لو قلت لقلبي توب عيني تكذبني

الجزء الرابع والثلاثين

سعود : وش يعني نسكت عشان هي ماتبي احد يدري بالموضوع ؟ نواهل انتي صاحية ؟
نواهل : ايه صاحية ومصحصحة
سعود : ليه ماتكلمينا من قبل ؟
نواهل : لأني مو خايفة عليها ، انا خايفة على الليث وش بيصير فيه
سعود : شلون يعني ؟
نواهل : وش اكثر شي يهد الرجال ؟
سعود : كسر قلبه
نواهل : مناهل بتكسر قلب الليث ولا بترحمه بس مب الحين
سعود : شلون ؟
نواهل : انت تشوف مناهل تعاني مع ليث وماتعلم احد صح ؟
سعود : اي لأنها كتومة
نواهل : صح عليك هي كتومة بس اذا انفجرت تنفجر بشكل مو معقول ، مناهل اذا احد كسرها تضره و تضر اهله بعد وهي لأنها تحب الليث ما ضرته ولا كان يمديها تذبحه بعد ، بقولك شي ثاني
سعود : وش ؟
نواهل : مرا كنا انا ومناهل طالعين مول وجاء واحد وقذف علينا كلمة مو كويسة تخيل مناهل وش سوت ؟
سعود : وش ؟
نواهل : لحقته لين بيته وجابت معلوماته كلها ودبست فيه جريمة قتل و قصّوه
سعود بصدمة : ذا يطلع من مناهل ؟
نواهل : ايه ، عشان قذفها بس دخلته السجن ، توقع وش بتسوي بالليث ؟
سعود : بتدخله السجن ؟
نواهل : مارح تضره فعليا
سعود : لا تلحسين مخي شلون يعني ؟
نواهل : رح تضره من بعيد لبعيد
سعود : شلون طيب ؟ كيف بتسوي ؟
نواهل : مارح تجيب رجال يضربونه مارح تجيب واحد يذبحه مارح تدبس فيه جريمة ابد مارح تسوي ولا شي من هذا مارح تضره ابدا لانها تحبه لكن اذا زودها بتخليه يبكي دم بتخليه يتمنى الموت والموت يجفاه بتخليه يتمنى تغفى له عين بيجلس عمره كلها مهموم بتخلي امه وابوه يبكون عليه بسبب خوفهم وقهرهم عليه ترا مناهل قوية واقوى مننا كلنا لكن مناهل تنتظر الوقت المناسب وتنفجر فيه واذا انفجرت محد بيتضرر كثر الليث
سعود : كفو عليها هذي بنت هادي
نواهل : ماتعرفها انت ، مناهل تهد بلد كوكب كوكب
سعود : حلو ماينخاف عليها
نواهل : تتوقع لو مناهل ضعيفة انا بسكت ؟ والله اعلم ابوي على طول
سعود : تتوقعين اهله يدرون انه يخون مناهل ؟
نواهل : ما اعتقد ما اتوقع ابدا
سعود : ولين ؟
نواهل : حتى لين ماتدري
سعود : الا تدري انا متأكد لين تطلع اخبار العالم كله معقولة ماتدري
نواهل : لا ماتدري ولاتحملها ذنب اخوها عشان ماتندم انت ياسعود
سعود : معد ابيها
رفعت لين يدها وهي تقفل فمها بقوة ونزلت دموعها واهلها ساكتين
سعود : اللي يضر اختي اضره هو واهله وقبيلته كل ابوها
نواهل : بس لين وش دخلها ؟ تبي تكسرها مثل ما انكسرت مناهل ؟ توها صغيرة على هالكسر ومارح تتحمله وبعدين انت مارح تكسر لين لحالها انت رح تكسر عمرك معها
سعود : بس لو كملت معها وبقلبي حقد لاخوها بضرها غصب عني بدون قصد
نواهل : حط شي واحد ببالك لين مالها دخل واذا تركتها محد بيندم كثرك ، محد بيندم كثرك يا سعود فكر بعقلك لاتفكر بقلبك لاتخلي لين تتحمل ذنب غلط هي مالها دخل فيه
تنهد سعود وقال : طيب المكيف التبن ذا وش نسوي فيه ؟
