لو قلت لقلبي توب عيني تكذبني

الجزء الثالث والثلاثين

في بيت قصي
نور : وين بابا ؟
عبير : بابا بالشغل
نور : ما بيشتريلي حلاو ؟
عبير : الا يا حبيبي يجيبلتس حلاو
نور : واذا ماجاب ؟
عبير : يجيب يا ماما يجيب واذا ما جاب مانفتحله الباب
ضحكت نور وضربت كفها بكف امها
دق الباب وقالت عبير : بابا جاء
نور : نشوفه من المنضار ؟
عبير : تعالي
شالت عبير بنتها وهي ترفعها على منضار الباب وشافت قصي وفتحو الباب شوي بس وطلعت نور رأسها
نور : جبتلي حلاو ؟
قصي : يا بابا انا جاي تعبان
هزت رأسها بمعنى " لا " وقالت : لا ابي حلاو
قصي : طيب البس ونروح نشتريلتس حلاو
نور : لا ابي الحين
قصي : يعني شلون ؟
رفعت نور يدها وشالها قصي وسحبت شماغه وعقاله
نور : يلا نروح الحين
ضحك قصي بقلة حيلة وهو يبوس عبير وطلعو
عبير : حتى رجلي تشاركني فيه وش ذا البنت العاصية
ضحكت وهي ترمي نفسها بالسرير
●
●
●
في بيت ابو ياسر
عمار : متى يكبر ذا الغثى ابي اصفقه
سلمى : منجد ابي اتضارب معه طوّل المفروض يكبر بسرعة
بدور : مافيكم واحد صاحي وخرو بس لا تخربون ولدي بهبالكم
سارة : تكفين يا ام الامبراطور
بدور : شدخل ؟
سارة : شيلي ورعتس بس
اخذت ولدها وقالت : ودتس بمثله
سارة : وععع
بدور : بعينتس الوع يا وسخة
جمال : شادة حيلتس يا مرت الاخ ارفقي بنفستس
بدور : اسكت انت
جمال : مريضة
دخل ياسر وقال : مين يتطاول على حرمتي المصوون
بدور : كلهم
ياسر : تستاهلين مين قالتس تطلعين من جناحتس ؟
بدور : لا شرايك انكتم
سلمى : يابنتي اسكتي
●
●
●
يوم الجمعة الساعة 10:00
قامت من النوم صلّت الضحى ونظفت البيت ومسحته و بخرته و سوّت الغداء و سوّت حلا واخذت ثوب الليث وشماغه ونزلت تكويهم وجهزت اغراضه وخصلت وراحت تصحي الليث
مناهل : بتروح للصلاة ؟
الليث : اييه
مناهل : طيب يلا قوم
قام الليث وتروش ولبس و وقف قدام المرايا وهو يضبط شماغه ويتشخص ويلبس الكبك وتعطر وتبخر وراح يصلي
دخلت الحمام ( وانتم بكرامة ) تروشت ولبست وتجهزت ونزلت تجهز الغداء و صلّت الظهر ورجع الليث وجلسو يتغدون
الليث : بوصلتس لبيت اهلي وقولي لصقر ولا آسر يرجعونتس لأني طالع و بطوّل
مناهل : وين بتروح ؟
رفع رأسه وهو يطالعها بنظرات حادة وقال : كم مرا قلنا هالسؤال ما تسأليني هو تفهمين انتي ولا لا ؟
قامت مناهل وقالت : آسفة
دخلت المطبخ وقالت : عمى بعينك روح لا ترجع ميتة فيك ومتشققة عليك صدق عمى بعينك
طلعت وشافته جالس واخذت المواعين وغسلتهم وجلست تقرأ سورة الكهف وبعد ما خلصت قالتله : بكلم مالك يجيني
