لو قلت لقلبي توب عيني تكذبني

الجزء السابع عشر

مناهل : ليث حبيبي شفيك ؟ يوجعك شي ؟
حط رأسه على رجلها وهي تخلل اصابعها بشعره وقالت : ليث ياعيوني تكلم لاتقعد كذا ساكت
الليث : اذا تكلمت يوجعني خليني ساكت
مناهل : تمام يابعد اهلي انت وش اللي يوجعك ؟
الليث : ضرسي الله ياخذه
مناهل : طيب خلاص قوم شوي ياعيني
قام الليث وهو يتربع وحط يده على خده
مناهل : من متى يوجعك ؟
الليث : من امس
مناهل : تمام انا بروح دقايق واجيك
الليث : لا خليك
مناهل : يا بابا اروح وارجع مابطول
الليث : تمام
طلعت مناهل و نص ساعة ورجعت وبيدها صينية
الليث : وش ذا
مناهل : لازم تأكل عشان تشرب العلاج
الليث : مقدر والله يوجعني حيل
ميّلت رأسها بطفولية وقالت : طيب مارح تاكل عشاني
ابتسم وقال : هاتي يلا
حطت الصينية على السرير وهي تأكله وبعدها عطته بنادول عشان يخف الالم
الليث : كذا يروح ؟
ضحكت مناهل وقالت : كأنك بزر ياحلوك بس
ضحك عليها وقال : مب وقتتس يروح الالم كذا ؟
اخذت صحن صغير كان بالصينية وفيه قرنفل مطحون
مناهل : حطه على ضرسك يتخدر ترا
ابتسم الليث وقال : مابي ضرسي يتخدر بس ابي اتخدر كلي تعالي بوسيني
ضحكت بصوت عالي وقالت : حتى وانت تعبان ؟؟
الليث : احبتس طيب وش اسوي اموت ؟
مناهل : لا تموت ابيك
اخذ القرنفل وهو يحطه على ضرسه وفعلاً خف الالم شوي : حركات وش دراتس انه يروح خابرتس طب بشري مالتس بالاسنان
مناهل : الحركة ذي كل خلق الله يعرفها انت مدري من وين طالع ماتعرف شي
الليث : ايوه اخبارتس
مناهل : صرفت سالفتي بس ماعليه ، انا طيبة الحمدلله وانت ؟
الليث : مثل ماتشوفين جيت عندتس صرت طيب
مناهل : جعله دوم
الليث : تدومين لليث و ابو اهل الليث
مناهل : طفشانة انا
الليث : نسوي تحدي شرأيتس كنت افكر بذا التحدي منزمان وجبت عودي معي
مناهل : ايوه
الليث : واللي يفوز له هدية واللي يخسر له عقاب
مناهل : يعني على الخاسر يدفع هدية ويسوي عقاب
الليث : ايه
مناهل : تم بس وش اللعبة ؟
الليث : جيبي عودتس
قامت مناهل وفتحت دولابها واخذت العود ورجعت تجلس قدام الليث
مناهل : ايوه
الليث : عندتس 5 الحان وعندي 5 الحان اذا دقيتي انتي وماعرفت انا وش الاغنية لتس نقطة
مناهل : تمام
الليث : يلا
بدأ الليث يعزف و مناهل تلحن بفمها معه وقالت : عيونك آخر امالي وليلي اطول من اليم
الليث : صح عليتس
ضحكت وقالت : يسسس
ابتسم الليث وقال : دورتس يلا
مناهل : تمام
ضمت عودها لصدرها وهي تعزف وهو يلحن معها بداخله وقال : ابتعد عني ما احبك وش تبي بي
ضحكت وهي قالت : صح عليك
ابتسم وقال : انا اقول عيونتس اخر امالي وهي تقول ابتعد عني وش ذا القسى يا بنت هادي
ضحكت مناهل وقالت : يلا يلاا
الليث : تمام لاتتحمسين حيل
