لو قلت لقلبي توب عيني تكذبني

الجزء الثامن والخمسين

الساعة 1 بالليل
في غرفة الليث
مناهل : ليث ، لييثث
قام الليث وقال : هلا حبيبي ، في شي يوجعتس ؟
مناهل : لا ، بس ابي اتحرك وعجزت
الليث : وين تبين تروحين ، مناهل ابوي لا تتحركين وانتي تعبانة خليتس كذا مرتاحة
مناهل بنبرة باكية : ليث ملييت طفشت وانا كذا هذا وهو اول يوم ، لو مرت باقي الايام اقعد كذا متصنمة ؟ مابيي
قعد الليث وهو يقربها لحضنه ويمسح شعرها بحنان وهي تبكي
الليث : طيب ياحبيبي طيب ، قوليلي وين تبين تروحين وابشري انا بوديتس
مناهل : ابي امشي بالبيت احس رجلي يبست
الليث : طيب بس شوي تتعشين و تأخذين علاجاتتس و تقومين تمشين
مناهل : لا لا ابي انزل اتعشى تحت
الليث : تمام احتريني اغسل وجهي
مناهل : طيب
قام الليث وهو يرجع ظهرها على ظهر الكرسي ودخل للحمام ( الله يعزكم ) غسل وجهه و توضأ لصلاة الوتر وطلع ما لقاها
الليث : يا رب حنا والعناد ماتقدر تسمع الكلام والله لو تموت ، ذي لو تسمع كلامي تنطح السحاب
طلع وهو يشوفها مستندة على الدرج وتنزل بشويش وراح لها بسرعة ومسكها ونزلها بشويش
الليث : وش قايل لتس انا ؟
مناهل : طولت علي وضقت
الليث : لاحول ولا قوة
لفت تطالعه وتجمعت الدموع بمحاجرها وقالت : طفشت مني ؟
الليث : لا والله مب ذا قصدي
مناهل : الا يا ليث طفشت مني ، خلاص وخر انا بسوي كل شي بنفسي مابي اتعبك معي
الليث : مناهل يا حبيبي والله ماكنت اقصد كذا
طنشته وهي تستند على الدرج وتنزل بشويش وهو وراها
مي بهمس : اعوذ بالله توها مسقطة امداها تقوم تمشي
ندين بهمس : عساها تطيح و تتقلب يا ربي
نزلت مناهل وهي تطالع فيهم وقالت : حشو حشو خذو راحتكم
الليث بحدة : مناهلل
لفت مناهل وهي تطالعه بحدة ومشت وهي تمسك بطنها بألم وراحت للمطبخ تطلع الخضار وبدأت تقطع البصل وسرعان ما مسك الليث يدها وسحب السكينة بشويش وقال : انتي قولي وانا بسوي
مناهل : مابي اتعبك انا اقدر اسوي واذا تعبت بقطع وانا جالسة
الليث : مناهل ، وش اقول انا ؟
رمت السكينة وقعدت وقالت : يلا سوي اللي تبي و كل انت
طلعت من المطبخ وهو عصب لكن كتم غضبه عشان مايسوي شي يندم عليه بعدين
الليث : استغفر الله يارب صبرني
اخذ السكينة وجواله وهو يشوف مكونات الشوربة ويسويها

اليوم الثاني 
قامت من النوم و تروشت ولبست فستان قصير وعاري حتى صلاة ما صلّت
ندين : ياخي قسم بالله علي جمال و كشخة جبااااااارررة لا اله الا الله
تعطرت بعطر يجذب مراا ولبست عبايتها و قامت تلتفت يمين ويسار وجاء الليث من وراها وهو يطالعها من فوق لين تحت
الليث : على وين بهالشكل ؟
فزت ندين وقالت : هاه ؟
الليث بحدة : من قال هااااهه سمعع على وينن بذا الملاابسسس
ندين : ولا مكان
الليث : وليه لابسة عبايتتس ؟
ندين : اصبر بشرحلك طيب
الليث : يلا هذاني انا اسمعتس اشرحيلي
ندين : انا معي فلوس واستأجرت شاليه وعلى اساس بروح وبجهزه وبدق عليك تجي ونقعد مع بعض
الليث : و تتوقعين بترك مناهل عشان ذا السخافة ؟
ندين : ليث لا تفرق بينا اوكي هي تعبانة بس لاتشوفنا سخيفات عشانها ، من يوم طلعت مناهل من البيت معد صرت تعطينا وجهه زي قبل ادري انك تحبها اكثر مننا بس مو كذا ياليث
مسح الليث وجهه واستوعب انه مقصر معهم
الليث : طيب يا ندين ادخلي غرفتتس وانا شوي وجايتس
ابتسمت ندين براحة لأنه ما كشفها ودخلت بالغرفة تكلم احد .
