لو قلت لقلبي توب عيني تكذبني

الجزء الثالث عشر

دقت مرام على الهنوف وقالت : نفنفة
الهنوف : هلا
مرام : منقهرة حيل
الهنوف : سلامات وش صاير
مرام : مدري
الهنوف : تمام شويات واجيك
مرام : لاتجين انا اجيك
الهنوف : تمام انتظرك
طلعت مرام تجهزت واستأذنت من ابوها وامها وطلعت لبيت ابو نايف
الهنوف : حياك الله تعالي
دخلت مرام وقالت : نجلس بالحوش ؟ منكتمة ابي هواء
الهنوف : ابد ابد منتي عاجبتني دقايق اجيب شي ناكله ونشربه واجيك
مرام : لاتطولين
الهنوف : اوك
طلعت الهنوف ورجعت مرام ظهرها لظهر الكرسي وهي تنثر شعرها
مرام : وش سويت يوم انك قلبت حالي لهالدرجة بس عشانك صديت ؟ ليه تغيرت معي كذا حتى نظرة بالغلط ماتطالعني كأني مب موجودة ؟ اصلا انا ليه منقهرة ومهتمة ؟ ليه ما انقهر يوم يطنشوني نواف وماجد ومجد وامجد وفهد وسعد وسعود ؟ شمعنى انت يوم صديت انا تضايقت ؟ يمكن عشان تعودت عليه وماتعودت على صده ؟ ياربب بسس
رجعت الهنوف وهي تصب لها قهوة وتطالع وجهها اللي واضح الضيقة فيه
الهنوف : ماودك تنطقين ؟
مرام : وش اقول ؟
الهنوف : اللي مضيق خلقك
كان واقف قريب منهم ويسمعهم من غير لاينتبهون عليه وهو متعمد يوقف قريب منهم من يوم سمع من خواته يقولون انها بتجي قرر يسمع سبب جيتها المفاجئ
مرام : الهنوف ياخي وش الفرق بين نايف و نواف ؟
الهنوف : وش ذا السؤال
مرام : مدري
الهنوف : وش الفرق بينهم من الناحية الشخصية والناحية الاجتماعية
حطت الهنوف رجل ع رجل واستندت على ظهر الكرسي وقالت : ماني فاهمة عليك ابدا
تنهدت مرام وقالت : طيب سوي سكب للسؤال ذا وبسألك سؤال ثاني
الهنوف : اتركي الاسألة وقولي وش مضايقك على طول
مرام : جاوبيني اول
الهنوف : تمام اخلصي
مرام : الحين يوم تتعودين على اشخاص دايم مزوحين وخفيفين دم و ونيسين و وسيعين صدر ودايم يسولفون معك براحة وتطقطقون على بعض وتتهاوشون مع بعض
النهوف : ايوه
مرام : وكلهم يتغيرون عليك وماتهتمين عادي
الهنوف : ايوه
مرام : بس واحد فيهم يوم تغير عليك وصار يصد عنك ويحاول قد مايقدر مايطالعك حتى لو بالغلط يوم تغير هو الوحيد تحسين بنقص يعني كلهم مافرق تغيرهم معك بس هو فرق بالنسبة لك يوم تغير مع ان كلهم تغيرو غصب عنهم بسبب اشغالهم وهو تغير بدون سبب
الهنوف : يعني تحبينه
مرام : وشو ؟ احبه شلون يعني اعتبره اخوي
الهنوف : طيب كلهم تعتبرينهم اخوانك ؟
مرام : ايه
الهنوف : ويوم بعدو عنك بسبب ظروفهم مافرق معك شمعنى هذا فرق
مرام : مدري
الهنوف : انتي تحبينه وماكنتي تدرين بذا الشي وظهر حبك له بعد ما صد عنك بس الغريب بالموضوع ليه صد
نزلت دمعة مرام وانصدمت الهنوف : تستهبلين ؟ تبكين عشان واحد صد ؟ بالطقاق يابنتي الله ياخذه
مرام : لالا لاتدعين عليه انتبهي لا
الهنوف : طيب لاتبكين عشانه يصد مايصد بكيفه
مرام : تخيلي يحب وحدة ثانية
الهنوف : هو الخسران بالله يتركك انتي الجمال والدلع والاناقة ويروح لوحدة ثانية
مرام : يمكن تكون احلى مني
الهنوف : لاتهزين ثقتك بنفسك ابدد عشان واحد مايستاهل انا بقوم اجدد الشاهي وارجعلك وانتهي هدي عمرك شوي