نواهل : قوم نام بغرفتي
سعود : وانتي ؟
نواهل : انا بنام بغرفة مناهل
سعود : لا انا بنام بغرفة مناهل مشتاقلها حيل والله
نواهل : مشتاقلها مرا ؟
سعود : اي من زمان ما كفخنا احد انا وياها سعيد واخته يدورون ضرب
ضحكت نواهل وقالت : قوم يلا نروح لها
سعود : تمام
نواهل : ناخذ الحبيبة معنا ؟
سعود : مين ؟
نواهل : لين
سعود : يختي الله ياخذك ياليتني ماخطبتها
نواهل : احح ليه ؟
سعود : من يوم خطبتها وانا ابيها حلالي اليوم قبل بكرا قسم بالله يوجعني قلبي يوم اشوفها بالجامعة ومقدر اقرب منها وربي عمي ابو صقر قاهرني وش فيها لو خلاني املك عليها وتصير حقي
نواهل : تبيها انت ؟
سعود : لو ما ابيها ليه خطبتها ؟
نواهل : قلتلك جهز جناحك واذا جناحك صار جاهز تعال خذ مني المهر كامل ماينقصه ريال
سعود : ايوه ؟
نواهل : واذا صار بيتكم جاهز والمهر جاهز نروح نملك وابن امه يرفض
سعود : واذا رفض عمي ابو صقر ؟
نواهل : سعود عمري انا خليت شي بخاطرك ؟
سعود : لا
نواهل : خلاص انطم مارح اخليها بخاطرك وبتملك عليها قريب بس شد حيلك
سعود : ياخي ورب الكعبة اني احبك
نواهل : جننتك لين كذا ؟ ما الومك البنت تجنن بس لازم تصير ثقل يا سعودوه خلك ثقل لازم عيال هادي هم الثقيلين وعيال عمي زايد هم الخفيفين شوف فهد ثقيل على كيان وجته مناهل ثقيلة على ليث صحيح ماتوفقت بس بتربيه بثقلها انا ثقيلة على
تداركت نواهل نفسها وسكتت وصقر وآسر ضحكو
سعود : انتي ثقيلة على مين ؟
نواهل : محد
سعود : نواهل كملي كملي انتي ثقيلة على من ؟
نواهل : محد تعرفني ما احب سوالف الحب والغراميات ذي مو جوي
وقفت نواهل ومسكها سعود وقال : والله ماتنحاشين بعلم سعد ترا يستلمك قولي حاطة عينك على مين ؟ آسر و لا صقر
نواهل : يمكن ذيب ولا ذياب وش معنى حددت آسر وصقر
سعود : لان ذيب وذياب اصغر منك
نواهل : اصغر مني بسنة مب بمليون
سعود : قولي مين ؟
نواهل : والله ما اقول وخر
انحاشت نواهل وقالت : بلبس عبايتي وانتظرك تحت
ضحك سعود وقال : ورب الكعبة اكشفك يا نواهل 
اخذ المخدة وهو يحضنها وقال : اخخ يا لين وش سويتي بنا جبتينا على وجيهنا حسبي الله على خلفة عمي زايد جايب انتاج جبار
ضحك وهو يفتح دولابه وقال : ياحظ ذا اللي جايب راسك يا نواهل ياحظه الكلب ابوه وامه داعين له من قلب قلبهم
صرخ سعود بصوت عالي : سعددد يا كلببب كسر الله يدككككك وين التيشييررتتتت
دخل سعد وقال : بجيبلك بداله
سعود : مابي بداله ابي هو نفسه
سعد : يا رجال كل تبن والله ما اجيب شي تقلع
سعود : مين سمح لاهلك تخش غرفتي
سعد : نسينا ما كلينا ايام مستقعد بغرفتي ؟
سعود : نشبة انت غثيث ؟
سعد : طالع عليك انا ما اقول الا الله يعين لين عليك
سعود : برمي العلاقة بفمك لا تقول اسم محارمي
سعد : من زينك انت ومحارمك رح رح يالخفيف
ضحك سعود وقال : لين ذي جالسة تشوهه سمعتي
سعد : سمعتك ماش من يومك تو تدري سترنا عليك حنا يوم رحنا نخطب لك