بدأ يعزف اغنية هي تحبها حيل لكن ماعرفتها لحنتها مرة ومرتين وثلاث واخذت العود وهي تلحن زي لحنه لكن ما قدرت
مناهل : ليث وش ذا بالله جايب اللحن من المكان اللي خابره
ضحك الليث وقال : يباان الشووق في عين المعذب و تبقى الدمع تذكار الاحبة انا اتعب انا بالحيل اتعب ولا قالو تحبه قلت احبه
صارخت بحلطمة وقالت : لااااااا
الليث : اغنيتتس المفضلة ماتعرفين لحنها ؟ صاحية انتي
قالت بزعل : تمام يلا دوري
اخذت العود وهي تفكر بأغنية صعبة وبدأت تعزف
الليث : عرفتها بسيطة ، من بعد مزح ولعب اهو صار حبك صحيح اصبحت مغرم عيووون وامسيت وقلبي طريح
مناهل : اخسر اخسر اخسرررر
ضحك الليث وقال : ابي افوز مجهز لنفسي هدية حلوة
مناهل : نذل
الليث : لا يكثر انا لي نقطتين ولتس نقطة
مناهل : تمام يلا دورك
الليث : تمام
عزف وهو يشوف شفايفها تتحرك معناها انها عرفت الاغنية وغنى معها : وابتدت اول حكايتنا بمساء الخير لو ماشفتك في ذيك الليلة صدفة
مناهل : سهلة حيييل
الليث : تمام يلا
انتهو من اللعبة و فاز الليث ب ثلاث نقط و لمناهل نقطتين
مناهل : يلا قول وش تبي ؟
الليث : عندتس عقاب و جائزة
مناهل : تمام تمام اخلص قل وش تبي
الليث : اول شي ابدأ بالعقاب
مناهل : بس ارفق بي طيب ؟
ضحك وهو يرفع اكتافه بمعنى " مالي دخل "
مناهل : طيب اخلص
الليث : ابد قفلي عيونتس هذا عقابتس ولاتسوين اي شي
مناهل : بس ؟ اصير جماد ؟ ابشر
ضحك الليث من نيتها وقفلت عليها وسرعان ما قرب منها واستقرت شفايفه بشفايفها وابتعد عنها وهو يدفن وجهه بنحرها ويبوسها
مناهل بقلبها : الله ينفخ برطمك يارب
شافها تهتز عالصامت ورفع راسها وشافها تضحك : ما اقدر اقول انتس مبسوطة بس بقول انتس قاعدة تدعين علي من داخلتس
ضحكت مناهل وقالت : افتح ؟
الليث : لا
مناهل : ياخي بلا قلة حياا
ضحك الليث وهو يقرب منها ونفسه يلسع وجهها ودق قلبها بقوة وهو ملاحظ توترها وعاجبه
الليث : تدرين بشي
مناهل ببحة قالت : وشو ؟
الليث : انا مشتهي
قاطعته وقالت : اطبخلك بعدين
ضحك على الترقيعة السريعة وقال : مين قال اني مشتهي اكل ؟ انا مشتهي عصير عصير
مناهل : تمام بفتح عيوني عشان اقوم اسويلك
مسكها من كتفها وهو يرجعها لين ورا واعتلاها واخذ يدينها وهو يحاوطها برقبته
مناهل : الحين وش العقاب المخيس ذا ؟
الليث : عاجبني انا وحييييل خليتيني متحمل 4 سنوات وهذاني جالس اتحمل السنة الخامسة
حست مناهل انه بيسوي شي غلط وقالت : ليث خلاص وخر
الليث : ترا الجائزة اخس من كذا
فتحت عيونها بسرعة وهي تشوف وجهه قريب من وجهها والتقت عيونه بعيونها
الليث : يااااوجععع قلبك يا ليث
لفت وجهها لليمين وهي ودها تبكي من الاحراج ومسك فكها وهو يلفها له وقال : الحين دموعتس بتنزل ليه
مناهل : ابعد
