نور : ابي حلاو
قصي : قولي لعبير
نور : ابي حلاااو
قصي : لاااا
نور : ابي حلاااااااااااااو
قفل قصي اذنه وهو يصارخ وقال بعناد : لااااااااااااااا
بكت نور وقالت : ابي حلاو ابي حلاو ابي حلاو
عبير : قصي ماني ناقصة
قصي : لا لالا مافي حلاو قصي حلو و نور يع
نور : ابي حلاو
قصي : لا
طلع قصي ونور رفعت صوتها وهي تصارخ وتبكي وقصي يسمعها من ورا الباب ويضحك
عبير : الله يصلحك يا قصي ياسر معلمك الهبال الله يكفيناا بسس
دخل قصي وهو ياخذ جزمة نور ويلبسها وقال : يلا
اخذها وهو يجلسها على كتوفه وطلع للبقالة
●
●
●
رجعت البيت وهي ترمي نفسها بتعب ، رفعت رأسها وهي تطالعه شارد ويفكر ولا هو معها ولا كأنه شافها ابد
رفعت حواجبها ونزلتهم وزمت شفايفها بملل وقامت غرفتها
الليث : وش اسوي ؟ هي اللي قصرت معي وخلتني اسوي كذا
قام وهو يدخل للغرفة وشافها تلبس وتنحنح
نزلت بلوزتها بهدوء وقالت : في اختراع اسمه طق طق
ضحك وهو يجلس وقال : ان شفت ؟ شفت زوجتي ماشفت غريب
مناهل : تمام
الليث : مناهل تعالي شوي بكلمتس
جلست جمبه بهدوء ومسك يدينها بقوة وقال : وش فيتس ؟ لي فترة اشوفتس هادية وتطنشيني وماتكلميني ليه ؟
ابتسمت مناهل وهي تبوس خده وقالت : اقولك ؟
الليث : ايه
مسك يدها وهو يجلسها بحضنه وقال : علميني
رفعت يدينها وهي تحط كفوف يدينها بخده وهو مسك يدينها
مناهل : تذكر يوم رحت لأهلي كم يوم ؟
الليث : اي
مناهل : بعد مارجعت بعد يومين اعتقد شفت روج بدرج التسريحة الروج مو روجي ولا استخدم ماركته قلت يمكن انت جايبه لي هدية لكن يوم شفته مستخدم وشبه مخلص عرفت انه مو لي لشخص ثاني
جاء الليث بيتكلم وقاطعته : خلني اكمل ، بعدها بكم يوم انت رجعت البيت وريحتك عطر نسائي قوي
سكت الليث وهو يطالعها وكانت جدية مية بالمية
الروج صار بدرجها يوم راحت لأهلها وميّ عرفت ان مناهل مو موجودة بالبيت راحت لبيت الليث بحجة انها تبي تعطيه ملفات ودخلت الروج بالدرج والليث مايدري ، اما سالفة العطر بالمكتب يوم طاحت وهو مسكها فتحت عطرها وعطرت الليث منه من غير مايركز والليث ما ركز ابد عشان كذا كان منصدم وهو مايدري عن اي شي وكل ذا تخطيط خبيث من ميّ ، صحيح ان ميّ دخلت رأسه بس مافكر يخون مناهل ابدا لأنه يحبها ويموت فيها وقبل لا يخطي خطوة غلط يفكر ان مناهل رح تتركه وهو مايتقبل فكرة ان مناهل تتركه ابدا لانه يشوفها كل شي بحياته
الليث : انا اخونتس ؟
مناهل : خلني اكمل
الليث : تمام
مناهل : تذكر هذاك اليوم يوم انهرت وقت النوم وانت كنت مستغرب وكنت ابكي
الليث : ايه ؟
مناهل : يوم سمعتك تكلم مساعدتك وتقولها من عيوني وتسلم عيونتس وانتبهي على نفستس واستودعتتس الله اوجعني قلبي عشان كذا بكيت ، آخر شي يوم رجعت البيت وبشفايفك روج
الليث : خليني اشرحلتس سالفة الروج اسمعيني
قفلت فمه بكف يدها وقالت : مابي اسمع منك ولا شي انا معد ابي اتمسك فيك واتمسك بحياتنا بترك حياتنا تمشي مثل ماهي والمكتوب بيصير اما على سالفة التطنيش والتغير
ابتسمت مناهل واستأنفت كلامها وقالت : فترة تفكير وتنتهي ، والحين تصبح على خير
الليث : مناهل اسمعيني تكفين
انسدحت وهي تعطيه ظهرها ونزلت دموعها وكانت تحاول قد ماتقدر مايدري انها تبكي
الليث بقلبه : كل ذا بقلبها وساكتة ؟ وش سويت يا ليث ؟ تبي تخرب بيتك انت ؟
تخللت اصابعه بشعره وشد على رأسه بقوة ورأسه بينفجر من التفكير
حست فيه انه للحين ما انسدح ، قامت تجلس وهي تشوفه ماسك رأسه ، قامت تجيب له مويا وبنادول وقالت : تعشيت ؟
الليث : ماني جوعان
حطت الكاسة والحبة بالطاولة وراحت تسوي له عشاء وطلعت