سعود : انا بشوف ذي اللي بتحبها وتخليك زي الرخمة وراها
سعد : سعود يا حبيبي لا تحسب كل الناس زيك
دخل فهد وقال : ياخي انتم ماتعرفون تسكتون ماتخلون الواحد يروق شوي
سعود : وانت الله يسلمك شاد حيلك مرا خل البنت ترتاح شوي
ضحك فهد وقال : الله لا يوفقك يا كلبب
ضحك سعد وقال : والله وجبتها يا سعود
سعود : من يوم تزوج ماشفناه
دخلت نواهل وقالت : اقوم العنك ؟ لي سنة استناك
سعود : تخيلو في واحد جايب راس نواهل
فهد : احلفف
سعود : والله
سعد : وش ذا الغدرة يا نواهل مو متفقين انا وياك مانحب ؟
نواهل : ماحبيت والله ما حبيت توني على اتفاقنا بس ذا كلب لقطني اقول كلمة بالغلط مسكها علي روح روح انتي خلك مع لين اللي جايبتك على وجهك
سعود : خليها تجيبني على وجهي مب خطيبتي هي ؟
نواهل : لين ذي سوت شي ربي عاقبها فيك شكلها كانت تعصي امها وابوها
ضحك سعود وقال : والله ياحظها فيني
فهد : ايه لو انا بنت كان تزوجتك
سعود : يععع الله يقرفك والله لو انك اخر بنت بالعالم
فهد : يا كلب انا افزعلك
سعود : حط فزعاتك بالمكان اللي انت خابره
دحل ابو فهد وقال : ماتقضبون السنتكم انت
نواهل : حي الله الرأس الكبير
ابو فهد : اقول انتي خليك على جمب يالنفاس
ضحكو اخوانها عليها وقالت : جالس تظلمني يا يبه والله
ابو فهد : لا والله اني اظلم النفاس انا ابي اعرف صقر ذا شلون وظفك عنده وانتي مامنك فايدة 24 ساعة متسدحة مهددته انتي ؟ مجنونة تسويها
نواهل : يا يبه ذا صقر يحمد ربه اني اشتغل معه ويحمد ربه اني اطالع فيه حتى لو بالغلط
رفع صقر حواجبه وهم يطالعون فيه
ام فهد : ليه مين انتي ؟
نواهل : بنت هادي ال حزام
ابو فهد : والتبن عليك انتي وال حزام
نواهل : تغلط على نفسك معنا ترا
ابو فهد : يبيلك تربية انتي
انحاشت نواهل وتخبت ورا فهد وقالت : امزح يبه والله امزح
ابو فهد : وش عندك لابسة عبايتك تتمخطرين رايحة جاية من غير علمي ؟
نواهل : علمي ولا ادبي ؟ هههه امزح امزح بنروح انا وسعود لمناهل تقلطون ؟
ابو فهد : يووه يا حليلها مناهل عليها غبار يا قدمها
ضحكت نواهل وقالت : جحدتها الله يسلمك
ابو فهد : بعد من واحد لين ثلاثة واللي مب موجود تحت مايطلع من البيت لمدة اسبوع
ماهي الا ثواني وكل واحد سحب جواله ونزلو
ذياب : ياخي وش الحياة الرهيبة ذي
لين : اي والله حياتهم تجنن الحمدلله اني بعيش معهم
آسر : والله مافيهم عاقل
ابو صقر : آسر خلك ورا اخوك تشوف لي وش علّته وتشوف مين الرخيصة اللي جالس يخون حرمته معها
آسر : ابشر
ام صقر : وش بتسوي مناهل بوليدي ؟ بتكسر قلبه ؟
ابو صقر : خليها تذبحه بعد اخذ بنت ذهبة يروح يخونها مع وحدة الله اعلم من وين جايبها
سكتت ام صقر بخوف من مناهل من الكلام اللي سمعته من اخوانها و الواضح انها مب هيّنة ابدا واذا حقدت تهدم بلد
●
●
●
في بيت الليث
فتحت الباب وطاح الليث وقام
الليث : تو تفتحين ؟
مناهل : وش منومك هنا ؟
الليث : غفيت ، ابي اكلمتس
مناهل : وخر