الليث : تسوين خير بعد ماني فاضي اضرب مشوار لين بيتنا
مناهل : طيب كان قلته من البداية محد جبرك توصلني
الليث : لا تراددين لا اقطع لسانتس
مناهل : سلامات تكلمني بهالأسلوب جايبني من الشارع ؟ اذا كنت قاعد تشوف نفسك ماتقدر تحترمني رجعني لأهلي
الليث : اقول ابلعي العافية ماني ناقصتس ابد
مناهل : الله يعينك على نفسك بس
الليث : تقلعي من قدامي لا اقوم عليتس يا مناهل
طالعته بطرف عين وطلعت غرفتها
مناهل : مالك ؟
مالك : سمي
مناهل : فاضي ؟
مالك : والله اني بالمستشفى صوب امي و ودي اجيك بس مقدر والله
مناهل : لا خلاص خلك حولها انا ادبّر عمري وسلّم على اهلك
مالك : يوصل
مناهل : يلا انتبه على نفسك ، مع السلامة
مالك : مع السلامة
لبست عبايتها وتنقبت ونزلت وشافته منسدح بالكنبة
مناهل بهمس : ياخي عساك تفطس يا معفن 24 ساعة متسدح تكرم عليك النفاس يا مخيس
مشت وهي توقف قدام باب الشارع تنتظر تاكسي يمر من قدامها
مناهل : يعني يوم مالك فيه تمر مليون سيارة قدامي والحين خلااص انعدمت كل السيارات وشذااا
طلع الليث وبيده مفتاح السيارة ويطقطق بجواله وركب سيارته وقال : اركبي واخلصي علي
مشت وطنشته وهو يمشي بالسيارة بشويش
الليث : بتركبين ولا كيف ؟
مناهل : الله لا يحوجني لك بشوف حتى لو سيكل
الليث : ترا نفسيتي واصلة لرأس خشمي
انفعلت مناهل وهي تضرب رجلها بالارض وقالت : انت خير قاعد تنافخ علي من اليوم ؟ سلامات ؟ تهددني يعني نفسيتي ونفسيتي وبقوم لك ومدري وش ؟ وش بتسوي ؟ بتمد يدك علي ؟ مدها والله ماتشوفني يا ليث انقلع من قدامي لا توريني وجهك ماني ناقصتك
الليث : المبزرة اتركيها على جمب واركبي
شدت على اسنانها وقالت : اصير جثة هنا ولا اركب معك
مشت سيارة تاكسي وقالت : العتق
ركبتها وتركت الليث ومشت
الليث : لو تموت ماتترك طولة اللسان والعناد
حرك سيارته ومشى
●
●
●
في بيت ابو صقر
كانو كلهم موجودين وجالسين بالحوش لين وصلت مناهل
فهد : حي الله ذا الوجه
مناهل : الله يحييك
عمار : ارحبي
مناهل : من يرحب يبقى
آسر : وين ليث ؟
رفعت كتوفها بلا معرفة وقال ذياب : مب هو اللي جابتس ؟
مناهل : لا انا جيت بتاكسي وهو راح مدري وين
سعد : يعني زوجك ما يوصلك مشاويرك ليه ؟
سعود : ليه ماكلمتي مالك
مناهل : كلمته مشغول بأهله
ذيب : كان دقيتي علي يا زوجة الاخ واجيتس بربع ساعة
مناهل : ماعليه يلا اهم شي جيت
جلست جمبهم وهي تتربع وقالت فاطمة : تهاوشتو ؟ انا قايلة مارح يكمل معتس دامه عصى قبيلته واهله عشانتس وانتي ماتسوين