باسها بخدها ورمى نفسه بحضنها وقالت : وش بقيت لبعد زواجنا ؟
ضحك الليث وهو يدفن وجهه بشعرها وقال : باقي ال اء اء
ضربته براسه بخفيف وقالت : استحي استحي قم انقلع
الليث : وجائزتي ؟
مناهل : انا اكبر جائزة بحياتك
الليث : بخطفك يوم كامل
مناهل : ابوي مارح يرضى
الليث : معليك
مناهل : مابيرضى
رفعت يدها وهي تلعب بشعره وقال : بدق عليه الحين وشوفي
سحب جواله وهو يدق على ابوها وقال بتخدر تام : هلا عمي
ابو فهد : علامه صوتك كذا ؟
الليث : نعسان والله عشان كذا
ابو فهد : وش تبي ؟
الليث : عمي عادي اخذ مناهل 24 ساعة وارجعها ؟
ابو فهد : لا
الليث : ليه ؟ تكفى ياعم
ابو فهد : وش تبي بها ؟
الليث : زوج بيطلع مع زوجته تكفى عاد ياعمي لاتردني
ابو فهد : لالالا
الليث : تكفى ياعم تهز رياجيل
ابو فهد : الله يهز راس العدو
ضحك الليث وقال : تردني ياعم وانا اطلبك ؟ بعدين وش المانع مب زوجتي هي ؟
ابو فهد : خذها الله لا ياخذكم
الليث : جعلني افداك ياخي
ابو فهد : ياخي ! خويك انا لاتخلني اغير كلامي
الليث : خلاص خلاص اسف بجي اخذها بعد صلاة الفجر
ابو فهد : لو ادري انك سويت شي غلط ياويلك مني
الليث : معليك مابسوي شي صابر 4 سنوات وعليها بصبر هالشهرين
ابو فهد : زين انقلع
الليث : يلا مع السلامة
قفل الليث وقال : ودي انام
مناهل : زين قم من علي ورح بيتكم نام
الليث : انا ما جاني النوم الا بحضنتس لو قمت طار
مناهل : قم لا افرشك قم
ضحك وهو يبعد عنها وقالت : يلا حبيبي باي باي
الليث : باي
طلع الليث وهي رمت نفسها بتعب وسرعان مادخلت عليها نواهل
نواهل : وش صار طالع الاخ منهلك
مناهل : سوينا تحدي وفاز صفقني وانتهينا
نواهل : صفقك صفقك ولا صفقك ؟
مناهل : كذا وكذا
ضحكت نواهل وهي تنسدح جمبها
●
●
●
في بيت ابو صقر كانت ترسل له بس مايرد عليها الا ولقته مبلكها
لين : زعل ؟ من حقه يزعل قايلة له اكرهك وش متوقعة يجلس يكلمني وهو زعلان ؟ بعدين على اي اساس يكلم وحدة تكرهه ! متاكدة يالين تكرهينه ولا تعشقينه ؟ اخذت المخدة وهي تدفن وجهها فيها وصرخت صرخة مكتومة ودخل آسر
آسر : علامتس ؟
رفعت رأسها و دموعها متجمعة بمحاجرها وهزت رأسها ب " لا "
آسر : علامتس تكلمي ؟
تغطت باللحاف ودخل آسر وهو يسكر الباب بهدوء وبعّد اللحاف عنها وقال : قومي حاكيني
جلست لين وهي تطالع يدينها وتشد عليها : وش مضيقتس ؟
لين : مافيني شي
زفر آسر بهدوء وقال : لازم اجبرتس ؟
لين : تعودت على وحدة من صديقاتي وكنا كل مانشوف بعض نتهاوش بمزح طبعاً بس انا كنت كل ما اشوفها اقول لها اكرهتس لين صدقتني وبلكتني
آسر : وانتي ليه تقولين لها اكرهتس ؟
لين بطفولية : احب احارشها
ضحك آسر غصب عنه وقال : خلي محارشاتتس تنفعتس
طالعته ونزلت دموعها وقالت : اي اضحك انت
