لو قلت لقلبي توب عيني تكذبني

الجزء الرابع والاربعين

نواهل بقلبها : انا مدري لين متى بتجلسين تتحملين هالشقى يا مناهل بهالعمر مدري والله مدري ، حسبي الله ونعم الوكيل بس حسبي الله عليك يا ليث
نزلت مي وهي تأخذ الدلة وتصب لها قهوة ومطنشتهم مرا
نواهل : في شي اسمه سلام عليكم
مي : سلام للشياطين ؟
نواهل : اقول كلي تبن لا اصفقك واعلمك مين الشياطين
مي : ترا نفسيتي بطرف خشمي ماني فاضية لك لا انتي ولا اختك
نواهل : شرايك بالشعور وانتي بتجي على رأسك وحدة ؟ يعور صح ؟
ضحكت نواهل وهي تطقطق على مي و مي شويات وتصفقها .
الساعة 7:00
دق جوال مناهل و ماردت و بعدها دق جوال مي
مي : هلا
الليث : وش ذا الجفاف وشو اللي هلا ؟
مي : آمرني
الليث : ليه مناهل ماترد ؟
مي : وش علي فيها انا ؟
الليث : مي وينها مناهل ؟
مي : جمبي
الليث : طيب تجهزو يلا بنروح لأهلي
مي : طيب
قفلت مي وقالت : تجهزي بنروح لبيت اهل ليث
قامو مناهل و نواهل ومي وهم يتجهزون وجاء الليث وركبو كلهم ورا
الليث : كانو يتضاربون مين بتركب قدام الحين ولا وحدة تبيني ، بتجي الثالثة تعوضني ان شاء الله
نقزت مي قدام وهو ضحك ورفع عيونه يطالع عيون مناهل اللي كانت تطالع الشباك ويدها على خدها وعيونها حمرا وتلمع
عض شفته بقهر وحركو لبيت اهله
ابو صقر : حياك الله
الليث : الله يحيك ويبقيك
قربو وهم يسلمون على ابو صقر وام صقر وجلسو
الليث : بفتح معكم موضوع
ابو صقر : عسى خير ؟
الليث : لا خير خير
ام صقر : وشو يا وليدي ؟
الليث : تعداد سكاني
نزلت لين وهي تجلس جمبهم وقالت : جلستك فيها أنّ
الليث : اجلسي وانتي ساكتة
طالعته لين بطرف عين وشمقت له
الليث : يا يبه انا الشرع محلل لي اربع
مناهل بهمس : اشغلنا بالشرع انت لو تعبد الله زين وباقي الشرع تعال تناقش معنا
ضحكت بخفوت وهو يسمع كل كلمة تقولها وساكت
الليث : ابي اتزوج الثالثة و من ناحية مي ومناهل تراهم موافقات واذا ودك اسألهم
ابو صقر : انت صاحي ولا مهبول ؟ كل ماشفت نفسك رايق قلت ابتزوج
ضحك الليث وقال : تغيير و تنويع يا يبه
ام صقر : اللي تقوله انت صدق ؟
الليث : اي والله صدق
لين : قسم بالله وضعك مشكوك فيه منت بصاحي والله
الليث : يا يبه ماودك بعيال ؟ انا جالس اتزوج عشان يجونك احفاد وقلتلك زوجاتي راضيات
ابو صقر : انتي موافقة يا بنيتي ؟
مناهل : اذا هو وده ماتمنعه كلمة مني
ابو صقر : الا تمنعه واذا انتي رافضة قولي و والله مايتزوج علي الحرام والطلاق من امه
مناهل : لالا استغفر الله يا عمي استغفر الله انا مب رافضة انا راضية والله دام الشي ذا فيه سعادة له انا بالنسبة لي اهم شي سعادته ويسوي اللي وده
ابو صقر : وانتي يا بنيتي راضية ؟
مي : اذا كان بخاطره و وده وهالشي يسعده الله يوفقه ومحد يمنعه
