لو قلت لقلبي توب عيني تكذبني

الجزء التاسع والستين

اعتذر عن القطعة اللي قطعتها لكن بعوضكم ان شاء الله ، البارتات الجاية رح تضايقكم شوي بس رح نرضيكم بعدها بأذن الله

بعد شهر

عمار تزوج تولين لهم يومين ومخططين على سفرة يفرفرون الكرة الارضية ويفلون امها

مشعل خطب سمر رسمي و حددو زواجهم

الليث كان يحاول قد ما يقدر يرجع قلب مناهل له لكن للأسف خسره وهي كانت تعامله مثله مثل الجدار وصارت باردة معه وماتعطيه وجه وان قربت منه تقرب عشان تعاند ندين وبس

في بيت ابو مشعل
كانت مشاعل بالمطبخ تسوي القهوة و ترتب الفناجين بالصينية وطلعت لامها وصبت لها قهوة وجلست تطقطق بجوالها
ام مشعل : مشاعل يا بنيتي
قفلت جوالها وحطته جمبها وقالت : سمي
ام مشعل : ولد خالتي خالد خطبتس وانا وابوتس وافقنا
انصدمت مشاعل وشرقت بالقهوة وقالت : وشووو ؟؟
ام مشعل : وش اللي وشو ؟
مشاعل : يمهه انا ويننن و خالد وينن هو كبير وانا توني صغيرة تو عمري 22 تو بدخل ثلاثة وعشرييييينننن
ام مشعل : اللي بعمرتس معهن 10 انفار انقلعي غرفتس
حطت المشاعل الفنجان بقوة على الطاولة لين انكسر وانكبت القهوة على يدها واخذت جوالها وطلعت وهي تبكي ودقت على مشعل
مشاعل : مشعللللل
مشعل : هاه حبيبي وش فيتس
مشاعل : تعال شوف امك وابوك وربي تعبت انااا
مشعل : وش فيه طيب ؟
مشاعل : يبون يزوجوني خالد ابن خالة امي
مشعل : هذاك ابو كرش ؟
مشاعل : ايهه
مشعل : يناسبتس
مشاعل بنبرة باكية : لا تستهبلللل
مشعل : خلاص اسكتي لا تبكين لا افرشتس الحين نجيتس انا وحمد نحل الموضوع
مشاعل : وش دخل حمد ؟
مشعل : بقولك حل و بشوف رايتس
مشاعل : لا تطول علي
مشعل : من عيوني ، تبين اجيب لتس شي ؟
مشاعل : اي جيب قهوة
ضحك مشعل وقال : يا خوفي يجيتس خفقان ، بس ابشري
مشاعل : شكرا
مشعل : امسحي دموعتس مابي ارجع واشوفها طيب ؟
مشاعل : طيب
مشعل : يلا انتبهي على نفستس
مشاعل : ان شاء الله
مشعل : باي
مشاعل : باي
رمت جوالها وسحبت مخدتها ودفنت وجهها وصرخت صرخة مكتومة
●
●
●
في بيت ابو قصي
ام قصي : انت وراك ما تقوم تشوف بنتك و تشوف وينها 24 ساعة فاطسة بذا الغرفة
ابو قصي : حتى الشي اللي يريحها بتهاوشينها عليه خليها على راحتها يا بنت الحلال
ام قصي : راحتها هذي بتوديها بستين داهية بنتك بتخرب
ابو قصي : مارحح تخربب يرحم والدينتس خارجينا من هالموال اللي يتكرر كل يوم
قام وتركها وهي منقهرة من تطنيشه لفاطمة ومتأكدة ان في شي صاير من وراها لكن بتموت عشان تعرفه

