لو قلت لقلبي توب عيني تكذبني

الجزء الرابع والعشرين

يوم السبت الساعة 9:00
في بيت ابو فهد
كانو جالسين كلهم بالصالة ويسولفون ويتهاوشون مع بعض
ابو فهد : ماعندكم دوامات اليوم ؟
سعد : انا بروح بعد الظهر
فهد : وانا جلستي بعد العصر
ام فهد : انتي قلتي انك بتشوفين لك وظيفة ؟
نواهل : كنسلت دامني جالسة ببيت ابوي معززة مكرمة اشتري واخذ اللي ابي وش ابي بالوظيفة
ابو فهد : زين ، مناهل وينها ؟
ام فهد : فوق بغرفتها
سعود : تقول تبي تقعد لحالها
ابو فهد : فهد دق على الليث
فهد : ليه ؟
ابو فهد : نشوف وش فيهم ما بخلي بنتي انا ضايقة كذا وشايلة هم الدنيا على اكتافها
فهد : معه جلستين يا يبه اليوم مشغول حيل
ابو فهد : وقت ما يفضى قول له يجي
فهد : ان شاء الله
نواهل : انا بقوم اشوفها
سعود : اتركيني انا اروح لها
طلع سعود و دق الباب : مناهل افتحيلي الباب
مناهل : انا نايمة يا سعود نايمة
سعود : بكلمك
مناهل : ادخل
دخل سعود وشافها متغطية بلحافها قفل الباب وراه وجلس جمبها
سعود : قومي شوي ودي اكلمك
وخرت اللحاف وهي تتربع وقرب سعود وهو يحط شعرها ورا اذنها
سعود : وش مضايقك ؟ ابوي وامي شايلين همك وانتي ماودك بضيقهم صح ؟
هزت رأسها بمعنى " ايه "
سعود : تمام هم ضيقهم ما جاء الا من ضيقك انتي لا ابتسمتي تشيلين الضيق عننا كلنا
مناهل : مافيني شي انا
سعود : فيك اشياء يا مناهل مب شي بتجلسين كاتمة كذا بقلبك ترا مب زين ابد حتى نواهل ما قلتي لها وانتي اللي تقوليلها حتى عن الطير اللي يطير فوقك
مناهل : وش اقول ؟
سعود : اللي مكدر خاطرك
نزلت رأسها وهي تعض شفايفها وتكتم بكاءها
سعود : ابكي يا مناهل ابكي مب عيب
غطت وجهها بكفوف يدينها وبكت وسعود حضنها وجلس يمسح شعرها بحنية صارت اخته الصغيرة بدل ماتكون اخته الكبيرة صحيح سعود طفولي ومهبول شوي الا انه مايرضى على اخوانه تمسهم نسمة الهواء ويضيق من ضيقهم
سعود : وش قايل لك ليث ؟
مناهل : قال لي انا ؟
سعود : وش ؟
مناهل : صار موضوع حساس شوي بس
فهم سعود انه موضوع خاص بينها وبين الليث ولو يموت مارح تقوله لانها تستحي من كل شي
سعود : تمام يا حبيبي لاتضايقين عمرك اي زواج فيه مشاكل و زعل انتي افردي لي ذا الوجه شوي
ابتسمت مناهل من تفهم سعود وعدم احراجه لها وقالت : ان شاء الله
سعود : يلا ترا نستناك تحت
مناهل : البس واجي
سعود : تمام
طلع سعود ونزل تحت
ابو فهد : وش فيها ؟
حك رقبته بأحراج وقال : يعني هي ما قالت وش فيها بالضبط لكن اللي فهمته منها انها اشياء خاصة بينهم ما تنقال
ابو فهد : لا حول ولا قوة الا بالله
ام فهد : دام ذا الموضوع انا بكلمها
سعود : لا يا يمه لا انا وهي تكلمني بغت تنفجر من زود ماهي مستحية
ام فهد : ماينفع تستحي من اشياء زي كذا
ابو فهد : انا جاي معك
قامو ابو فهد و ام فهد لغرفة مناهل
نواهل : راحت فيها
فهد : كان صبرو شوي تو سعود طلع من عندها
سعد : نتخارج من ضيقتها اللي مضيقة صدورنا معها
سعود : خير ان شاء الله