ابو صقر : وانت يعني كذا امورك ماشية ؟
الليث : ايه وبكرا بجيك انت وامي و نروح لهم و مي و مناهل بيجون معي
ام صقر : الله يهديك يا وليدي الله يهديك
لين : ترا لو اندارت الدنيا فيني وتزوج سعود علي والله لا اذبحك لا تحسبني زي مناهل اعرف اتجاهل وباردة اعصاب ومايهمني شي انا اموت ولا اشوف سعود مع غيري
ضحكت مناهل وقالت : انا اول من يمنعه بس اتركيني بحالي
لين : شوفو كيف تضحكك وزوجها بيتزووجج ليه كذاا تقهريين انتييي
مناهل : ما اوقف بوجه سعادته
مسكت بطنها وقفلت فمها بيدها الثانية وطلعت للحمام
الليث : هذي المرا الرابعة اتوقع اللي ترجع فيها اليوم
ام صقر : يمكن حامل
نواهل : لالا هي كذا حتى قبل لا تتزوج اذا اكلت شي حار يصير معها كذا يوم يومين و تتحسن
الليث : مالها علاج ؟
نواهل : الا بس ماتحب تستخدم
الليث : هي لو تترك عنادها والله كانت الحين فوق بالسماء
طلعت مناهل بتعب وقالت : ابي البيت
وقف الليث وقال : يلا الحين نستأذنكم استودعناكم الله
ركبت مناهل ورا ومي قدام و رجعو للبيت ونامو
●
●
●
اليوم الثاني الساعة 7:00
قام من النوم تروش و توضأ وصلّى الضحى و لبس ثوب بدون شماغ وعقال تعطر و حط نظارته الشمسية على شعره و نزل
سعود : يااا صبااح الخير تو مانورت الدنيا والحياة الا بشوفتكم
ابو فهد : هلا والله صباح النور
باس رأس امه و ابوه ويدينهم وجلس جمبهم ونزل سعد وهو يطقطق بجوال
سعود : لابس ثوب وشماغ وحركات مترسم شعندك
سعد : طالع اشوف احد
سعود : احد ولا احدة
ضحك سعد وهو يأشر له بيده بمعنى " ترا كف "
سعود : وصلت وصلت الله يسلمك
نزل فهد وهو كمان كاشخ و مترسم و وراه كيان لابسة عبايتها ومتنقبة
فهد : صبحكم الله بالخير
سعود : صبحكم الله بالنور
جلسو وهم يفطرون وقال سعود : انا برجع للبيت متأخر متأخر
ام فهد : ليه وش عندك ؟
سعود : برجع من جامعتي الساعة 4 برجع للبيت بغيّر ملابسي وبروح اخذ لين وبنروح نشوف الوان البويات و البلاط وكذا ونختار و بعدها بنتعشى وبرجع لين لبيتها و بروح للكوفي عشان الدوام
سعد : وانا برجع متأخر
ام فهد : وانت بعد وش عندك ؟
سعد : عندي عملية بعد ساعة وعندي مرضى افحص عليهم وعندي عملية بالليل وعندي شخص بروح اشوفه عندي معه كم موضوع
ابو فهد : وانت ؟
فهد : انا عندي جلسة شوي معقدة يعني ماني مطول برجع عالمغرب تقريبا
ابو فهد : وانتي يايبه متى بترجعين ؟
كيان : انا برجع الظهر ياعمي و بعدها بروح لبيت اهلي
فهد : ليه ؟
كيان : بنجتمع كلنا انا واخواني وخواتي و مناهل ومي رايحين نخطب لليث
كلهم قالو بصوت واحد : وشووو ؟؟؟
سعود : مناهل بتروح معكم ؟
ابو فهد : وش تقولين الله يصلحك يا بنيتي ؟
كيان بخوف قالت : بيخطب الثالثة يا عمي ومناهل راضية