مسح دموعها وقال : تعنّي وروحي لين بيتها واعتذري لها
لين : تقوله ؟
آسر : اي اقوله ونامي الحين يلا
لين : طيب
طبع بوسها بخدها وطلع وهي انصدمت اول مرا تشوفه بهالحنية والهدوء
لين : تجننننن يا حيوااااانن
●
●
●
في بيت ابو ياسر
كان جالس جمبها وهو يشوفها تاكل تفاحة ورا تفاحة
ياسر : هدي لا يطلع ولدي اخضر
طالعته وضحكت باستهزاء وقالت : ها ها ها ها ها دمك خفيف ما شاء الله شسم امك
ضحك ياسر وقال : تراتس حرامتني منتس من يوم دريتي انتس حامل تظلميني كذا
بدور : اقول هذي آخر تفاحة بيدي رح جيب اكثر
ياسر : ياليل صاحب الفواكه بيقول اشوفك اكثر من نفسي
طالعته بدور بنظرة عشان تستعطفه وقالت : تتركه بخاطري
ضحك وهو يطبع بجبينها وخدها بوسة وقال : اخسي والله ربع ساعة بس واجيبلتس التفاح وشجرة تفاح ازرعها لتس بالحوش
ضحكت وهي تشوفه يطلع ويسكر الباب وراه وقالت : يا ناااس احبهه واحب اسمع هباليله
ضحكت وهي تأكل التفاحة ودخلت بعدها تتروش
●
●
●
عند العرسان الحلوين
كانت منسدحة على السرير بتعب وانسدح نايف جمبها وهو يحاوطها ويقربها لحضنه وصار ظهرها بصدره
نايف : نمتي ؟
مرام : لاا
نايف : بتنامين طيب ؟
مرام : لا والله بس كذا منسدحة اريّح جسمي
نايف : امم
مرام : انت بتنام ؟
نايف : اي والله فيني النوم
لفت له مرام وهي تلمس وجهه بيدينها الناعمة وهو مغمض عيونه
مسك يدها وهو يبوس باطنها وقال : سولفي لين انام
مرام : بزعجك
نايف : اطلق ازعاج
مرام : بكيفك بس انا نبّهتك يعني
نايف : قولي يلا
مرام : في واحد كان يحب وحدة من يوم وهو صغير
نايف : شسمه ؟
مرام : اسمه نايف
ضحك نايف وهو يشد بخصرها ويقربها لحضنه وقال : الوحدة شسمها ؟
مرام : اسمها مرام
نايف : حلو
مرام : كان هذا نايف يحب مرام حيل بس كان لعّاب
فتح عيونه وهو يناظرها وقال : صرت لعّاب ؟
ضربت رأسه بخفيف وقالت : انطم
كملت له القصة وهو ما نام كان دافن وجهه بشعرها ومستمتع بصوتها بس السالفة ساحب على ام امها
نايف : احبك
مرام : اعشقك والله
نايف : ياا ربااه ياكثر الحب بس
رفع راسه وهو يطالع عيونها وهي تلمع وقرب وهو يبوس رقبتها
●
●
●
اليوم الثاني الساعة 2:00 آخر الليل
قامت مناهل وتوضت وصلّت الوتر وجلست تقرأ قرآن لين اذن الفجر
صلت الفجر وقامت تتروش ونظفت غرفتها ولبست ونزلت تشوف ابوها كالعادة جالس بالصالة يقرأ قرآن
ابو فهد : بتطلعين ؟
مناهل : اذا تسمح اي
ابو فهد : روحي يا بنيتي اسودعتتس الله
مناهل : بسوي فطور واجيك
ابو فهد : زين
وصل الليث وطلع له ابو فهد : هلا وليدي
الليث : هلا ياعم صبحك الله بالخير
ابو فهد : صبحك الله بالنور
قرب ليث وهو يبوس جبين ابو فهد ويده
ابو فهد : شلونك
الليث : طيب الحمدلله انت شلونك
ابو فهد : نحمد الله ونشكره تعال نجلس برا لين تجي مناهل
