لو قلت لقلبي توب عيني تكذبني

الجزء الخامس والسبعين

في بيت ابو ياسر
سارة : تدرين بخاطري اتزوج
سلمى : وعع
سارة : مو ان ودي اتزوج يعني عشان اتزوج لا
سلمى : اجل ؟
سارة : يعني عشان ابي اشوف الاهتمامات شلون بتكون والمشاركات بشوف المشاكل وش سببها وكيف نتخلص منها
سلمى : والله مدري عنتس ان سدحتس زوجتس معد تبين تفكرين بذا كله
ضحكت سارة وهي تصب القهوة وقالت : وصخة انتي
سلمى : صبي لي معتس
جلست بدور جمبهم وقالت : سلامن عليتسن
سارة : عليكم السلام
بدور : طفشانة يا بنات طفشانة
سارة : والله مابيدنا شي كل واحد انشغل بنفسه وبعمره ومحد يبي يكلم احد
سلمى : اكتشفت ان اللي كان يلملمنا مناهل
بدور : اي والله كانت تسوي لنا اجواء تجنن
سارة : من يوم تطلقت ونفسيتها بخشمها حتى لو تحاول تبيّن لنا ان كل شي عادي واضح ان مب عادي
سلمى : منجد بس اللي صار معها مو قليل وهي تو صغيرة
بدور : الله يكون بعونها بس
سارة : امين ، الا فصفص وينه ؟
بدور : مع اخوتس طالع يشتريله العاب
دخل جمال بتعب وقال : يا كثر التعبب بسس
بدور : قواك الله
جمال : الله يقويتس
اخذت سلمى المويا وعطته لجمال وقال : برد برد
فتحت سارة التكييف وقالت : شاد حيلك شكله
جمال : كان عندي مهمة عشان كذا ، فصول وينه ؟
سلمى : مع ياسر
جمال : طيب انا بطلع انام ان جاء خلوه يجيني للغرفة
سلمى : طيب
●
●
●
في بيت ابو صقر
فز ذيب من سمع صوت صراخ وراح لغرفة امه يدق الباب
ذيب : يمههه يمهههه
طلعت ام صقر بخوف وقالت: علامك روعتني الله يصلحكك
ذيب : نواهل يا يمه تصارخخ
راحت لها ام صقر بسرعة وكان باب الجناح مقفل وجاء ذياب
ذياب : وش فيكم ؟
ام صقر : اكسرو الباب
حاولو مرا ومرتين لين كسرو الباب وصد ذياب على طول وذيب راح يدق على صقر و ام صقر دخلت عند نواهل
نواهل : فيي دممم في دمم
ام صقر : طيب هذا طبيعي لا تخوفين عمرتس
اخذت ام صقر عباية نواهل ولبستها ودخل صقر مخروش
صقر : بسم الله عليتس
بكت نواهل وقالت : صقرر صقرررر
صقر : الحين نروح
مسكها ونزلها بسرعة وامه راحت تلبس عبايتها وراحو للمستشفى واخذوها الطوارئ على طول
صقر : يمه مارح يجيها شي صح ؟ مارح يصير فيها زي منيرة
ام صقر : استهد بالله مارح يصير الا كل خير
صقر : اجل ليه كل هالدم ؟ يمه لا تموت تكفين
ام صقر : مارح تموت ان شاء الله
كان صقر كانه بزر اشغل امه واشغل كل اللي بالمستشفى وهو يحسب ان نواهل بتموت
●
●
●
في بيت ابو فهد
مناهل : تضاربو لو تتذابحون بس مو قدام الناس ومافي شي يستاهل انكم انتو الاثنين تتهاوشون عشانه لو وشو كلنا نعرف علاقتكم والناس تتمنى اخوان زيكم وش الموضوع التافهه اللي خلاكم تتضاربون كذا ؟
سعود : مبزرتهه و ورعنته هي اللي خلتنا نتضارب
سعد : بكمل عليك ترا
مناهل : قومو قومو تضاربو مرا ثانية قومو يلا
سكتو سعود و سعد وقالت مناهل : وش اللي صاير بينكم ؟
سعد : آسر جاء هو وابوه وخطبوك
قالت مناهل بصدمة : وشووو ؟؟؟
سعود : وجاء اخوك المحترم يقول انه كفو ويستاهلك وبيحطك بعيونه
تذكرت مناهل اللي صار بينها وبينه وقتها بغرفة لين وخافت
