لو قلت لقلبي توب عيني تكذبني

الجزء الثامن والستين

في بيت قصي
نور : باباااااا
قصي : وجعااه يا نور وجعاااه
نور : ليه ماصرت تقعد معي ؟
قصي : معد صرت احبتس وش اسوي ؟
نور : ماتحبني انا ؟
قصي : ايه
قوست نور شفايفها وتجمعت الدموع بمحاجرها وهو يطالعها مسوي نفسه مب مهتم
قصي : لا تصيحين و تزعجيني
كانت شفايفها ترتجف وعبير تطالعها وكاتمة ضحكتها وتتقهوى
نور : ليه تكرهني ؟ وش سويت لك انا ؟ انا زعلتك ؟
قصي : لا بس انا صرت اكرهتس
نور : بس انا احبك
قصي : بس انا ما احبتس
نور : شكرا
وقفت نور وهي تمسح دموعها ومتوجهة لغرفتها وسرعان ما قام قصي وهو يرفعها ويبوسها بخدها وضحك
قصي : امزح معتس يا بابا ، تتوقعين انا ما احبتس ؟ انا اموت فيتس
بكت نور وهي تتعلق برقبته وتحضنه وقالت : وعع
قصي : راضي
عبير : العشاء يا قصي العشاء
قصي : جوعانة ؟
نور : لا
قصي : وانا مب جوعان تبين انتي كلي
عبير : لا والله شبعانة
قصي : اجل مب لازم نتعشى اليوم بنقعد انا و حبيبة ابوها
نور : اي وانتي روحي مانبيتس
عبير : طيب يا وصخة طيب
نور : يلا روحي
قصي : اي انقلعي
عبير : بنقلع بنقلع
قصي : اي يلا مناك
ضحكت عبير وهي ترفع رجولها وتبوس شفايف قصي
نور : لاااااا ، وخرييي عن بابا وخريي
عبير : يا بزر انتي ذا حبيبي انا مب حبيبتس انتي
قصي : وناسة والله
ضحكت عبير وهي تأخذ نور وتنزلها بالارض وتمسك ذراع قصي وترفعها وتدخل بحضنه وهو يضحك
نور : ابعدي عنهه
عبير : روحي الغرفة العبي ابي اكلم زوجي
قصي : شكله موضوع حلو
ضحكت عبير وقالت : صاير قليل ادب ترا
قصي : وش قلة الادب ؟ زوجتي انتي ولا انا غلطان ؟
عبير : نور تعالي نروح انا وياتس ونخلي بابا بشغله
نور : ايه
قصي : شطار حبايبي مابي احد يزعجني ، وانتي بعدين بجي اكلمتس ( وغمز لعبير )
ضحكت عبير وهي تشيل نور وطلعو للصالة وهو رجع لشغله
●
●
●
في جناح سعد و فاطمة
كانو جالسين بالارض متربعين ويطالعون فلم باللابتوب
فاطمة : سعّودي
سعد : سمي
فاطمة : سم الله عدوك ، متى برجع لأمي ؟
لف سعد وهو يطالعها وقشر الفصفص بيدينه : وش ؟
فاطمة : متى برجع لامي ؟
سعد : تو ما قلنا بسم الله ، حتى لمسة مالمستك شفيك مستعجلة على شوفة امك ؟
فاطمة : لاتعصب طيب ماقلت شي
سعد : ان كنتي تبين تروحين قولي
فاطمة : اي ابي اروح وبرجع بعد يومين
قفل اللابتوب بقوة واخذ جواله وهو معصب ودق على قصي
قصي : هلا سعد
سعد : اسمع ، انا طالع الحين من البلكونة عندي شغل ، فاطمة عندك
قصي : طيب
قفل سعد وقام وهي تطالعه
فاطمة : الحين ليه عصبت ؟
طنشها و طلع للبلكونة ونط وما اهتم ليده اللي تعورت بس اخذ تاكسي وراح لبيته
فاطمة : قلت شي غلط انا ؟
رفعت حواجبها باستغراب و لبست عبايتها وجاء قصي ورجعها لبيتهم
●
●
●
في بيت ابو ياسر
جمال : سالم جدد القهوة
سلمى : حسبي الله بس الحين تشوفون سارة انثوية اكثر مني ؟
سارة : وش عليتس مني انا ؟
عمار : ارجل منتس سارة
سحبت سارة المخدة ورمتها بوجه عمار وهو ضحك
سارة : ماخذتها منك
وسع عمار عيونه وانفجر جمال ضحك
عمار : طيب يا بنت الكلب طيب
سارة : البادي اظلم
جمال : اخلصو وحدة منكم تقوم تجدد القهوة
قامت سلمى تجدد القهوة وهي تسولف مع بدور اللي تسوي الاكل
سلمى : اقول بدروه
بدور : همم
سلمى : تحسين الفترة ذي العايلة ماش
بدور : اي ملاحظة
سلمى : الله يستر بس
اخذت سلمى القهوة وحطتها قدام جمال وصبت له واخذت جوالها وصاحت وقالت : ليث طلق ميييي
لفو كلهم وهم يطالعونهم وقالت : الاء تقول ليث طلق مي بالثلاث اليوم افتحي شوفي بالقروب
فتحت سارة الواتس وفعلا كانت الاء مرسلة خبر طلاق مي وقامو يزغرطون
عمار : شكله ناوي على الخامسة
جمال : الله يستر منه
●
●
●
في بيت ابو صقر
كانو كلهم جالسين يتقهوون مع بعض وذيب جالس جمب نواهل
ذيب : اقول نواهل
نواهل : هاه
ذيب : طفشان
نواهل : وش اسويلك ؟
ذيب : مدري
دق جوال آسر وقال : سلام عليكم مين معي ......... اي نعم انا اخوه وش فيه ؟
لفو كلهم وهم يطالعون آسر وفزو معه اول ماشافوه فز وانقلب وجهه وطلع وطلعو العيال وراه
ام صقر : وش فيكمم ؟؟
نواهل : صلي على النبي يا خالتي يروحون ويشوفون وش في ويدقون علينا اهدي انتي الله يحفظك
اخذت مويا وهي تعطيها وام صقر تدعي ان مافي الا كل خير