Hungkag at blangko ang kaputian ng mga ulap
Ni hindi kumikilos ang hangin sa alapaap
Mga ibon, saanma'y hindi mahagilap
Kalungkutan ang maaaninag na ganap
Pamilyar ba ang nakikita mong litrato?
Pamilyar ba ang larawang tinutukoy nito?
Iya'y kaparis ng kasalukuyang buhay mo
Malamlam na tulad ng kumupas na abo
Humayo ka at ang mga nakikita'y suriin
Umindayog ka sa ritmo ng mabining awitin
Mga krayola ay buong-pusong gamitin
Ipinta mo ang kagalakang ninanais sapitin
Nasa iyong mga kamay ang bahagharing makulay
Isaboy ang kariktan ng nahihimbing na uhay
Yakapin mo at hagkan ang kapalarang dalisay
Upang makamtan ang pinapangarap mong buhay.
BINABASA MO ANG
Ang Alamat ng Nagtataeng Bolpen
PuisiSapagkat ang isipa'y malikot, ang imahinasyon ay umiikot. Sapagkat ang bawat malikhaing kamay ay miminsang nababahiran ng tinta, ng saya, at ng lungkot. Isang koleksiyon ng mga tula na sumasalamin sa kapangitan, kaengotan, kapalpakan, at kagandahan...