ابو فهد : لا حول ولا قوة الا بالله
سعد : اقضبو هالرجال والله اني لا اذبحه والله بس خلوني اشوف دمعة من عيون مناهل تنزل قسم بالله ما ارحمه
شدت كيان على يد فهد بخوف
فهد : لا تخافين عليه وهو يستاهل لا تتوقعين مننا نسكت يا كيان واخوك قاعد يكسر اختنا مثل ما تخافين عليه حنا نخاف على مناهل والفرق بينهم ان ليث رجال و مناهل بنت حساسة تنكسر من الكلمة
نزلت دموع كيان بخوف على اخوها
كيان بقلبها : ليت لساني انقطع ولا علمتهم
ابو فهد : انا مدري هالمناهل لين وين تبي توصل بحركاتها هذي وهي راضية باللي يسويه
سعود : بنتك داهية يا هادي لا تخاف عليها وهي اخت سعود
ضحك وهو ياخذ جواله ومفتاح سيارته وبوكه وقال : يلا مع السلامة
طلع سيارته وهو يشغلها وحرك و دق على لين
سعود : كيفها الحلوة ؟
لين : زيييينة
سعود : واضح يا اخت المعرس
لين بخوف : سعود تو ادري امس
سعود : شدعوه خايفة مابسوي شي انا ، مناهل اللي بتسوي ، الزبدة انا بجي اخذك اليوم
لين : ليه ؟
سعود : بجيبك عشان تشوفين جناحنا وبعدها نروح نختار بويا مناسبة للجناح ونختار بلاط زين
لين : مايمديني اجي واليوم ليث بيخطب
سعود : اسحبي عليه كلها خطوبة بعدين احضري الملكة وبعدين هذا اكيد كلام رجال مب حفل حفل
لين : بكلم ابوي وارد لك خبر اذا شفتك بالجامعة
سعود : طيب
قفل وهو يرفع صوت الاغاني وراايق مرا
●
●
●
في بيت ابو صقر
نزلت وهي تعدل نقابها وقالت : يبه
ابو صقر : وش تبين ؟
لين : مارح اروح معكم اليوم انا لانه مجرد تفاهم و كلام ، لا صار شي رسمي بحضر لأن تو سعود قايل لي بيأخذني عشان نبدأ نجهز البيت من اليوم
ابو صقر : طيب
لين : يلا انا طالعة توصي شي ؟
ابو صقر : انتبهي على نفستس بس
لين : ان شاء الله
ابو صقر : يلا استودعتتس الله
طلعت لين وركبت السيارة وراحت للجامعة
لين : اهلين
تولين بملل : امم اهلين
لين : وجع وش ذا النفسية عمى وخري لا تنشرين سلبيتتس علي بس
ضحكت تولين وهي تشرب القهوة وقالت : وان كانت في سلبية بتروح من شوفة الحبيب طالعي
لفت لين وهي تشوف سعود مع تركي جالسين بالطاولة يسولفون
حطت يدها على خدها وهي تتأمله وقالت : يجنن ذا الادمي والله
تولين : والله ما يجنن الا اللي جمبه يهبل بسم الله عليك
لين : ما يخاوي الا امثاله حلوين وشايفين انفسهم وثقيلين
ضحكت تولين وقالت : شكلك تعانين من شوفة نفسه وثقله
لين : اهههخخ ثقييل ثقققيييل تخيلي يدق علي وانا متحمسة بسولف معه مشتاقة لصوته يقولي كلمتين كيفك شخبارك بشوفك بكرا باي ويقفل واذا شفته اههخخ واذا شفته اذا شفته
تولين : اقول قومي بس لا تنصهرين قدامي بدأت المحاضرة
قامو وهم يدخلون الكلاس يستعدون لبدأ المحاضرة
●
●
●
في بيت ابو قصي
كانت منسدحة على السرير على جمبها وهي حاضنة مخدتها