سعد : انتي لو تقضبين لسانك احسن
قصي : سعد احترمني مرة
سعد : وانت لو تحترمنا وتسكتها نحترمك ونحطك على رأسنا
سكت قصي بقهر وقام : فطيم قومي
قامت فاطمة وراحت ورا قصي
فهد : انت ليه ماتعض شحمة ؟
سعد : تغلط على اختي تقولها انتي ماتسوين على اساس اختي كانت متشققة على ابن قبيلتهم المخيس ذا اللي ماجاها من وراه الا النكد
سكتو كلهم وقام سعد بغضب
مجد : اشتحنت الاجواء بسبب فطيم
عمار : وفطيم قامت وتقلعت ونكدت على الكل
مناهل : لو اني ماكلة هواء وجلست بالبيت ومانكدت عليكم كذا
سعود : لا ياحبيبي ما نكدتي علينا مالك دخل انتي
قام آسر وهو يدخل بيت الشعر ودق على الليث
آسر : وينك فيه ؟
الليث : عندي شغل
آسر : وش الشغل اللي عندك ؟ من متى حنا ننشغل يوم الجمعة ؟
الليث : الجمعة ذي والجمعة الجاية عندي شغل واجد
آسر : لاتكذب على يا ليث علمني شعندك
الليث : ودي اقولك لكنك طيب زيادة عن اللزوم وبتفضحنا اصبر شهر واسبوع وتعرف كل شي
آسر بحدة : ليييثث وش مسويي
الليث : مو مسوي شي
آسر : ابي اعرف الحين انت وينك والحين اجيك
الليث : لاتجيني فمان الله
قفل الليث ومسح آسر شنبه وهو خايف من تهور الليث
آسر : ياخوفي يا ليث تسويها بس ، وينك الله ياخذك وينكك
حط جواله بجيبه وطلع زقارة وهو يحطها بشفايفها ورفع الولاعة وهو يغطيها بيده عشان ماتطفى من الهواء وشغل الزقارة ودخل الولاعة جيبه وتلثم بشماغه بس كان تحت فمه بشوي وطلع وجلس جمب صقر
صقر : وينه ؟
آسر : مب راضي يعلمني
تنهد صقر بغضب وقال : يصير خير ، معك دخان ؟
طلّع بكت الدخان وفتحه وقربه من صقر وصقر اخذ وحدة وقال : ولاعة طيب
لف رأسه والدخان بشفايفه و آسر يشغّل له الزقارة
ابتسم صقر من وصلته رسالة منها مكتوب فيها
" عادي ترمي هالسم ؟ "
ضحك وهو يمسك الزقارة ويحطها وسط اصابعه الوسطى والسبابة وكتب لها " آسف "
ردت عليه بسرعة وقالت " على هواء وارمه "
ضحك وهو يمسك طرف الزقارة ويحكها بالارض لين طفت وارسل لها " كبيناها ولا تزعلين "
ردت عليه بابتسامة وهو يطالعها " اذا ماكنت تفكر بنفسك فكر قبل لاتسوي الشي ان في ناس تفكر فيك "
ضحك وهو خاق مرا ودخل جواله بجيبه
آسر : وش فيك انت ؟
صقر : الطيحة اللي طاحها ليث انا طحتها
ضحك آسر وقال : الحمدلله ربي رحمني ، مين اللي طيحتك ؟
صقر : اخت اللي طيحت ليث
ضحك آسر ضحكة عالية وقال : حالفين بهم انتو ؟
ضحك صقر وهو يطالعها تتهاوش مع سعود
آسر : يلا الله يعينكم
●
●
●
عند الليث الساعة 9:00
كان واقف ينتظرها والحريم والبنات كلهم يطالعونه ومنهبلين عليه .
