمعتهم وش يقولون وبرمضان يوم عزمونا سمعت وش كانت تقول وبشعبان يوم عزمونا سمعتهم وبعد الخطوبة بكم يوم سمعتها وكل مرا كانت الضيقة توضح بصوتها اكثر اقولك يا ليث ان ماوقفت فطيم عند حدها ابصم لك بالعشر انك انت ومناهل مارح تكملون مع بعض
صقر : وش تحس فيه يوم مسكت يد فطيم قدام خطيبتك ؟
ذيب : وكلهم شافو لكن تجاهلو
لين : وانا من بداية الجلسة كنت جالسة جمبها واسمع تمتمتها وسكت
ذياب : فاطمة كلنا ندري انها تحبك ومستعدة تذبح مناهل عشانك
آسر : وحط شي واحد براسك ان مناهل لو احد يضرها بلمسة اصبع والله تهلكه ولا تلتفت له يا يبه قل لعمي يقضب بنته واذا ما قضبها يتحمل الضرر اللي بيجيها من مناهل واهلها
ابو صقر : كل ذا صاير ومحد يقوله ؟
الليث : اريج وش سمعتي ؟
اريج : كانت تقول من بعد سالفة فطيم اللي صارت بالمول وانت صاير حساس ما تتقبل منها اي شي وصرت تصد عنها وتبعدها عنك ومعد صرت تطيقها وتقول انك تحب فاطمة وتقول انك تروح من عندها مبسوط وترجع لها متكدر بيجي اليوم اللي بتنفجر فيه عندك ولا تتضايق امسكها وخلها تقول اللي بخاطرها لك
الليث : قاعدة تصدني مهي راضية تقول لي وش فيها اذا سألتها وش فيتس تستغبي
كيان : تذكر وش قلت لمناهل بالمول ؟
الليث : وش ؟
كيان : قلتلها " اذا كرهتتس رح اكرهتس ولا اهتم انتي مين و وش كانت مكانتتس بقلبي " وش تتوقع ردها لك بعد ذا الكلام انا يوم سمعت قريباتها يقولون انك قلت لها كذا توقعت تتركك بس طلعت اعقل منك تقول لها هالكلام عشان فطيم اللي محد سلم من مشاكلها
لين : اسفة بس اكتشفت انك مو صاحي
طلع الليث غرفته وهو يحاول يجمّع تصرفاته وكلامه واسلوبه مع مناهل وادرك انه غلطان بحقها وكثير
انسدح وهو يفكر شلون يراضيها لين غلبه النوم من زود التفكير
●
●
●
في بيت ابو فهد
كانو البنات جالسين ويسمعون لسواليف مرام اللي كلها حب
ميهاف : اللي يسمعها يقول محد تزوج الا هي
ضحكت نواهل وهي تقول : الله يكفينا شر الحب وطواريه
لفو البنات كلهم لنواهل وقالت سمر : نواهل انتي ماحبيتي ؟
هزت ب " لا " وقالت : للحين محد خلاني احبه
الاء : يعني معقولة محد خلاك تحبينه ؟
نواهل : لا
كملو البنات سواليفهم وكله كان عن الحب والخرفنة وكذا ومناهل ساكتة ونواهل تطالعهم بابتسامة
في واحد شدها بهدوءه وفخامته وهيبته و سكونه وثقله مايتكلم مع احد ابد الا اذا توجهه الكلام له نطق شدها جماله شخصيته اسلوبه مع الناس فعلا شدها بكل مافيها لكن ماحبته بس انعجبت فيه ممكن يتحول هالاعجاب لحب ؟ ومين هالشخص ؟ رح نعرفه بالبارتات الجاية