مناهل : كل عشان تشرب العلاج
اخذ الصينية منها وقال : مناهل والله ما اخونتس والله الروج اللي لقيتيه بالدرج مدري من وين جاء وريحة العطر والله مدري من وين جت والله ما ادري جعلني جثة قدامتس لو اني كذاب والله
مناهل : تمام خلاص حصل خير
الليث : وعلى سالفة الروج الثانية ميّ مساعدتي جابتلي كوب قهوة فيه طبعة روج وانا شربت منه وطبع الروج بشفايفي والله ما اخونتس
مناهل : كنت تقدر تغير الكأس لكن مو مهم تعشى واشرب الحبة
انسدحت بقهر منه وقال الليث : مناهل لاتصدين تكفين تكفين والله ما اقوى خلينا نرجع زي قبل واحسن تكفين
قالت مناهل بهدوء : مب قلت انك تكرهني ؟
الليث : والله اني كذاب كذاب اموت ولا اكرهتس وانتي تدرين لاتعطيني ظهرتس وقومي كلميني يا مناهل
قامت وهي تتربع وقالت : ليه ماخذني قلت ؟ عشان تنام معي وبس ويوم شفت اني اخاف من ذا المواضيع كرهتني ، هذا قولك انت ولا احد قاله غيرك ، وش تبي مني الحين ؟
الليث : مناهل تكفين
مناهل : مب بهواك يا ليث وقت ماتبي تخرب الامور و وقت ماتبي ترجعها الحين كل شي يمشي بهواي انا
سكت الليث وهو يطالعها برجاء وعيونه تلمع
رفعت كف يدها وهي تغطي عيونه وقالت : لاتطالعني كذا يا بزر
ضحك وهو يبوس باطن كفها وقال : آسف
مناهل : اقولك وين تحطها آسف ؟
الليث : وصلت
مناهل : تعشى ونام يلا
الليث : ماني مشتهي
رفعت حواجبها بتملل وهي تأكله وبعد ماخلصت عطته الحبة والمويا وقالت : يلا نام
انسدحت وهو حط رأسه بصدرها وهي تلعب بشعره
اشتاق لها وحيل اشتاق لأيامهم قبل ميّ يوم تستهبل معه و تهاوشه ويحارشها وتعانده ويحبها وتدلعه وتسمع كلامه اشتاق لتفاصيلها كلها ولعن اليوم اللي فكر بغيرها فيه استحقر نفسه يوم فكر بميّ والدنيا كلها معه هو وملكه لحاله يطالع النجوم والقمر معه وياكثر النجوم ويا وحدة القمر وهي قمراه مالها مثيل بعينه
اطلق تنهيدة طويلة وقالت : سلامات ؟
الليث : مدري
نزلت يدها وهي تحركها بوجهه وهو ضحك : اعقلي اعقلي
مناهل : نام لا تفكر بشي
الليث : بقوم وانتي مب فيه ؟ بيجي يوم وانتي مو موجودة فيه ؟
مناهل : كل شي يمشي على حسب معاملتك معي لو كسبتني يا ليث اموت ولا اتركك لكن ان بعدتني مارح تشوفني بعدها
عض شفته بقهر وهي حكّت لحيته بمعنى انها راضية عليه وضحك وقال : طاح الحطب ؟
مناهل : لاتسألني هالسؤال عشان ما ادعي يطيح على رأسك
الليث : طيب راضية ؟
مناهل : ايه
قام وهو يتربع وقال : تمام يلا قومي
مناهل : وين ؟
الليث : نجلس مافيني نوم تو بدري الساعة 7
مناهل : ما ابي
الليث : يلا يلا
قامت مناهل وهي تتحلطم وهو نزل
تروشت ولبست قميص نوم ابيض قصير لين الفخذ بأكمام طويلة منفوخة ومفتوح الظهر وشعرها سوته ويفي وميك اب وروج احمر سوت مناكير احمر وتعطرت وتبخرت ولبست نعالها الابيض الفرو
نزلت وهي تشوفه جالس ومعه ريموت التلفزيون وقالت : ذي جلستك ؟
طالع فيها بأعجاب حتى كشختها اشتاق لها ، ابتسم ابتسامة عريضة برزت اسنانه وقالت : غيّر جوك مايمشي معي ترت
ماحست فيه الا وهو يحاوطها من خصرها ويضمها لحضنه ويدفن وجهه بشعرها
الليث : يا الله وشلون فرّطنا بهوانا ؟
مناهل : انسى ترا اللي فات مات
ابتسم وهو يجلس ويمسك عوده وهي مسكت عودها وبدأت تدق وهو يتأملها
أنت تقرأ
لو قلت لقلبي توب عيني تكذبني
Romanceدخل الليث البيت والتعب لاعب فيه لعب رمى نفسه على الكنبة وهو يهف وجهه يبعد ريحة الدخان الليث : آسر تكفى وخر سكت آسر وهو يطلع زقارته الثانية ويحطها بشفايفه وياخذ الولاعة ويشغل الزقارة دخل ابو صقر وهو يقول : انا كم مرا اقول الزفت ذا لا تقربه ؟ آسر :...