دخلت وهي لابسة فستان قصير لين الفخذ فيه كسرات من الخصر ومنفوش وبدون اكمام عاري الكتوف والصدر
ابتسم ابتسامة عريضة من شافها وقربت منه وهي تحاوط رقبته
ضحك وهو يمسك خصرها بيد وحدة ونزل رأسه على كتفها وقال : مرا وحدة كذا ؟ كثير علي ترا
ميّ : مو قدام الناس
ابتسم وهو يبوس عنقها وقريب شفايفها وقال : تجننين
ميّ : انت اللي تجنن اكثر والله
الليث : الحين ماينفع نروح غرفة لحالنا ؟
ميّ : طبعا ينفع
لفت ميّ وهي تنادي امها وقالت : يمه نبي ندخل داخل
ام ميّ : اي يا بنيتي ادخلو
مسكت يدها وهي تمشي وهو وراها ودخلو غرفتها
جلس على السرير وهي جلست على رجوله ورجعت شعرها لورا وقالت : احس اني طايرة ، بتصير حقي
حاوطها من خصرها وشدها لصدره اكثر وهي حطت كفوف يدينها على صدره وشدت على ثوبه وعضت على شفايفها وهي تبوس رقبته وباسته من ياقة ثوبه وطبع روجها وتعمدت تسوي هالحركة عشان مناهل
ابتسم وهو يشدها له ورمى نفس على السرير وهي طاحت بحضنه
ميّ : لاتتهور
الليث : ليه اللي يشوف حركاتتس يقعد من غير مايتهور
رفعت يدها وهي تتحسس شفايفه وقالت : احبك طيب وش اسوي
عض شفايفه وماحس الا بشفايفها تستقر على شفايفه ، بعدت عنه وهي تشوفه مغمض عيونه ومبتسم كان عاجبه الوضع مرا صحيح انه يحسها جريئة زيادة عن اللزوم بس اكتفى من الاستحياء والخجل اللي يملي مناهل وطفش ومل منه
الليث : يلا لازم امشي
ميّ : افف ماتموت ترا لو قعدت عندي كثير انت قريب تصير زوجي
الليث : ميّي لا نبدا بهالمواضيع
وقفت وهي تقوس شفايفها بزعل وتكتفت وهو ابتسم و وقف يعدّل شماغه وقال : اطلع كذا ؟
ابتسمت وهي تبوسه من خده وهو باسها من نحرها وعلّمت
ميّ : باي
الليث : مع السلامة
طلع الليث وهو مبسوط مراا وطاير بالسماء ولا يبي شي ثاني
الليث : هذا اللي اسمه زواج صح مب تستحي مني كأني باقي خطيبها
ضحك وهو يتوجهه لبيته ودخل الغرفة وشافها حاضنة البطانية وشعرها منسدل على المخدة وما انتبهت على وجوده وكانت تكلم نفسها
مناهل : ياربي لين متى بجلس اتسآل احنا وين بنوصل ؟ وش بيصير ؟ ياربي انا فيني الصبر الكافي اني اصبر عليه واكمل معه ؟ ولا بتركهه ؟ ياربي احبه ما ابي اتركه بس جالسة اكرهه وحبه يغلبني ياربي انا ابي اكرهه ابي اكرهه قلبي يا ربي يبيه بس عقلي وخاطري مايبونه وش اسوي ؟
ضربت بطانيتها وهي تبكي وقالت : ابي اموت ياربي خذني عندك وارحمني ملّيت انا
غمض عينه بقوة من كلامها اللي اوجع قلبه حيل
هو يحبها ويعشقها ويموت فيها و وده يبوس الارض اللي تمشي عليها يخاف على زعلها ولا وده يجرحها او يكسرها حتى لو بالغلط  يتمنى الموت يأخذه ولا يجي اليوم اللي تتركهه فيه وهو خايف من هالفكرة لكن هو رجل وله حقوقه ومشكلة مناهل انها تمنعه من حقوقه صحيح تدلعه وتحبه وتحطه بعيونها وتخاف عليه لكن هو يبي الاساس ، ميّ بعمره ما حبّها ولا فكر يحبها بس يحب جرائتها وتجذبه بطريقتها الجريئة اللي المفروض تسمى وقاحة مب جراءة لكن هو كان معمي بسبب ( شهوته ) .
