يوم الخميس
كانت جالسة قدام البحر و الشاهي جمبها و العود بحضنها وتطالع القمر وتفكر
مناهل : انا وش قاعدة اسوي ؟ ليه قاعدة اسوي كذا ؟ ليه اكرهه بلحظة وارجع احبه اكثر من قبل ؟
حست بيده تحاوطها من ورا ودفن وجهه بنحرها وقال : الحين ليه تطلعين وتخليني داخل ؟
مناهل : بيجي العو يأكلك ؟
ضحك وقال : ليه شايفتني بزر ؟
مناهل : ايه
قام وهو يجلس قدامها ويطالعها وهي بالمثل تطالعه بخباثة
الليث : مب مرتاح لنظراتتس
مناهل : بذبحك ؟
الليث : افداك
مناهل : ادري
حطت اسبعها السبابة على ياقة ثوبه وهي تقربه لها وصارو قريبين من بعض حيل مايفصل بينهم الا شعرة
الليث : بتخليني اسوي شي يزعلتس
مناهل : مارح تسوي
رفعت يدها وهي تمسك فكه وتلفه للجهة الثانية وباسته بخده
الليث : وش ذا المشورة
ضحكت وهي تحط رأسها على كتفه ومسكت يده وشدت عليها
الليث : تدرين
مناهل : همم
الليث : جتني
قاطعته مناهل وقالت : ضيقة ؟ حتى انا
الليث : من وش ؟
مناهل : معرف
رفع يده وهو يخللها بشعرها وقالت له : وانت من وش ؟
الليث : والله مدري
مناهل : قلبي يقول في شي شين بصير
الليث : ان شاء الله مافي الا كل خير و مافي شي شين بالدنيا الا عدمتس فيها الشي الوحيد اللي مخوفني اني اصحى بيوم وانتي مب موجودة واعجز اكلمتس
مناهل : لو ماتهينّي يا ليث مارح اروح
الليث : والله اني اكره عمري واستحقر نفسي بكل مرا ارفع صوتي فيها عليتس او ازعلتس بكلمة حتى والله اني اقول وش انا مزين يوم ربي يجازيني بتس والله العظيم اني اقول دايم انتس كثيرة علي وانا ما استاهلتس ابد حتى ما استاهل نظرة منتس لو انها بالغلط ، تدرين وش السبب اللي مخليني مبسوط بهالضنا اللي بيجي ومنتظر له على احر من الجمر ؟
مناهل : ليه ؟
الليث : عشان يقربني لتس اكثر انا كنت خايف بيوم من الايام تروحين وتخليني لكن اذا جاء هالضنا رح تقعدين معي اذا مب عشاني عشانه
رفعت رأسها وهي تلمس وجهه بيدينها وقالت : وانا وش مخليني احب هالضنا غير انك ابوه ؟
الليث : مب انتي قلتي انتس تكرهين هالضنا عشاني ابوه ؟
مناهل : وش متوقع اقول وانا منقهرة منك وقلبي منحرق بسببك ؟
الليث : يختي والله اني آسف على كل زلة اقولها لتس بلحظات اكون فيها غبي
جت ندين من ورا مناهل وهي متخصرة وقالت : لو سمحتي لاتأخذينه مني بيومي
لفت مناهل و هي تطالعها وقالت : لا يا حبي ماخذيته هو اللي جاء
ندين : وانتي ما صدقتي على الله شفتيه ولصقتي به
مناهل : ايه ، وش بتسوين ؟
قربت ندين وقالت : بعلمك وش بسوي بعدين ، ليث تعال ابيك
قام الليث بقهر وهو يمشي جمب ندين ولف بسرعة وهو يرسل بوسة بالهواء لمناهل وهي ضحكت و ردت له نفس البوسة
●
●
●
في بيت احمد
نزلت أريج وهي لابسة عبايتها وشافته جالس على الكنب ويطقطق بجواله
أريج : حمود حبيبي انا بطلع
رمى جواله بغضب مكتوم وقال : تعالي اجلسي
جلست جمبه وهي تطالع فيه وقالت : سم
احمد : وقفي شغلتس
اريج : احمد احنا تكلمنا بهالموضوع
احمد : وقفي شغلتس يا اريج وكلامي مابعده كلام وان ماعجبتس شي ثاني
اريج : ليش طيب ؟