هزت رأسها بمعنى " تمام " ودخلت الهنوف وسرعان ماحست مرام بيد تمسك معصم يدها
مرام : وشو ؟
نايف : قومي بكلمك بسرعة
مرام : الهنوف تجي الحين
نايف : قوميي
مرام : وخر مابي
نايف بحدة : مرااامم
وقفت ودموعها متجمعة بمحاجرها : تكفى وخر
شد على يدها عشان تنزل دموعها وفعلا نزلت دموعها ومسحها بحنية وقال : امشي معي تكفين
مسك يدها واخذها لورا البيت وحاصرها بين يدينه وصار محاوطها من الجهتين
مرام : وش قاعد تسوي انت ؟
نايف : مين اللي تقصدينه بكلامك مع الهنوف
صدت عنه وهي تحاول قد ماتقدر ماتضعف قدامه : محد
مسك فكها وهو يلف وجهها وتلاقت عيونهم : مين ؟
مرام : نايف محد محد
حاوطها من خصرها لين صار صدره لاصق بصدرها
مرام : نااايييفف
نايف : ماتروحين لين تقولين مين تقصدين ؟
شدت على ثوبه وهي تدفن وجهها بصدره وهي تبكي وقالت : ليه تبعد عني ؟ ليه تصد عني بعد ماعودتني عليك
ابتسم وهو يشدها لحضنه ويمسح شعرها وقال : اهدي شوي
مرام : اشتقتلك والله
ابتسم وهو يجلس وهي جلست متوسطه ركبه
نايف : تذكرين اللي صار بيننا بخطوبة مناهل والليث
هزت راسها بمعنى " ايه " وقال : يوم قلتيلي انك حسبة خواتي ماحبيت اقرب منك وانتي تعتبريني اخوك بس
رفعت راسها وهي تطالع عيونه : وش تبيني اقول وقتها ؟
سرح بجمالها وتفاصيل وجهها الناعمة والهادئة وقال : احبك
ابتسمت وهي تلمس وجهه بكفوفها : حتى انا
نايف : انتي وش ؟
مرام : احبك
عض شفته وهو يقربها لحضنه وقال : وانا والله اموت فيك وفي اللي جابوك
مرام : تمام الهنوف راح صوتها وهي تناديني
نايف : تمام
طبع بوسة على خدها ضحكت وقامت وراحت لالهنوف
الهنوف : وينك فيه ؟
مرام : موجودة
الهنوف : لي سنة انادي صوتي راح الله يروّح ابليس
كانت ابتسامة مرام عريضة حيل شاقة وجهها شق
الهنوف : تركتك تبكين رجعت و وجههك بينشق بشويش عليك
مرام : اوووه يا الهنوف اووه
الهنوف : الله يعين منك بس الله يعين
وصلت رسالة لجوال مرام " مارح اطول بالموضوع حيل بكلم ابوي ونجيكم على طول "
ضحكت مرام وقالت الهنوف : شفيك
مرام : حتجوز
شهقت الهنوف : نعمم ؟ وش حالفين تتزوجون مرا وحدة
مرام : شتبين ؟
الهنوف : وش اللي بتتزوجين ؟
مرام : امزح علامش يلا باي باي بيبي
طلعت مرام وتاركة الهنوف وعلامات استفهام مرسومة على وجهها ودخل نايف : نفنفة
الهنوف : سم
نايف : ابوي وامي كلهم داخل ؟
الهنوف : ايوه
نايف : تمام تعالي
حاوطها من كتفها ودخلو داخل وجلسو ساكتين ومركزين على توتر نايف
نايف : اححم
ابو نايف : اخلص قل وش عندك قروشتنا
نايف : يبه تدري ان عمري 27
ابو نايف : ايوه ؟
نايف : وانا الحمدلله يعني طيّار يعني وظيفة وخير وحلال فيه
ابو نايف : الزبدة
نايف : وانت حاط لي انا و نواف جناح لكل واحد فينا ان تزوجنا
ابو نايف : ايه
نايف : ودي اخطب
فزو البنات وقالت ام نايف : صادق ؟
نايف : ايه
قامت ام نايف تزغرط والبنات يصفقون ويغنون
نواف : انتظرني طيب
نايف : تقلع انت