دق الباب وهي فزت بخوف ومسحت دموعها بعشوائية وقالت : متى جيت ؟
الليث بهدوء : تو وصلت
مناهل : ما انتبهت
وقفت وهي بتطلع ومسكها من ذراعها وشد عليها
تجمعت الدموع بمحاجرها تحملته واجد وتنتظر اللحظة اللي يخليها تنفجر
مناهل : قاعد توجعني
الليث : ابي اكلمتس
مناهل : بروح انام تعبانة ومافيني حيل للكلام
الليث : تو بدري انتي ماتنامين هالوقت
مناهل : بس الحين نعست
الليث : مناهل
مناهل : فك عن مناهل يا ليث فكني
الليث : بكلمتس وروحي
بدأت تلين ، رفعت راسها وشافت طبعة روج برقبته و ياقة ثوبه ودفته بقوة : مابي اكلمكك اتركنيي
مشت بخطوات سريعة ودخلت الغرفة الثانية وهي تسكر الباب
مناهل : ليه ما اروح لبيت ابوي ؟ وش اللي يمنعني ؟ وش اللي مصبرني عليه ومخليني اجلس عنده وانا بكل مرا ربي يفتح عيوني ويظهر لي انه خاين ليه رجولي تمنعنيي اترككهه لييههه ليهه ليهه
جلست تبكي وهي تضرب الارض بكف يدها لين صارت حمرا
مناهل : اكرهك اكرهك اكرهكك اكرهكك يا ليث اكرهك
جلست تسمع صوته وهو يترجاها تفتح الباب
مناهل : ليث لو ماتروح الحين والله ادق على ابوي يجي يأخذني رووح
تنهد االيث بقلة حيلة وهو يجلس ويسند ظهره على الباب
الليث : دامك تبيها ليه رايح لغيرها ؟ وش قاعد تسوي انت يا ليث ؟ كيف جالس تفكر انت ؟
تنهد وهو يمد يده ويرفع رجله الثانية زي الزاوية الحادة وغطى وجهه بشماغه وغفى
●
●
●
يوم السبت الساعة 5:00 بعد صلاة العصر
في بيت قصي
عبير : لا تزعل منه شفت انت كيف انقهرت على اختك يوم غلط عليها ؟ هو قال لها كذا يوم شافها جالسة تتمادى على اخته وانت ساكت سكت لها عشان انت تتدخل لكن انت كنت ساكت
قصي : بس المفروض يحترم وجودي
عبير : احترم وجودك يا قصي بما فيه الكفاية امك واختك يدقونها بالحكي قدامك وانت ساكت و هو ساكت ينتظرك تتدخل بس خلاص مارح يسكت وهو يشوف امك واختك يغلطون عليها
قصي : وانتي نعم جالسة تدافعين عنه ؟
عبير : ما ادافع عليه يا قصي بس الولد معه حق
قصي : عبير تقلعي من قدامي ماني ناقصتس
عبير : ليه عصبت طيب كنا جالسين نتكلم بهالداوة يا قصي
قصي : طيب بالهداوة تقلعي
عبير : طيب
قامت وهي تشيل نور ودخلت الغرفة وقفلت الباب
عبير : له وجه يزعل واخته قليلة حيا ما احترمت لا كبير ولا صغير ، امه اللي هي امه الشيب مالي شعرها حاطة عقلها بعقل وحدة عمرها 20 سنة وهو يدري بضرر امه واخته على الناس عشان كذا طلعني من بيتهم ولا لو امه واخته كافين شرهم عن الناس ليه طلعني من بيتهم الكبير اللي يعيّش قبيلة ؟ لأنه عارف بحركات امه واخته اللي مالها داعي ، جاي يقول لي تقلعي ببوس رجله واقول له لاااا تكفى تكفى بجلس حولك ، غبي ، وانتي نامي لا اطلع حرة ابوتس فيتس نامي
●
●
●
في بيت ابو نايف
الهنوف : جالسين يزودونها و مرااا يعني لين متى هي بتجلس تتحملهم ؟
ريوف : منجد تخيل يبه من يوم تزوجت مناهل الليث وهذي فطيم تنغزها بالحكي واخوها ساكت واذا دافع سعد عنها يزعل
نواف : قليلين حيا صدق
