لو قلت لقلبي توب عيني تكذبني

الجزء الثاني والعشرين

كانت اريج جالسة هي و خواتها
كيان : اريج انا بأخذ فستان من اللي فصليتهم مافيني اطلع اشتري
لين : طيب كعب اكسسوارات ؟ مارح تشترين ؟
كيان : عندي
اريج : تمام روحي واختاري الفستان اللي تبينه وان بغى له تعديلات ابشري
كيان : حبيبتي والله
لين : حتى انا ابي من حقتس
اريج : روحو خذو اللي تبونه انا حتى فستان خطوبتي وملكتي بفصلهم بنفسي
كيان : حلو والله
قامو لغرفة شغل أريج كانت كبيرة و فيها قسم معلق فيها الاقمشة و مكينة الخياطة و الاصنام اللي معلقة فيها الفساتين وكان في طاولة فيها تصاميم فساتين
اريج : لو ماعجبوكم الجاهزين شوفو هذي التصاميم اذا عجبكم فستان علموني افصله
لين : بيمديتس تفصلين 3 فساتين قبل خطوبتتس ؟
اريج : معليكم انتم مافي خطوبة الا وفساتينكم جاهزة
قربو كيان ولين يحضنونها
لين : ياحلوتسسس
كيان : تهبليين
اريج : يلا امسكو وشوفو اللي يعجبكم
اخذت لين الكراسة الاولى وهي تشوف التصاميم وكيان اخذت الكراسة الثانية واريج جالسة قدام مكينة الخياطة تنتظر طلبهم
كيان : انا اخترت ابي هذا
عطت اريج التصميم وقالت : ابي ذا
اريج : وش لونه؟
كيان : نرجسي
اريج : تمام تعالي اقيس
وقفت اريج وهي تقيس من الخصر و الكتف والصدر و الطول
أريج : خلاص تمام اعتبريه جاهز
لين : وانا اخترت كمان
اريج : وش تبين لون ؟
لين : زهري
اريج : اطلعي من اللون الزهري دايم تلبسين زهري
لين : تمام ابس اصفر فاااااتح حرير
اريج : موديل الفستان مب حرير
لين : تمام
اريج : يلا تعالي
خلصت واخذت القياسات وشغلت اغاني وبدأت تخيط ولين وكيان طلعو ونزلو تحت
كيان : يمه العيال وينهم ؟
ام صقر : راحو لبيت ليث
لين : وليه ما ياخذونا ؟
ام صقر : جلسة شباب وش تبون انتم ؟
كيان : يعني تقنعيني ان مناهل مب فيه ؟
ام صقر : هم راحو ومناهل باقي بجامعتها
لين : اممم وش اليوم ؟
كيان : اثنين
لين : متى يجي الخميس طفش
ام صقر : ندق عليه نقوله تعال
ضحكت كيان وقالت لين : ماتقصرين يالغالية
ام صقر : قومي جيبي القهوة قومي
قامت لين بحلطمة وهي تجيب القهوة وصبّت لامها وسحبت على كيان
كيان : قليلة ادب صبّي لي انا بعد
تذكرت لين كلمة سعود وقالت : على يدتس نقش حنة
كيان : حركات طالت الالسنة
لين : شش شش بس اسكتي
اخذت كيان الدلة وهي تصب لنفسها وتطالع لين بطرف عين
لين : يمه وين ابوي ؟
ام صقر : طلع هو واعمامتس للبر
كيان : علامهم يطلعون ماياخذونا
لين : خليني ادق على صديقتي ابرك لي
اخذت جوالها وهي تدق على تولين
لين : هلا تولين
تولين : نعم ؟
لين : شرايك تجيني ونروح لسلمى
تولين : تم
لين : تعجبيني يلا انقلعي
تولين : باي باي
قامت لين وهي تكشخ ولبست و وصلت تولين وراحو لبيت ابو ياسر
ونزلو
لين بصوت عالي : سلمووووووهههه
طلع عمار من الشباك وقال : نعم يا مزعجة ؟ صوتتس واصل آخر الشارع سلامات ؟