ام نايف : بخطبلك وحدة جمال وكمال ودلال وبنت حسب ونسب و اصل وفصل وخير ونعمة
حك رقبته بتوتر وقال : يمه الصدق هي موجودة
ابو نايف : منهي ؟
ابتسم نايف وقال : مرام بنت خالي ثنيان
ابو نايف : والله انك عرفت تختار وابشر بها
نايف : من بعد موافقتكم طبعا
ابو نايف : انا موافق
ام نايف : وانا موافقة
نايف : وانتو شرايكم ؟
نواف : اذا تبيها خذها
نوف : والله من ورانا حركات بركات بس اهنيك تصلحلك
ريوف : لايقين على بعض حيل
الهنوف : كانت تقصدك يعني ؟
نايف : ايه ، متى نروح نخطب ؟
ام نايف : ثنيان مسافر الطايف اليوم وبيرجع بعد يومين لا رجع نروح لهم
نايف : زين وعجّلي تكفين
ام نايف : مب طايرة لا تخاف
ابتسم نايف وقال : ماندري يا يمه يمكن تطير
ضحكت الهنوف وقالت : ماتطير ماتطير
ضحك نايف وقال : ان شاء الله
●
●
●
في بيت ابو فهد
سعود : فهدهد
فهد : نعم
سعود : الحين يوم تخق على وحدة شلون تسوي
ضحك فهد لأن اعجبه الموضوع وتربع قدام سعود
فهد : والله كان ودي اسألك كمان
سعود : ليه انت خاق
فهد : وحيل بعد وانت ؟
سعود : لو ماكنت خاق ما سألتك
فهد : مين ؟
سعود : انت قل اول
فهد : انا الكبير
سعود : حجرة ورقة مقص
فهد : تمام
سعود وفهد : حجرة ورقة مقص
سعود : انا حجرة
فهد : انا مقص
سعود : يلا قل
فهد : اخت الليث
انصدم سعود وقال : لين ؟؟
فهد : ليه انت عينك على لين ؟
سعود : خاق على لين ؟
فهد : لالا
سعود : اجل ؟
فهد : اختها الكبيرة كيان وانت ؟
سعود : لين
فهد : يا ال فيصل
ضحكو سعود و فهد وقال سعود : الليث جايب مناهل لين جايبتني كيان جايبتك
ضحك فهد وقال : لا والله مانخليهم الطرف الثقيل
سعود : صح عليك تفهم والله نصير احنا الثقيلين
جلست مناهل جمبهم وقالولها السالفة والمخطط
مناهل : تم
دق الليث وقال فهد : لو ذكرنا مليون ابرك
سعود : عمره طويل ذا
ضحكت مناهل وقالت : ارد ؟
فهد : اي ردي بس الاسلوب خليه ثقل
مناهل : ابشرو
سعود : ردي جمبنا تكفين
مناهل : والله لو تموت
فهد : تعالي عشان مايزل لسانك
ضحكت مناهل وردت وحطت سبيكر
الليث : سنة عشان تردين ؟
مناهل : اصبعي اللي ارد فيه انكسر وجالسة ارد عليك بأصبع ثانية والموضوع صعب شوي
ضحك الليث وقال بتمثيل للصدمة : احلفيي
مناهل : ايه
الليث : شلونتس ؟
مناهل : طيبة
الليث : الحمدلله انا طيب
كتمو فهد وسعود ضحكتهم وقالت مناهل : جعله دوم
الليث : تدومين لاحبابتس
مناهل : مشكور وياك
الليث : الرسمية التبن ذي من وين جايبتها ؟
مناهل : مشغولة وقاعدة احاول ارد بسرعة بسرعة عشان اقفل
الليث بملل : ليه شعندتس ؟ تحلين امور الدولة ولا تحررين القدس
مناهل : لا ذا ولا ذا
الليث : مناهل يا بابا وش فيه ؟
مناهل : ولا شي وش فيه ؟
الليث : مناهل ترا انرفع ضغطي
مناهل : ليه وش قايلة انا
الليث بحدة : مناااهللل
مناهل : وشوو
الليث : الحين كذا ثقيلة ؟ والله انا العن
قفل الليث وضحكت مناهل واخوانها ضحكو وقال فهد : امشي كذا
مناهل : انثبرو تخربون علاقتي معه
●
●
●
تسريع احداث
آخر يوم في شعبان الساعة 3 مساءً