ابو نايف : ومناهل ذي اللي لسانها طويل على الكبير والصغير ماتعرف تسكتهم وتوقفهم عند حدهم
مرام : ياعمي مناهل طويلة لسان على اللي يغلط عليها عمرها ما طوّلت لسانها على شخص ما سوا لها شي بس هي محترمة ام قصي لأنها مره كبيرة وبياض شعرها طاغي على سواده
ام نايف : ونعم التربية بنت اخوي ، بس ليه تسكت على الوسخة فاطمة
نوف : ساكتة لأنها تقرب الليث ومناهل اي شخص يقرب الليث تحترمه حتى لو يتطاول عليها
نايف : وش حصلت من هالليث ؟ احترمها مثل ما احترمته وخافت على زعله ؟
ام نايف : اي والله من يوم تزوجته وهي خاطرها متكدر وضايقة
ابو نايف : هي كم لها متزوجة
ام نايف : هي تزوجت بعد نايف و مرام بشهرين انتم كم لكم ؟
نايف : احنا لنا 8 شهور متزوجين
ابو نايف : ضيّق خلقها وهم لهم 6 شهور بس متزوجين
نواف : الله واعلم وش بيصير بعدين
مرام : نايف خلّص الليمون
ريوف : تسجيل دخول
ضحك نايف وهو يأخذ مفتاح سيارته : الحين اروح اجيب
ابو نايف : اي ياولدي الله يصلحك لاتخلي شي بخاطرها لا يجي حفيدي شي
نايف : ابشر يا يبه
طلع نايف وراح يشتري لها ليمون
●
●
●
في بيت ابو مرام
ام مرام : انا مستغربة شلون هادي و ميساء ساكتين لهم
هيام : لأن مناهل ما كلمتهم
رهام : يعني مايدرون ؟
هيام : الا يدرون بحركات ليث بس يقولون يعني هي ماعلمتهم معناها ماتبيهم يتدخلون واذا احتاجت رح تعلمهم وبعدين اذا خربت علاقتها مع الليث رح تخرب علاقة ابوها مع ابو صقر وكذا رح تخرب علاقة فهد وكيان و سعود ولين
ابو مرام : لا مارح تخرب يعني يخلي مناهل تتحمل كلامهم عشان فهد و سعود
وئام : ايه فهد و سعود يقدرون يدبرون عمرهم مب بزران هم
هيام : والله ماندري وش بيصير احنا نطالع الاحداث ونسكت
●
●
●
في بيت ابو ماجد
كان مجد متربع بالارض ويأكل ورق عنب وماجد وامجد جمبه وامه وابوه جالسين بالكنب يتقهوون
مجد واللقمة بفمه : لا تخافون عليها ، مناهل بنت خالي واعرفها من يوم واحنا صغار بتسكت بتسكت وبعدين بتنفجر هدوءها هذا ما قبل العاصفة
ماجد : ايه واذا صبرت واجد محد بيأكلها كثر الليث والله تبكيه دم
ام ماجد : هذا اللي مخلينا متطمنين عليها انها تعرف تأخذ حقها بيدها وبالطريقة الصح
امجد : بنت حزام ذي ماعليها خوف
ابو ماجد : الله يعينها يارب ويهدي الليث
مجد : كانت جالسة ببيت خالي هادي معززة مكرمة يجيها الشي قبل لا تطلبه قامت تتزوج وتو عمرها 20 سنة
ماجد : اي والله الحين تحملت كل ذا بهالعمر كان صبرت لاحقة على الشقى
أمجد : ماتخاف واحنا وراها ما معها اخوان بس معها عيال خالات تحتزم بهم
ابو ماجد : كفو عليكم
ماجد : والله اذا فكر الليث يضرها مارح يوقفون فهد وسعد و سعود بس بوجهه انا ومجد وامجد ونايف و نواف نلعن اهله معه
ام ماجد : ايه حبايبي هذي التربية الزينة
مجد : حسبة اختنا هي
●
●
●
في بيت ابو صقر
صقر : يبه ولدك جالس يغلط مع مناهل والله اذا قامو ال حزام عليه يذبحونه ولا يردهم شي هذول يموتون ولا تزعل بنت من بناتهم
لين : حتى ذي فطيم هي وامها يا يبه ماتركو مناهل بحالها ضايقوها لين قالو امين