جلس ابو فهد هو والليث بالحديقة قدام المسبح
طلعت مناهل وبيدها صينية ومانتبهت لوجود الليث
مناهل : ورب الكعبة يا هادي اكثر شي بتفقده بعد زواجي اكلي و وناستي و صوتي قسم بالله يا يبه محشوم يعني بس انك كنت غبي يوم زوجتني كنت حولك قمت تعطيني للحيوان ليث اللي مايقدرني
جاء الليث من وراها وقال : صرت حيوان وما اقدرتس
فزت وهي تشوفه ومسك الصينية قبل لاتطيح وضحك ابوها
الليث : كذا تتكلمين عن رجلتس قدام اهلتس ؟
مناهل : اقعد تسمم وانت ساكت
جلسو على الطاولة يفطرون بهدوء لين طلع سعود وهو يغني
سعود : يا عاذلين الهواء
قاطعه الليث وقال : حيا الله
سعود : ياليييييل نشبة انت صرت اشوفك اكثر من عمري يا ابن الحلال خلاص خذها وانقلعو بيتكم مب لازم زواج
الليث : جايز لي الوضع
ابو فهد : ابلعو تراب الاثنين
جلس سعود وهو يبوس مناهل عشان يقهر الليث وبالفعل حقق مراده
الليث : الله ينفخ برطمك
ضحك ابو فهد وقال الليث : عمي شف ورعك ذا يحتك بزوجتي
سعود : اقول على شحمة تلطمك اختي قبل لا تعرف وجهك
الليث : بفرشك هاه والشحمة ذي بلطمها بوجهك
طلعو سعد وفهد وجلسو جمبهم ونفس حركة سعود سووها وهم يبوسون مناهل وهي تضحك على وجهه الليث
الليث : جاكم الحب وتشققتو الله يشق ابليس
فهد : مريض ذا في احد يغار على زوجته من اخوانها ؟
سعد : بعدين ذي حبيبة البيت و ونيسته مايبدأ يومنا الا ببوسة منها جعلني فداش
مناهل : حبيبي
طلعو نواهل وامها وهم متحجبات بعد ما درو ان الليث موجود
الليث : صبحتس الله بالخير يا خالة
نواهل : في عالم جت بعد
ضحك الليث وقال : صبحتس الله بالخير
قامت مناهل واخذت الفطور بعد ماخلصو وجابت شاهي وجلسو يسولفون
ابو فهد : اقول ابو زايد
مناهل : وااه يبه وش زايده انا ولدي اسمه هادي
الليث : حبيبي اقضبي لسانتس
مناهل : مع ن ف س ك
الليث : حجرة ورقة مقص اللي يفوز هو اللي يسمي اللي يبي
جلسو يطالعون نقاشهم اللي يشوفه يقول نقاش اطفال مب متزوجين و كانو منصدمين مرا ويضحكون
مناهل : انا اللي بتعب وبتحمل 9 شهور مب انت
الليث : انا الاساس
سكتو كلهم وضحك الليث يوم حس انه جاب العيد وضحكو كلهم معه الا مناهل ونواهل منحرجات حيل
الليث : يلا قومي تجهزي
مناهل : الحين منجدك ؟ احسبك تستهبل
الليث : لا يا طوايف اهلي ما استهبل انا اللي فزت وهذي جائزتي وترا اذا ماسويتي الجائزة في عقاب
تذكرت اللي صار امس وفزت بسرعة وطاح الكرسي وهو انفجر ضحك عليها وكلهم مستغربين ورجعت وهي جاهزة
مناهل : شدعوه انا جاهزة اصلا
طالعت ابوها وقالت : يبه ارفض وخلني اجلس
مسكها الليث وهو يشيلها من خصرها وارتفعت رجولها وقال الليث : ودعناكم الله
ضحكو عليهم وقال ابو فهد : ماني ندمان ابد اني وافقت تتزوجه