بغرفة فاطمة
كانت منسدحة وتفكر تدق عليه ولا لا
فاطمة : يا بنت دقي رجلتس ترا
دقت على سعد و وصلها صوته وقال : ها يا عيوني
فاطمة : اشتقتلك
سعد : يا عيوني والله ، حتى انا اشتقتلك بجي اخذك
فاطمة : شلون ؟
سعد : بقالتكم اللي بآخر الشارع انا بنتظرك هناك
فاطمة : طيب
سعد : يلا استودعتك الله
قفلت فاطمة ونزلت لابوها وشافته بالحوش
فاطمة : يبه
ابو قصي : سمي
فاطمة : عادي اطلع
ابو قصي : مع سعد ؟
استحت فاطمة وابتسمت وابوها ضحك وقال : روحي يا بنيتي روحي
باست ابوها برأسه و طلعت تلبس عبايتها وراحت للبقالة
●
●
●
في بيت نياف
كان قاعد ويشتغل على قضاياه وشاد حيله مرا لين دق جواله
نياف : شتبي ؟
فهد : جاي ابشرك بس الظاهر وجهك مب وجه بشارة
نياف : اخلص قل وش عندك
فهد : عرفنا اللي تحبها
نياف : مين ؟
فهد : خوية اختي اسمها ميهاف
نياف : ايه عرفتها
فهد : خذ رقمها
نياف : هات
فهد : سجل ........... 050
نياف : تسلم ماتقصر
فهد : مسوي محترم
نياف : كل تبن يا شيخ دزها
فهد : اقول مافيك خير انقلع
قفل نياف ودق على الرقم ورد عليه
نياف : الو السلام عليكم ، اختي ميهاف ؟
ميهاف : اي نعم اخوي مين معي ؟
نياف : اللي خليتيه يفكر فيك ليل نهار
ميهاف : نيااف ؟؟
نياف بتقليد : اي ، نيااف
ميهاف : من وين جبت رقمي
نياف : محامي وش تتوقعين
ميهاف : واو ابهرتني
نياف : اقول انثبري بس ، ان جيت وخطبتك وافقي
ميهاف : امر ذا ؟
نياف : اي نعم
ميهاف : لا انقلع
نياف : طيب طيب شكرا لك باي
ميهاف : لا امزح تعال
كبت ضحكته و قال : خلاص دزيها وش اخطب وحدة ماتبيني كرامتي بالارض ؟
ميهاف : لاوربي مب بالارض بس امزح شفيك شادها
نياف : يلا سامحتك
ميهاف : يا رجال انقلع
ضحك نياف من قلب وهو مبسوط لأنه عرفها وقال : يلا قريب ان شاء الله اجيك واخطبك
ميهاف : تمام
نياف : يلا استودعناك الله
ميهاف : مع السلامة
قفل نياف و هو يحس انه طاااااااير وفرحان مرا
●
●
●
نرجع لبيت ابو مشعل
وصل مشعل و دق الباب وقال بصوت جهوري : يا ولدد طريق
ثواني و دخلو مشعل و حمد للمجلس ومنتظرين مشاعل
حمد : طولت
مشعل : انثبر شوي شفيك مستعجل على رزقك خير ؟
حمد : كل تبن
دخلت مشاعل وهي متنقبة وجلست جمب مشعل بعيد عن حمد
مشعل : اسمعي ، امي وابوي بيزوجونتس ؟ وانت تهبلين والناس تجي وتخطبتس لعيالها وادري انتس ماتبين ، لكن ان قعدتي كذا غصب عنتس بيزوجونتس
قالت مشاعل بنبرة باكية : مابي انا طيببب مابييي
مشعل : يا بعد عيني ادري انتس ماتبين ، بس اقل شي انخطبي
مشاعل : وش تفرق ؟ بنخطب و بعدين بيجي الكلب اللي بيخطبني وبيقول لي عجلي الزواج
ضحك مشعل من شاف ملامح حمد وهو رافع حواجبه
مشعل : حمد بيخطبتس ، وبيخليتس على راحتتس اهم شي تكونين تحت ظل رجال وكذا محد بيجيتس