مناهل : الموضوع يخص مين ؟ يخصني انا يعني قراري انا ماودي تتدخلون فيه و تدخلون بمشاكل بين بعض انا بنتظر لين يكلمني ابوي وقرار ابوي يسبقني انا ومارح يصير الا كل خير
سعود : ما يستاهلل مايستاهل انتي تشوفين هو كيف ؟ شايف نفسه ذا زيه زي اخوه
سعد : ذا رجال وارجل منك
سعود : والله انك انت اللي مب رجال
سعد بحدة : اعقبببب
مناهل : بس انت وياه
جلست جمبهم وهي تفكر انها اذا تزوجت آسر ربي رح يسامحها عن الغلط اللي صار بينها وبين آسر هذاك اليوم وهالموقف للحين ببالها مع انه مر عليه شهور
مناهل : ادري يا سعود انك تكره آسر وماتطيقه هذا لأنك بعيد عنه خلك قريب منه زي ما انت قريب من صقر و ذياب وشوف وشلون والله هو مسكين وحليل شوف صقر كنت تكرهه من كرهك لآسر وكيف تغيرت نظرتك عنه جرب تصفي قلبك ناحيته مو عشان شي انا اقصد عشان الايام الجاية ولاتنسى هذا اخو زوجتك رح تحتاجه بيوم من الايام حتى لو انت تكرهه
سعود : والله لو وشو ماتقبلته كريهه كريهه ماينطاق ابد
ابتسمت مناهل بقلة حيلة وقالت : وش يقنعك انت اصلا
سعود : يعني ركزي انتي شوفي شلون مغرور وشايف نفسه ومتكبر ورافع خشمه ويحسسك انه هو فوق والناس كلهم تحت رجله
طالعه سعد بطرف عين وسكت عشان مناهل بس
مناهل : ترا بعض احيان ملامح الوجه تخلي الواحد ينحكم عليه بشي غير شخصيته وبعدين ماتعرف مقولة دايم الناس يقولونها ؟
سعود : يا ام المقولات انتي
ضحكت مناهل واشرت بأصبعها السبابة ورفعتها بوجه سعود وقالت : لاتحكم على الكتاب من غلافه
سعود : مدري عنكم اللي تبونه سووه وش دخلني انا
طلع سعود وراح لجناحه
سعد : اسمعيني معليك فيهم والله والله والله انه كان عندي بعد نظر كيف كنت كاره ليث وشوفي كيف صار ؟ فكري وشوفي آسر شلون رجال كفو وهاجد وراكد ويفكر بعقل ومنطق وتلقينه هو اول واحد وقف بوجه ليث يوم فكر يتزوج عليك وربي انه يفكر بالشي مليون مرا قبل لا يسويه ليث تزوج عن طيش هذا بيتزوج وهو واعي وعاقل ويعرف هو وش بيسوي يوم فتح عمي زايد الموضوع اليوم مع ابوي كان ابوي متردد شوي بس يوم تكلم آسر قسم بالله حسيت ان ابوي اقتنع والله يا مناهل انه يستاهلك وبيحطك بعيونه بيمنع دموع عينه تنزل عشان لا تطيحين منها
حست مناهل بتوتر من كلام سعد بس فعلا كل كلمة قالها عن آسر صدق وحقيقة وآسر كفو ويستاهل
ابتسمت مناهل وقالت : ان فتح ابوي الموضوع معي يصير خير وفي شي اسمه استخارة وما رح يصير الا اللي كاتبه لي ربي
سعد : اعرفي انه مارح يصير الا اللي يرضيك وتدرين ان ابوي لو وش مايصير مارح يوافق الا بعد موافقتك انتي
مناهل : ان شاء الله
سعد : انا معك بكل شي و موجود جمبك وقت تبيني انا حاضر انا سندك واخوك تعزوي فيني واحتزمي بي واي شي تبينه ( اشر على عيونه ) من العين ذي قبل العين ذي
باسته بخده وقالت : عساني ما انحرم منك يارب
سعد : بقولك شي
مناهل : وش ؟
سعد : انا متزوج
عقدت حواجبها باستغراب وقال : انا متزوج ومحد يدري الا ابوي وفهد وسعود حتى امي و نواهل مايدرون
مناهل : وش حادك تتزوج بالسر ؟ واهل البنت ؟
سعد : ام البنت تكرهني والبنت تبيني وابيها وش نسوي ؟
مناهل : مو مبرر يا سعدد تقوم تتزوج بالسر