كانت اريج تسوي سلطة الخضار والسلطة الحارة ولين تجهز السفرة والملاعق و الصحون والمويا والعصير و كيان وامها يسوون السحور ويتساعدون فيه اما ابو صقر وصقر وآسر والليث وذيب وذياب كانو جالسين يقرأون قرآن
بعد ما جهز السحور حطوه على السفرة وجلسو وقبل ما يبدأون دعو ادعية وتسحرو
●
●
●
في بيت ابو فهد
كان البيت يملأه صوت القرآن و العيال جالسين يرتبون زينة رمضان وابو فهد يشرف عليهم ومناهل ونواهل بالمطبخ يجهزون السحور وامهم تشرف عليهم
ابو فهد : يا بهيمة ارفعها فوق فوق تخليها كذا طايحة صاحي انت ؟
سعود : طيب يا هادي اهدأ لايطق فيك عرق مب ناقصين احزان حنا برمضان
ماحس سعود الا على النعال اللي يتوسط جبهته : الله يسامحك يا يبه
انفجرو سعد وفهد ضحك عليه
سعد : سلمت يدك يا ابوي
طلعو البنات بعد ماخلصو السحور وجلسو يتسحرون مع السواليف البسيطة
ابو فهد : كل يوم بيكون اخوي وخواتي يجون يفطرون عندنا تمام ؟ بيجون قبل المغرب بساعتين عاد انتم الحريم بقروب كل يوم وحدة تسوي طبخة ويجيبونها
ام فهد : ان شاء الله وحياهم الله
بعد السحور مرت 10 دقايق وأذن الفجر وراحو ابو فهد وعياله للمسجد وصلو وكذلك البنات وامهم وبعد الصلاة جلسو يقرأون قرآن لين الساعة 7 صلو الضحى ونامو
●
●
●
الساعة 4 العصر في بيت ابو مرام
ابو مرام : وش سويتو ؟
ام مرام : خلية النحل
مرام : انا سويت اصابع جبن
هيام : انا سويت حلا بالشعرية
وئام : وانا سويت فطاير بالتونة
رهام : انا سويت كيك
ابو مرام : وجاهزين لابسين خلاص ؟
ام مرام : اي خلاص جاهزين
ابو مرام : يلا توكلنا على الله
●
●
●
في بيت ابو نايف
ابو نايف : هالله هالله بتبييض الوجهه ابي تسوون شي سنع
ام نايف : ماعليك سويت هذيك المكرونة باشميل تاكل الصحن وراها
الهنوف : وانا سويت فطاير بالجبن والزعتر
نوف و ريوف : احنا سوينا حلا
ابو نايف : تمام يلا
●
●
●
في بيت ابو ماجد
ابو ماجد : سويتي طبختين ؟
ام ماجد : اي سويت شوربة لحم
ماجد : انا سويت الطبخة الثانية
مجد : ياخي انت طباخ فنان تعجبني
امجد : وش سويت ؟
ماجد : شورما
مجد : احح
ماجد : لاحقين يلا
●
●
●
في بيت ابو فهد وصلو كلهم وطلعو البنات يفرشون السفرة بالحوش ويجهزون العشاء وجلسو على السفرة كلهم كبيرهم وصغيرهم حريم ورجال ينتظرون الاذان
اذن المغرب واتفقو كلهم على نفس الدعاء
" ذهب الظما وابتلت العروق وثبت الاجر ان شاء الله "
بدأو يفطرون مع السواليف والضحك والمدح للأكل والهواش بين العيال وبعد الفطور قامو يصلون وجلسو العيال والرجال والحريم بالمجلس والبنات بالمطبخ ينظفون ويسولفون وخلصو بعد صلاة العشاء وتوجهو للمسجد عشان صلاة التراويح
●
●
●
تسريع احداث للمرة الثانية...آخر يوم رمضان
ياسر : تعبانة حيل ؟
بدور : بس ظهري يوجعني بينكسرر خلاص
ياسر : دخلتي الرابع ؟
بدور : ياسر حبيبي يخلص رمضان ادخل الخامس
ياسر : احلفي ؟ احسب توتس بالرابع
بدور : متى دريت عني انت اصلا
بكت بدور وياسر يطالعها بصدمة وتدارك الوضع وقرب منها
ياسر : بدور ياعيوني وش تقولين ؟
بدور : وخر عن وجهي