احمد : لانتس معد صرتي تقعدين بالبيت ، وقتتس كله بشغلتس انا اناا محقق ما انشغلت مثلتس وانتي مصممة كل ذا شغل وشوله ؟ ماعندتس زوج ؟ ماعندتس بيت ؟ انتي منتي زي قبل ببيت ابوتس يا اريج ، انتي تزوجتي و صار عندتس مسؤولية اهم من ذا الشغل ، بعدين انا مقصر معتس يوم تروحين تشتغلين ؟ عمرتس قلتيلي يا احمد ابي وقلت لتس لا ؟
اريج : لا بس هذي شي احبه تركت دراستي عشان هوايتي يا احمد تجي تقول لي اتركي و اترك ؟؟
احمد : يعني انتي الحين تعاملين شغلتس كانه زوجتس و زوجتس كأنه شغلتس الوقت اللي المفروض يكون لي صار لشغلتس و الوقت اللي المروض يكون لشغلتس صار لي
اريج : مقدر اترك شغلي يا احمد مقدر
احمد : طيب
قام وهو يأخذ شماغه و يضبطه وطلع معصب و منقهر مرا وهي عدّلت نقابها وطلعت بعدم اهتمام
●
●
●
في بيت نايف
نزل وهو يدندن و يدور بعيونه على وعد و مرام
نايف : وينها بنتيي و زوجتي
طلعت وهي ماسكة الملعقة وقالت : الحين صارت بنتك الاهم و الاولى ؟
كشت عليه وقالت : مالت عليك يا جاحد العشرة
ضحك نايف و قال : انتي الاساس و لولا الله ثم انتي كان هالورعة مب فيه
ضحكت وقالت : رح رح
نايف : ماعندي دوام اليوم تخيلي
مرام : يعني بتستقعد لي ؟
نايف : تحمدين ربك المفروض
جلس وهو يشيل بنته لحضنه وقال : انك تطالعين فيني
مرام : ليه حبي ؟ اطالع يوسف ؟
نايف : طايل لسانك من بعد ذا الوعد شكلها بتجي تزيّن اشياء وتشيّن اشياء
مرام : وش قصدك تشيّن اشياء ؟
نايف : مدري ننتظر و نشوف
مرام : دام ما منك فايدة تعال شيل المواعين وحطها بالطاولة
قام وهو يدخل للمطبخ واخذ المواعين وهو يحطها بالطاولة وهي تجهز الاكل على ازعاج وعد و صياحها
●
●
●
في بيت ابو فهد تحديدا بغرفة سعود
كان منسدح على السرير وهو يطقطق بلابتوبه لين دق جواله
سعود : هلا باللي لها الخافق يهلي
رد وقال : ارحبي
لين بنبرة خشنة قالت : البقى
ضحك وقال : صوتك الحين وانتي مخشنته كانك قطو تو بالغ
ضحكت لين وقالت : تراك قليل ادب
سعود : معليك ، شلونك ؟
لين : تمام
سعود : طيب اسأليني وانت
لين : وش دخلني فيك
سعود : والله
لين : لا امزح ، ادري انك طيب ياحبيبي
دخل سعد وقال : سعود تخاوي ؟
سعود : وين ؟
سعد : طفشان و بطلع تجي ؟
سعود : الحين
سعد : لا بكرا ، ايه الحين لاترفع ضغطي
سعود : ماخذ عباطة مناهل انت ؟
ضحك سعد وقال : بتجي ولا لا ؟
انتبه للجوال اللي على اذن سعود وقال : لا دام الجوال لاصق بأذنه مافي امل اجل اخليك انا
فز سعود وقال : لااا بجي بجي
سعد : طيب انتظرك تحت
طلع سعد وقفل الباب وراه
سعود : يلا لين حبيبي تبين شي ؟
لين : انا داقة مشتاقة لك طيب شلون تروح وتخليني
سعود : تمام يا عيني انا مابروح واضيع وبموت ، انا برجع
لين : انت تبيها من الله اصلا انقلع لاتكلمني
سعود : ياخي مشكلة اللي يتزوج بزر
لين : خف علينا يالشايب تراك اكبر مني بسنة مافي فرق تقلع يلا
ضحك وقال : احبك ترا
لين : شكرا
سعود : شكرا لانك قلتي لي شكرا
لين : وانت شكرا لانك قلت لي شكرا لان انا قلت لك شكرا
ضحك سعود وهي ضحكت من ضحكه وقال : عفوا وش تسوي ؟
سعود : ماش مالها اعراب عندنا