مشت وهي تتركه وهو يمسح وجهه ودخل الحمام ( يكرم القارئ )
وهي راحت تلبس وتجهز اكل من شافت رسالة من اهلها انهم جايينها
مناهل : هلا والله
قرب ابوها وهو يحضنها وكان مركز بوجهها اللي مايبشر بالخير ابد و يوضح البكاء اللي بكته من قلب
ابو فهد : وش فيك ؟
مناهل : ابد تعبانة بس تعالو انتو ادخلو معليكم
دخلو وجلسو بالصالة وقهوتهم وجلست بهدوء وهم يطالعونها
سعود : مناهل في احد مضيق خلقك ؟
سمعو صوت الليث يتنحنح ودخل وسلّم على ابو فهد وام فهد والعيال وكيان وجلس
الليث : حياكم الله
فهد : الله يحييك
الليث : تو مانور البيت والله
كان سعود يطالعه بكره وحقد ونواهل تطالعه وكأنه ماسوا ولا شي
سعود بقلبه : كيف نواهل كذا تطالعه ؟ كيف كاتمة قهرها ؟
ابو فهد : اموركم تمام يا وليدي ؟
مناهل : اي يا يبه كل شي تمام الحمدلله
سعود : ابوي ما سألك انتي
سكتت مناهل وهي تشوف نظرات سعود لليث
الليث : الحمدلله امورنا كلها طيبة بس مناهل تعبانة شوي
حاوطها من كتفها وقربها لصدره وهي قرفانته
الليث : بس ان شاء الله مافيها الا العافية
ام فهد : اكلتي يا يمه ؟
مناهل : ايه
جلسو يسولفون والليث مركز تماما ومنتبه على نظرات سعود وطلعو لبيتهم
الليث : قلتي لأهلتس شي ؟
وقفت مناهل وهي تأخذ الصينيات : لو قلتلهم تتوقع بتبقى عايش للحين ؟ والله ينفونك ولا يبقو لك اثر ويخلون العالم كله ينساك ولا كأنك كنت موجود
وقف وهو ياخذ الصينيات من يدها وجلس وجلسها معه وقال : مناهل علميني وش فيتس ؟
مناهل : اللي فيني انت انت خليتني اكرهك واتقرف منك واستحقرك واحقد عليك خاف مني يا ليث خاف مني والله بتندم والله وبخليك تبكي وتتمنى دموعك تنزل حتى تتمنى دم اهم شي تعبر عن حزنك بخليك جسد بدون روح يا ليث
الليث : طيب علميني وش مسوي
بعّدت يده عنها بشويش و وقفت وقالت بهدوء تام : لاتعودني دفا شمسك دام في النية غروب
طلعت غرفتها وهي تسكر الباب
كان جالس بالكنب وشاد على رأسه ودق جواله ورد : هلا ذيب
ذيب : ما انصحك هالفترة تجي صوب اهل مناهل 
فز الليث وقال : وش ؟ وش تقصد ؟
ذيب : كلنا ندري انك تخون مناهل يا ليث حتى ابوي و تراه حاط آسر وراك
الليث : وش تقول انت ؟ تستهبل ؟
ذيب : و نواهل اخت زوجتك كانت تدري وراحت تعلم سعود ارحم نفسك يا ليث من مناهل واختها ورب الكعبة هذول دواهي امي خايفة منهم يا ليث
الليث : ماني فاهم شي
ذيب : نواهل قالت لاخوها ان مناهل بتكسرك وبتخليك تبكي دم وتتمنى الموت والموت يجفاك بتخلي امي وابوي يبكون عليك من قهرهم وحزنهم عليك انتبه من مناهل يا ليث اللي متساهل فيها ذي تهد بلاد وسعود يهدد انه بيذبحك يا ليث وال حزام كلهم
الليث : وش مخوفك منهم كذا ؟
ذيب : ماني خايف منهم انا خايف من مناهل تدري انها دبّست جريمة قتل على واحد قذفها بكلمة وقصّوه ؟
انصدم الليث وقال : قل والله
ذيب : عشان كذا انتبه يا ليث
الليث : علمهم اني جايهم باكر انا ومناهل بعد العشاء