ام صقر : والله وعيالي صادقين
ابو صقر : خلاص كلمو الليث يجي واكلمه
ذياب : قبل لا تكلم ليث كلم عمي ابو قصي يقضب حرمته وبنته وقصي قول له لا يجلس يزعل اذا ابدو اخوان مناهل ردة فعل لأن لو غلط احد على فطيم قدامه بيقلب الدنيا فوق تحت
ابو صقر : لاتوجعون رأسي يصير خير
لين : والله يبه مناهل جالسة تزعل مرا اخاف سعود يزعل معها ويخليني
ضحك صقر وقال : مغسول وجهتس بمرق انتي ؟
ضحك ابو صقر وقال : ان كان بيخليتس ما كان خذاتس من البداية هذول رجال ونعم الرجال مايتركون الشخص بنص الطريق
لين : ايه ما اوافق الا على اللي كفو
قامت وهي تجلس جمب ابوها وقالت :  يبه انت ارتحت من كيان وأريج ماودك ترتاح مني ؟ يعني بتتحملني 3 سنوات ؟ بزعجك ترا
ابو صقر : قومي لا اجلدتس بالعصا
قامت وهي تتحلطم وجلست جمب امها : يمه قوليله
ام صقر : انتي شكلنا ربّينا اخوانتس كلهم ويوم جيتي انتي تعبنا ومعد فينا حيل وما ربيناتس
لين : اتكلم عن خطيبي انا مو واحد من الشارع
دق جوالها وقال ابوها : جيبي جوالتس جيبيه
لين : وش تبي به يبه ؟
ابو صقر : جيبي الجوال
وقفت وهي تجيب جوالها وكان مكتوب " حبيبي الثقيل "
ابو صقر : لا حول ولا قوة الا بالله العلي العظيم معد في بنات
ضحكت لين وقالت : عجبك الاسم
جلس ذيب جمب ابوه وقرأ الاسم وضحك : شكلتس تعانين منه عشان كذا كاتبة الثقيل
صقر : شايف مايعطيها وجه هي اللي ماشية وراه
ضحك آسر وهو يطالع صقر وقال : ايه انا اعرف ان الرجال هو اللي يمشي ورا البنت بس كفو سعود يعرف يلعب فاهم
ضحكت لين وقالت : تسلمني الجوال ؟
ذيب : يبه خلها ترد جمبنا
طالعوها بخباثة وهي عادي عندها جلست رجل على رجل وهي ترد وحطت سبيكر
سعود : يعني ادق والف البيت كله وارجع وانتي باقي جوالك يرن وينك ؟
لين : شغل
سعود : شغل وش تراك بزر
لين : اقول لايكثر بس
سعود : طالت الالسنة طالت
لين : ما طالت
سعود : الزبدة
قام وهو يفتح المكيف وانفجر عليه
سعود : وجععع
لين بخوف : وش فيك ؟
ضحك سعود وقال : المكيف فجّر علي كنت بروح فيها وتصيرين ارملة
لين : يا غبي ارملة يوم اكون زوجتك الحين خطيبتك ما اتسمى ارملة بعدين وش ذا المكيف التعبان ؟
سعود : اصبري اشوفه
حط سبيكر وترك جواله فوق الطاولة ودخلت نواهل
نواهل : سلامات ؟
سعود : كنت بموت
نواهل : الله معك
سعود : وجعا لا احساس ولا ضمير
نواهل : اقول وش صاير ؟
سعود : مكيفكم التعبان حرام عليكم تخيلو تزوجت وجبت لين ونمنا وانفجر المكيف علينا تبون تحرقون قلبي على حبيبتي
نواهل : اقول ابلع تبن انت وحبيبتك المخيسة ذي
سعود : محد يعرف للمكيفات الا فهدهد والحيوان يسوي قلة ادب مع زوجته
ضحكت نواهل بصوت عالي وابتسم صقر من ضحكها
نواهل : وانت حاط دوبك دوبهم ليه ؟
جلس سعود وقال بحزن : حرام على عمي ابو صقر يحرمني كذا يعني انا ماخطبت لين الا لأني ميت فيها وابيها يقولون يبون الزواج بعد 3 سنوات انا وش يصبرني
نواهل : توك صغير والاثنين تدرسون
سعود : عادي انا الحين جالس اشتغل صح ؟ اصرف عليها وبعد ما اتخرج نضبط اوضاعنا