راح الليث عند مي ودق الباب
مي : ميين ؟
الليث : انا
قامت مي بسرعة وفتحت الباب وقالت : هلا حبيبي صباح الخير
ابتسم الليث وقال : هلا فيتس صباح النور ، شلونتس ؟
مي : مو تمام لين شفتك صرت طيبة
حاوطها من خصرها وهو يبوسها بخدها وقال : عساتس دايم بخير
مي : اذا انت حولي اكيد اني بخير
الليث : انا اليوم بقعد عند ندين ، باكر بجيتس طيب ؟
مي : اوكي
طلع الليث وراح لغرفة ندين وترك مناهل بغرفتها نايمة
●
●
●
في المبنى
وصلو ذيب و ذياب وهم يروحون للفريق عصام و وقعو حضورهم و بدأو شغلهم
ذيب : وينه آسر ، طالع من البيت من زمان بس مب شايفه هنا
ذياب : يمكن انه بالمبنى الثاني
جاء جلال من وراهم وقال : اللواء آسر يبيكم
ذياب : جايينك الحين
راح جلال و ذيب وذياب وراه ودخلو لمكتب آسر و ضربو له تحية
آسر : استريحو ، وش صار ؟
ذياب : رايحين الحين نشوف
آسر : عطني عنوان البيت انا اروح له
ذيب : بيت عم جمعان
آسر : تمام
وقف آسر وهو يدخل جواله وبكت الدخان بجيبه و طلع راجع لبيتهم
آسر : استغفر الله ، امحق جار والله العظيم
دق الباب و طلع لها جمعان
جمعان : تزعجون العالم من الصبح ؟؟؟
طلع آسر هويته وقال : معك اللواء آسر بن زايد ال فيصل
جمعان : طيب ؟
كتم آسر ابتسامته وقال : مسوي كاميرات على الشارع ياعمي ؟
جمعان : ايه ، وش تبي ؟
آسر : تسمح لي اشوفها ؟
جمعان : عندك تصريح ؟
آسر : عندي الله يحفظك تفضل
عطاه ورقة التصريح ودخل يوريه كاميرات المراقبة
آسر : ابي هالتسجيل
جمعان : معليش ما اقدر اعطيك مابي ادخل بمشاكل انا
آسر : وش مشاكله الله يحفظك هذول عصابة خطر على الناس نبي نمسكهم ومايقدر يساعدنا الا هالتسجيلات
جمعان : آسف انت قلت تبي تشوف ماقلت تبي تأخذ التسجيلات
آسر : مارح تدخل بمشاكل على ضمانتي ، اتركك من اللواء انا مب لواء انا جاركم ابن ابو صقر ، والجار للجار ياعم جمعان
جمعان : الله يحفظكم بس تسجيلات مانيب معطي
تنهد آسر و طلع من بيت جمعان ورجع للمكتب
عصام : شفت ؟
آسر : اي شفت التسجيلات بس ماشفت من البداية شفت من الوسط
عصام : شفتهم ؟
آسر : شفتهم
عصام : طيب وين التسجيلات ؟
آسر : مارضى يعطيني التسجيلات يقول مايبي يدخل بمشاكل
عصام : وش مشاكله احنا بنأخذ التسجيلات ولا من شاف ولا من درى انها منه
آسر : حاولت معه مارضى
عصام : ارسل له فريق يجبرونه
آسر : لا يا طويل العمر ، خل الاجبار بعدين
عصام : اللي تشوفه
آسر : تامرني على شيٍ ثاني ؟
عصام : ارسلت لك موقع بالواتس ، حسب الكلام اللي ينقال ان عثمان بتلقاه هنا
آسر : والله وجاك الموت يا تارك الصلاة
ضحك عصام وهو يشوف آسر يطلع من المكتب بحماس وهو يجهز سلاحه
عصام : والله انك فخر للوطن يا آسر وكل من المملكة يفتخرون بك وبامثالك يوم انكم تخلون العالم يعيشون بأمن وامان واستقرار ولا في بقلوبهم خوف ابد
●
●
●