لين : وينها العربجية ؟
عمار : راقدة
لين : صحيها
عمار : لا خليها تنام وراها موعد
لين : موعد وش ؟
عمار : بتروح تشوف حبيبتي
لين : ياخي انت لعّاب ماتطفش من بنت لبنت خاف الله تندار الدنيا بخواتك
عمار : خليني انبسط
لين : الله ياخذك يا حيوان
ضحك عمار وقال : ارقي ناديها من نفستس لو تموتين ماطلعت من غرفتي حبيبتي بتدق علي
طالعته لين بقرف وقالت : الله يعينك على نفسك
عمار : باي بااي
ارسل لها عمار بوسة بالهواء وقالت : نفخ الله براطمك ياكلب
ضحك عمار بصوت عالي وهو يسكر الشباك
تولين : وقحح و يجاهر بعد بالمعصية
لين : الله يكون بعونه امشي ماعلينا منه
دخلو لغرفة سلمى وهم ينطون بالسرير
سلمى : كسر كسر كسر
لين : قومي نبي نطلع
سلمى : وين نطلع يا بنت وين ؟
تولين : نار جهنم قومي
قامت سلمى وهي تتحلطم وتتجهز وطلعو للمول
●
●
●
بالمستشفى كان الليث جالس وهي منسدحة وراسها بصدره والعيال يطالعونهم ومبسوطين مرا
كانت منسدحة بهدوء وقال الليث : ذا من قعدة امس بالسطح 3 ساعات فوق
كحت مناهل وهي تتكلم بصوت مبحوح : ماله دخل
الليث : الايسكريم مايدخل البيت الا مرا بالشهر والحجم الصغير بعد تسمعين ؟
مناهل : ان شاء الله
دق جوالها وردت : هلاا ليلاس .......... تمام ..... باي
قفلت جوالها وهي تتأفف وبكت
لف لها الليث بخوف وقال : يوجعتس شي يا عيني ؟ علامتس تصيحين ؟
مناهل بنبرة باكية : ابي اطلع بس
الليث : ابشري نطلع الحين لاتبكين ياحبيبي والله ماتهون علي دموعتس ، آسر رح سوي اجراءات الخروج
طلع آسر و مناهل كانت مغطيه عيونها بكف يدينها وتنزل دموعها
الليث : قالت لتس صديقتتس شي
سكتت مناهل والليث ماكان يبي يضغط عليها ورجع آسر
آسر : امشو يلا
مشو العيال وركبو السيارة والليث فتح لها الباب وركب و رجع ركب هو وشغل السيارة وحرك وهو يسمع صوتها وهي تبكي بخفوت وقلبه موجعه حيل
الليث : مناهل قوليلي وش فيتس ؟ لو في شي متعبتس علميني نرجع المستشفى
هزت رأسها بمعنى " لا "
تنهد بضيقة وقال : لازم ادق على صديقتتس يعني ؟
مناهل ببحة قالت : دكتورتي ماتت يا ليث بس
رددو العيال كلهم مع بعض " لا حول ولا قوة الا بالله " 
نزلت دموعها وهي تسمعهم ومسك الليث يدها وشد عليها
سكت الليث وهو مايعرف يواسي احد خصوصا بالموت ويصير ضعيف حيل
ذياب : عظم الله اجرتس كلنا فانين محد باقي بس هي سبقتنا
صقر : راحت للي ارحم مننا ومنتس
كان آسر مثل الليث مايعرف يواسي احد
الليث : تبين اوديتس عند نواهل ؟
مناهل : ابي اجلس بالبيت لحالي
الليث : ابشري
مناهل : لو ودك ارجع معهم لبيت ابوك
الليث : واخليتس ؟ مب رجال انا اخلي زوجتي بهالحال واطلع
وصلو البيت والعيال ركبو سيارة صقر ورجعو لبيتهم
الليث : تعالي يا قلبي تعالي
مسكها وهو يوديها للغرفة ودخل غرفة الملابس وطلع لها بجامة
الليث : بلبستس انا اسمحيلي ولا تعترضين