ضحكو الاثنين و ودعها وقفل وقام يتجهز وطلع مع سعد
●
●
●
في جناح فهد و كيان
كيان : فهدهد
فهد : لا غلط غلط ، فهدهد يقولونها اهلي والعيال انتي تقولين فهودي
ابتسمت وقالت : فهدهد
فهد : يا رب سترك ، العناد اللي عندك ذا من وين تجيبينه فطرة ب ال فيصل
كيان : اسمها عندتس ، عندك لما تكلم ولد
فهد : يختي انتي لاتستقعدين لي على الكلمة اللي تطلع حياها الله
كيان : لا انا ابي كذا
فهد : شوفي قضايااككك وانتي ساكتة ورانا شغل بعدين
لفت بسرعة وتوسعت عيونها وهي تطالعه وقالت : وش شغله ؟؟
انفجر ضحك على ردة فعلها وجلس بالارض وهو ماسك بطنه
فهد : مب شغل شي اسكتي الله لا يفضحنا
رفعت حواجبها وقالت : وصخ وصخخ وصخخخخ
جلست على السرير وهي تطالعه يضحك و يوقف ويرجع يضحك مرا ثانية ويسحب ملفاته و يحطها على وجهه ويضحك بشكل مكتوم وهي سحبت المخدة وضربتها بوجهه وقالت : مالككك داعييي
ضحك وهو يدفن وجهه بعنقها وقال : ابيك يابنت الحلال
كيان : وانا ما ابيك
فهد : قد الكلام ؟
كيان : ايوه
بعد عنها وهو يطالعها بعيون شبه مغمضة وهي ضحكت وقالت : شتبي
غمز لها وهي فاهمة قصده مرا وقالت : وقته الحين انت تشوف ؟
فهد : ليه من متى له وقت محدد ؟
كيان : من عندي
فهد : انا قايم
كيان : حيوان وين ؟
فهد : بقوم اتروش ابتنشط
كيان : تنشط تنشط ليه ماتتنشط
قام وهو يفك ازرار ثوبه وقال : يعني مافي امل ؟
ضحكت وهي تعطيه ظهرها وتنسدح وقالت : اليوم لا
رفع يده وهو يشوف الساعة وقال : اليوم لا ، صارت الساعة 12 يعني دخلنا اليوم الثاني
ضحك وقال : بالطقاق ياشيخة ما باقي الا اترجاك عشان شي مايسوى
دخل الحمام ( الله يعزكم ) يتروش وهي نامت بسبب تعبها
●
●
●
في بيت ابو ياسر بجناح ياسر و بدور تحديدا
ياسر : فصفصة تعال هنا
فيصل : ماما وش اقوله ؟
بدور : قوله فول سوداني
ضحك ياسر و قال : وش حلوه الفول السوداني طعمه حلو مب زي الفصفص مالح
فيصل : ترا انا ما احبك
ياسر : لا تكفى بتقطع يا فيصل بتقطععع
بدور : هه بالله عليكم ذا اب ؟ والله انك اب تحتاج اب
ضحك ياسر وهو يمسك بلوزة فيصل من ورا ويرفعه ويدور فيه وفيصل يصارخ ويضحك وهي تضحك عليهم
بدور : ياربي رزقتني اثنين مجانين ارحمني و ساعدني واعطيني الصبر
وقف ياسر وهو يمسك فيصل ويرميه فوق و يمسكه
ياسر : تحب بابا ولا لا ؟
فيصل : لا
ياسر : تحب بابا ولا لا
فيصل : لا ، نزلني
نزله ياسر وقرب فيصل منه وشد شعره وراح ركض عند جمال
جمال : ياخي كم في بزر هنا ؟
ياسر : شد شعري الحيوان
عمار : الله يكون بعونتس يا بدور بس
ياسر : انا ابووهه مايشد شعري يحترمنيي
عمار : اووه شد شعره الله يعينك على الالم
ياسر : انت وعع
فيصل : انت وع الوع
ياسر : انت ختمت الوعاعة
ضحكو على ياسر وهو شد شعر فيصل بخفيف وانحاش وفيصل يلحقه وهو طلع الحوش وتخبى تحت السيارة و جمال شايل فيصل بحضنه و يدورون ياسر
فيصل : فوول ثودانيي
ضحك ياسر وطلع وقال : وش تبي يا فثفثة
فيصل : ابي اضربك
ياسر : انت اللي بديت طيب
فيصل : بس انا صغير
ياسر : وانا مولود
قوس فيصل شفايفه وراح له ياسر وشاله وقال : خلاص انا آسف اضربني يلا