ياسر : بدوورر ذي نفسية الحمل من يوم حملتي وانتي كذا ياحبي لعد تحملين يلعن ابو الضنا اذا بيخليتس كذا
بدور : يعني ماتبي ضنا مني ؟
ياسر : ماقلت كذا قص الله لساني اذا قلت كذا
بدور : انت متغير الله اعلم اذا تخوني ولا لا
ضحك ياسر وقال : ما اخونتس والله
بدور : ليه تضحك اذا ماتخون
ياسر : اضحك لاني احبتس يلا قومي بنروح لبيت عمي ابو صقر يلا
بدور : ايه احسن اطالع وجيههم شوي ابرك منك
ضحك ياسر وهو يأخذ عبايتها ويلبسها ويعدل نقابها ونزلو
●
●
●
في بيت ابو فهد كانو كلهم متواجدين وينتظرون اذان المغرب الا مناهل ونواهل كانو بغرفتهم
مناهل : تخيلي دق لابوي قاله الملكة ثالث يوم العيد واحنا متفقين الملكة بعد العيد بشهر بس المشكلة مب هنا المشكلة انه حاط الفترة بين الملكة والزواج 3 شهور وانا كنت ابيها 5 شهور كان طول الوقت يسلك لي وآخر شي راح يقنع ابوي انه يبي يعجل الزواج
نواهل : لاتلومينه خرفنتي الرجال
مناهل : تمام مانختلف بس متغير حيييل تخيلي شفتي آخر يوم اختبارات
نواهل : ايوه
مناهل : قالي فهد انه خاق على كيان وسعود على لين وقالو نبي نصير حنا الطرف الثقيل وسحبوني خلوني اكلم ليث جمبهم غصب عني تخيلي وقالولي اثقلي واضطريت اكلمه بثقل لانهم جمبي وهو زعل ويوم قمت رحت غرفتي عشان اراضيه دقيت عليه مارضى يرد من هذاك اليوم لين الحين وهو مايدق ولا يرسل رسالة واذا راسلته انا يرد على قدر سؤالي ويروح نواهل والله من بعد ما صارت سالفة فطيم بالمول وهو صاير حساس يبي يبعد بس شهرين مو معطيني وجه
نواهل : عادي عامليه بالمثل وانتهى الموضوع
مناهل : اخاف
نواهل : مناهل اللي مايبينا مانبيه ولا نفكر فيه كرامتك تدعس على قلبك تسمعين ؟
هزت رأسها بمعنى " ايه " ونزلو بعد ما سمعو الاذآن وفطرو ونظفو كل شي وراحو للمسجد باستثناء مناهل لأن ماعليها صلاة
●
●
●
في بيت ابو صقر كان تعبان وماراح معهم للمسجد وكانت اخته كيان معه عشان لو احتاج شي تكون حوله
كيان : ليث
الليث : همم
كيان : وش فيك ؟
الليث : ولا شي ليه ؟
كيان : مدري احس فيك شي ؟
سحب يدها وهو يحطها على جبينه
كيان : احح تحرق عمى ليه ماتتكلم
الليث : والله جسمي متكسر فيني خمول مافيني شدة اسوي شي والله كان بخاطري اروح اصلي معهم لأن اليوم آخر يوم رمضان لكن الشكوى لله
كيان : عادي عادي انا بقوم اجيبلك علاج
الليث : تمام
قامت كيان وجابت له علاج للحرارة ورجعت
كيان : امسك
الليث : لا يا كيان الله يخليتس طعمه يسد النفس جيبي هذاك اللي بالفراولة
كيان : بزر انت اقول قفل خشمك واشرب
قفل خشمه وشرب العلاج بسرعة والمويا بعده
الليث : طعمه خايس
كيان : زيك
انسدح الليث على رجل كيان واخذت كيان جوالها وشافت مناهل اونلاين ودقت عليها كام
كيان : هلا مناهل
ركز الليث على اسمها وسوا نفسه نايم
مناهل : هلا فيك شلونك
كيان : تمام الحمدلله وانتي
مناهل : والله طيبة عمي وخالتي طيبين ؟
كيان : الحمدلله
مناهل : واخوانك واريج ولين
كيان : قولي شخباره ليث وبس
ابتسم الليث بخفوت وضحكت مناهل
كيان : والله ليث تعبان حيل
مناهل اممم الله يشفيه