سكتت بقلة حيلة وسمحت له يلبسها وبعد ما خلص مشط لها شعرها و سوالها جديلة وجاب لها عشاء وجلس يأكلها وبعدها جاب لها علاجها وبعد ماخلص انسدح وهو يسند ظهره على ظهر السرير وهي منسدحة وراسها بصدره حاوطها وهو يمسح شعرها بحنية وهي تبكي
●
●
●
في بيت ابو نايف
نايف : مرام
مرام : عيوني
نايف : ودك نطلع ؟ طفشان
مرام : تمام يلا بس اسمع
نايف : سمي ؟
مرام : نأخذ اهلك معنا لي فترة احسهم طفشانين وضايقين
ابتسم نايف وقال : تمام كلميهم
مرام : ابشر
نزلت مرام وشافت نواف منسدح على رجل نوف و ريوف منسدحة على رجل الهنوف وابو نايف وام نايف جالسين ساكتين يطالعون التلفزيون
مرام : عمي
ابو نايف : سمي يا بنيتي
مرام : ودنا نطلع كلنا مع بعض
ابو نايف : روحو غيرو جو
مرام : لا انتم معنا بعد
ريوف : شرايكم نسافر ؟ يعني احنا مافي ولا واحد فينا يدرس ونواف ونايف ياخذون اجازة ونروح الطايف والله انكتمت
نواف : اي والله يا يبه ودنا نسافر
ابو نايف : زين لا صرتو جاهزين مشينا للطايف
فزو البنات وقالو بصوت واحد : يسسس
راحو كلهم يتجهزون وسحبو على ام الطلعة
●
●
●
بعد اسبوعين يوم الاربعاء الساعة 7:30
في بيت ابو فهد
سعود : يبه
ابو فهد : هلا يا يبه
سعود : ابي اخطب
ابو فهد : وشو ؟
سعود : ابي اخطب ؟
ابو فهد : كم عمرك ؟
سعود : 20
ابو فهد : توك يا سعود صغير انتظر لين تتخرج
سعود : مناهل تزوجت وعمرها 20
ابو فهد : في فرق انت رجال يا وليدي عندك مسؤولية اكبر عكسها هي يعني انت باقي طالب والليث متخرج و توظف و مقتدر ومرتاح ماديا
سعود : وانا مرتاح ماديا يا يبه هم مب اغنى مننا اقل شي بخطب و لين اتخرج و بتزوجها مابي يا يبه تنخطب و ياخذها غيري
ابو فهد بشك : هي موجودة يا وليدي ؟
سعود : ايه يا يبه موجودة
ابو فهد : منهي ؟
سعود : اخت الليث الصغيرة
ابتسم ابو فهد وقال : نكبونا عيال زايد
ضحك سعود وقال : يبه بس نخطب واتخرج و اتوظف و اشيل نفسي واشتري بيت ونتزوج
ابو فهد : لا رجعو اخوانك نفتح الموضوع
نزلو ام فهد و نواهل وجلسو جمبهم بهدوء و سرعان ما وصلو فهد و سعد
ابو فهد : تعالو في موضوع بعلمكم فيه
جلسو بتوتر من نبرة ابوهم الجدية
سعد : سم يبه
ابو فهد : انتو تدرون ان هالفيلا اللي احنا ساكنين فيها دو اول وثاني وارض صح ؟
فهد : ايه يبه ندري
ابو فهد : ومن يوم انولدتو وانتم تعيشون بالدور الاول والارضي والدور اللي فوق ماعمركم طلعتوه صح ؟
فهد : اي كنت دايم تمنعنا نطلعه
ابو فهد : الدور اللي فوق فيه 4 شقق كبيرة 4 غرف و حمامين و مطبخ و صالة
سعود : ليه طيب ؟
ام فهد : ابوكم كان دايم يبيكم تحت عينه عشان كذا جهز لكم هالشقق عشان لو تزوجتو تسكنون معه لكن اللي وده يسكن ببيت لحاله مع زوجته هذا قرار خاص فيه لكن احنا قلنا لكم تعيشون معنا فترة زواجكم ويوم كل واحد منكم يجيب 3 ولا 4 عيال بعدها انقلو بيت كبير يوسعكم كلكم لان الجناح بيكون صغير عليكم