في بيت ابو ياسر
عمار : حسوونن
ابو ياسر : ارفع علومك
عمار : شلون الوجه البشوش
ابو ياسر : وش تبي ؟
عمار : انا جاهز ، بيتي جاهز ، المهر جاهز الشبكة والدبلة جاهزين فلوس العرس جاهزة وفلوس الغداء حق بعد العرس جاهزة فلوس الفندق جاهزة فلوس شهر العسل جاهزة انا جااااااهززز ونروح نخطب
سارة : بشويش على عمرك لا يطق بك عرق
عمار : انثبري انتي ، ساااللممم
دخلت سلمى وقالت : ترا قاعد تذبح انوثتي
عمار : انوثتتس مذبوحة من زمان تعالي بس
جلست سلمى جمبه وقالت : وش ؟
عمار : معتس رقم ابو تولين ؟
سلمى : وش ابسوي برقم ابوها ؟
عمار : دقي حاكيها تجيب رقمه
سلمى : بتحاكيهم اليوم ؟
عمار : وش رأيتس انتي اخلصي ؟
قامت سلمى وراحت تجيب جوالها ورجعت تجلس جمب ابوها ودقت
عمار : حطي سبيكر
سلمى : ياا ورع ليه سبيكر ؟؟
عمار : حطي وانتي ساكتة ، ردت ردت
حطت سلمى سبيكر وقالت : تولين
تولين : تلوك من اقصاك قولي امين
ضحكو عليها وقالت سلمى : للداعين يارب
تولين : الدكتور طردني من المحاضرة يا وصخة
سلمى : انطمي يا بنتي شوي واسمعيني
تولين : هاه
سلمى : عمورتس
تولين : ياخي الله ياخذ عمار يوم انه سمح لك تنادينه عموري
ضحك عمار وهو رافع حواجبه
سلمى : مب عموري هو الله لا يقوله عمورتس انتي
تولين : هو من ناحية عموري عموري مانختلف ، الزبدة شعندك ؟
سلمى : عطيني رقم ابوك ؟
تولين : اخوك الله لا ياخذه ماترك بنت ما حاكاها ، بتستلمين وظيفته واول شخص بتبدين فيه ابوي
سلمى : مابقى الا ابوووتتتسسس
تولين : اعقبي يا حيوانة ، اخلصي قولي وش عندك
سلمى : والله صدق هاتي رقم ابوتس
تولين : طيب ليه ؟
سلمى : ابوي بيحاكيه ؟
تولين : والله القمطة
سلمى : ليه ؟
تولين : وش بيقول له ؟
سلمى : بيقول له يا ابن الحلال قررنا نسوي فيكم خير ونأخذ بنتكم عندنا لأن انتم تعبتو معها بما فيه الكفاية وجاء دورنا
تولين : مافهمت
سلمى : من متى تفهمين بسرعة انتي
تولين : يختي وش اسويلك انتي معوقة ماتعرفين تتحاكين
سحبت سارة الجوال وقالت بصوت عالي : تولييييننن
تولين : اذني الله ياخذك
سارة : بنجي نخطبتس نخطبتتسسس
شهقت تولين بصدمة وقالت : وشووو ؟؟؟؟؟
سارة : بنجي نخطبتس لاخوي عمار
تولين : ويي طلع منجده احسب يستهبللل
سارة : اخوي مايمزح بمواضيع زي كذا ، حنا عندنا رجال لا قالو فعلو
تولين : والتبي فيك وفي رجالكم
سلمى : اعقبي
تولين : لاتجون كلكم جيبو عمار بس
سلمى : حبيبي ذي خطوبة كلام رجال مب شوفة شرعية
تولين : لالا مابي شي جيبو الشيخ نملك وياخذني على طول
عمار : وانا موافق
قفلت تولين وهي تصارخ بفشلة
سارة : ياغبي ليه تتكلم
عمار : وش قلت ؟ قلت اني موافق
سلمى : حمار الحين بتقعد مستحية منك مليون سنة قدام
عمار : ماعليتس
ابو ياسر : ماتخاوون الا طويلات اللسان الا اللي زيكم دقوو مرا ثانية خلوها تجيب رقم ابوها