ام فهد : اي الله يجمع بينهم بالخير دايم ولا يفرق بينهم ابد
نواهل : ي ج ن ن و ن
سعود : منجد ابي زوجة زي مناهل
سعد : لا صرت زي الليث يصير خير
سعود : كل هوا بس انا سعود ولد هادي
اخذ ابو فهد بيالة الشاهي وهو يقربها من شفايفه وقال : والتبن
ضحكو كلهم من ردة فعله وقال : الله يسلمك مشكور وماعليك زود
●
●
●
عند مرام ونايف طلعو وهم يودعونهم اهلهم
نايف : شهر وراجعين لكم ان شاء الله
مسحت ريوف دموعها وقالت : لا تطولون
حضنها نايف وقال : ما بغترب برجع
ابتسمت مرام وهي تسلم عليهم وطلعو للمطار
مرام : مانقدر نسافر بسيارة
ابتسم نايف وقال : مابروح للديرة بنروح ايطاليا يا ماما
قوست شفايفها وهي تمسك يده وقالت : اخاف من الطيارة
نايف : وانا جمبك مايروح الخوف ؟
مرام : يروح شوي ويبقى نقطة خوف
ضحك نايف وقال : بخليك تقعدين جمب الشباك وبتحبين الطيارة من بعدها امشي يلا 
●
●
●
لين : هلا نواهل
نواهل : هلا ماما انتي
لين : مالتس داعي تعامليني كأني نونو عشان فرق 5 سنين
ضحكت نواهل وقالت : آمريني
لين : طفشانة و ودي اجي نطلع انا وياتس 
نواهل : تمام بعد العشاء اوك ؟
لين : تمام مين بيودينا
نواهل : سعد
لين : لالا
نواهل : ليه ؟
لين : استحي منه
نواهل : طيب فهد ؟
لين : اخاف منه
نواهل : قولي ابي سعود وبس
ضحكت لين وقالت : وش ابي فيه ؟
نواهل : خلاص بقول لفهد يجي لاتخافين منه لأنه مارح يأكلك
لين : تمام تمام جيبي اللي تبين
نواهل : يلا انقلعي
لين : باي
قفلت لين وهي تتأفف : غبية دامها فهمت اني ابيه ليه تحرجني ؟
انسدحت على السرير بحلطمة
●
●
●
بالسيارة عند الليث و مناهل
مناهل : وين بتوديني لا تطلعني برا الرياض من زود الحماس بس
الليث : مانطلع يا بنت الحلال اسكتي شوي من ركبتي السيارة وانتي ماسكة خط يابنتي ارتاحي شوي لسانتس تعب
سكتت مناهل بزعل وقال الليث : خلاص آسف سولفي يلا
رفعت كتوفها بمعنى " لا "
الليث : وين تبين نروح ؟
مناهل بصوت واطي : دامك واصل لهالطريق معناها انت ببالك وجهة محددة لا تسألني
ضحك الليث يوم حس بزعلها وقال : تدرين ان الاب يدلع والزوج يبتلش
لفت عليه وهي رافعة حواجبها وقالت : الحين انت مبتلش فيني ؟ نزلني و ابعد عني
مسك يدها وهو يبوسها وقال : احسن بلشة بالعالم والله
سحبت يدها وهي تتكتف وتطالع الطريق وهو يضحك
الليث : بنكشت
مناهل : ايه ماورانا شي خلينا ننلطع بالشمس و ننشوي نرجع لاهلنا يقطعونا على طول وياكلون ههههه
انفجر الليث ضحك من حلطمتها وقال : صدق ترا بنكشت لين العصر وبعدها بنجلس نتمشى على خط السفر لين المغرب وبعدها نروح اللي تبين
مناهل : ودنا الديرة وش ذا التمشيات المخيسة نكشت نتمشى بطريق السفر وش ذا وش ذااااا
