Isang tula ang ihahandog ko sa iyo
Tulang singhaba ng Tulay ng San Juanico
Kasing-cool ng klima sa Baguio
Sintayog ng tuktok ng Bundok Apo
Isang tula ang hinahabi ng aking panaginip
Kahulugan ay mas malalim pa sa Philippine Deep
Kasingkumplikado man ng mga kwebang masisikip
Singganda naman ng kumpol ng mga coral reefs
Isang tula ang aking isisigaw
Habang sinasakyan ang mga alon ng Siargao
Kasing-engrande ng mga palayan ng Ifugao
Misteryoso at sagradong paris ng Bundok Banahaw
Isang tula ang aking ipapangalandakan
Malakas na tila tubig ng Pagsanjan
Singlinaw ng mga katubigan ng Palawan
Tanyag na tila Boracay Beach sa Aklan
Isang tula ang aking pinapantasya
Nakaiigayang tulad ng pamayanan ng Sagada
Hindi magmamaliw gaya ng Vigan sa Ilocandia
Singkulay ng mga parol at ilawan ng Pampanga
Isang tula ang sa isip ay ikikintal
Tulang singsaya ng Masskara Festival
Maliit mang ituring gaya ng Bulkang Taal
Makasaysayan namang tila bantayog ni Rizal
Isang tula ang aking ibabandera
Na kasingrikit ng mga hardin ng Pasonanca
Singlawak ng mga palayan ng Nueva Ecija
At singhalaga ng Talon ng Maria Cristina
Isang tula ang sayo'y iaalay
Yun lamang ay sinayang mo at nilustay
Puso ko ngayon ay puno ng luha at lumbay
Gaya nitong bansang unti-unting pinapatay.
BINABASA MO ANG
Ang Alamat ng Nagtataeng Bolpen
ŞiirSapagkat ang isipa'y malikot, ang imahinasyon ay umiikot. Sapagkat ang bawat malikhaing kamay ay miminsang nababahiran ng tinta, ng saya, at ng lungkot. Isang koleksiyon ng mga tula na sumasalamin sa kapangitan, kaengotan, kapalpakan, at kagandahan...