ذيب : تمام
الليث : يلا رح
ذيب : يلا فمان الله
الليث : بحفظه ، وش بيصير ؟ وش بتسوين يا مناهل
كانت الجملة اللي قالتها مناهل تتردد برأسه
" لا تعودني دفا شمسك دام في النية غروب "
الليث : استغفر الله العظيم خطيت خطوة ولازم اكملها وما اهتم
●
●
●
اليوم الثاني بعد صلاة العشاء
في بيت ابو صقر
ابو صقر : الله يستر من هالولد
ام صقر : لاحول ولا قوة الا بالله
كانو كلهم جالسين بتوتر ينتظرون الليث و اولهم لين تحس بطنها يمغصها لين دق الباب قامت بسرعة وهي تفتحه
الليث : السلام عليكم
الكل قالو بصوت واحد : وعليكم السلام
جلس الليث وقال : تعالي اجلسي
جلست مناهل جمبه لكن بعيدة شوي
الليث : انا ادري باللي سمعتوه امس من نواهل و سعود
لفت رأسها من طاري اخوانها وشافت التوتر فعلا يملي وجيههم كلهم
الليث : بيني وبين مناهل مشاكل جالسة تصير داخل بيتنا ومحد يدري عنها اذا بسوي شي انا اتحمل عواقبه واضراره واتمنى من قلبي محد يتدخل فيه
ابو صقر : وش تهرج انت ؟ تسمع فمك وش ينطق ؟
الليث : اسمع يا يبه وانا مو قاعد اقول هالكلام بتهور انا فكرت بهالموضوع شهرين لين قررت قرار وتسمعونه كلكم ومايصير شي من غير رضى احد ، كله برضاكم و أوّلكم مناهل
كانت شابكة اصابعها ببعض وتشد على يدها تحاول تخفي رجفتها الواضحة للكل
الليث : انا بتزوج خطوبتي كانت يوم الجمعة قبل امس و الملكة بتكون الجمعة الجاية و الزواج بيكون بعد شهر
انصدمو كلهم من الكلام اللي يقوله الليث للحظة حسو انه مو بوعيه
لين : وش قاعد تقول انت ؟ صاحيي اذنك تسمع و تقول ؟ غبي انت ؟
الليث بحدة : ليينن اجلسيي
جلست لين وكلهم للحين منصدمين
ابو صقر : انت صادق ولا تستهبل ؟
الليث : ابد صادق وما امزح
رفع يده وهو يوريهم الدبلة
ام صقر : وشلون تقول كل شي بيصير برضاكم وانت خطبت وخلّصت
الليث : الملكة انا اقصد يا يمه
رفع ابو صقر رأسه وهو يطالع مناهل اللي كانت تضرب يدها اليسار عشان توقف رجفة يدها ودموعها بالقوة حابستها
ابو صقر : حسبي الله ونعم الوكيل
كانو كلهم يطالعون مناهل اللي تطالع بالارض
ابو صقر : يا بنيتي تعالي جمبي تعالي
وقفت مناهل بتمشي وسرعان ما اغمى عليها وفز الليث وهو يحط رأسها على رجوله ويضرب خدها بشويش : مناهل تكفين يا مناهل قومي
صقر : الله يلعنك يا كلبب الله لا يوفقكك
شالها الليث و اخذها للمستشفى واهله وراه بالسيارة الثانية
ام صقر : وش صار بوليدي وصار قاسي كذا ؟
آسر : يا يمه اهدي يرحم والديتس
وصلو المستشفى ودخل الليث بسرعة واخذوها منه
ذياب : كذا مبسوط ؟
لين : جعلها بذمتك يا ليث
ابو صقر : حسبي الله ونعم الوكيل حسبيي الله ونعم الوكيلل
الليث : وش مسوي انا ؟؟
طلع الدكتور وتوجهو كلهم نحوه
الليث : وش صار يا دكتور ؟
الدكتور : البنت هذي تتعرض للاهمال تجيها حرارة بشكل متتالي و سوء تغذية وين ولي امرها ؟
الليث : انا ولي امرها
الدكتور : البنت ذي بذمتك يا ابن الحلال خاف الله فيها