فاطمة : مايجوز يا فطيم انتي قريب بتصيرين على ذمة رجال لا تفكرين برجال ثاني لا تفكريين ، افف بسس غصب عني شسويي
دخل ابوها وهو يفتح الانوار ويقفل التكييف وقال : علامتس لتس يومين فاطسة بهالغرفة
غطت عيونها بالبطانية وقالت : لا يا يبههه لااااا
ابو قصي : قومي يلا ساعدي امتس بتنظيف البيت يلا
فاطمة : يا يبه اعتقني تكفى
ابو قصي : يلااا
فاطمة : تمام انا اجيك الحين
ابو قصي : قيلت القايلة
سحبت جوالها وقالت : تو الساعة 8 وش القايلة اللي قيلت ذا الوقت يا يبه
ابو قصي : بتقومين ولا شلون ؟
فاطمة : قمت قمتت
قامت وهي تلبس نعالها ( الله يعزكم ) توضت وصلّت الضحى ونظفت غرفتها ومسحتها و بخرتها و نزلت تنظف البيت وتمسحه وتبخره وغسلت الملابس و نشرتها وسوّت كل شي وبعدها قامت تسوي الفطور
كانت تحشي البصل وهي تحركه وتفكر ومتخصرة بيدها الثانية
فاطمة بقلبها : لين وين بوصل ياربي ؟ انا تعبت وانا اتحمل واكتم عشان غيري والله ليه يفكرون بقلبه مايفكرون بقلبي ؟ ليه يخافون على كسره مايخافون على كسري وانا بنتهم ؟
اطلقت تنهيدة طويلة وراحت تجهز الشاهي والسفرة
فاطمة : يمههه يبههه الفطور جاهز
نزلو يفطرون وبعد ماخلصو غسلت المواعين ونظفت الحوسة و طلعت بالحوش تجلس وهي تشرب شاهي بالنعناع واخذها التفكير بعيد
●
●
●
في بيت ابو نايف
كانت بغرفتها منسدحة على بطنها وهي تقلب جوالها ورافعة رجولها وتنزل وحدة وترفع وحدة وتدندن بصوت واطي : شو حلو حبيبي شو حلو هالقمر شوفو ما اجملو
انفتح الباب بقوة وفزت وهي تشوف نوف واقفة وحاضنة ملابس ومغطية وجهها
الهنوف : يكسر رجلك ربي يا ارحم الراحمين انتي ماتعرفين السنع ماتعرفين تدقين الباب ؟ وش ذا الملابس
نوف : وين الطريق ؟
الهنوف : قدام قدام
مشت نوف قدام ورمت الملابس على السرير وقالت : هذي ملابسك اللي كانت بالسطح نشفت خلاص تقول امي سفطيها واذا جت ودولابك منحاس بتاخذ جوالك ثلاثة ايام
الهنوف : يووه امي حاطة دوبها دوب دولابي
سمعو صوت بكاء وعد وقالت نوف : ياعمري عليها مرام من يوم جت ذا الوعد وهي معد صارت ترتاح مزعجة بنتها و 24 ساعة تبكي
الهنوف : قومي سوي لها رضاعة وانا بأخذ وعد عندي وبنومها
نوف : تمام
نزلت نوف تسوي حليب لوعد و الهنوف راحت لجناح نايف ودقت الباب
مرام : تعالي
دخلت الهنوف وهي تجلس على السرير وتشوف مرام وهي تهز وعد اللي تبكي بصوت يملأ البيت كله
مرام : لازم اكلم نايف نطلع بيت لحالنا لاازم عمي وعمتي مو مجبورين يتحملون صراخ ذا المزعجة
الهنوف : جيبيها وانا بشوفلها حل انتي نامي
مرام : بتصرعك والله
الهنوف : مالك دخل جيبيها
اخذت الهنوف وعد وطلعت وهي تقفل الانوار وقفلت الباب وراحت غرفتها وهي تشوف رضاعة وعد فوق التسريحة واخذتها وهي ترضعها وحطتها على كتفها وضربت ظهرها بشويش لين نامت وجلست تسفط ملابسها