فهد : انا بالنسبة لي موافق اعيش بالجناح مع زوجتي وبجلس فيه لين يصير معي 3 اطفال بطلع بيت لحالي
سعد : وانا نفس الشي
سعود : حتى انا زيكم
نواهل : بس يبه اذا طلعو اخواني بعدين من البيت بنستوحش البيت لحالنا
ابو فهد : انتي يا بنيتي اكيد بتتزوجين لكن اذا ما بقى احد بالبيت بقفل هالبيت وبنقل لبيتنا الصغير
فهد : لا يا يبه يوم اطلع انا من هالبيت اكيد بشتري فيلا تعالو انت وامي معنا
ام فهد : لا يا وليدي ماينفع نضيق عليك
فهد : الله المستعان يا يمه الراحة ماتجي الا بوجودكم
سعد : لا انا باخذهم عندي
سعود : يا رجال انثبرو باخذهم انا
نواهل : يصير خير بعد مليون سنة السؤال المطروح وش اللي خلاك تفتح الموضوع الحين يبه ؟
ابو فهد : سعود يبي يخطب
لفو كلهم عليه وقالو بصوت واحد : وشششش ؟؟؟
ام فهد : يا وليدي توك صغير ؟
سعود : بخطب يا يمه وبعد ما اتخرج وتضبط اموري بتزوجها
نواهل : لين ؟
سعود : ايه
فهد : ابوها ما بيوافق
سعود : عادي اذا ما بيوافق علي مابيوافق على اللي اصغر مني
ام فهد : وش تقول انت ؟
سعود : يمه انا ولين صدفة ندرس بنفس الجامعة و زميلها يبي يخطبها وهو اصغر مني واذا رفضني عشان اني صغير بيرفضه لانه هو صغير بعد
سعد : يعني ماخذها حجز ؟
سعود : اي تخيل يخطبونها بخلي مناهل تتوسط لي عند الليث والليث شاطر
ابو فهد : انا اكلم ابوها ومايصير الا كل خير
سعود : تكفى يا يبه لاتروح البنت
ابو فهد : انا قايل عيالي رايحين بستين داهية من ذا الحب
ضحك فهد وقال : والله يا يبه انا رايح رايح
سعد : اجل انا ونواهل اللي طلعنا منها
نواهل : اي والله لا حب ولا قروشة مطولين بالنا
ام فهد : الله يصلحكم ويجمعكم بمن تحبون
●
●
●
في بيت ابو صقر كانو كلهم جالسين بالصالة يتقهوون
ابو صقر : اريج
اريج : سم يبه ؟
ابو صقر : عمتس ابو ياسر جاي هو واحمد يملكون يوم الجمعة
اريج : بس مب كانه بدري تو خطبنا الاسبوع اللي راح ؟
ابو صقر : يا بنيتي هو بيملك عليتس وبعد شهرين العرس
اريج : كلمتك يا يبه ما بعدها كلمة
ابو صقر : الله يوفقتس يا بنيتي و يسعدتس يارب
اريج : امين
ذيب : تخيلي وانتي متزوجة
اريج : مالك دخل انت تبي تتزوج منقهر لاني بتزوج قبلك
ابو صقر : مغسول وجهتس بمرق انتي ؟
ضحكت اريج وضحكو عليها كلهم
●
●
●
في بيت الليث كانت منسدحة على الكنبة بتعب وتطقطق بجوالها
مناهل : مب من عوايده يتأخر كل هالتأخر الساعة بتجي 8 مليت لحالي وش ذاا
دخل الليث وهو دايخ فصخ جزمته ( اكرمكم الله ) ورمى نفسه بحضنها وصار فوقها ودفن وجهه بعنقها
جلست تلعب بشعره وقالت : طولت ! الاسبوعين ذي انشغلت عني حيل جالسة استوحش البيت وانت مب فيه
الليث : اشغلوني جلسة ورا جلسة
مناهل : تمام ارتاح انت وانا بقوم اسوي شي تأكله
الليث : خليتس كذا انا مرتاح بنام كذا ساعتين و اقوم
مناهل : تمام
كانت تخلل اصابعها بشعره وتحكه وهو غفى من هالحركة
مناهل : ياعيني انا على التعبان الله ياخذ اللي يتعب حبيبي