الليث : والله انها تمشيات بطلة بس انتي مدري وش تبين بالضبط تبين مول منتجع منتزه مطعم كوفي حركات الراقين ذي ما احبها
مناهل : ومين قالك ان اي احد يروح ذي الاماكن لازم يصير راقي والله الاماكن اللي جالس توديني اياها تقل خرجات طعوس
الليث : ماله دخل بعدين شقصدتتس انا طعس ؟
مناهل : رئيس الطعوس بعد
وقف الليث وهو يفتح الشنطة ويطلع الفرش والاغراض وهو يفرش وهي تطالعه بطرف عين
مناهل : خرجة ضاربة الله يضرب رأسك
فتح لها الباب وهو يمسك يدها وينزلها
مناهل : عبايتي لو تنحاس بحوس وجهك
الليث : يا بنتي انزلي نجيبلتس محل عبايات بعد
نزلت مناهل وهي ترفع عبايتها وتربطها على طرف خصرها و فكت نقابها وطرحتها
الليث : تفصخي لو ودتس سلامات ؟
مناهل : حر يا ابن الناس حررررر ماتحس انت
الليث : الحين يجيتس شاهي جبار
مناهل : شاهي بعز الحر الله يخارجنااااااا
ضحك الليث وهو يفتح البرّاد ويجيبلها قهوة ستاربكس
مناهل : احسن شي سويته
اخذت القهوة وهي تفتحها وتشرب وتطالعه متلثم بالشماغ ويشرب شاهي ومنبسط حيل
الليث : برد والله
مناهل : منجد
الليث : قومي جيبي فروتي من السيارة
مناهل : اكيد بقوم انت شايب مافيك حيل تتحرك
الليث : برش الشاهي بوجهتس مين اللي فرش و سوا كل شي ؟ انا وانتي جالسة كأنتس اميرة
مناهل : اميرة تبعاً
الليث : ارفعي علومتس
كشت بوجهه وهو ضحك وقامت تجيب الفروة ورمتها بوجهه
طالع فيها وهي بردانة وترجف فعلا
الليث : ترا عادي لو تنازلتي وقلتي دفّيني معك
مناهل : مابيك تدفّيني
الليث : تعالي تعاااااللييي
قامت وهي تجلس جمبه
الليث : لا لا ياغبية كذا ما تتدّفين زين تعالي بحضني
طالعته بقرف وقالت : مزودها حيل اخوي
فتح الفروة وقال : اخوي انتي خابرة وين تحطينها
ضحكت مناهل وهي تجلس بحضنه وهو يحاوطها بالفروة وحضنها
مناهل : كثرة الاحضان تكسر الضلوع
الليث : لو تدخلين بضلوعي تسوين خير
مناهل : لا تكفى مابي
ضحكت وهي تستند على صدره وقالت : لو اني جايبة عودي نغير جو
الليث : سولفي لي
مناهل : وش تبيني اقول ؟
دفن وجهه بشعرها وقال : اي شي
مناهل : اممممم خلني افكر ..... ايوه
الليث : هاه
مناهل : تحبني انت ؟
الليث بهدوء وهو يستنشق ريحة شعرها قال : فاتحة كذا سالفة ؟
مناهل : خلاص بسكت
الليث : انتي تدرين جوابي وشو
مناهل : تمام خلاص
الليث : احبتس واهيمتس واعشقتس واموت فيتس وما اشوف الدنيا اللي بعيونتس وما ارتاح الا يوم اني اسمع ضحكتس و ما يعجبني شي كثر محارشاتتس ومضارباتتس واحس اني مالك الدنيا كلها بشوفتس و انبسط حيل بنرجسيتتس وشوفة نفستس وغرورتس كل تفصيل فيتس يوديني لعوالم بعيدة حيل بأختصار انا طايح ومحد سمى علي انا جايتس على وجهي بكل مرا اشوفتس فيها اتخرفن اكثر من المرا اللي قبلها وبكل مرا اقرب فيها منتس اتخدر واذوب والله وفي كلام واجد بقلبي لو اسدحلتس دواوين وشعر ما كفى حقتس