نواهل : طيب حرام تجيب اطفال وهي تدرس
سعود : يع مابي ورعان انا بخليها تشرب حبوب لين نتخرج
نواهل : طيب وش تبي الحين ؟
سعود : ابي احد يقنع عمي ابو صقر حتى ابوي واقف بصفهم يفرقون الاحباب هذول لين لسانها اطول منها دايم تمشي كلامها ليه هالموضوع ماعرفت تمشيه بمزاجها ؟
نواهل : انا اضبطلك الموضوع بس ماتتزوجون الحين
سعود : متى ؟
نواهل : اقل شي سنة تضبط الجناح فيه اما المهر انا ادفعلك هدية زواجك
سعود : احلفي
نواهل : والله ، يعني انا اشوف اخوي حبيبي ضايق واسكت ؟ والله ثم والله سنة وحدة ولين زوجتك
صرخ سعود بصوت عالي وهو يقول : الله يعزكككك
ضحكت نواهل وقالت : بمقابل
سعود : عيوني لك ابشري
نواهل : مابي شي امزح انت انبسط وانا كل اموري تصير تمام
سعود : ياخي والله ان الخوات نعمة بالحياة والله اول شي انتي وبعدين مناهل بالله مين معه خوات زيي
نواهل : امدحنا يا كلب امدحنا دام الموضوع فيه لين يصير مافي احسن مننا
سعود : والله اني احبكم لين مالها دخل ، بس انتي شلون تضبطين الوضع ؟ بتكلمين عمي ابو صقر ؟
نواهل : لا بسوي واسطة من شخص لعند عمي ابو صقر
سعود : ومين اللي بيتوسط ؟
نواهل : مالك دخل انت مالك الا اللي يرضيك
سعود : صقر ؟
نواهل : مالك دخل قلت
سعود : لاتدخلين مع صقر وحش ذا
ضحكت نواهل وقالت : والله انه مسكين مدري شعندكم انتم تقولون عنه كذا ؟ اوكي انا اشتغلت معه شهرين بس ، بس والله انه حنون يعني لو تروح تقوله يا صقر انا ابي اختك والله يقولك تم بس انت حيوان
سعود : والله تبين الصدق هو قال لي اذا تبي تملك تعال بأي وقت وابشر بس يختي مدري شلون هو وآسر ماتقبلتهم لا انا ولا فهد بس سعد اللي تقبلهم
نواهل : ماتقبلتوهم لأنهم حالهم حال نفسهم لكن الكلب ليث اللي قلب حياة اختكم فوق تحت تقبلتوه
سعود : ليث ذا انا ساكت ساكت بس والله لو يزودها ولا لو تجيني مناهل وتقول بس اسمه والله اني العنه ولا افكر هو مين واخو مين
حتى لو اذبحه وانتي تدرين ال حزام يسوونها
نواهل : ادري انك تسويها بس ولين ؟
سعود : بأخذها وفوق خشومهم كلهم مالهم وجه يزعلون اصلا يعني ولدهم الغلطان وباقي يزعلون ؟
نواهل : بقولك شي يا سعود بس لاتعلم احد
سعود : وش ؟
نواهل : ليث
بلعت ريقها بتردد وقالت : يخون مناهل مع مساعدته
سعود بصدمة قال : وشوو ؟؟؟
انصدم ابو صقر وهو يسحب الجوال من لين وقامو العيال يجلسون جمبه
نواهل : تذكر هذاك اليوم يوم جت مناهل عندنا تنام ؟
سعود : ايه ؟
نواهل : يوم رجعت بيتها شافت روج بدرج التسريحة مستخدم ومو حقها
سعود : ايوه
نواهل : ومرا ثانية يوم جت تحضن الليث شمت ريحة عطر نسائي بحضنه
سعود : ايوه ؟
نواهل : ومرة رجع البيت وشافت بشفايفه روج
سعود : ايوههه ؟؟؟
نواهل : وامس رجع البيت وبرقبته وبثوبه طبعة روج
سعود : تستهبلين انتي ؟ الكلب جالس يهين اختنا عنده وانتي ساكتة ؟؟ ليه ماتتكلمين
مسكت نواهل يد سعود وقالت : ماتبي احد يدري ، قالتلي ماتبي احد يدري بالموضوع