الهنوف : ياخي ليه اذا سفطت ملابس او رضعت وعد احس اني سنعة ويبيلي زواج
ضحكت على نفسها وهي مستمرة بالغناء والدندنة
●
●
●
في بيت ابو ياسر
كان ابو ياسر جالس بالصالة هو و ام ياسر و سارة وما كان في احد غيرهم كل واحد بدوامه و بدور بجناحها هي وفيصل
بدور : لا يا ماما غلط تلمس هذا بعدين لو لمسته ينفجر بيتنا و نموت وتعيش انت لحالك
فيصل : ابي اروح لماما مناهل
بدور : بالاجازة يا حبيبي بالاجازة اوديك عند ماما مناهل الحين مناهل مشغولة وعندها مذاكرة واختبارات ، متحمسة انا و وجهي وانا اشرحله مدري انه بزر مايفهم
قامت وهي تمسح جناحها و تكنسه وتنظفه و تبخره وبعد ماخلصت روشت فيصل ولبسته بنطلون بني مع بلوزة بيضاء و جلسته على السرير وهي لبست تنورة بني قصيرة لين الفخذ ومفتوحة من الجنب مع بلوزة بيضاء بدون اكمام عارية من الاكتاف ونص بطن تركت شعرها منسدل وسوت ميك اب وجددت روجها الاحمر وتعطرت و عطرت فيصل معها وتبخرو وجلست تلعب معه تنتظر رجوع ياسر
●
●
●
في بيت الليث
قامت من النوم وهي تشوفه صاد عنها ومو معطيها وجه ويكلم بجواله
الليث : لا بطلع من الدوام بدري اليوم عالساعة 6 تقريبا على اذان المغرب بالضبط بخلص جلسة الظهر وباقي الملفات بسوي عليها تشييك سريع ............. والله مدري لكن اتوقع اني بأجلها للاسبوع الجاي لأن اليوم ابد مايمديني والله ............... وش عليك انت انقلع يا شيخ لاتنشب وجع تقلع يلا مناك
ضحك وهو يلف لها وهي غمضت عيونها بسرعة ، رفع يده وهو يبعد شعرها عن وجهها وقال : مدري وش فيتس وش اللي مغيرتس ، مايقنعني عذر انتس تغيرتي عشاني بتزوج عليتس وش بيكون مصيرنا يا مناهل ، يارب اجمعني انا وهي بمصير واحد و مستقبل وحاضر وماضي واحد يارب ، والله اني احبتس يا مناهل واعشقتس واموت فيتس واهيمتس وجايتس على وجهي ومتخرفن عليتس وخاق عليتس وعلى كل تفصيل يخصتس وانا والله ما بقلبي الا انتي وانتي تسوينهم كلهم
سكت وهو يقوم ويتوضأ ويصلي و يلبس وترسم وتشخص و وقف قدامها
الليث : مناهل الساعة 8:40 دوامتس بيبدأ الساعة 9 ونص قومي يلا
مناهل : طيب ابعد ريحة عطرك صدعت رأسي
وقف الليث وهو يمسك العطر ويكسره وقال : تخارجنا منه
مسكت خشمها وقالت : فاحت ريحته جعلك الكسر
دخلت مناهل وهي تستفرغ و تبكي
الليث : وش سالفتها ذي ؟؟ معقولة كل ذا عشان بطاطس حار ؟
قفلت الباب وهي تدخل تحت المويا بدون لا تشيل ملابسها
●
●
●
الساعة 9:00 قبل الظهر
في المستشفى
كان يعقم يدينه و هو يلبس القلفز و الكمامات و يجهز عمره لعمليته