ابو صقر : نقدر نشوفها ؟
الدكتور : ادخلو
دخلو كلهم ومناهل مغمضة عيونها ودموعها تنزل
ام صقر : الحمدلله على سلامتتس يا بنيتي
قربت منها وهي تمسح شعرها بحنية : ماعليه يا بنيتي كله فترة ويعدي كل شي يضايقتس وملكته محد يروحلها و زواجه محد راضي عنه
مناهل : لا ياخالة تكفين
رفعت نفسها بشويش وقالت : هو قال مايصير هالزواج الا برضاي ؟ انا راضية والله اني راضية وبنروح كلنا ملكته وزواجه ونفرح فيه وانا بنفسي بزفه
ابو صقر : يا بنيتي تكلمي بعقلتس
مناهل : انا بكامل قواي العقلية يا عمي خلينا نروح تكفى طالبتك يا عمي ولا تردني وتخليها بخاطري تكفى
ذياب : منجدتس انتي ؟
مناهل : والله ما اقعدله يوم واحد اذا ماتزوجها
الليث : اللي ودتس فيه ابشري به
كانو ساكتين ويطالعون مناهل وينتظرون المغذي يخلص
مناهل : خلّص ؟
صقر : لا باقي شوي
مناهل : خلاص تعبت ابي ارجع للبيت
صقر : يخلص و على طول نوديتس للبيت
كان صقر حنون معها حيل ويخاف عليها من خوفه على خواته
بعدت الابرة من يدها وفز الليث وهو يمسك يدها : وش تسوين انتي ؟
مناهل : انكتمت معد ابي اقعد
الليث : طيب خلي يخلص ونروح
مناهل : مابي ولاتمانع على شي مايخصك وخر عني
بعد عنها بهدوء وقامت وطلعت وهم وراها
ابو صقر : يا بنيتي بتتعبين كذا اكثر
مناهل : ياعمي والله تعبت مابي اقعد هنا
ركبت السيارة الثانية وراحت فيها والليث بسيارته وراحو لبيته
ام صقر : انا بجلس عندتس يا بنيتي عشان اكون حولتس
مناهل : لا يا خالة بتعبك معي
ام صقر : وش تعبه يا بنيتي اجلسي اجلسي
جلست بالسرير ونزلت ام صقر
ام صقر : انا بجلس عندها
ابو صقر : اي زين عشان تهتمين فيها البنت بأمانتنا واهملناها كذا
سكت الليث وهو فعلا هالشهرين لهى عنها ومعد صار يهتم فيها ، كان يشوف نظرات ابوه واخوانه ودهم يصفقونه بس ساكتين احتراما لرغبة مناهل
●
●
●
بعد شهر بيوم زواج الليث الساعة 6 المغرب
في بيت الليث
الليث : مارح نروح فندق وبنجلس هنا
ابتسمت مناهل وقالت : تمام انا بروح اجلس عند اهلي ثلاثة ايام
الليث : ليه ؟
مناهل : عشان اخليكم لحالكم انتو تو معاريس ماينفع اكون طرف ثالث بينكم
الليث : وش طرفه ؟ تستهبلين انتي اكيد منتي طرف ثالث انتي الداخلة وحنا الطالعين
مناهل : تمام بس انا برجع مع اهلي
سكت الليث وهو مايبي يضغط عليها ابد
دخلت الحمام ( تكرمون ) تروشت وطلعت ولابسة المنشفة ورابطتها على خصرها وجلست قدام التسريحة والليث منسدح على السرير مب كأن اليوم عرسه
رطبت جسمها بكريم وعطرته بمعطر جسم ولبست فستان اسود ماسك عالجسم بأكمام طويلة ومن الرقبة خنّاق ومفتوح من الساق لين الفخذ ولبست خلخال ذهبي بفخذها وحلق ذهبي طويل وكعب اسود و مناكير اسود ، مكياجها كان ايشدو لحمي مايل للوردي ورموش طرفية وعدسات رمادية وايلاينر بمدمع العين وبلاشر ودري وهايلاتر وقلوس ، شعرها فرقته من النص وحطته على اذنها ورفعته بخفيف ذيل حصان وسوّت ويفي من تحت وطلّعت خصلتين من قدام وسوتها ويفي تعطرت وتبخرت وهو يطالعها بأعجاب كانت فخمة بشكل مرعببب الاسود اعطاها هيبة وفخامة واضاف لها جمال فوق جمالها والفستان كان يجنن مع فتحة الفخذ وخصرها الممشوق يجننه