حضنه فيصل وقال : انا احبك ترا
ياسر : حبيبي وانا احبك اكثر من بدور
فيصل : وانا احبك اكثر من ماما مناهل
ياسر : العبببب يحبني اكثر من مناهلل مين قدك يا ياسرر
ضحكو عليه وهم يستغفرون ودخلو وهو اخذ فيصل وراحو جناحهم
ياسر : تخيلي في احد غلب مناهل بالحب
بدور : مين ؟
ياسر : انا
بدور : ليث يحبك اكثر من مناهل ؟
ضحك ياسر وقال : لا الله يقرفتس لا
ضحكت بدور وقالت : اجل ؟
ياسر : فصفصة يحبني اكثر من مناهل
بدور : اووووه صرنا ننسى ماما بدور
ياسر : ايه و قال لي انه يحبني اكثر منتس
بدور : ازعل يا فصول ؟ ازعل
فيصل : ايه ازعلي
ضحك ياسر وهو يبوس خد فيصل و قال : تبون نطلع ؟
بدور : اي والله جت بوقتها
لبسو وطلعو يتمشون
●
●
●
في بيت ابو صقر تحديدا جناح صقر
كانت واقفة فوق السرير وهي تمشط شعرها وهو جالس متربع
صقر : الحين مايمدي تمشطين شعرتس وانتي جالسة ؟
نواهل : عشان اقدر اتحرك براحتي
صقر : طيب تعالي
جلست بحضنه وهو اخذ المشط و قعد يمشط لها شعرها وهي تطالع وجهه من المرايا و الابتسامة شاقة وجهه
صقر : ليه ماتصبغين شعرتس ؟
نواهل : وش تبي لون ؟
صقر : اسود
نواهل : هو لونه بني غامق وش يفرق ؟ بعدين الاسود ما يناسب لون بشرتي
صقر : طيب بني فاتح ؟
نواهل : حاضر اصبغ لعيونك كم عندي صقر انا
صقر : ياجعلني افداتس يا شيخة
لفت نواهل وهي تطالعه وقالت : صقر اسمعني
عقد حواجبه باستغراب من نبرة صوتها المتغيرة وقال : قولي
نواهل : ابرجع لبيت اهلي
صقر : ليه ؟ مزعلتس انا ؟ اذا مقصر معتس علميني لا تدخلين اهلتس بينا لو سمحتي والله ان كان انا مزعلتس بشي ترا ورب الكعبة بالغلط وهي زلة يا نواهل والله زلة
ابتسمت وهي تطالعه وحضنته بقوة وقالت : احبك يا صقر
رفع يدينه وهو يحاوط خصرها وقال : وانا والله اموت فيتس
نواهل : بس تراني بروح لأهلي اغير جو طفشانة
بعد عنها وقال : بشتاقلتس
نواهل : معليه الحب ما يزداد الا من الشوق
ضحك وهو يطبع قبلة على شفايفها وقال : دام كذا تمام ، بس كم بتقعدين
نواهل : شهر شهري
قاطعها وقال : حدتس ثلاثة ايام وتحمدين ربتس الاخت ناوية تقعد شهر شهرين
ضحكت نواهل وقالت : لا تقاطعني طيب
صقر : ثلاثة ايام يا نواهل ثلاثة ايام وتراها كثيرة علي بس مارح ابخل عليتس
نواهل : يعني ماتزيد ؟
صقر : ابد
نواهل : مثل ماتحب يكون
صقر : شاطرة
ضحكت وهي تبوسه بخده وهو قعد يطالع عيونها وو ...🌚
●
●
●
عند سعد و سعود
سعود : خلاص وصلني الكوفي لا اتأخر على دوامي ويستلمني المدير وعادل معه
سعد : طيب
وصله للكوفي و راح للمركز
كانو بدر و احمد وسالم داخل غرفة التحقيق محاصرين فاروق و قدام غرفة التحقيق كانو الفريق عصام و الفريق غازي و المحامي قصي يسمعون حوار اللي داخل
بدر : شوف تكلم وبنخلص سريع سريع مارح نعورك ترا
ضحك فاروق وهو يجلس بعدم اهتمام ويحط رجل على رجل ويرجع ظهره لورا ويدينه ورا رأسه وقال : ماعندي شي ينقال
احمد : اجل جبناك هنا وش تسوي ؟
فاروق : حقق معي
سالم : شوف حبيبي خفة الدم والفرفشة اتركها لابوك وامك تمام بابا ؟ يلا قول وش نوع الحلاو اللي كنت تاكله ؟