وقف قدام الباب وهو يقرأ الاذكار والادعية ان الله يسهل عليه ودخل وهو يبتدأ العملية بهدوء تام وهو يحاول قد مايقدر يبعد عن رأسه فاطمة وفاروق وكان يكرر كلمة وحدة عشان تنسيه
" يارب الطف يارب الطف يارب الطف "
كان محمد واقف جمبه وهو يساعده و يمسح عرق جبينه و يسولف معه عن العملية عشان يبعد شوي من التوتر
محمد : كله يتيسر كله يمر اهدأ ولا تقلق بشويش يا سعد بشويش
سعد : ابعد عن الشرايين يا محمدددد ابععدددد
محمد : اهدأ انا بعيد بالشاشة عندك يجي قريب اهدأ
سعد : استغفر الله بس
محمد : روح روح وانا بكمل
سعد : خلني اخلص شغلي
سكت محمد وهو يساعد سعد بكل ما يقدر و يحاول يشيل كل الحمل عنه ويتركله شوي لأن ماعنده طاقة يتحمل شي
طلع وهو يمسح جبينه بتعب و وقف قدام عائلة المريض بعد ما اخذت العملية منه خمس ساعات
سعد : عظم الله اجركم
مشى سعد ودخل لمكتبه وهو يمسح جبينه بتعب وشرب مويا
محمد : ارتاح وانا بجيب لك الاكل
طلع محمد وهو يطلب غداء لسعد وهو يطلع قدامه
سعد : ماتقصر يا محمد بعطيك اجازة
محمد : ماودي باجازة
سعد : انت تعبان اكثر مني وانت متدرب بس
محمد : عاجبني وش عليك انت
سعد : ماودي اضغط عليك واحملك اكثر من طاقتك
محمد : ماتخصصت هالتخصص الا لاني احبه انت كل و روح واترك المرضى علي بسويلهم تحليل فحوصات و اشعة واذا اضطر الامر اسوي تقرير و اكتبلهم علاجات وبعدين اجيبلك ملفاتهم ونشوف مين اللي يحتاج له عملية ونحدد له مع بعض
سعد : متأكد ؟
محمد : متأكد بس تعال بالليل لا تنسى عندك عملية
سعد : لا معليك بجي
طلع سعد وهو يبدل ملابسه وراح لوجهته
●
●
●
بالجامعة
كانت تمشي مع صديقتها طالعين من الجامعة من انتهى دوامهم
لين : انتي روحي وانا بجلس احتري سعود
تولين : بيطلع بعد العصر الساعة الحين 2 بتنتظرينه لحالك ساعتين ؟
لين : ايه معليتس انتي
تولين : تمام انتبهي على نفسك
طلعت تولين وجلست لين بالكافتيريا وهي تطقطق بجوالها وماحست بالوقت وهو يمر ابدا ابدا
لؤي : تدرين انه من زمان عنك ؟ واحشتني حيل
جلس جمبها وهو يحط رجل على رجل ورجع ظهره لورا
لين : قوم انقلع
لؤي : ليه من قلت بخطبك انخطبتي ؟
لين : لاني ما ابيك
لؤي : بس انا ابيك
لين : طيب انا ما ابيك تفهم ؟
لؤي : وش علي منك انا
ضحكت لين وقالت : شكلك مب صاحي ابدا انقلع يبوي
قرب وهو يمسك يدها وماحس الا بيد تمسكه من ياقته وتلكمه
سعود : اكسر يدك قبل لا تلمسها يا ورعع
تركي : اهجدد يا سعودد
قامت لين وهي تغطي فمها بخوف وقالت : سعووودد وقفف
سعود : تركي لا تخليني اصفقك لا اوصيك العن والديه
مسك يدها وهو يطلع وركبو السيارة
سعود : شعنده الكلب معك ؟
لين : وش دراني جاء يقول ابيك و انا اقوله ما ابيك وهو يقولي ابيك وانا اقوله ما ابيك هو يقولي
قاطعها وقال : خلاااص اسكتيي
ضحكت لين وقالت : رفع ضغطي