عمار : يبه لو سمحت عن الغلط ، ذي حرمتي المستقبلية ماتقول عنها طويلة لسان لو سمحت
ابو ياسر : اقول انثبر انت
دقت سلمى مرا ثانية واخذ عمار الجوال : تولين يا بنت الحلال عطينا رقم ابوتس
تولين : طيب برسله الحين
عمار : يلا مع السلامة
قفل عمار وسرعان ماوصله رقم ابو تولين و اخذه ابو ياسر و دق عليه
ابو ياسر : سلام عليكم
ابو تولين : وعليكم السلام ، مين معي ؟
ابو ياسر : معك ابو سلمى ، صديقة بنتك تولين
ابو تولين : حياك الله
ابو ياسر : الله يحييك و يبقيك
ابو تولين : آمرني
ابو ياسر : والله يا ابو تولين حنا ودنا بالقرب منكم و ودي اخطب بنتك لولدي عمار
ابو تولين : والله يا ابو سلمى انا ما اعرفكم عن قرب ولا اعرف ولدك عمار لكن اللي بقوله ان بنتي تو صغيرة عمرها 19 سنة
ابو ياسر : زين نشوفكم ونتفاهم ؟
ابو تولين : حياكم الله ببيتي اليوم بعد العشاء
ابو ياسر : ان شاء الله ، يلا فمان الله
ابو تولين : فمان الكريم
قفل ابو ياسر وقال جمال : وش قال ؟
ابو ياسر : يقول بنته صغيرة وقال تعالو عندي بعد العشاء نتفاهم زين و نشوف وش يصير
عمار : يبه حركاتك سوها عليه اقنعه تكفى
ابو ياسر : انت اثقل وبعدين يصير خير
عمار : ابشر
ام ياسر : يلا هذا وابو البنت وكلمناه ماودكم تقومون لشغلكم ؟
قامو عمار و جمال وهم يبوسون رأس امهم وابوهم وطلعو
●
●
●
في بيت ابو مشعل
قامت من النوم وهي تتروش ولبست ملابسها و وصلتها رسالة وعقدت حواجبها باستغراب وقالت : وش يبي يرسل ؟
فتحت جوالها وهي تقرأ الرسالة
" قوي عزومتس ترا ضعفتس يضعف مشعل ، كل يوم يجيني ضايق شايل همتس ، طالبتس لا تظهرين همتس له ، وان كنتي تبين تفضفضين انا موجود واعتبريني اخوتس قبل لا اكون ابن عمتس "
ابتسمت مشاعل وردت عليه برسالة
" مشكور وماتقصر وليتك مكلمني عن مشعل من قبل "
رد عليها بسرعة وماتوقعت ابدا لان رسالته الاولى كانت الساعة 2 بالليل
" ما كنت ابي اضايقتس بموضوعه لكن شفته شايل هم اكبر منه وهو حتى وظيفته ماتسمح له يشيل هموم اكثر اللي فيه مكفيه "
قفلت جوالها ورمته على السرير و راحت لغرفة مشعل ودقت الباب وفتحته وهي تدخل رأسها بس وقالت : صباحو اخوي الحلوو
فتحت النور وهو سحب المخدة وغطى وجهه
مشعل : مشاعل يرحم لي والديتس خليني ارقد
مشاعل : يلاااا
مشعل : يا شيخة وش تبين ؟
مشاعل : ابي تقوم تتروش و تلبس وتنزل تفطر انا بحتريك تحت ، مارح تتأخر على اختك حبيبتك صح ؟
مشعل : تمام انتي روحي وانا اجي وراتس
مشاعل : اوككيي لا تبطيي
طلعت مشاعل و قام مشعل وهو يطلع جواله وغرد تغريدته اليومية وقت الصباح " صباح الخير "
دخل الحمام ( الله يعزكم ) تروش و لبس ثوبه و صلّى وشخّص شماغه و تعطر واخذ جواله من سمع الاشعار وابتسم من شاف رد على تغريدته " صباح النور "
كالعادة رد على التغريدة ب لايك و نزل وهو يشوف امه و ابوه يتقهوون باسهم براسهم ويدهم وقال : صبحكم الله بالخير