لفت مشاعل وهي تطالع في حمد وهو ساكت وجامد
مشاعل : منجدك ؟
مشعل : هالله هالله ، بتقعدين مخطوبة لين تقررين الزواج
حمد : وان كنتي ماتبيني وفي احد تبين يجي ويخطبتس وقتها علميني و انا بفسخ الخطوبة
مشاعل : لا مب كذا ، عطوني وقت افكر
مشعل : تمام خذي راحتتس ، بس اسمعي انا بقول لابوي وامي انتس وافقتي على خالد ، لكن مايعلمونهم لانتس تبين فترة تتجهزين فيها
مشاعل : تمام
طلعت مشاعل لغرفتها وحمد رجع لبيتهم و مشعل راح لامه وابوه
مشعل : اسمعو ، مشاعل وافقت على خالد ، بس لاتكلمونه هو واهله تقول تبي اقل شي اسبوع تتجهز ولا صارت جاهزة قولوهم انها موافقة
ابو مشعل : على خير ان شاء الله
●
●
●
عند سعد كان واقف جمب البقالة ينتظر فاطمة وضرب لها بوري اول ما شافها وركبت
سعد : هذي والبقالة خطوتين ، لو قلنا لك اطلعي عالشارع العام وش بتسوين ؟
فاطمة : شدعوه
سعد : وين تبين نروح ؟
فاطمة : نتمشى ؟
سعد : جوك دايخ ، عقد الزواج معك ؟
فاطمة : معك انت
سعد : المفروض يكون معك انتي يا غبية
فاطمة : وش دراني اول مرا اتزوج انا
سعد : افتحي الدرج ذا الله يكفينا شر الفهاوة بس
فتحت الدرج وطلعت عقد الزواج وقالت : وش تبي فيه ؟
سعد : عندي اجازة ، بنأخذ فندق
فاطمة : واهلي
سعد : بكلم قصي
سكتت فاطمة وهو اخذ جواله ودق على قصي وشغل السيارة وحرك
سعد : هلا بالنسيب
قصي : هلابك زود ، كيف الحال
سعد : كله تمام انت شلونك ؟
قصي : نحمد الله ونشكره نسلم عليك
سعد : الله يسلمك ، اسمع بأخذ فاطمة معي اسبوع كذا لا سألوك قل عندك
قصي : الموضوع عندي معليك
سعد : كفو هذا العشم
قصي : كفوك الطيب
سعد : يلا توصي شي
قصي : لا سلامتك
سعد : اجل يلا فمان الله
قصي : بحفظه
قفل قصي و راحو لمول عشان فاطمة تشتريلها كم لبس لأنها ما جابت لها من بيت اهلها شي
●
●
●
في بيت ابو ياسر تحديدا في جناح ياسر
كان ياسر منسدح على رجول بدور و فيصل بحضنه وهي تطقطق بجواله و ياسر وفيصل يلعبون مع بعض
بدور : ياسر طفش وربي مراا طفش
ياسر : وش تبين اسوي يا عيوني انتي
بدور : خلنا نسافر الشرقية نفلها
ياسر : ابشري ، فصولي بابا قم جيب جوالي شوفه فوق الطاولة
قام فيصل واخذ الجوال وعطاه ابوه ودخل لقروب العيال وبدأ يسجل صوته
ياسر : سلام عليكم يا رجال كيف حالكم شخباركم وكيف اهاليكم عساهم طيبين ان شاء الله ، ياعيال من يوم عرس عمار من بعدها ماطلعنا عشان كذا شرايكم تعويض للشرقية
دخل فيصل بالفويس وقال : اييهه نبيي نرووحح بنروح
ارسل ياسر الفويس وسرعان ما جاه الرد
عمار : بالنسبة لي تم
صقر : وانا من ناحيتي تم
الليث : وانا عني وعن حريمي وامي وابوي واخواني اقول تم
ياسر : اجل الوعد وقت صلاة الفجر تكونون جاهزين ، نصلي و نتوكل
نايف : تم