بغرفة مناهل
ابو فهد : يا بنيتي اشياء بينك و بين زوجك ماتستحين منها انا عاررف انك خجولة زيادة عن اللزوم بس ذا رح يضر علاقتك مع رجلك
كانت مناهل تسمع كلام امها و ابوها وشوي وتبكي من زود الاحراج اللي صفقها
●
●
●
بمكتب الليث
ميّ : الجلسة الجاية بتحضرها ؟
الليث : ان شاء الله ، متى بتكون ؟
ميّ : بعد صلاة المغرب ان شاء الله
الليث : تمام
ميّ : وش فيك متضايق من امس ؟
الليث : ولا شي
ميّ : من وجهك واضح
الليث : من ضغط الشغل بس
ميّ : خلاص روح البيت ارتاح وانا احضر الجلسات عنك
الليث : لا جلسة صعبة بتهد حيلتس
ميّ : شدعوه ماتوثق ؟
ابتسم الليث وقال : الا والله وأخسي ما اوثق بس كثرة هرج مالتس فيه
ميّ : انا مساعدتك هنا اشيل عنك الضغط روح ارتاح وانا اكمل كل شي
الليث : تمام بس تراني بحضر الجلسة وبشوف ادائتس
ميّ : ما قلت انا ارتاح عشان تجي لا ارتاح وارجع للبيت
الليث : ماعليه ماودي برجعة البيت الحين
ابتسمت ميّ بعد ما حست ان مشكلة بينه وبين زوجته صارت و قالت : اجيبلك قهوة ونتفاهم
ابتسم الليث و طلعت ميّ وهي تجهز له القهوة ورجعت وهي تمشي متوجهة له وقربت منه وداهمته ريحة عطرها اللي خدرته
الليث : اعوذ بالله
جلست ميّ قدامه وقالت : متهاوش مع زوجتك ؟
الليث : يعني مب هوشة هوشة
ميّ : اجل وش اللي مضيق خلقك لاتكذب وتقول من الضغط هذاني قلتلك بمسك الشغل عنك وماشفت الزعل راح من وجهك
سكت الليث وهو يسمع ضغط ميّ عليه وبعدها نطق : خوافة و خجولة حيل تستحي من كل شي حتى من الحلال والسنة
رجع ظهره لورا وفهمته ميّ وابتسمت ابتسامة خبيثة
ميّ بقلبها : الوقت الصح الحين اني اقرب منها بيلقى عندي اللي مايلقاه عندها بعطيه اللي ما جابتله ( رفعت صوتها ) يعني هي مب موجودة بالبيت ؟
الليث : راحت عند اهلها
ميّ : تمام انت ارجع البيت ريّح نفسك وانا اسوي كل الشغل
الليث : ماتقصرين
اخذ اغراضه وهو يطلع
ميّ : لازم الواحد يمسك الفرصة بيدينه و رجوله
ضحكة وهي تفكر بأشياء خبيثة حيل
●
●
●
بمكتب كيان
كانت جالسة على مكتبها وهي تفكر
كيان : يا كثر البعد والمسافات اللي انخلقت من موقف
دخلت نجلاء وهي تجلس رجل على رجل
كيان : ماعندتس شغل اليوم تقدرين تنقلعين
نجلاء : هذا دوامي واجلس لين اكمل باقي ملفاتي
كيان : وانا مديرتتس وأمرتس وماتمشين الا بكلمتي قلتلتس ماعندتس شي اليوم
اخذت نجلاء اغراضها وطلعت وهي تشتم كيان
اخذت جوالها وهي تدق : هلا
رد عليها ببرود وقال : آمريني استاذة كيان
كيان : لا تقول استاذة لو سمحت
ابتسم بسخرية وقال : مب قلتي ما بيننا شي عشان اقول لك كيان انا وانتي نشتغل مع بعض بس وعيب بحقي اقولك كيان بس لازم الاستاذة الفاضلة كيان ، المهم وش بغيتي ؟
بلعت ريقها وقالت : عادي تجي المكتب ؟
فهد : عندي اشغال بالبيت اهم
كيان : ضروري لو سمحت
فهد : قوليه بالجوال قلتلك مايمديني اجي
كيان : تكفى تهز رجال يا فهد
فهد : لا حول ولا قوة ، زين نص ساعة واكون فيه
سكتت وهي تطق الطاولة بالقلم وجلست تنتظر والتوتر يأكلها أكل .
دق الباب وفزت وقالت : مين ؟
فهد : انا
كيان : تفضل
دخل فهد وقال : سلام
كيان : وعليكم السلام تفضل
جلس فهد وقال : وش ؟
كيان : فهد انا آسفة
ابتسم فهد وقال : مايهم اعتذارك ما يقدم ولا يأخر اللي صار صار ، هذا الموضوع اللي جايبتني عشانه ؟ لو انك تاركتني احل مشاكلي ابرك
وقف وهو يلبس نظارته وقال : شي ثاني ؟
كيان : فهد تكفى لا تقسى
فهد : من بغى يفهم موقف صار لي انااا على هواه يتحمل قساي يا كيان
كيان : يعني وش متوقع ردي يوم اني اشوف وحدة تقرب من واحد انا احبه ؟
ابتسم فهد وقال : وشو ؟
كيان : وشو اللي وشو ؟ يعني ماقلت لغز انا ؟ مب انت قلت بيننا اشياء واجدة توضح من عيوننا ؟ يعني من كلامك انك تحبني ، لو شفتني قريبة من رجال زي قرب نجلاء لك بلحظة بتفهمني غلط
فهد : طيب بعدها مب المفروض تجيني وتسمعيني ؟
كيان : خفت
فهد : تمام كملي خوفك الحين
مشى كيان وسرعان ما استوقفته يدها اللي ماسكة يده
كيان بنبرة باكية : فهد تكفى لاتروح
فهد : انتظريني يوم الخميس يا كيان خلاص فكي
وخرت يدها وقالت : ما فهمت ؟
فهد : وش وراك ماتعرسين مع اريج مرا وحدة نخارج ابوك منك انتي واريج ولين
ضحكت كيان وقالت : شلون يعني ؟
فهد : لاتصيرين دلخة حيل يعني بخطبك ب خ ط ب ك
كيان : وشو كذا مرا وحدة كلنا ؟
فهد : وش يقويني اشوفك قدامي ولا احضنك
كيان : روح روح
ضحك وهو يطلع ورجع لبيتهم
●
●
●
بعد 10 ايام يوم الأربعاء الساعة 3:30 العصر