ابتسمت وهي تلف وتتأمل وجهه وقت ينام يصير بريئ حيل وطفولي عكس لما يصحى تصير حادة
مناهل : وش سويت يا ليث فيني يوم تخليني هايمة فيك كذا ؟
باسته بشنبه وقالت : جعل التعب اللي فيك بضلوعي يارب
شد على خصرها بقوة و قال : لعد تعيدينها
مناهل : احسبك نايم
الليث : تعبان
مناهل : يخسي التعب يمسّك خلني اقوم اسويلك شي تاكله يلا
الليث : وان جاء التعب وانتي مب فيه ؟
ضحكت مناهل وقالت : يعني اقعد كذا ؟
الليث : اههخخ بس لو تقعدين العمر كله كذا والله يخسي التعب يجيني واخسي انا اكون مب مرتاح
مناهل : ياحبيبي والله ، طيب بسويلك عشاء بعدين سوي اللي تبي
رفع رأسه وهو يطالعها وقال : اسوي اللي ابي ؟؟
ضحكت وهي فاهمة قصده : لاتصير وصخ تلقط اللي تبي
ضحك الليث وقال : لاتنسين طيب اخر مرا كانت قبل اسبوعين
مناهل : مابي انا طيب !!
سكت الليث وهو يدري انها بترفض ومارح ترضى الا بعد معاناة
تنهد وقال : وش بتسوين عشاء ؟
مناهل : اللي تبيه انت ابشر به
الليث : ودي بكبسة
مناهل : حاضر
الليث : تمام انا بدخل اتروش والبس واجي
قامت مناهل وهي تجهز الكبسة والليث ينتظرها بملل بالصالة
●
●
●
اليوم الثاني في بيت ابو صقر كانو كلهم مجتمعين رجال وحريم
ابو فهد : علومك يا ابو صقر
ابو صقر : نحمد الله ونشكره احنا بأحسن حال انت اخبارك
ابو فهد : مثل ماتحب نسلم عليك
ابو صقر : الله يسلمك
ابو فهد : والله يا ابو صقر انا جايك بطلب و ودي انك ماتردني
تعدل سعود بجلسته وهو كل حواسه عندهم
ابو صقر : نخسي نردك يا ابو فهد انت قل واحنا نعطيك وابشر باللي يسرك يا ابو فهد
ابو فهد : والله احنا من يوم قربنا منكم وصرتو لنا اهل صرنا طامعين بنسبكم اكثر واكثر والله و ودنا بالقرب فوق القرب
استغربو كلهم وهم يسمعون ابو فهد
ابو صقر : آمرني يا ابو فهد وان شاء الله لك اللي يسرك وحنا والله يشرفنا بالقرب الاكثر لكم
ابو فهد : والله انا جاي اطلب يد بنتك لولدي سعود على سنة الله ورسوله
انصدمو كلهم وتوتر ابو صقر وقال : على حد علمي هو ولدك الصغير
ابو فهد : هالله هالله
ابو صقر : وبنيتي كبيرة حيل عليه
ابو فهد : ودنا بآخر العنقود يا زايد
ابو صقر : آخر العنقود عمرها 19 سنة ولا يناسب تتزوج الحين وبعدين ولدك صغير يعني الاثنين صغار ماودي اردك يا ابو فهد بس بالعقل فكّر
خاف سعود من الرفض لكن تدخل فهد : ياعم حنا مب مستعجلين على الزواج سعود باقي له سنتين ويتخرج والسنة الثالثة يأسس نفسه ويشيل عمره الحين نبي بس نخطبها عشان ما يأخذها الغير
ابو فهد : هذا المقصد يا ابو صقر بس نبي خطوبة و بعد 3 سنوات يتزوجون
سعود بهمس : أساله يا يبه وش تخصصها جامعة
ابو فهد : هي وش تخصصها بالجامعة ؟
ابو صقر : محاماة
ابو فهد : يعني نخطب الحين وبعد ثلاث سنوات سعود بيكون جاهز وبنتك تخرجت من الجامعة واحنا ندري بمشكلة العمر لكن حنا من زود محنا طامعين بنسبكم مانبي احد ياخذها علينا