الليث : بتروحين كذا والفستان مفتوح ؟
مناهل : ايه
مسكت البخور وهي تبخر نفسها وقالت : مابتقوم ؟ الساعة صارت 8 الزواج بيبدأ بعد ساعة
الليث : تمام
قام بقلة حيلة تروش ولبس ثوبه وبشته وتشخص وتبخر وكان وده هي اللي تبخره بس ماله وجه يقولها بخريني عشان اعرس عليتس
الليث : جاهزة ؟
مناهل : ايه
لبست عبايتها وطلعو للقاعة
دخل الليث وكلهم سلمو عليه الا آل حزام سوو نفسهم مشغولين لأنهم شايلين بخاطرهم عليه وحيل ، زعل من حركتهم بس لهم كامل الحق يزعلون على بنتهم

في قاعة الحريم دخلت مناهل والكل انهبل عليها كأنهم اول مرا يشوفونها كانت تجنن فعلا كلمة فخمة قليلة بحقها جمالها كان يوجع القلب ومايبين ان اليوم عرس زوجها ابد الابتسامة شاقة وجهها شق
ابتسمت من شافتهم كلهم يطالعون فيها
قربت وهي تسلم على اهل الليث واهلها وجلست وشغلو اغنية كانو يقصدونها فيها وقامت ترقص وهي تتمايل بخصرها جننت كل الحريم لدرجة ان اغلبهم كانو يبون يلعبون عليها بكم كلمة ويخلونها تتطلق ويخطبونها لعيالهم
بدور : تجنن بنت اللذين
عبير : مدري هو الليث اعمى ؟ ولا يستهبل ؟ يعني لو انا عندي هالجمال اروح للقباحة ليه ؟
مرام : معوق مايعرف يفكر
ضحكو البنات وجلست مناهل جمبهم ومرت من جمبهم عجوزة
العجوزة : يا يمه انتي متزوجة ؟
مناهل : انا ؟
العجوزة : ايه انتي
مناهل : انا متزوجة يا جدة و عرس زوجي الليلة
العجوزة بصدمة قالت : ترقصين وتضحكين وزوجك اعرس عليك ؟
مناهل : وش تبين يا جدة اسوي ؟ اتقطع ؟ الله يفتح عليه
العجوزة : وراه ماتتطلقين منه واخطبك لوليدي انتي تجننين وماتتعوضين
مناهل : الله يسلمك يا جدة مشكورة

جاء وقت الزفة والكل ينزفون و أول ما شافو ميّ لفو كل الحريم لمناهل ، ترك الجمال وراح لوحدة اقل من عادية ؟ كانو منصدمين شلون ترك مناهل وراح لميّ

كان واقف وميّ ماسكة يده وعيونه تدور عليها لين استقرت عليها وهي تلعب مع فيصل ، ابتسم وكان فعلا متخرفن على شكلها فعلا جمالها اليوم اوجع قلبه واتعبه حيل
وصلو للكوشة وشغلو اغنية وميّ بكل جراءة باسته بشفايفه قدام الكل ونزلت دموعها وهي تشوفهم
نواهل : لاتبكين يا مناهل تكفين
مسحت دموعها وقالت : يناسبون بعض تصدقين ؟
نواهل : خلينا نمشي تكفين
مناهل : مابي
نواهل : طيب فهد وسعد وسعود يبون يشوفونك
مناهل : بعدين
تنهدت نواهل بقهر وهي تشوف عيون مناهل اللي بتنفجر من زود الدموع اللي حابستها

بعّد عن ميّ وهو متخدر من حركتها مرا حاوطها من خصرها وهي حاوطته من رقبته وقالت : خلاص صرت حقك
ضحك الليث وقال : مبروك عليتس
ميّ : الله يبارك فيك
لفت وهي تدوّر مناهل وشافتها وابتسمت ابتسامة خبيثة وحضنت الليث والليث شدها لحضنه