سعود : والله لو اشوف واحد يجلس جمبك وماتقومين والله لا اصفقك والله
لين : هيه يبوي سلامات تهاوشني انا ؟؟ وش دخلني اللي يسمعك يقول انا اللي قلتله اقلط تعال حياك الله وش دخلني انا ؟؟ لاتهاوشني
سعود : لاحول ولا قوة
سكت وهو يعتدل بجلسته وشغل السيارة و وصلها لبيت ابوها
لين : مب كنا بنروح نشوف جناحنا ؟
سعود : ماتبين تغيرين ملابسك ؟
نزلت وهي تدخل
ابو صقر : مب قلتي بتطلعين مع رجلتس ؟
لين : اي هو برا ينتظرني بدخل اغيّر ملابسي
ابو صقر : ماتستحين على وجهتس تخلينه برا ؟ دخليه
طلعت لين وقالت : سعود انزل ابوي يبيك
نزل وهو يأخذ مفتاح السيارة ودخل وهو يسلم على ابو صقر و لين طلعت تلبس
ابو صقر : شلونك يا وليدي
سعود : طيب بشوفتك يا عمي الحمدلله نحمد الله و نشكره انت كيفك بشرني عنك
ابو صقر : الحمدلله له الحمد والشكر ، تقول لين بتروحون تشوفون البويا والبلاط حق جناحكم
سعود : ايه ومع الوقت ان شاء الله نكمل باقي الاثاث
ابو صقر : ان شاء الله
نزلت لين وقالت : سعود يلا
سعود : تمام
قام سعود وهي ترفع يده ودخلت من تحتها
سعود : فمان الله ياعمي
ابو صقر : انتبهو على نفسكم
طلعو وفتح لها الباب وركبت وهو ركب وراحو للبيت
دخل غرفته وهو يرمي نفسه بالسرير وهي تطالعه ومتخصرة
لين : خير ابي اشوف جناحي
سعود : ابي البس طيب
لين : طيب شعندك مدخلني معك ؟
سعود : لبسيني
لين : يا حلوه الورع اللي يبيني البسه ابشر يلا تعال
ضحك وهو يجلس وهي تفصخ له ثوبه وفتحت دولابه وطلعت له بلوفر اسود مع سروال ابيض و شوز سبورت اسود و ساعة آبل بيضاء
لين : انا بطلع وانت البس
سعود : انتي قلتي بتلبسيني
لين : سعود حبيبي سلامات البسك وشو ؟ اشوفك ؟؟
ضحك سعود وهو يحاوطها وقربها له وكفوف يدينها على صدره العاري
سعود : تدرين ان يدينك تعجبني ؟
لين : كلي اعجبك مب بس يديني
سعود : تلبسيني ولا شلون ؟
لين : علي اللي فوق وانت عليك اللي تحت
ضحك وهو يبوس نحرها وعلّمت
لين : لا يا كلب ابوي بيشوفها ؟
قرب وهو يبوسها بمكان ثاني وعلمت وصارت علامات واااجدة بأكثر من مكان
لين : سعووود سعووود ليه تعاند ؟
سعود : لو فتحتي فمك الحين مرا ثانية ترا بتزيد وهالمرة مب برقبتك بمكان ثاني
رفعت رجولها وهي تعض شفايفه وهو شد على خصرها بألم من عضتها وحس بالدم
سعود : حيوانة
لين : حبة بحبة
سعود : بس حلو
ضحكت وهي تطلع وهو لبس وطلع و راحو لجناحهم
سعود : شوفي ذي غرفة داخلها حمام غرفتنا وفي 3 غرف برا وصالة وحمامين
لين : شقة ذي
سعود : اعجبك ؟
لين : ايه حلو
سعود : ترا ما بنقعد طول عمرنا هنا ؟
لين : ليه
سعد : اذا صار عندنا اطفال بننقل بيت كبير
لين : ليه ودك تجيب مليون طفل ؟ ترا حدك اثنين ثلاثة وبس
سعود : ابي سبعة عشرة انا
لين : مع نفس اهلك يشيخ امش بس امش