ابو صقر : والله مدري وش اقول
الليث : يا يبه دامهم قالو مجرد خطوبة يسّر الامور وعلى بركة الله
ابو صقر : انا بالنسبة لي موافق لكن الشور الاول والاخير شور البنت
ذيب : انا بقوم اعلّمها ونشوف
ابو صقر : فهمها بالهدوء وقول مهي مغصوبة على شي
ذيب : ابشر
كان سعود مشابك اصابع يدينه وشاد عليها ويهز رجله بتوتر
سعد : اهدأ كله يمشي مثل ماتحب ان شاء الله
سعود : يا خوفي ترفض بس
سعد : مين يرفضك انت ؟ يتشرف من يأخذك اهدأ بس
●
●
●
عند الحريم
ام قصي : ما عيّنا بطن طالعة
خولة : والله حرم ولدتس حملت بعد زواجها ب 3 سنوات ما سمعنا حستس بس يوم تزوجت مناهل تو لها شهر و 20 يوم قلتي ما عيّنا بطن طالعة
ام سلمان بحدة : خولة
سكتت عبير وقالت لها خولة : آسفة ما كان  قصدي ازعلتس بس قهرتني
عبير : عادي والله واعرفها انا
فاطمة : الله واعلم اذا كان لمسها ولا للحين توها بنت
رفعت مناهل رأسها بصدمة من جرائتهم شلون يعطو نفسهم الحق انهم يتدخلون بخصوصياتها
ام فهد : حبيبتي انتي مالك بكلام الكبار البزران خلوهم على جمب واذا كانت بنتي مب حامل لأن توها صغيرة ماتبي تتعب نفسها
انقهرت مناهل حيل منهم
سارة : معليتس دايما زوجة عمي وبنتها يدقون بالكلام ماعليتس فيهم
هيام : بس مالها الحق تتكلم بموضوع يخصها هي وزوجها وش عليها بذا الحكي ؟
ريوف : ناس ماتستحي ولا تنتخي صدق
لين : وسعي صدرتس لاتهتمين لهم
وصلهم صوت ذيب الجهوري وهو يقول : يا ولدد يمه لين تعالو ابيكم
قامو ام صقر ولين و اريج وكيان معهم لقافة وفضول
ذيب : قايل امي و لين انا وش تبين انتي وهي ؟
كيان : جينا مرا وحدة ، قل اخلص
ذيب : يا يمه سعود ولد عمي هادي
فزت لين من طاريه
ام صقر : اي يا وليدي علامه ؟
ذيب : خطب لين
ام صقر : مب كأنه صغار ؟
ذيب : بيخطبها وبعد ثلاث سنوات بعد مايتوظف ويشيل نفسه وتتخرج لين يتزوجها ، بس الحين عشان مايبي احد ياخذها منه خطبها و لو انا منتس وافقت
كان قلب لين يدق بقوة ماتوقعت يحبها كانت تحسب يلعب عليها لأن يوضح من شكله انه لعّاب وحتى ان حبها حب ماتوقعت يوصل انه يخطبها
لين بعدم استيعاب : نعم ؟
ذيب : سعود بن هادي خطبتس على سنة الله ورسوله وبعد 3 سنوات الزواج
لين : خطب مين ؟ خطبني انا ؟
ام صقر : علامتس انهبلتي ؟
لين : يمه يقول سعود خطبني انا ؟
ضحك ذيب وقال : شكلتس حاطة عينتس عليه
غطت وجهها بكفوف يدينها وراحت
ضحك ذيب وقال : انا بنتظر هنا شوفو وش ردها
كيان واريج : تمام
ام صقر : انتم روحو لها لحالكم هي بتستحي مني
راحو كيان واريج لغرفة لين وشافوها تنطط بالسرير
كيان : دامتس كذا معناها موافقة
لين : خطبني خطبني خطبنييييييي
كيان : موافقة ؟
لين : ايه ايه ايييه ايهههههههههه
ضحكو عليها وهم ينزلون لذيب
ذيب : هاه وش قالت ؟
اريج : وافقت
ذيب : على بركة الله
راح ذيب للرجال يبشرهم وام صقر وكيان دخلو يزغرطون