استغربو كيان والليث " الله يشفيه " بس ؟ ماتقول وش فيه وش تعبه لكن اظهرت اللامبالاة وعدم الاهتمام وكأنه اخر اهتماماتها
كيان : وانتي شعندتس مارحتي الصلاة ؟
مناهل : فيني حرارة وراسي مصدع
كيان : وش ذا الحب اللي يجيتس يجي ليث
مناهل بغباء : ليه ليث فيه الدورة ؟
سحب الليث المخدة وهو يحطها بوجهه ويكتم ضحكته وكيان انفجرت ضحك
مناهل : انلخمت الله لا ياخذك
ضحكت كيان وقالت : أثرت فيتس حيل شكلها
مناهل : والله راسي بينفجر وحالتي حالة
كيان : المهم بتجون بكرا الصباح ؟
مناهل : لا اعمامي جاين عندنا دايم اعمامي يجون صباح العيد
كيان : ابوي مكلم ابوتس واهلتس كلهم يجونا
مناهل : يمكن بيقول لنا بعد مايرجعون من الصلاة
كيان : بتجين معهم ؟
مناهل : لا
كيان : احلفي ؟ ليه ؟
مناهل : والله مقدر متكسرة تكسير ومافيني الشدة اجي
كيان : عيب عليتس والله ابوي عازمكم عشانتس
مناهل : معليتس بقول لأبوي يرد العزيمة بعد صلاة العشاء ونعوض
كيان : تمام
مناهل : يلا انا بقوم انظف تبين شي ؟
كيان : سلامتتس
مناهل : باي
كيان : باي
كان الليث ساكت وهو متأكد مليون بالمية انها رح تجي وهذا مجرد كلام ومستحيل ماتجي متأكد حيل انها رح تجي و أول الناس بعد
كيان : ياحلوها تهبل والله يحظك فيها
الليث : مشكورة
كيان : بس مب عاجبتني نبرة صوتها يوم جبت طاريك متهاوشين انتو ؟
الليث : لا مب متهاوشين
كيان : ليث نصيحة مني لك لاتخلي فاطمة تدخل بينكم من بعد هذيك السالفة وحالكم ابد مب عاجبني
الليث : مافي شي يا كيان
كيان : تمام انا بقوم اجهز اغراضي للصبح تبي شي ؟
الليث : لا بقوم انام
●
●
●
في بيت ابو فهد
قامت مناهل ونظفت البيت ومسحته وبخرته لين صار يلق لق وسوت اصناف كثير من الحلا والكيك والفطاير و الكعك وجهزت التمر وحلويات العيد صار كل شي جاهز
ابتسمت وهي تفكر بفعالية جديدة للعيد من يومها متعودة تسويلهم كلهم فعاليات للعيد حتى لو هم كبار وهالمرة لازم فعالية أكبر لأن عدد عائلتهم صار اكبر بانضمام ال فيصل لعائلتهم وصارو عائلة وحدة
مناهل : وش اسوي ؟ جت ببالي فكرة بس كيف نصرف الشياب ؟ ابتسمت وقالت : خلاص تمت الفعالية
الفعالية كانت انها تستأجر شاليه ثاني العيد وتخبي ظروف فيها مبالغ مختلفة بأماكن صعبة واللي يحصل الظرف ياخذ المبلغ اللي فيه
مناهل : ناقصني الظروف والشاليه
دقت على مالك ورد عليها : هلا مناهل
مناهل : فاضي ولا مشغول ؟
مالك : لا فاضي آمريني
مناهل : ابيك تجيني الحين
مالك : ابشري
ربع ساعة و وصل مالك وطلعت للمكتبة واشترت 500 ظرف وراحت تستأجر شاليه دايم تتعامل معه اذا في مناسبة وبعد ما استأجرت الشاليه رجعت البيت وهي تجهز المبالغ بالظروف وأقل مبلغ كان 5 ريال واكثر مبلغ كان 1000 ريال ماتزيد ابد
بعد الصلاة رجعو اهلها للبيت
ابو فهد : ابو صقر عازمنا الصباح بعد صلاة العيد ابي كلكم تكونون متواجدين تسمعون ؟
مناهل : يبه انا والله مقدر اروح معكم تعبانة حيل والله
ابو فهد : عيب يا بنيتي احنا صرنا عائلة وحدة من بعد الله ثم انتي وليث يعني هالعزيمة لتس