قفل ياسر جواله وقال : يلا قومي تجهزي وانا بنزل اكلمهم تحت
قامت بدور تجهز شنطة لها وشنطة لفيصل و شنطة لياسر و هو نزل يكلم اهله
ياسر : سلاام
قالو كلهم : وعليكم السلام
ياسر : الاهل جايينا قبل الفجر بنصلي و بنروح للشرقية
سارة و سلمى : احللفففف
ياسر : والله
سارة : والله انك فخم
جمال : جهزو شنطتي معكم
سلمى : يا رجال اجهز شنطتك واجهزك انت بكبرك ابشر كم معي جمال انا
جمال : اعوذ بالله
قامو يتجهزون وحالهم من حال كل بيوت ال فيصل و ال حزام
لين اذن الفجر اجتمعو كلهم والرجال راحو للمسجد صلو جماعة و رجعو والحريم جاهزات و توكلو على الله و حركو
بسيارة الليث
فجر : ليوث ابي من دانكن
الليث : حاضر اذا صادفنا اجيبلتس
ندين : وانا ابي بقالة
الليث : ابشري
لف وهو يطالع مناهل اللي كانت جالسة جمبه
الليث : وانتي يا قلبي ماتبين شي ؟
مناهل : سلامتك
الليث : اي شلونتس
طنشته مناهل وهو ابتسم فعلا صار يحب برودها بعد ما كانت عصبية صار يعشق هدوءها بعد ما كانت ثرثارة و تحب الازعاج صار يموت بتطنيشها له وثقلها عليه قاعدة تجيبه على وجهه و بقووة
طالعها وهي مسكت فكه ولفته لقدام وقالت : الطريق
ندين بقلبها : صدق يا زين الكرامة تهينه وتذله وتعامله هو والجدار سوا وشف كيف يموت فيها كل يوم اكثر من اللي قبله
ابتسم من شافها تفتح كف يدها و تفرق اصابعها وهو شبك اصابعه باصابعها وقربها وباسها
ندين : ليووثيي
الليث : هلا حبيبي
سحبت مناهل يدها وهو طالع فيها وضحك بخفوت
مناهل طقت براسها عناد مثل ما ندين تعاند حتى هي بتعاندها
مناهل : عادي توقف السيارة
الليث : ابشري
وقف الليث السيارة وهي قامت وجلست بحضنه وقالت : يلا حرك
ضحك الليث وهو عاجبه الوضع مع انه يدري انها تبي بس تعاند والحركة ذي مب من قلبها لكن عادي اهم شي تكون جمبه
حاوطها من خصرها و مسك الدركسون و حركو
ندين بهمس : الله يكسر يدك يشيخة

بعد ما وصلو للشرقية كل واحد اخذ اهله وراح لشاليهه الخاص ودعسوها نومة ليين بعد العشاء
ابو نايف : لا بارك الله فيهم نايمين نومة اهل الكهفف
ابو قصي : هم لو انهم مجتمعين بمكان واحد نقدر لهم بس شلون وكل واحد طاير له بشاليه
ابو مشعل : الشرهه على اللي خلاهم يتفرقون كذا
ابو فهد : كل واحد يروح يصحي عياله
تفرقو وفعلا كل واحد راح يصحي عياله لين قامو وصلو الصلوات اللي فاتتهم و قعدو الحريم لحالهم والرجال لحالهم
آسر : وش الاحوال عندك ؟
الليث : والله كله تمام
آسر : مب ناوي تطلق ؟
الليث : الله لا يقول
آسر : اقصد الثنتين الاخيرات
الليث : لا مابطلق ولا وحدة
آسر : بتضيف ؟
الليث : لا خلاص ثلاث يكفوني وانا صدق اكتفيت
آسر : بينخرشون العالم منك لو فكرت بالخامسة
ضحك الليث وقال : خلهم ينخرشون وش وراهم
آسر : الله يعينك يشيخ