ام مشعل : علامكم ؟
ام صقر : لين انخطبت لسعود ولد هادي
فزو البنات وهم يزغرطون والحريم معهم ويباركون ل لين ويزفونها هي واريج مع بعض
●
●
●
كانو الرجال ساكتين ينتظرون ذيب و من سمعو صوت الزغاريط عرفو الاجابة
دخل ذيب وقال : مبروك يا ابو هادي
قامو الرجال وهم يباركون لسعود وهو طاير من الفرحة ومو مصدق ابد
سعود : الله يبارك فيكم يا رجال وعقبال الباقين يا رب
كالعادة رفعو العيال اصواتهم وهم يقولون : اميييينن
ضحكو الرجال عليهم وطلعو ابو فهد و عياله وابو صقر وعياله لبيت الشعر يتفقون على باقي الامور وتركو الباقين بالمجلس
ابو صقر : بكرا حفلة ملكة اختها تسوي حفلة خطوبتها معها
ابو فهد : مثل ماتحب يكون ودام ان الخطوبة بكرا نأخذها الحين عشان تختار شبكتها و دبلتها وانا وانت نتفق على المهر
ابو صقر : تمام
صقر : بأخذهم انا محرم لها
طالعه سعود بطرف عين وقامو وعطو لين خبر وطلعت و نواهل وراها وركبو
سعود : وش جابتس ؟
نواهل : بجي معكم بشوف
سعود : زين
حركو وهم متوجهين لمحل الذهب ونزلو كلهم
صقر : اختاري اللي خاطرتس فيه
كانت لين واقفة ومحتارة كل طقم احلى وافخم من الثاني
لين : مدري كلهم يجننون
نواهل : لو سمحت
لف صقر وهو يطالعها : سمي ؟
نواهل : يعني لو ما تمانع تخليه يختار معها قدام عينك
ابتسم صقر وقال : تمام
ابتسم سعود وهو يمسك فك نواهل ويبوسها : جعلني افداك والله تتوسطين
ضحكت نواهل وقالت : روح يلا
قرب سعود من لين وهم يختارون مع بعض و صقر و نواهل واقفين عند الباب ينتظرون وهم يشوفون سعود يلبس لين الخاتم ويقيسه لها
سعود : عجبك ذا ؟
نزلت رأسها وهي ترفع يدها تشوف الخاتم وقالت : عادي تعدل لهجتك وتكلمني بلهجتنا
رفع يدها وهو يبوس مكان الخاتم وصقر رافع حواجبه وقرب و استوقفه صوتها : اتركهم لو سمحت باس يدها ترا ما فجرها
ضحك وهو يرجع لورا
سعود : ابشري اسولفلتس باللي ودتس
ضحكت وهي تطلّع الخاتم من اصبعها وقالت : بأخذه
سعود : يفداتس
اخذو الطقم و وركبو السيارة وحركو و وقفهم بياع ورد
نواهل : سعود جيب لي
سعود : طفرت ياحبيبي
فتح صقر الشباك واخذ بوكيهين ورد واحد عطاه نواهل و واحد عطاه سعود
لين بزعل : وانا ؟
صقر : خطيبتس يعطيتس
ضحك سعود وهو يلف ويعطيها بوكيه الورد اللي معه وقال : يضيع الورد قدامتس
صقر : لاتمون يا سعود
سعود : ياخي وش سوا اخوك يوم خطب اختي ؟ لاتحرموني تكفون انا بنحرم 3 سنوات مشّيها انت
اخذ شماغه وهو يرميه بحضن صقر و وفز صقر وهو يشيل الشماغ  ويحطه برأس سعود : ابشر بها وقت ماتبي والله وان بغيتها عروس باكر اترك ابوي علي انا
سعود : قل والله ؟
صقر : والله وانا معطيك كلمة رجال
صرخ سعود وهو يقول : الله يعزك يا صقررر الله يعزكككككك
ضحكو عليه وهو يشغل اغاني ويفتح الشباك وطلع يجلس عليه ويرقص
صقر : لا اله الا الله والله ان بغى الواحد الزواج ف هو بسبب ليث وسعود