مناهل : ماعليك يبه بعتذر منهم لاتشيل هم وتعويض لهم نعزمهم عندنا العشاء
ابو فهد : اللي تشوفينه
●
●
●
اول يوم عيد الساعة 5:00 صباحاً
في بيت ابو فهد
قامو العيال تروشو وصلو الفجر ولبسو وتعطرو وتبخرو و وصلو اهل ابو ماجد واهل ابو نايف واهل ابو مرام وراحو الرجال للمسجد عشان صلاة العيد والبنات جلسو بالبيت يتجهزون
الهنوف : الصدق يعني مناهل ذي ابد مالها داعي يعني صدق عيب ماتجي
وئام : طيب يقولون تعبانة ماتفهمين ؟
نواهل : والله اللي ودها تسويه
الهنوف : ابلعي تراب انتي المهم هي وينها ؟
نواهل : فوق نايمة نومة اهل الكهف
خلصو البنات شعورهم ومكياجهم ولبسو وتعطرو و وصلو الرجال وحركو لبيت ابو صقر
●
●
●
في بيت ابو صقر بعد مارجعو الرجال والعيال جلسو بالمجلس والبنات والحريم يتجهزون وينظفون ويبخرون البيت لين وصلو اهل ابو فهد
ام سلمان : حياكم الله اسفرت وانورت
ام مرام : الله يحييك ويبقيك وكل عام وانتو بخير
ام بدر : وانتي بخير وصحة وسلامة حياكم الله ادخلو
دخلو الحريم والبنات المجلس عند الرجال وهم متغطيات .
لاحظ ابو صقر نظرات الليث اللي كانت تدور على مناهل كان متأكد انها رح تجي وبالاخير طلع كلامها صدق و ماجت وماحب الليث يكون خفيف حيل ويسأل عنها مع انه من حقه لكن ابو صقر برد قلبه وقال : اقول يا ابو فهد
ابو فهد : سم
ابو صقر : سم الله عدوينك مناهل وشوله ماجت
وقف سعود وباس جبين ابو صقر ونواهل وقفت وباست جبين ام صقر
سعود : مناهل موصيتنا نبوسكم ونعتذر منكم لأنها ماجت وتقولكم كل عام وانتم بخير
ابتسم ابو صقر وقال : سلمت يدين من رباكم وهذا العشم فيها
ابتسم الليث مايدري ليه حس بالفخر من يوم طالعوه كلهم شعور حلو انها مانست اهله واعتذرت منهم
ابو صقر : لكن هي وش فيها ؟
فهد : تعبانة شوي
ابو صقر : ماتشوف شر وان شاء الله نشوفها ثالث العيد بالملكة
ابو فهد : وشوله ثالث العيد انا عازمكم اليوم بعد صلاة العشاء عندي ولاتردوني
ابو صقر : ابشر واعتبرنا جينا
قامو الحريم والبنات ودخلو داخل وانفردو الرجال والعيال لحالهم
ام قصي : لو انه من الادب والاحترام تجي حتى لو انها بالموت
ام سلمان : حليمة فكينا عاد
فاطمة : وامي صادقة
ام صقر : ايه وش آخر اخباركم
ام ماجد : والله الحمدلله كل شي تمام انتم علومكم
ام صقر : كله تمام عال العال
عبير : لا يا ماما لااا لااااا لين قومي شيليها لابوها قروشت اهلي
لين : ابشري
اخذت لين نور من عبير وطلعت للحوش وضربت بظهره بالغلط
لين : عسى خشمك الكسر
لف وهو يضحك وقال : نشبة انتي تطلعين لي بكل مكان
لين : لاا لا تكفى اراقبك متى تطلع عشان اجي اصادفك خذ خذ
اخذ سعود لين واستفرغت عليه
سعود : لاااااا
انفجرت لين ضحك عليه : يا رباااه وش ذا
سعود : حرام عليك يا بزر والله حرام وش مسويلك انا كان استفرغتي بوجهه لين ، وكشختي طيب الله يقلعك
لين : جيبها ورح للمحلق وانا بجيبلك ثوب
سعود : بسرعة
لين : تمام
اخذت لين نور وهي تضحك ودخلتها لابوها وطلعت لغرفة ذيب تدور ثوب يجي على مقاس سعود