ابو مشعل : صبحك الله بالرضى والسرور
عقد حواجبه باستغراب من ابوه لان اول مرا يرد عليه بهدوء بدون مايسفل فيه
جلس جمبهم وقال : عساكم بخير ؟
ام مشعل : ايه بخير
مشعل : مشاعل وينها ؟
طلعت مشاعل وهي تحط الفطور وقالت : يلا الفطور جاهز
قامو كلهم يفطرون ومشاعل ومشعل يطالعون بعض و مستغربين من هدوء امهم وابوهم الغريب والمرعب بالنسبة لهم
خلصو يفطرون وقامو مشعل و مشاعل يتساعدون وينظفون وسوو القهوة
مشعل : وش بلاهم ؟
مشاعل : والله مدري
مشعل : نزل الوحي
ضحكت مشاعل بخفوت وقالت : اسكت ياغبي لا يسمعونك
مشعل : والله يخوفون ، تجهزي باخذتس معي ، اتوقع هذا هدوء ماقبل العاصفة والله ما اخليتس يسوون فيتس شي مب ناقص انا افقدتس انا والله اموت
مشاعل : وايييي مشعللل تجننن
ضحك مشعل وقال : يلا احتريتس بالسيارة يلا
مشاعل : منجدك ؟
مشعل : والله ماني متطمن لهدوءهم مقدر اخليتس
مشاعل : تمام
طلعت مشاعل ولبست عبايتها ونزلت وركبت السيارة وراحو للمبنى
●
●
●
في بيت ابو قصي
فاطمة : يبه عادي اروح لبيت قصي ؟
ابو قصي : اي روحي ، بيت اخوتس هو
ام قصي : مو من عوايدتس تروحين لهم ، وش عندتس ؟
فاطمة : ماعندي شي الله يحفظتس يمه ، وش عندي يعني طفشانة بروح لعبير
ابو قصي : روحي يا يبه روحي
ام قصي : انتي وراتس بلا وانا دارية
ابو قصي : يا مره اتركي البنت من شكوكتس التعبانة روحي يا فطوم روحي انبسطي
قامت فاطمة وهي تتجهز و ركبت السيارة وحركو لبيت قصي
قصي : هلا والله ، تو مانور البيت
فاطمة : البيت منور باهله يا حبيبي
قرب وهو يبوسها بخدها وطلعت نور ركض وقالت : فطووومممم
رفعتها فاطمة وهي تشيلها وباستها بخدها وقالت : هلا ياقلب فطوم
فاطمة : وين عبير ؟
طلعت عبير وهي شايلة صينية القهوة وقالت : هلا فطومة
فاطمة : هلا فيتس
عبير : يلا قصي يلا لا تتأخر على دوامك يلا
قصي : لاتحشون علي
ضحكو عليه وقالت فاطمة : مابقى الا انت آخذ ذنوب عشانك اقول دزها ياشيخ
ضحك قصي و طلع وتركهم
عبير : نور ماما روحي داخل العبي يلا
دخلت نور للغرفة وقالت عبير : اخلصي اهبدي اللي عندتس
فاطمة : ماعندي شي
عبير : يعني تبين اصدق انتس جايتني وماعندتس شي تقولينه ؟ قولي قولي
فاطمة : والله يا عبورة في بس مدري من وين ابدأ
عبير : ابدي من اللي ودتس
قالت لها فاطمة سالفتها مع سعد من البداية للنهاية
فاطمة : والحين ابيه يخطبني وهو يبي يجي يخطب وزعلان لأني قلتله لا تجي
عبير : دامتس تحبينه وهو يحبتس وشوله تقولين له لاتجي ؟
فاطمة : امي ماتحبهم علامتس انتي والله انها ترفضه وتقوم تمسك واحد من الشارع وتقوله تزوج بنتي عنادا فيه
عبير : معليش بس امتس حالة خاصة
تنهدت فاطمة وقالت : والله مدري وش السواة ، صح انه يكلمني كل يوم ونتهاوش ونمزح ونتضارب لكن احس كل ما يكلمني يتضايق وانا ماودي بضيقه ابد