فاروق : مصاص بنكهة الكولا يجي طعمه جبار جربه ماتخسر شي ترا
دخل عصام بعصبية وهو يصفق فاروق وقال : يستخف دمهه ذاا
لف عصام وقال : سعددد
دخل سعد والعيال مسكو فاروق وقرب منه وهو يسحب منه دم وهو يحاول يقاومه واخذ سعد الدم وابتسم ابتسامة خبيثة وقال : نشوف عند طريق الدم النجس ذا وش نوع المصاص اللي كنت تتعاطاه
ضحكو العيال وطلع سعد و ركب السيارة وحرك اما الباقين كملو تحقيق مع فاروق
ركب السيارة و وصلته رنة وفتح سبيكر وقال : هلا فطومي
ابتسمت فاطمة وقالت : هلافيك ، كيفك ؟
سعد : اوووه طاير
فاطمة : جعله دوم طيرني معك ؟
سعد : حبيبك و زوجك المستقبلي بالمركز عند بدر واحمد يحققون معه مسكوه يتعاطى مخدرات ويروج بالاستراحة مسكوه هو واخوياه ، اخوياه اعترفو وهو جحد سحبت منه دم بروح للمختبر بشوف هو يتعاطى او لا
فاطمة : طيب ابي اطلب منك طلب
سعد : عيوني
فاطمة : تسلم عيونك ، بس لو سمحت وقف تقول حبيبتس وخطيبتس
سعد : بس انا ماقلت حبيبتس و خطيبتس انا قلت حبيبكك و خطيبكك
فاطمة : تنكت ؟
سعد : تعلمت من حبيبك خفة الدم
فاطمة بحدة : سعددد لو سمحت لاتقول حبيبك يصيرون عيال العالم كلهم حبايبي الا هو
سعد قال : عادي كل الناس يصيرون حبايبك ؟
فاطمة : ايه ، لأنك انت كل الناس يا سعد
ابتسم وقال : ان كنت انا كل الناس انتي اللي محتوية هالناس
حكت خشمها بخجل وقالت : المهم انا بروح كلمني عن اللي يصير اول بأول
سعد : طيب اسمعي
فاطمة : سم
سعد : سم الله عدوك ، الحين اذا خلصنا من موضوع فاروق وخارجتك منه وخلاص ارتحتي منه
فاطمة : ايوه
سعد : معد بكون اكلمك ؟
فاطمة : مافهمت
سعد : الحين انا ليه اكلمك ؟
فاطمة : عشان موضوع فاروق و تريحني منه
سعد : طيب واذا انتهينا منه
فاطمة : ايوه ؟
سعد : خلاص يا فاطمة خلاص يلا فمان الله
فاطمة : حتى لو راح فاروق يا سعد بكلمك كل يوم وابيك انت تكلمني كل يوم وكل ساعة وكل دقيقة انا كذابة اذا قلت لك اني قاعدة ادق عليك عشان فاروق ، انا ادق عشانك انت عشان ابي اسمع صوتك بس ابيك تكون موجود سواءً كان عشان فاروق ولا مب فاروق
سعد : من قلبك ؟
فاطمة : من اعمق نقطة بقلبي
سعد : وان جيتك ترضين بي ؟
فاطمة : مين مايرضى بك ؟ مهبولة اللي ترفضك وانت كامل والكمال لله خَلق و خُلق جمال كمال حسب ونسب
سعد : خليتيني عروسة
ضحكت فاطمة وقالت : محشوم بس صدق وشوله ارفضك ؟
سعد : ما اتكلم عني انا ، اتكلم عنك انتي بتوافقين ان جيتك ؟
فاطمة : اي ، بوافق لاني ابيك واحبك
سعد : تمام ، انتظريني بزيارة قريبة يا فاطمة
فاطمة : ابشر
سعد : يلا استودعتك الله انتبهي على نفسك
فاطمة : ان شاء الله
سعد : يلا فمان الله
فاطمة : مع السلامة
وصل سعد المختبر وهو يسوي الفحص وكل تفكيره اخذته فاطمة
أنت تقرأ
لو قلت لقلبي توب عيني تكذبني
Romanceدخل الليث البيت والتعب لاعب فيه لعب رمى نفسه على الكنبة وهو يهف وجهه يبعد ريحة الدخان الليث : آسر تكفى وخر سكت آسر وهو يطلع زقارته الثانية ويحطها بشفايفه وياخذ الولاعة ويشغل الزقارة دخل ابو صقر وهو يقول : انا كم مرا اقول الزفت ذا لا تقربه ؟ آسر :...