سعد : اهدي طيب شفيك انفعلتي ابوها واخوها يدرون وهم اللي قالولنا نتزوج بالسر من ورا امها
مناهل : مافي اب يرضى هالشي لبنته
سعد : بس مايرضون يشوفون بنتهم تتزوج احد هي ماتبيه
مناهل : مين ؟
سعد : فاطمة
مناهل : نعمممم ؟؟؟؟؟
سعد : وش ؟
مناهل : فاطمة ماغيرها اخت قصي ؟؟
سعد : ايوه
مناهل : يارب وش ذا
دخل سعود بسرعة وهو يلهث : سريع سريعع المستشفى بسرعة
فزو سعد و مناهل بخوف
سعد : وش فيك ؟؟
سعود : نواهل ولدتت
قامت مناهل ولبست عبايتها وطيران للمستشفى
●
●
●
في المستشفى
كان صقر رايح جاي رايح جاي حاس رؤوسهم كلهم
ام صقر : اقعد يا وليدي اقعد
ذياب : اشغلتنا اجلس
صقر : تخيلو يموتون
ابو صقر : لا حول ولا قوة الا بالله
طلع الدكتور وهو يمسح جبينه وقال : مبروك ما جاكم ويتربى بعزكم
صقر : كلهم بخير ؟
الدكتور : اي كلهم وين الزوج ؟
صقر : انا الله يحفظك
الدكتور : جاك ولد
ابتسم صقر وهو يسلم على ابوه ونزلت دموعه غصب عنه
ابو صقر : مبروك ما جاك
الليث : يتربى بعزك ياخوي
ذيب : سمه علي سمه علي
ذياب : اقول انثبر بس
وصل ابو فهد و عياله
ابو فهد : بنتي فيها شي ؟
قرب ابو فهد منه وباسه بيده وجبينه وقال : مبروك ياعمي جاك الحفيد جاك ولد نواهل
حضنه ابو فهد وقال : مبروك ما جاك و يتربى بعزكم يارب
فهد : نبي نشوفه
الدكتور : ساعة كذا وتشوفونه على بال تصحصح المريضة
كانت عيون الليث على مناهل وهي تتجنب نظره اما آسر كان مركز على نظرات الليث لمناهل وماحب اخوانها يشوفونه عشان مايفرشونه
آسر : اقول ليث امش نشتري مويا لهم توترو شوي
مسك الليث وسحبه لين الاصنصير : تبي تنكب نفسك انت غبي تطالعها كذا والله لو لمحوك اخوانها رحت فيها
الليث : خطبتها ؟
سكت آسر وقال الليث : قول اخلص
آسر : تهاوشو سعد و سعود
الليث : ليش ؟
آسر : فهد و سعود مايبونها توافق وسعد قال اني كفو وتهاوشو
الليث : ياخي مشكلة قسم بالله يعني سعود وفهد بيفرون مخها وبيخلونها ترفضك
آسر : يصير خير ان شاء الله امش
طلعو وراحو يشترون مويا ورجعو عند الاهل و نقلو نواهل للغرفة ودخلو عندها
لين : نبي الولدد الولدد
سعود : استني طيب
لين : ابي اشوفه
دخلت الممرضة ومعها الطفل
ذيب : العبب يالورع البطل
اخذه صقر وضحك : يا صغره صغرااااه يجنن
راح لنواهل وقرب منها : شوفي كيف صغير يجنن
نواهل : ايه ، شوف القهر يشبهك
ضحك صقر وقال : شدعوه عليتس
ضحكت نواهل وقالت : امزح امزح
سعود : جيبه بشوفه
اخذته مناهل وباسته برأسه : بسم الله عليك الله يحفظك ويجعلك قرة عين لنا كلنا يا رب
نزلت دموع نواهل وحضنت مناهل وقعدو يصيحون وقامو كلهم يصيحون معهم و آسر كاتم ضحكته
فجر : ليث سكتهمم سكتهمم
ضحك الليث وقال : خليهم كذا يعبرون عن سعادتهم ترا
مسحت فجر دموعها وبعدو مناهل و نواهل عن بعض
نواهل : سميه انتي
مناهل : انتي اللي تعبانة فيه مو انا سميه انتي
نواهل : انا ابيك انتي اللي تسمينه
زمت شفايفها وقالت : امممم احس زياد ؟ زياد بن صقر ال فيصل
نواهل : صقر تم صح ؟
صقر : ايه يا ام زياد
ابو صقر : جيبه نأذن في اذنه
اخذه ابو صقر واذن في اذنه وبعدها رجعو كلهم لبيوتهم الا صقر أصر انه يكون مرافقها