عبير : معليتس اتركي السالفة علي لين يمر موضوع مناهل وتصير الاجواء تمام وبعدين نتصرف
فاطمة : تمام
●
●
●
في المركز
كانت جالسة وحاطة يدها على خدها وتطق القلم بالطاولة ، قام وهو يسحب منها القلم وقال : بس الله يصلحتس شوشتي مخي عجزت اركز
نواهل : افففف يا صقررر افففف
صقر : علامتس يا حبيبي وش فيتس ؟
نواهل : خايفة على مناهل
صقر : وشوله تخافين عليها وهي مع الليث ، حتى الليث ما راح دوامه عشانها
نواهل : صقر لا تزعل مني بس انت تدري لو طاحت عين ليث على زوجاته بينسى مناهل واهل مناهل
تنهد صقر وهو يدري فعلا ان الليث كذا
صقر : طيب تبين تروحين تقعدين معها اليوم ؟
نواهل : لا جيبها عندي
صقر : مارح ترضى
نواهل : الا جيبها عندي لو سمحتتت
اشر على عيونه وقال : من عيوني بعد الدوام اروح واجيبها لين عندتس كم عندي نواهل انا
قربت وهي تبوس عيونه الثنتين وقالت : عساني ما انحرم منك
صقر : ولا منتس يا روحي ، الحين نشتغل ؟
نواهل : اشتغل انا بروح اجيب قهوة صدعت
مسكها وهو يحاوطها من خصرها وقربها لصدره وقال : برا كله رجال انا اروح اجيب لتس قهوة ، وانتي زي الشطورة هنا تحتريني اوكي ؟
مسكت ارنبة انفه وقالت : لا تقول شطورة مب بزر انا
ضحك صقر وهو يفك يدها ويبوسها وقال : بعيني الا
نواهل : رح رح
طلع صقر يجيب لهم قهوة عشان يركزون بشغلهم
●
●
●
في الجامعة
كانت جالسة رجل على رجل وتشرب قهوة
تولين : تخيليي
لين : هاه
تولين : عمار بيجي يخطبني اليوم
فزت لين وانكبت القهوة وقالت : اححححح
ماحست الا بيد سعود اللي تمسك يدها وتقومها
سعود : بشويش الله يصلحك بشويش
وقفت لين وهي تبعد العباية عنها وشوي وتبكي
سعود : انحرقتي ؟
لين : لااا بس عبايتي توصختت
سعود : العباية تهون يا حبيبي الحين اهم شي انتي ما جاتس شي
لين : والعباية ؟؟
سعود بحدة : لييننن
وقفت لين واخذها سعود و تركي واقف بعيد يحك رأسه وقال : لنا الله يا خالي من الشوق من الشوق
قالت تولين بصوت واطي لكن كان مسموع لتركي : وانا المولعع
ضحك تركي وهو يروح للكلاس و تولين نفس الشي

عند سعود و لين كانو واقفين جمب المغاسل يغسل لها عبايتها
سعود : صاحية انتي ؟
لين : انبسطت مرة
سعود : وش اللي خلاك تنبسطين لدرجة تحوسين نفسك
لين : عمار بيخطب تولين اليوم
رفع رأسه وقال : هذول اللي ولا واحد فيهم يطيق الثاني ؟؟؟؟
لين : وعن حب بعد
سعود : سبحان مغير الاحوال
لين : اي والله
سعود : اجل انبسطي اكثر ، زواجنا بعد ماتعدي مناهل ازمتها
لين : احلففف
سعود : والله
وقف سعود وهي حضنته وقال : حبيبي الناس
بعدت عنه وهي تطالع كل اللي بالجامعة يطالعونهم مبتسمين لأنهم يدرون انهم متزوجين وغطت وجهها بكفوف يدينها بفشلة وهو قرب وباسها بخدها وسمع تصفير العيال وصراخ البنات وضحك من لين اللي تكتم صراخها من الفشلة