لفت وهي تحضنه وقالت : تجنن تجنن تجنن احبك والله
ضحك الليث وقال : زين
الساعة 2 بعد صلاة الظهر
طالعت عيونه النعاسة وقالت : فيك نوم ؟
الليث : شوي
مناهل : اطلع السيارة نام
الليث : لا
مناهل : اللي ودك
انسدحت مناهل وهي مغمضة عيونها عشان الشمس وهو يطالعها وهي تخلل اصابعها بشعرها وتتمتم بصوت واطي وثواني فتحت عيونها وهي تطالع وجهه فوقها
مناهل : خرشتنيي
ضحك الليث وقال : ماقدرت
مناهل : تمام ابعد ابعد
رمى نفسه بحضنها وسرعان ما غفى
مناهل : قليل ادب صدق تخيل يجي احد يجي يشوفنا والله اول مرا يمر بحياتي شخص مطنش العالم زيك قليل ادببب
ضحك الليث وقال : اسمعتس ترا
ضربت رأسه بشويش وقالت : قم نام بالسيارة
الليث : بنام بحضنتس طيب
مناهل : لا صرت زوجتك يصير خير
الليث : غبية ؟ بالله انتس غبية وانتي الحين وشو ؟ مب زوجتي ؟ ولا تبين تصيرين زوجتي رسمي
فهمت تلميحاته وسكتت بخجل
الليث : متى بتصيرين ببيتي
مناهل : وش فرقت ؟
الليث : واجد
مناهل : قم بالسيارة نام
الليث : اذا قمت بيروح نومي ( باستهبال ) اخااف
مناهل : بزر انت ، انقلع قم السيارة
الليث : تجين معي
طالعته وهو كأنه ولدها بحضنها وضحكت من خيالها وقالت : تماام قم اجلس انظف القروشة ذي وانت انتظرني بالسيارة
الليث : قومي يلا
قامت مناهل والليث قام ينظف وما سمح لها تمسك شي لين خلص وركب ورا وهي جالسة
الليث : نروح فندق
فزت مناهل بخوف وقالت : نعم ؟
ضحك الليث وقال : امزح والله
طالعته بطرف عين وقالت : خفيف دم وش اسم امك ؟
الليث : قربي قربي
قربت منها وهي تسحبه لحضنها لين نام
مناهل : أثر علي فقدك حزينة نظرتي صوتي عتب ملياااان ، طفشت وذا الحيوان نام وتركني
ابتسمت وهي تطالع وجهه وحطت يدها بلحيته وهي تحكها بأظافرها وشافته يتحرك ويمسك يدها ويحطها بشفايفه
مناهل : صاحي ؟
مارد عليها وقالت : مريض وش ذا ؟
ضحك بخفوت من غير ماتحس عليه واخذت جوالها وهي تدق على نواهل كام
مناهل : نواهل
نواهل : اشتقتلك الله لا ياخذك كيف بسوي يوم ياخذك الحيوان ليث
مناهل : ياكرهك له
نواهل : ما اكرهه والله بس منجد وش يبي ذا جالس ياخذك مننا يقهر الحين نص يوم واشتقتلك بموت كيف لو تزوجتو
نزلت دموع نواهل وقالت مناهل : لاتستهبلين شفيك تبكين مالك داعي ترا لاتخليني اتقطع بكى الحين
ضحكت نواهل وهي تمسح دموعها بعشوائية وقالت : وينك ؟
مناهل : تخيلي اخذني للبر الغبي يقول بنجلس لين بعد صلاة العصر ومن بعد العصر بنجلس نتمشى بطريق السفر لين المغرب بالله مين يتمشى بطريق السفر ؟
ضحكت نواهل وقالت : بدوي وش تنتظرين منه ، وين بتروحون المغرب ؟
مناهل : قال لي اللي تبين بعدين يصير خير
سحبو اخوانها الجوال من مناهل